Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Igisagara ca Rumonge giherutse kuronswa amazi meza

Igisagara ca Rumonge giherutse kuronswa umugende w’amazi meza ufise uburebure bw’ibirometero 11, ukaba wubatswe ku muriyaridi w’amafaranga y’amarundi yatanzwe na Reta y’Uburundi. Ico gisagara hamwe n’ikiyaya c’Imbo kiri mu turere dusanzwe tubangamirwa n’ikiza c’indwara ya Choléra. Mu migambi ya kazoza, ngo ikiyaya c’Imbo bategekanya kukironsa amazi, aho isoko ry’ahazova ayo mazi ryabonetse mu kibira, iryo naryo ngo rigashobora gutanga amaritiro 100 ku musegonda. Ivyo vyashikirijwe n’umuvugizi w’ubushikiranganji bw’amazi meza, amasoko ntanganguvu, ubutare n’agataka, Léonidas Sindayigaya, ku wa 30 Ndamukiza 2020, mu kiganiro yahaye ikinyamakuru UBUMWE.

Nk’uko Léonidas Sindayigaya yabimenyesheje, ngo igisagara ca Rumonge giherutse kugabana umugende w’amazi meza, uwo nawo ukaba uva kw’isoko rya Mahoro, muri komine Burambi, ukaba ufise uburebure bw’ibirometero 11. Igisagara ca Rumonge cari gihanzwe mu bukene bw’amazi meza, ngo ni igisagara kiriko kiraguka, ariko ngo uravye urugero rw’amazi atangwa n’iryo soko rya Mahoro rw’amaritiro 26 ku musegonda, ngo ni amazi menshi, aho abantu bose babaye muri ico gisagara bazoronka amazi.Uno munsi, ngo igisagara ca Rumonge cose kirafise ayo mazi ndetse no mu micungararo yaco, imitumba igikikije igashobora kuronka kuri ayo mazi, na cane cane ku mutumba Mutambara, aho naho hakaba hariko hubakwa ibagiro rizoba rikomeye mu Burundi. Iryo bagiro naryo ngo rikeneye amazi menshi, aho n’abanyagihugu bo mu micungararo bazoyaronkako. Aho uwo mugende ngo wagiye uraca, ahari inyubako rusangi hose, bagiye baratanga amazi meza.Aho mu ntara ya Rumonge, ngo abanyagihugu barashimye kubona bararonkejwe  amazi meza, kubera yari intara yibonekezamwo ubukene bw’amazi meza ndetse uko umwaka utashe hakaba hibonekeza ikiza c’indwara ya cholera, ivyo bikaba vyatumwa n’uko bakoresha amazi y’ikiyaga Tanganyika. Abajejwe intwaro basabwe guhimiriza abo bajejwe kurongora kuvavanura n’ingendo yo gukoresha ayo mazi y’ikiyaga. N’aho ku mabombo rusangi amazi agurishwa, bayakoresheje ngo niho ico kiza kizotuzwa burundu.

Ivyigwa vyo kuronsa amazi meza  ikiyaya c’Imbo vyarakozwe
Mu migambi ya kazoza, ngo n’ikiyaya c’Imbo kuva mu Rugombo gushika i Nyanza-Lac, barategekanya kuronsa amazi abanyagihugu kubera ko naho nyene hakunda kwibonekeza ikiza ca cholera. Kuva mu buraruko bw’igisagara ca Bujumbura gushika mu ntara ya Cibitoke, ayo mazi akaba azova mu kibira, ivyigwa ngo bigeze kure. Ku bijanye n’igisagara ca Nyanza-Lac, umugambi wo kukironsa amazi meza  wari umugambi umwe gisangiye n’igisagara ca Rumonge, ukaba wari umugambi wari gufatwa mu mugongo n’igihugu c’Ubudagi. Kuva mu mwaka w’2015, aho imigenderanire yahagara, ngo vyaciye bikorwa ku buryo bwa Reta kugira baronse amazi igisagara ca Rumonge, iyo migenderanire idasubiriye gutangura, ngo n’igisagara ca Nyanza-Lac, bashobora kwikora ku buryo bw’igihugu. Igisagara ca Nyanza-Lac, ngo ni igisagara kiriko kiraguka, aho uno munsi haba abantu barenga ibihumbi 100.Muri ivyo bisagara bironswa amazi meza, ngo abanyagihugu ku mabombo rusangi barariha kugira bishitse umuringoti ukononekara, ababijejwe bashobore kuwusanura. Kuri ayo mabombo rusangi, ngo abagiraniye amasezerano n’ishirahamwe Regideso, 1m3 y’amazi (iritiro 1000) bayigura amafaranga 224, umunyagihugu mu mategeko ngo yogura ikidumu c’amaritiro 20 amafaranga 10, ariko ngo kubera bene kugiranira ayo masezerano n’ishirahamwe Regideso bariko barabivamwo, baremerewe ko ico kidumu bashobora kukigurisha amafaranga 20. Ku vyigwa vyakozwe, ngo iryo soko ryo mu kibira, rikazoshobora gutanga amaritiro 100 kumusegonda. Ariko ngo biragoye ko hoboneka uburyo kugira ikiyaya cose kironke amazi, ngo n’umugambi uzogenda buke buke.   

