Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abanyeporitike bahamagariwe gushikiriza abarundi imigambi yubaka mu gihe c’imyiyamamazo

Umukuru w’umurwi w’igihugu wigenga ujejwe gutegura amatora CENI atera akamo abanyeporitike gushikiriza Abarundi imigambi yo kubateza imbere muri kino kiringo c’imyiyamamazo y’amatora y’Umukuru w’igihugu, abashingamateka hamwe n’abagize inama mpanuzwajambo z’amakomine. Ku rwaruka rwo mu migambwe itandukanye, ngo boruhanura kugira ingendo yo kwihanganira abo badasangiye ivyiyumviro, rushigikire abanyeporitike rudashikuza. Ivyo ni ivyashikirijwe n’umukuru w’umurwi CENI, Pierre Claver Kazihise, mu gitondo co ku wa 25 Ndamukiza 2020, mu nyubakwa z’uwo murwi, aho yariko ashikiriza Abarundi itegeko ry’Umukuru w’igihugu inomero 100/057 ryo ku wa 25 Ndamukiza 2020, rihamagarira abanyamigambwe, inani z’imigambwe hamwe n’abigenga kwitaba ikiringo c’imyiyamamazo catanguye ku wa 27 Ndamukiza igihe c’isaha 12 zo mu gitondo kikazosozerwa ku wa 17 Rusama 2020 igihe c’isaha 12 zo ku mugoroba.Nk’uko umukuru w’umurwi CENI, Pierre Claver Kazihise yabandanije abimenyesha, ngo ikiringo co kwiyamamaza catanguye ku wa 27 Ndamukiza 2020 igihe c’isaha  cumi nazibiri  mu gitondo, kikazosozerwa ku wa 17 Rusama 2020 igihe c’isaha cumi nazibiri zo ku mugoroba. Ibikorwa vyo kwiyamamaza ngo birabujijwe inyuma y’isaha 12 zo ku mugoroba. Ikiringo c’imyiyamamazo kiraba imigambwe, inani z’imigambwe hamwe n’abigenga bemerewe kwitoza. Muri ico kiringo c’indwi zitatu imyiyamamazo izomara, ngo imyiyamamazo ishikirizwa biciye mu majambo, indirimbo, ubutumwa busomwa, inyandiko, inama hamwe n’ubutumwa buciye mu bimenyeshamakuru.Vyongeye, ngo kuri abo bose bari mu gikorwa co kwiyamamaza, birabujijwe gutukana no gutyozanya, ico gikorwa ngo gitegerezwa kwubahiriza umutekano wa bose. Ku banyamigambwe, inani z’imigambwe hamwe n’abigenga bakeneye ikibanza muri komine iyi canke iriya ngo bategerezwa gusaba ico kibanza kwa musitanteri amasaha 24 imbere, ngo biraheza bikoroha gutanga ico kibanza. Kuri abo bose bariko bariyamamaza, ngo birabujijwe gutanga ibintu vyo guhera abatora kugira bazobahunde amajwi. Mu kiringo c’imyiyamamazo, ngo birabujijwe gukoresha ibikoresho vya Reta ndetse no kwiyamamariza ku kazi.  Ivyo bihanwa n’ingingo ya 220 y’itegeko rigenga amatora, aho uwiyamamarije ku kazi afashwe atozwa ihadabu ry’amafaranga ibihumbi 200. Inyuma yo ku wa 17 Rusama 2020, ngo birabujijwe kuzosubira kwambara ibimenyetso vy’imigambwe.