Déo Misigaro                                                                                                      

 

Inkozi z’ikibi karuhariwe zitatu zibisha urwenge zarafashwe n’igiporisi

Ishirahamwe MAIMO, ibanki BBCI n’ishirahamwe ridandaza igitoro Interpetrol yarituye abajejwe umutekano ku wa 3 Ndamukiza 2020 avuga ako hari abantu boba bariko bariba bakoresheje impapuro zitarizo.Ivyo bikaba vyatumye igiporisi gifata abantu batatu b’inkozi z’ikibi  karuhariwe ziba zikoresheje urwenge.  Ishirahamwe MAIMO, ibanki BBCI n’ishirahamwe ridandaza igitoro Interpetrol yarituye abajejwe umutekano ku wa 3 Ndamukiza 2020 avuga ako hari abantu boba bariko bariba bakoresheje impapuro zitarizo.Ivyo bikaba vyatumye igiporisi gifata abantu batatu b’inkozi z’ikibi  karuhariwe ziba zikoresheje urwenge.  Ivyo vyashikirijwe n’umuvugizi w’ubushikiranganji bw’umutekano Pierre Nkurikiye ku wa 29 Ndamukiza 2020 mu kiganiro yahaye abamenyeshamakuru.Yarongeye amenyesha ko igiporisi caciye gikora amatohoza gihereye kw’ishirahamwe MAIMO gica kihafatira umugore afise amazina abiri, hamwe akaba yitwa Josiane Muzaneza ahandi akitwa Jacqueline Kampayano avuka mu ntara ya Muyinga.  Uwo nawe akaba ariwe yagiriye icaha co kwica Jenerali Thomas Ndabemeye avuka i Bubanza yari yarakukurutse, akaba  yakoresheje inkoho ntoya yo mu bwoko bw’ibasitori mu myaka ya 2005. Amenyesha kandi ko uwo mugore yafatiwe kuri MAIMO yaje yiyita ko ari umunyabigega w’ishirahamwe ririho kw’izina gusa ryitwa «Burundi investiment Company» aje gutora ibintu bari baguzeho biciye imiriyoni mirongo itatu na zitanu (35.000.000). Abaporisi baciye bamufatiraho baca babandanya amatohoza kugira bamenye aho iryo shirahamwe ryoba rikorera baca basanga ntiribaho. Ariko rero bakaba basanze ryari ryemewe mu kigo API. Iryo shirahamwe rikaba ryashinzwe n’inkozi y’ikibi karuhariwe yari amaze gupfungirwa no mu bihugu duhana imbibe. Uwo nawe akaba afise amazina atatu yo mu bihugu bitandukanye. Kw’izina rya mbere yitwa Lukalu wa lukalu Samuel ry’igikongomani, ahandi akitwa Anicet Mugisha riri kuri karangamuntu k’abarundi irya gatatu akitwa Simon Mugabe ryo mu Buganda.

Uwundi bakorana yitwa Baltazar Nsabimana bose bakaba barafashwe. Mu nyuma amashirahamwe MAIMO na Interpetrol bahavuye bahurira mw’ibanki BBCI bagiye kuraba yuko amasheke yabahaye ari ay’ukuri ahubwo baca basanga yaramaze kwiba n’iyo banki amafaranga ashika ku miriyoni 35  yatumye akura igitoro muri Interpetrol. Ukugene yiba yuguruje konte mu mabanki ashika atanu KCB afiseyo konte y’amarundi n’amahera y’agaciro, BBCI, Fin bank, BCB na Bancobu. Amaze kwuguruza yaca ashirako amafaranga makeya kugira aronke amasheke yaho.  Ivyo bikaba vyamufasha kumenya imikono y’abarongoye izo banki  n’ibimangu vyazo kugira azoze aravyigana mu kubishira kuri sheke atanga mu gusaba ibidandazwa mu mashirahamwe. Pierre Nkurikiye asaba ikigo API kuja kirakurikiranira no kugendera amashirahamwe giha impusha zo gukorera imigambi mu Burundi. Yaramenyesheje n’amashirahamwe yari ku rutonde rw’ayo azokwibamwo. Hakaba hari ishirahamwe Adam’s, SOSUMO, Interpetrol yari yashatse kuhiba imiriyoni 35 ku wa 4 Ndamukiza 2020, SRDI bategekanya kuhiba imiriyoni 34, Savonor yategekanya kuhiba amabido ibihumbi 3 vy’amavuta bifise igiciro c’imiriyoni 25, ishirahamwe mpuzamakungu UNICEF yokwubakishije amashure akoresheje isima akuye muri BUCECO hamwe no mw’ishirahamwe DAIMO yari yahasavye ibintu bifise agaciro k’imiriyoni zirenga 33. Abo basuma kandi bari bafise ibitabu bigiramwo canke bigishirizamwo abandi mu kwiba biri mu rurimi rw’icongereza. Kimwe muriyo kikaba kivuga ‘uburyo umuntu yotunga’ (How to be Rich), ikindi kikavuga kiti ‘Kubera iki wahisemwo ubukene kandi isi yuzuye amahera’ (Why have you chosen to be poor when there is so much money in the world)Amabanki rero  na cane cane BBCI asabwa gukoresha ubuhinga bujanye n’ibihe tugezemwo kugira ntaje aribwa n’abantu bakoresha uruyeri gukora ibipapuro ivyo bita «certifiication» kugira biboneke hakiri kare ko ar’ivyiganano.   

Epitace NduwayoJanvier Niyonkuru

 

Abakozi n’abakoresha basabwa kuja hamwe bakirimbura, gutyo bame baja inama n’ingingo

Ku wa 1 Rusama 2020, Uburundi bwarifatanije n’ayandi makungu mu guhimbwaza umunsi mpuzamakungu wahariwe abakozi n’akazi wama uhimbazwa uko umwaka utashe.Ibirori vy’uwo munsi mukuru bikaba vyaratunganijwe mu ntara zose z’igihugu kuri iki ivugo “Twitabe amatora tudasize inyuma ibikorwa vy’iterambere ry’igihugu cacu n’ingo zacu.”Twabamenyesha ko ibirori ku rwego rw’igihugu vyabereye ku kibuga c’umupira w’amaguru c’ i Muremera, ku murwa mukuru w’intara ya Ngozi birongowe n’Umukuru w’igihugu Petero Nkurunziza ari kumwe n’umutambukanyi wiwe Denise Nkurunziza.Ico gihe akaba yatumiriye abakozi n’abakoresha kuja hamwe, bakisuzuma bakongera bagasuzuma ivyo baranguye, bagakomeza ya ngendo nziza yo kuja inama n’ingingo.  Ivyo birori vyari vyari vyitabwe n’abandi banyacubahiro benshi harimwo  n’uwuzoserukira umugambwe CNDD-FDD uri ku butegetsi, Evariste Ndayishimiye. Eka n’uwuserukira abakozi, hamwe n’uwuserukira abakoresha bari bahishikiye, bakaba barakeje Umukuru w’igihugu na Reta arongoye kuvyo bashoboye kurangura muri iyi myaka 15 iheze. Baranashikirije ivyo bifuza ko Reta yofasha abakozi n’abakoresha.Umukuru w’igihugu, Petero Nkuruziza akaba yabanje gukengurukira Imana Mushobora vyose yamufashije kuyobora igihugu mu mahoro akaba agiye kurangiza ikiringo c’imyaka 15 igihugu kiri mu mahoro n’umutekano, mbere n’ikiza covid-19 kitabica ngo bicike nk’uko biriko biraba mu bindi bihugu.

Mu gihe yari yatanguye kurongora igihugu, abarundi bamaze imyaka irenga cumi mu ntambara, bari mu mwiheburo. Yarakeje kandi Abarundi bashoboye kwitegurira amatora yo 2015, iryo 2018 n’ayimirije y’2020 batabanje kuzera inze.Yaripfurije abakozi bose umusi mukuru mwiza w’abakozi n’akazi, umusi mukuru w’akanyamuneza gaterwa n’akazi. Pierre Nkurunzizaaaribukije ko uyo munsi ari  akaryo keza ko kwirimbura no kwigira inama, kwishima no kwishimiriza bigina ivyo baranguye.  Ku bibazo vyashikirijwe n’abaserukira abakozi n’abakoresha, Prezida Nkurunziza yabishuye ko Reta Y’Uburundi iriko irabitegura, ibindi bija vyaragiye mu ngiro aca aranamenyesha yuko umwami yama agirwa n’abagabo, iyo hataba abaserukira abakozi n’bakoresha bemeye kwicara hamwe ngo bahagarike ingendo y’amayegereyegere bitari kuba vyaragenze neza nkuko biri ubu.Mu gusozera Pierre Nkurunziza yarashikirije ubushimwe abakoze neza gusumba abandi.ho twovuga intara, amakomine, amashirahamwe n’abakozi ku gatwe kabo. Aho umwe wese muri abo tudondaguye yaronse urupapuro rw’iteka ahawe na Leta y’Uburundi hamwe n’umuriyoni w’amafaranga y’amarundi.Intara yabaye iya mbere ikaba ari intara ya Bubanza yaronse amanota 89 kw’ijana. Komine ya mbere iba Ngozi ironka 100 kw’ijana.Muganga Michel Sabiyumva yagize iciyumviro co kwubaka ibitaro vy’igipolisi akanabirongora ubwambere yararonkejwe agashimwe, co kimwe n’uwamukoreye mu ngata mu kurongora ivyo bitaro, Joseph Ninteretse, aho mu myaka 2 amaze abirongoye yabikoranye ubwira, agashobora gushimisha abamwitura bose.Umukenyezi yigisha muri kaminuza Marie José Bigendako, nawe nyene yararonkejwe agashimwe kukugene yatanze ubumenyi akanagira ubushakashatsi.Ikigo Fomi gihingurwa ifumbire, abanyamabanga bakoze bigashimwa, ishure ry’akarorero ryo mu ngagara n’abandi bararonkejwe nabonyene umwe wese agashimwe.
Amasendika  y’abakozi  arajwe ishinga n’ikibazo c’umwidegenvyo w’ayoMu gisagara ca Bujumbura ibirori vyo guhimbaza uwo munsi mukuru vyabereye ku kibuga c’umupira w’amaguru « Intwari », birongowe n’Icegera ca mbere c’Umukuru w’igihugu Gaston Sindimwo.Mw’ijambo Gaston Sindimwo yashikirije akaba nawe nyene yamenyesheje ko icivugo c’uwo munsi mukuru ku rwego rw’Igihugu kivuga kiti « Twitabe amatora tudasize inyuma ibikorwa vy’iterambere ry’igihugu cacu n’ingo zacu ».Akaba yarifurije abakozi umusi mukuru mwiza, yongera abasaba kuja hamwe bakisuzuma bakongera bakaraba ivyo baranguye mu gukomeza ingendo nziza y’ukuja inama n’ingingo. Yarongeye kandi amenyesha ko ivyaranguwe mu myaka 15iheze ari vyinshi cane kandi ko babikesha Imana. Ivyabaye mu mwaka w’2015 ngo vyatumye batera intambwe y’ukwiyumvira no gukora gusumba. Abarundi ngo baramenye bongera baratahura iyo bava n’iyo baja kuko icari carabazingamitse kwari ukutamenya ko bashoboye.  Yaramenyesheje kandi ko bategekanya   kunagura ishirahamwe rijejwe kuvuza abakozi  ba Reta  mu ntumbero kworohereza abakozi n’imiryango yabo. Ku bijanye n’akaranda ka korona  yararemesheje abarundi yongera abasaba kubaha no kwubahiriza ingingo zafashwe. Uwuserukira abakozi Mélance Hakizimana nawe akaba yarashimiye Umukuru w’igihugu Petero Nkurunziza ku kuntu yitayeho ibisata bijanye n’akazi ,ibiganiro mu kazi no mu gutegekaniriza kazoza abakozi mu kiringo amaze arongoye igihugu. Yaciye asaba ko uwugiye kumukorera mu ngata yobandaniriza aho yari agejeje cane cane mu gutsimbataza ibiganiro mu kazi,no gushira muri izo nzego ababishoboye hisunzwe ubumenyi n’uburambe mu kazi.Mu bibazo nyamukuru bihanze abakozi akaba yamenyesheje ko bifuza ko hokwubahirizwa amategeko agenga umwidegemvyo w’amashirahamwe aharanira agateka n’inyungu z’abakozi no gukingira uburenganzira bw’ayo mashirahamwe ;gukomeza no kwubahiriza ibiganiro mu kazi ;gukurikirana ibijanye n’indwara ,impanuka ku kazi no gutegekaniriza kazoza abakozi.