Urwaruka rw’imigambwe itandukanye rwatewe akamo ko kwihaganganira

abo badasangiye ivyiyumviro vya poritike

Umurwi CENI, usaba abagiye mu bikorwa vyo kwiyamamaza, gusoma amategeko kugira bayakurikize. Ku barongoye imigambwe n’inani z’imigambwe, yabasavye guhanura urwaruka kugira rugire ingendo yo kwihanganira abo badasangiye ivyiyumviro vya poritike, babashigikire badashikuza. Ku bitoza mu bibanza bitandukanye, yabasavye gushikiriza Abarundi imigambi yo kubateza imbere no guteza imbere igihugu muri rusangi. Muri ico gihe ngo niho bazoheza bakabatora. Umukuru w’umurwi CENI yasavye abanyagihugu kuguma ku kivi na cane cane babandanye bakora  ibikorwa vyabo bibatunze , kuko inyuma y’amatora ngo ubuzima burabandanya.Ku kibazo co kumenya ingingo zafashwe muri kino igihe isi yugarijwe n’ikiza ca Covid-19, umukuru w’umurwi CENI yamenyesheje ko uburyo bwo kwikingira bwategekanijwe, aho ibikoresho vyo gukaraba bizoba bihari hamwe n’ibikoresho bifata ubushuhe bw’uwuje gutora. Abajejwe guhagarikira amatora ngo bazoba bafise udutambara two kwikingira harya ku biro vy’itora. Mu gihe ibikoresho vyo gukaraba bizoba vyategekanijwe, yahamagariye Abarundi kubandanya umuco mwiza wo gukaraba kugira bikingire, ku mirongo naho ngo bokwirinda gusunikana. Ku bijanye n’ibihano bitegekanijwe, ngo ingingo ya 219 y’itegeko rigenga amatora, rihanisha abiyamamaje imbere y’igihe biciye mu kumanika inyandiko imbere y’igihe, gutyoza, kuzimanganya inyandiko zamanitswe biciye mu mategeko, ngo uwagiriwe n’icaha ahanishwa ihadabu ry’amafaranga y’amarundi ari hagati y’ibihumbi 800 n’imiriyoni 4.
Déo Misigaro

 

Abakozi basaba ko amategeko abagenga ashirwa mu ngiro

Amategeko agenga abakozi n’akazi  arahari kandi arashimishije, igisigaye n’uko yoshirwa mu ngiro kandi agakurikizwa uko yanditse. Ivyo bikaba vyamenyeshejwe na Nsavyimana Célestin arongoye  ishirahamwe mpuzamasendika ry’abakozi COSYBU mu kiganiro yahaye ikinyamakuru UBUMWE kw’igenekerezo rya 28 Ndamukiza 2020. Iryo shirahamwe  mpuzamasendika n’inani zamasendika mu bisata vyose vy’igihugu   ashika 38 bikaba bifasha abakozi bose bo mu Burundi abari muri sendika canke  batayirimwo  mu bibazo bijanye n’akazi  nk’amategeko adakurikizwa, ivyo kubategekaniriza kazoza, ibijanye n’ivyo  kuvugana  mu kazi  ikabifata mu minwe ikabivugana n’abo bigenga bakabitorera umuti ata ngaruka mbi ibaye ku mukozi. Célestin Nsavyimana yaragarutse ku bijanye n’umunsi mukuru mpuzamakungu wahariwe abakozi  wama uhimbazwa uko umwaka utashe kw’igenekerezo rya 1 Rusama,  aho yamenyesheje ko uwo munsi mukuru  ushitse mu gihugu c’uburundi umukozi atamerewe neza ku bijanye n’imishahara kuko  akarusho bahora baronswa uko umwaka utashe batakikaronka, kwivuza bitakigenda neza kubera ikena ry’imiti ku bivuriza kw’ikarata y’abakozi hamwe no gutegekeniriza kazoza abakozi bitakigenda neza.

Ariko n’aho biri uko ngo ibibazo ntibiri mu bakozi gusa,n’abikorera ivyabo  muri kino gihe ntivyifashe neza mu bijanye n’ubutunzi kubera ikiza ca Coronavirus catumye ubuzi bumwe bumwe buhagarara,  aho yaboneyeho akaryo ko guhimiriza abakozi kwitwararika kwirinda ico kiza ndetse n’izindi ndwara. Mu kurangiza, Célestin   yahamagariye abakozi  kwijukira kuja mu mashirahamwe ama koperative  no kurondera utundi dukorwa bakora inyuma y’amasaha y’akazi bareke kwama barindiriye umushahara wo ku kwezi kuko ataco ukimaze aca yongera asaba  abakoresha  na Reta kuja hamwe bakiga  ibijanye no  kugwiza akazi kugira ubushomeri bugabanuke mu gihugu , ibiciro vyo kwivuza ku mukozi bikagabanuke   kugira umuntu wese ashobore kwivuza , n’ukuntu imishahara yoduga  kuko uravye uko ibintu biduga ku masoko ugaca uraba umushahara w’umukozi biraboneka ko umukozi bitamworohera kubaho.  