Christine Manirambona

 

Abiyamamaza muri aya matora y’2020 bahamagarirwa kubigira mu mahoro n’umutekano

Umukuru w’igihugu Petero Nkurunziza ahamagarira abiyamamaza muri aya matora y’ 2020 kubigira mu mahoro n’umutekano, ntibajuragize abenegihugu bazeyeko amajwi; bahiganishe imigambi, bareke abenegihugu bace urubanza. Uwuzorushwa azoshire aho intahe ishize, hanyuma uwuzotsinda nawe atsindire bose.  Ako kamo yagateye abarundi ku wa 30 Ndamukiza 2020 buca hahimbazwa umunsi mpuzamakungu wahariwe abakozi n’akazi. Akaba yaboneyeho n’akaryo ko gusaba abarundi kubandanya bubahiriza ingingo zafashwe na Reta zokwikingira ikiza ca coronavirus. Ni mwisomere ido n’ido ry’iryo jambo. Barundi, Barundikazi,Bakozi, namwe Bakoresha;
Imbere ya vyose, nimuze tubanze gushimira Imana Mushoboravyose, Umukoresha Mukuru kuri twese, dukesha ivyo twaranguye kandi tuzeyeko ivyo dutegekanya kurangura muri kazoza. Turashimira Imana yaduhaye amagara meza, Amahoro, Umutekano n’Impore, mu mpande zose z’Uburundi.Igenekerezo rya mbere Rusama uko umwaka utashe, abakozi n’abakoresha, mu Burundi no mu bihugu vyinshi, barahimbaza umusi mpuzamakungu w’abakozi n’akazi. Icivugo c’uyu musi mukuru ku rwego rw’Igihugu kivuga ngo: “Twitabe amatora tudasize inyuma ibikorwa vy’iterambere ry’igihugu cacu n’ingo zacu”.  Ni akaryo keza ko kwirimbura no kwigira inama, tutibagiye kwidagadura, kwishima no kwishimiriza twigina ivyo twaranguye.  Kw’izina rya Reta no kw’izina ryacu nyene, turipfurije abakozi bose umusi mukuru mwiza w’abakozi n’akazi, umusi mukuru w’akanyamuneza dukura mu kazi. Abakozi n’abakoresha tuje hamwe, twisuzume twongere dusuzume ivyo twaranguye, dukomeze ya ngendo nziza yo kuja inama n’ingingo.Uyu musi mukuru uhuriranye n’ibihe bidasanzwe, kuko uhuriranye n’igihe co gusozera igikorwa Imana yadushinze co kurongora Uburundi. Murazi ko kuva Uburundi buhabuje Intahe yo kwikukira, bubaye ubwa mbere hahera imyaka 15 Uburundi buri mu mahoro n’umutekano kandi burongowe n’abo abenegihugu bitoreye.Uyu musi mukuru ushitse kandi twinjiye mu gihe c’amatora, igihe co kwirimbura tukaraba ko ivyo twasezeraniye abenegihugu mu myaka itanu iheze twabiranguye, mbere tugatereza amaso inyuma tukaraba ico twamaze muri iyi myaka 15 iheze.Ivyo twaranguye mu myaka cumi n’itanu iheze ni vyinshi cane. Tubikesha Imana, ariko tubishimira abantu bose twakoranye muri iyi myaka, baba abari mu nzego zitandukanye, abenegihugu twasangiye ibikorwa, tutibagiye n’abakunzi b’Uburundi hirya no hino kw’isi batubereye kirumara.
Barundi, Barundikazi, Bakozi namwe Bakoresha;
Umusi twashikira Amabanga yo kurongora Uburundi, Igihugu cari kimaze imyaka irenga cumi mu ntambara. Ubutunzi bw’igihugu bwari bugeze aho umwansi ashaka. Abarundi benshi bari mu mwiheburo, bari barushe kubera intambara no kwamana intekera ku mutwe, kandi ico gihe agatimatare ntikari bwahere mu Barundi bamwe bamwe, bigatuma imigambi itari mike twari tuzanye ibangira.Imyaka cumi ya mbere twarongoye Uburundi, kwabaye ukumena umushike no gusimba imitego myinshi, yakomoka ku mwijima Uburundi bwabayemwo kuva ku muzo w’abakoroni gushika mu mwaka w’2005.Iruhande y’imigambge n’amasendika bikorera inyungu z’abakoroni, imvugo, inyandiko n’inyifato z’amacakubiri vyari bicatse indaro mu Burundi. Ivyo bikunyurwa n’ibiturire, ugusesagura no kunyonyeza ubutunzi rusangi, ubujuju, ubunebwe n’izindi ngeso mbi atawodondagura ngo azimare. Twamaze imyaka icumi, kuva 2005 gushika 2015 mu mageragezwa atagira uko angana. Intambamyi zikuruzikuru twahuye ni nk’izi: Ingeso mbi zifatiye ku kwimenyera bamwe bamwe bose bari bakuye iyo bahora mu gihe c’intambara zatumye babandanya kurya ibiturire, kunyuruza itunga ry’igihugu, gukora urudandazwa rwo mu kinywabi no kurondera gutunga ivyo batabiriye akuya;Amacakubiri, ukwinubana no gukengerana;Ugucanamwo kw’abonse rimwe mu mashirahamwe n’imigambge;Hariho akagaye, agasuzuguro no kutubaha inzego ku bantu bamwe bamwe: mu bisagara bimwe bimwe twaja ku kivi abandi nabo biryamiye canke barorera;Abiyita “ABAHETSI B’UBURUNDI” baduhatiyeko Integuro n’Imigambi bidafatiye ku vyipfuzo vy’Abarundi;Hari abatwemerera ubuki bategeka, abandi bakaduha imfashanyo z’uruhendo ;Abari mu masendika amw’amwe n’abanyeshure ba Kaminuza babaye ibikoresho vy’abakoroni, amayegereyegere akaba urutavanako;Iterabwoba ryakorwa cane cane hegereje amatora;Imigambwe imw’imwe itashira aho intahe ishize; Imwe muri iyo migambwe twavuze yahisemwo inzira y’intambara;Amashirahamwe amw’amwe yavuga ngo ntaharanira ivyicaro vya poritike, ariko adasiba kwisuka mu vya poritike;Agatimatare ko kuvuguruza abenegihugu mu gutembagaza Inzego bitoreye.