Josélyne Ndayegamiye

 

Ibikorwa vy’igice ca gatatu c’umwaka w’2019 ushira uw’2020 vy’ubushikiranganji bw’umutekano vyakozwe ku bice ijana kw’ijana

JackyIbikorwa vyose vyari vyategekanijwe mu ndinganizo y’ibikorwa mu gice ca gatatu c’umwaka w’2019 ushira uw’2020 mu bushikiranganji bw’umutekano , gukinga no gutabara mu gihe c’ibiza n’isibe vyakozwe ku bice ijana kw’ijana. Ivyo vyashikirijwe n’umushikiranganji w’umtekano Alain Guillaume Bunyoni, kw’igenekerezo rya 27 Ndamukiza 2020 mw’itangazo yashikirije abamenyeshamakuru ryo kumenyesha ivyaranguwe bikuru bikuru n’ubwo bushikirangani.Nk’uko yabimenyesheje, ngo mu vyakozwe hari ibikorwa vy’uburongozi bwiza vyateguwe mu bushikiranganji bwose, aho mu mugambi w’igihugu wo gukingira ibidukikije « Ewe Burundi urambaye» hamwe n’ibikorwa rusangi, imivyaro y’ibiti 625518 yaratewe mu gihugu cose hongera haba ibikorwa vyo gukwirikirana ibiti vyatewe hamwe n’ibindi. Ku vyerekeye kuganira ivy’imibereho, ngo inama indwi ku batwara abandi zerekeye akarangamutima zarakoreshejwe n’umushikiranganji ku bisata vyose bibukukira gushika mu burere bwose bw’igiporisi hongera haratunganywa ibikorwa vy’isuzuma no gukurikirana ivyaranguwe mu bisata bitandukanye ku ncuro 21 bikozwe n’ubugenduzi bukuru bw’umutekano no gukinga ibiza n’isibe. Yarongeye amenyesha ko haranguwe ibikorwa biri mu mugambi w’indinganizo y’ibikorwa vy’ubushikiranganji, aho ku bijanye n’ivyo kurwanya ubugizi bwa nabi n’iterabwoba habaye amasakasuzuma 216 haca haboneka umusaruro hafatwa inkoho 53, ibisasu ntezwantoke 108, amasasu 1972, ibisasu biturika 6, ivy’ubwoko bwa muzinga 60 hamwe n’ibikono vy’amasasu 78 hongera hafatwa ibitenge 2016 mu rudandazwa rwa magendo, gutyo abavyagirizwa barahagarikwa bakorerwa amadosiye bongera barashengezwa mu butungane. Ngo mu mirimo y’igiporisi yo gukinga ikorwa ry’ivyaha, ibikorwa bitari bike vyarakozwe mu ntumbero yo gukinga impanuka mu mabarabara, gucungera inyubakwa za Reta n’izo abikorera ivyabo, gukurikirana uruja n’uruza rw’abantu n’ibindi.

Yaranamenyesheje ko mu ntumbro yo kwitegurira neza gucungera amatora y’umwaka w’2020, umugambi wo gucungera umutekano w’ibihe vy’amatora ya 2020 wateguwe kandi wongera urashirwa mu ngiro mu kwigisha abaporisi bazoyacungera, kubaha ibikoresho no kubashikana aho bazoyacungera. Ngo ku vyerekeye kurwanya ibiza, ibikorwa bitari bike vyararanguwe harimwo gukinga ikiza c’umugera w’indwara ya Coronavirus, hashirwa ku gihe ibitabu 4 vy’inyigisho hamwe no  gucagura abaporisi bokwigishwa ibijanye no kugabanya ibiza n’isibe, hakorwa inyigisho nkarishabwenge ku baporisi 20 bajejwe gusambura ibirwanisho biturika hamwe n’abandi 120 bajejwe kuzimya umuriro, higishwa abaporisi 30 mu bikorwa vy’ubutabazi bw’ibanze hamwe no gutabara abagize ibibazo mu mazi, hongera higishwa abakozi bakorera amashirahamwe ya Retaa n’ay’abikorera ivyabo 115 ku bijanye no kwirinda imiriro hamwe n’ibindi. Ikindi naco, ngo mu bikorwa vyo gukarisha ubwenge inyigisho 64 zarashizwe ku gihe, nayo ku bijanye n’amagara y’inyamiramabi ngo ibitaro bikuru vy’igiporisi c’Uburundi vyarabandanije ibikorwa vyo kuvura , abivuje bataha banganye 3224, abarara 175 hamwe na 73 bavuwe kubuhinga bwo ku rugero ruhanitse. Umushikiranganji w’umutekano yaranamenyesheje ko bagereranije igice ca kabiri n’ica gatatu bateye intambwe ishimishije mu guhagararira umutekano no kurwanya ibiwuhungabanya kuko imirwi y’inkozi z’ibibi yasambuwe ku bice 84, 5 kw’ijana, impanuka zo mw’ibarabara zirakingwa zongera ziragabanuka ku bice 23 kw’ijana, ibitigiri vy’ubwicanyi bigabanuka ku bice 11, 2 kw’ijana  n’ibindi. Ngo ico kiringo kandi caranzwe n’impunzi zabandanije guhunguka ku bwinshi aho mbere hahungutse abarenga 1629 mu bari barakurikiye umwigeme Zebiya congera kirangwa n’imyuzurira yononye ibintu vyinshi mu duce tumwe tumwe tw’igihugu hamwe n’ikiza c’indwara ya Coronavirus. Niko guheraheza amenyesha ko ku gice gikurikira ubushikiranganji buzokwitwararika ishirwa mu ngiro ry’ibikorwa bisigaye kurangurwa bingana n’ibice 10 kw’ijana bafatiye ku bikorwa vyose vy’umwaka. Ngo umwitwarariko munini uzoba mu bijanye no gukinga ikiza c’umugera wa Coronavirus, igikorwa co gucungera amatora y’umwaka w’2020 no kurwiza ibikorwa vy’amasakasuzuma mu bisagara no hagati mu gihugu.

Evelyne Niyonzima na

Jacqueline Niyonkuru

 

Mu ntara ya Ngozi Abanyagihugu bariko bakamisha amahoro ibikorwa vy’iterambere

HHHMu ntara ya Ngozi umutekano wifashe neza kuko ngo  barakoresha inama zihuza imirwi  itandukanye y’abanyagihugu n’abanyamigambwe  badasigaye inyuma kandi ngo mu makomine barashinze intahe yuko umutekano wifashe neza. Ivyo vyamenyeshejwe n’umuhanuzi mukuru wa buramatari w’iyo ntara  Dieudonne Hiboneye aho yariko araha ikiganiro ikinyamakuru UBUMWE kw’igenekerezo rya 9 Ndamukiza 2020 Nkuko yabandanije abimenyesha,ngo nta murwi n’umwe basiga inyuma batagiranira inama kugirango bavugane ko umutekano ari “karahara mu rugamba ntibacure”Yaciye abanza gutanga akarorero k’inyabune ni ukuvuga abajejwe intwaro, abajejwe umutekano,abajejwe ubutungane hamwe n’abanyagihugu bose ngo basenyera ku mugozi umwe Ikindi naco yamenyesheje ngo ni uko bariko bakorana neza n’abanyagihugu badasangiye imigambwe  kandi bagirana inama n’imiburiburi kabiri mu kwezi zihuza imigambwe yose,ivyo rero ngo barabona ko bituma amahoro n’umutekano bitsimbatara. Yaciye amenyesha ko ubwa mbere babona abashamirana mu rwaruka rwo mu mugambwe CNDD FDD n’urwo mu mugambwe CNL  bapfa ubusa ariko ubu kubera izo nama vyagiye birahera baratekanye. Mu minsi iheze ngo baruguruye ikoperative y’iterambere ihuriramwo urwaruka rwo mu migambwe itandukanye  indwi, babona ko iri ku rubuga i Ngozi, vyumvikana ko za nama bagira zagize ico zifasha. Yaciye amenyesha ko barimiye hamwe bakimbura ico ngo ni ikintu gikomeye cane . Ikindi ngo ni uko bategekanije inkino za kera ivyo bita inkoni bagasiganwa bahanahana. Iyo habaye ikibazo baja hamwe bakagitorera umuti. Ku bijanye n’imigambwe ngo hariho ivyahora bigorana vyerekeye inama zikorwa bidaciye mu mategeko ariko ngo barabitoreye umuti bafashijwe n’itegeko itegeko rigenga izo nama z’imigambwe.Mw ntara  ya Ngozi abantu bari ku kivi ibikorwa rusangi birangurwa neza kandi n’umwimbu ngo umeze neza.  Ababijejwe ngo bakaba bababwira ko umwimbu w’ikawa ushobora kwiyongera ku bice 30 kw’ijana barabiye ku wuheruka n’uwo babona ubu. Ibiharage navyo akibaza ko ikirere kigenze neza umwimbu uzoba mwiza cane.Muri kino gihe ngo bahimiriza kurima ibiremberwa vyimbuka cane. Iyo rero amahoro n’umutekano bihari abantu baratekana kandi bakaja ku kivi mu ntumbero yo kubandanya biteza imbere.