Barundi, Barundikazi, Bakozi namwe Bakoresha;
Ingingo twafashe zo kwigisha abana mu mashure matomato ku buntu, no kworohereza abakenyezi n’abana bari musi y’imyaka itanu ngo bavugwe ku buntu, zararemuruye imiryango myinshi.Ivyabaye mu mwaka w’2015 vyaduteje iyindi ntambwe mu kwiyumvira no mu gukora. Abarundi isinzi barakize uruhumyi barahabona, baraca ubwenge, ivyiyumviro vy’aba na bariya biriserura, impano z’abana b’Uburundi zirigaragaza, Uburundi buva mu muzimagiza bwari bumazemwo imyaka irenga ijana, bwinjira mu muco.N’aho amakungu yari yadutangariye mu mwaka w’2012 aho twahimbaza Isabukuru y’Imyaka 50 duhabuje Intahe y’Ukwikukira; ivyo twaranguye muri iyi myaka itanu iheze biza ari agaheta. Irabire namwe:Tumaze kuzirikana ko tutaremewe gufashwa, ariko ko twaremewe gufashanya, twarakoze birashimwa, abaduteye akagere n’abaduhariye ivomo baratamarirwa, umwimbu urongerekana bidasanzwe mu bisata vyose bigize ubuzima bw’igihugu.Ikigo OBR gifashanije n’abajejwe Intwaro n’Abajejwe Umutekano carongerereje umwimbu uko umwaka utashe, bituma Reta yibako ku bice hafi 90% twahora kuri 45%. Hari abari biteze ko batadufashije tutazohemba abakozi, ariko siko vyagenze kuko, turetse ko twabandanije tubahemba, twaranabongeye agahimbazamusyi muri wa mugambi wo kugabanya ubusumbasumbane bw’Imishahara.Abagwizatunga b’Abarundi barashinze amahinguriro n’amashirahamwe y’ubudandaji yasahirije cane ubutunzi bw’Igihugu. Twabandanije twubaka ibibuga vya Kijambere, amashure, amavuriro, ibitaro, Uburaro bw’ingenzi, Ibiro vy’Indongozi n’ibindi vyinshi.Ingoro y’Umukuru w’Igihugu twitiriye uwo dukesha Uburundi NTARE RUSHATSI Abarundi n’amakungu barayikugura. Twarashinze Amakoperative ku mitumba yose y’Uburundi tugirako turagurana umutumba wose Umutahe w’Imiriyoni cumi. Twaritunganirije Umugambi w’Igihugu ukomokako imigambi yose y’Iterambere mu myaka icumi guhera mu 2018 kugeza mu 2027.Amatora yo mu 2015, Ibwirizwa Shingiro ryo mu 2018, n’Amatora yo mu 2020 twamaze kwinjiramwo yose yatunganijwe hakoreshejwe uburyo bw’Abarundi ubwabo.Kwitunganiriza amatora incuro zitatu tutarindiriye ak’imuhana, ni intambwe idasanzwe mu gusubiza Iteka Uburundi. Ni kandi ikimenyetso kigaragaza ko dushoboye. Ivyo biratanga icizere ko n’iyindi migambi yahora ikorwa duteze amashi tuzoyirangura n’uburyo bwacu. Turashimiye kandi turakeje abo bose batêrêra kugira Igihugu cacu kigire Iteka n’Iterambere. Muri make, Abarundi twaramenye twongera turatahura iyo tuva n’iyo tuja, kuko icari caratuzingamitse kwari ukutamenya ko dushoboye, kwari kandi ukwambara ikirezi ntitumenye ko cera.
Barundi, Barundikazi,Bakozi namwe Bakoresha;
Icivugo c’uku kwezi kwa Rusama kivuga ngo “Twitabe amatora tudasize inyuma ibikorwa vy’iterambere ry’igihugu cacu n’ingo zacu”. Amatora ni inzira irashe yo gutsimbataza demokarasi n’amahoro mu gihugu. Yamara rero, Abarundi bamye batungwa n’umwimbu ukomoka mu bikorwa. Ntimusamazwe n’amatora rero ngo mudebukirwe, guma ku kivi.Turizeye ko ubushomeri bugiye kugabanuka cane tubifashijwemwo n’Ibanki y’Urwaruka twaraye twuguruye, tutibagiye Ibanki y’Abarimyi n’Aborozi, hamwe n’Ibanki y’Abakenyezi zigiye gutangura ibikorwa mu mezi abiri ari imbere.Ntihagire n’umwe azosubira kubura ingurane afise imigambi n’umwete wo gukora. Turasavye abanyamitahe ngo bagwize amashirahamwe yo kuziganya no kuguranana, amabanki na yo agabanye inyungu asaba abaka ku ngurane, areke kubabegera ku bwabo no kuzibira iyo biva.
Barundi, Barundikazi,Bakozi namwe Bakoresha;