Christine Manirambona 

 

Abenegihugu bo mu ntara ya Ngozi barijukiye kuja mu makoperative

bbbbUmukuru w'igihugu Petero Nkurunziza yarakurikiranye inama ya bose isanzwe y’abanywanyi ba koperative yishinze guteza imbere abenegihugu  CDEC .  Umukuru wIgihugu Petero Nkurunziza yarakurikiranye inama ya bose isanzwe y’abanywanyi ba koperative yishinze guteza imbere abenegihugu  CDEC.  Aho hari kw’igenekerezo rya 14 Ndamukiza 2020.Iyo nama ikaba yabereye mu nyubakwa yakira ingenzi Ruhuka  iri i Buye muri komine  Mwumba intara ya Ngozi. Umukuru w’Igihugu akaba asanzwe ari umunywanyi w’iyo koperative. Mw’ijambo ryiwe ry’ikaze buramatari w’iyo ntara  Albert Nduwimana yaripfurije abitavye iyo nama kuroranirwa hamwe n’umunsi mukuru mwiza wa Pasika yamenyesheje kandi ko intara ya Ngozi ari intara itekanye, abenegihugu babanye neza mu budasa bwabo.

Christine Manirambona

 

Prezida Nkurunziza yabereye Abarundi akarorero keza k’umurimyi mworozi wa kijambere

8Kw’igenekerezo rya 13 Ndamukiza 2020 Umukuru w’Igihugu Petero Nkurunziza yaragendeye imirima  n’ibitungwa vyiwe biri ku musozi Rutanga komine Gashikanwa mu ntara ya Ngozi. Iyo mirima ikaba yari igizwe n’inanasi,ibigori,amashu,ibiharage,ikawa,ubushaza,ingano,ibihoke,isoya,amateke, ibiraya ,imyumbati ,intore,n’imyungu mbere akaba yaranimbuye  imwe mu myungu yeze. Iyo mirima irateye igomwe ibigori bimwe birayangitse,  ibiharage navyo bimwe bimwe  vyari bimaze kuremberwa.Yaciye kandi agendura n’ ibitungwa vyiwe bigizwe n’inka,ingurube, impene hamwe n’intama. Sebarundi rero akaba yiyemeje kubera Abarundi bose akarorero keza k’umurimyi mworozi wa kijambere. Kw’igenekerezo rya 13 Ndamukiza 2020 Umukuru w’Igihugu Petero Nkurunziza yaragendeye imirima  n’ibitungwa vyiwe biri ku musozi Rutanga komine Gashikanwa mu ntara ya Ngozi. Iyo mirima ikaba yari igizwe n’inanasi, ibigori, amashu, ibiharage, ikawa, ubushaza, ingano, ibihoke, isoya, amateke, ibiraya, imyumbati, intore, n’imyungu mbere akaba yaranimbuye  imwe mu myungu yeze. Iyo mirima irateye igomwe ibigori bimwe birayangitse,  ibiharage navyo bimwe bimwe  vyari bimaze kuremberwa.Yaciye kandi agendura n’ ibitungwa vyiwe bigizwe n’inka,ingurube, impene hamwe n’intama. Sebarundi rero akaba yiyemeje kubera Abarundi bose akarorero keza k’umurimyi mworozi wa kijambere. 
Christine Manirambona

 
Ouvrir