Uyu mwaka wabaye umwaka udasanzwe mu bijanye no kugwiza akazi. Abakozi bashasha baronkejwe akazi ni 2817 mu Bushikiranganji bw'indero, 201 mu Bushikiranganji bw'amagara y'abantu, hamwe n’421 basubiriye abapfuye canke bagiye gukora ahandi. Aha ntituvuze abaronkera ubuzi mu mashirahamwe y’abikorera utwabo no mu nzego z’Umutekano no kwivuna abansi.Ikindi gihambaye cakozwe ni ugusubiramwo Igitabu c'amategeko agenga abakozi n’akazi kugira ngo ajane n’ibihe tugezemwo aha iwacu, mu muryango w’ibihugu vyo muri afirika y’ubuseruko, yongere yisunge amategeko afitiye akamaro igihugu cacu atorerwa mu nama ya rya Shirahamwe Mpuzamakungu rijejwe akazi OIT.Mu ntumbero yo kworohereza abakozi n’imiryango yabo, turategekanya kunagura Ishirahamwe rijejwe kuvuza abakozi ba Reta. Turazirikana neza ko ikigega c’amasaka gikomoka mu kigega c’amagara. Mu kurindira iryo nagurwa, turasavye dushimitse abajejwe iryo shirahamwe gukora ibishoboka vyose kugira abanywanyi baryo baronke imiti ikwiye badatamye.
Barundi, Barundikazi,Bakozi, Bakoresha;
Nk’uko tudahengeshanya kubikora, twashaka gufata aka kanya ngo dutange impanuro. Ubwa mbere: Tumenye ko gukora neza akazi kujana no gukurikiza amategeko y’akazi. Amasendika y’abakozi n’abakoresha nibafashe rero kumenyekanisha amategeko y’akazi mu bakozi bose. Ubwa kabiri: Gukunda akazi bijana no kumenya ico twiteze gukura mu kazi kizodufasha mu buzima bwacu mu gihe tugikora no mu gihe tuzoba tumaze gukukuruka, na kare ngo: “Agakoni k’imisi gacibwa kare, kakabikwa kure y’imŭngu”.Ubwa gatatu: Abakoresha nibahimirize abakozi babo gutegekaniriza kazoza mu mashirahamwe ya Reta ONPR na INSS no mu mashirahamwe y'abigenga kugira baze baronke ikibafasha cisununuye bamaze gukukuruka. Dusavye rero abakoresha   gutunganya ibiganiro vy’akazi, abakozi bamenye ibiteza imbere akazi, n’ivyotuma bagira kazoza keza. Ubwa kane: Kumenya no kuzirikana ko agateka ko kwitwa umukozi, icubahiro, iterambere n’akanyamuneza dufise mu miryango, bikomôka ku kazi turangura n’ingene tukarangura. Tuvavanure rero n’ingeso mbi yo kuvuga ngo: “Akazi k’i Bwami kica uwicaye“, tumenye ko:“Urima bike ukimburira mu gipfunsi”. Ubwa gatanu: Nk'abakozi, nitwifatanye n'abandi benegihugu mu bikorwa vyo guteza imbere amakoperative ari ku mitumba n'amakaratiye yose yo mu gihugu, tubabere urumuri mw'iterambere.Ubwa gatandatu: Twirinde gusesagura amatungo y'igihugu, kuko ubusuma n'ibiturire bitukisha ubwa mbere umukozi yabikoze, imbere yo gutukisha igisata c'akazi akoramwo no guhombesha igihugu cose. Ubw'indwi: Tumenye ko ubunebwe ari bwo nkwezi y’amarere. Umunebwe atera amapfa umuryango, ikibano n’Igihugu. Ubw'umunani: Urwaruka rukure amaboko mu mpuzu, rusabe impanuro abarukurira, rusabe ingurane mw’ibanki yarwo rukore, kuko “Mpa akabando nandare aruta mpa akate ndambarare”. Dusavye urwaruka gukorera imigambi hamwe, kuko:“Abadasezeranye ntibajana” kandi ngo: “uwugutanze gukaraba agutanga no kubega”. Ubw’icenda: Kugendera akaranga n’imico myiza vyamye biranga Uburundi n’Abarundi harimwo gukunda ibikorwa.Ubw’icumi: Dusavye abiyamamaza muri aya matora kubigira mu mahoro n’umutekano, ntibajuragize abenegihugu bazeyeko amajwi; bahiganishe imigambi, bareke abenegihugu bace urubanza. Uwuzorushwa azoshire aho intahe ishize, hanyuma uwuzotsinda nawe atsindire bose. Na kare ngo:”Aho Imana itakugeneye ntuhashinga intahe uhashinga ijisho”.Ubw’icumi na rimwe: Mu gihe imvura imaze imisi igwa ari nyinshi ikonona ibitari bike, mukomeze wa mutima wo gufashanya no gutabarana kuko: “Buraca bugacana ayandi”, kandi “Ikiza ntikizira umwe”. Imbere yo gusozera, twashaka gusubira gukengurukira cane abo twakoranye ibikorwa rusangi muri iyi myaka 15 iheze, ivyo twakoreye hamwe birateye igomwe. Turakengurukiye ku buryo budasanzwe abadusengeye, abatugabiye, n’abaterereye mu nyubako zose twagizemwo uruhara. Umwe wese tumufise ku muzirikanyi, kandi tuzokwama tumwibuka, twongera tumusengera.Ku bijanye n’iki kiza karanda ca korona, turasubiye kuremesha no guhumuriza Abarundi. Ingingo zihagije zarafashwe, twese dusabwe kuzubaha no kuzubahiriza. Ibisigaye Imana izotuzitirira nk’uko yama iturinda ivyago kuva kera; n’uno musi ikiganza cayo kiri ku Burundi. Tubandanye kandi gusenga, dusabira abo gisugereje, ntitumere nka wa wundi ngo “Amarushwa ari ku wundi ntakuraza itiro”. Turabaremeresheje, iki kiza ni imvura izohita.
Mu gusozera, turasubiye kubakengurukira cane ku kuntu twakoranye neza muri vyinshi. Twatanguye bigoye ariko duhejeje vyoroshe. Twashaka kubasaba kuyoboka Umukuru w’Igihugu agiye kuramutswa Uburundi, maze intambwe y’iterambere no kwishira n’ukwizana tugezeko ntisubire inyuma. 

IMANA IHEZAGIRE UBURUNDI N’ABARUNDI; IMANA IBAHE

UMUGISHA MU BIKORWA VYANYU; MURAKOZE;

 

Imyiyamamazo y’imigambwe n’abigenga yuguruwe icese ku wa 27 Ndamukiza 2020

donaKw’igenekerezo rya 27 Ndamukiza 2020 niho abanyamigambwe, abahurikiye mu nani z’imigambwe hamwe  n’abigenga,bisunze itegeko ry’Umukuru w’igihugu inomero 100/057 ryo ku wa 25 Ndamukiza 2020, bashwara imihingo hafi yose y’igihugu aho batunganije ibirori vyo gutanguza igikorwa co kwiyamamaza mu  matora  yo ku rwego rw’umukuru w’igihugu, ku rwego rw’Inama Nshingamateka hamwe n’inama mpanuzwajambo z’amakomine, ayo nayo akazoba ku wa 20 Rusama 2020.Ibimenyeshamakuru ivya Reta n’ivyigenga bikaba vyaragize urunani mu ntumbero yo gukurikirana uko ivyo bikorwa vy’imiyamamazo vyagenze uyo munsi wa mbere.Kw’igenekerezo rya 27 Ndamukiza 2020 niho abanyamigambwe, abahurikiye mu nani z’imigambwe hamwe  n’abigenga,bisunze itegeko ry’Umukuru w’igihugu inomero 100/057 ryo ku wa 25 Ndamukiza 2020, bashwara imihingo hafi yose y’igihugu aho batunganije ibirori vyo gutanguza igikorwa co kwiyamamaza mu  matora  yo ku rwego rw’umukuru w’igihugu, ku rwego rw’Inama Nshingamateka hamwe n’inama mpanuzwajambo z’amakomine, ayo nayo akazoba ku wa 20 Rusama 2020.Ibimenyeshamakuru ivya Reta n’ivyigenga bikaba vyaragize urunani mu ntumbero yo gukurikirana uko ivyo bikorwa vy’imiyamamazo vyagenze uyo munsi wa mbere.


Umugambwe CNDD-FDD waruguruye icese imyiyamamazo muri komine Bugendana
Abagumyabanga, abakenyererarugamba, imbonerakure, hamwe n’abahumure bo mu mugambwe CNDD-FDD  bavuye mu ntara zose  zose z’igihu bahuriye muri komine Bugendana, ikukira intara ya Gitega isanzwe ari umurwa mukuru wa poritike, ku wa 27 Ndamukiza 2020, aho bitavye ibirori vyo gutanguza icese imyiyamamazo y’uwo mugambwe,vyari vyatewe iteka n’Umukuru w’igihugu Petero Nkurunziza, asanzwe ari umukuru w’inama y’inararibonye, akongera akaba n’imboneza yamaho mu mugambwe CNDD-FDD. 
Prezida Nkurunziza atumirira abarundi na cane cane abagumyabanga gutora umwizigirwa Evariste Ndayishimiye
Mw’ijambo Umukuru w’igihugu,Petero Nkrurunziza yashikirije abari ngaho i Bugendana , yabatumiriye kuzohunda amajwi umugabo w’imwizigirwa, jenerari Major Evariste Ndayishimiye yashizwe imbere n’umugambwe CNDD-FDD.Prezida Nkurunziza akaba rero yabanje gushimira Imana Mushoboravyose kuri yabashikanye kuri uyo munsi wo gutanguza igikorwa co kwiyamamaza mu matora yo mu 2020.Yarongeye ashimira Imana ku mutekano warangwa mu gihugu cose.Ku bwiwe ngo ivyapfundikiwe mw’ikoraniro rikuru ry’umugambwe CNDD-FDD, vyacitse ukuri.Vyongeye ngo igihe yatangaza ko atazokwitoza mu 2020, yiyemeje kuzoshigikira uwuzoserukira  umugambwe CNDD-FDD mu matora, yaciye amenyesha abari ngaho ko yishikiye  aho i Bugendana kugira ashikirize  ku mugaragaro abagumyabanga n’abarundi bose uwuzoserukira umugambwe CNDD-FDD,mu guhiganirwa ikibanza c’umukuru w’igihugu.Yaciye atumirira abarundi bose na cane cane abagumyabanga kuzohunda amajwi Evariste Ndayishimiye.Ngo bamutoye  bazogira amahirwe n’umuhezagiro narirya azobandanya ashira mu ngiro imigambi y’umuagmbwe CNDD-FDD, ku neza y’abanyagihugu.

Evariste Ndayishimiye ni intwari agakunda no gusenga
Prezida Nkurunziza yarashingiye intahe Evariste Ndayishimiye aho yamenyesheje ko amuzi neza nk’umugenzi ku rugamba n’umufasha wo hafi  kuva ashikira amabanga yo kurongora igihugu mu 2005.Yarashikirije impano ziwe n’ibikorwa yaranguye n’uwo azokwitoza mu kibanza c’umukuru w’igihugu kuva mu biganiro vyoguhagarika indwano burundu gushika ubu.Ati:Ni umugabo w’imwizigirwa.Yaramenyesheje ko afatiye ku bikorwa vyose yaranguriye  igihugu n’amabanga yagiye arashingwa , akwije ibisabwa vyose  kugira arongore igihugu.Ati dusangiye urugamba rwo gutsimbataza demokarasi n’iterambere rirama;rero duhamagariwe kumuhunda amajwi na kumusengera.Ararinda kandi arubaha Imana ni umugisha n’iteka ku barundi.Prezida Nkurunziza  ntiyibagiye gukebura Abarundi abasaba kuguma ku kivi ntibahebere umwanya w’ibikorwa  imyiyamamazo, ngo bahave bibagira ko bategerezwa kurondera ibibabeshaho.Yarangije atekerera impanuro abarundi bose, nacane cane abanywanyi b’imigambwe, zo kwiyunga mu mashirahamwe y’iterambere nk’uko twabirazwe n’umuganwa Atari umugani,Ludoviko Rwagasore,guryo ubutandukanye butubere ubutunzi.
Evariste Ndayishimiye yiyemeje kubanadanya gushira mu ngiro imigambi ya Reta 
Uwashizwe imbere n’umugambwe CNDD-FDD,Evariste Ndayishimiye mw’ijambo ryiwe nawe yaramenyesheje abari ngaho ko uwo munsi utameze nk’iyindikandi ari intibagirwa ku bagumyabanga n’abarundi bose.Akaba yarashimiye ko umukuru w’inama y’inararibonye mu mugambwe CNDD-FDD, akongera akaba n’Umukuru w’igihugu kuba yaraje kumushigikira nk’uko yari yari yaravyiyemeje.Aca aramenyesha ko yiteguriye kurongora igihugu,nk’uko abagumyabanga babimusavye.Ku vyerekeye imigambi iza imbere ku bimwerekeye Evariste Ndayishimiye yamenyesheje ko azobandanya ashiramu ngiro imigambi ya Reta kunneza y’abanyagihugu.Ngo ashira inguvu mu guteza imbere ibisata  nkoramutima kw’iterambere ry’igihugu n’abanyagihugu nk’amagara y’abantu, uburimyi, indero, n’ibindi.Yarateye akamo abanrundi ati:tureke ibidutandukanya , duhaguruke nk’umuntu umwe dukore dushize hamwe kugira dushobore guteza imbere igihugu kuko ico gihe atacotunanira.Evariste Ndayishimiye yarangije ahamagarira Abarundi gukora kugira igihugu gishike kw’iterambere riboneka.Ati ndi ngaha kandi abarundi twese tugiye hamwe  tuzoteza imbere igihugu cacu narirya ibikenewe vyose tubifise, ni ukuvuga inguvu, ubwenge , umutahe, n’ibindi.Ntiyibagiye kugabisha abagomba kurya ivyo batabiriye akuya.Abo ngo nta kibanza bafise mu Burundi. Nakare ngo urima itiro ukimbura ingonera.Twobamenyesha ko ivyo birori vyari vyitabwena bamwe mu baserukira ibihugu vyabo mu Burundi, abaserukiye imigambweyiyemeje gushigikirauwashizwe imbere n’umugambwe CNDD-FDD ngo azohiganirwe ikibanza c’umukuru w’igihugu.
Umugambwe CNL waruguriye icese Imyiyamamazo ku murwa mukuru w’intara ya Ngozi
Abanywanyi b’umugambwe CNL “Inyankamugayo”, baturuka mu mihingo nka yose y’igihugu bahuriye ku murwa mukuru w’intara ya Ngozi, ku kibuga c’umupira w’amaguru c’i Muremera, aho bitavye ibirori vyo kwugurura icese ibikorwa vyo kwiyamamaza mu matora yo mu 2020,vyari birongowe n’umukuru  w’uwo mugambwe Agathon Rwasa.
Agathon Rwasa yasavye inyankamugayo n’abandi barundi  kuzomuhunda amajwi
Uwo munsi Rwasa yasavye inyankamugayo n’abandi barundi kuzotora umugambwe CNL.Ibirori vy’uyo munsi vyatangujwe n’urugendo rurerure, aho abanywanyi  b’umugambwe CNL aribo ” inyankamugayo” bavuye kw’ibariyeri iri kw’ibarabara ryinjira mu gisagara ca Ngozi, bakagenda bagana ikibuga c’umupira w’amaguru c’i Remera ahabereye ibirori nyezina.Urwo rugendo rwabaye akaryo ku nziramugayo rwo kuramukanya n’abanywanyi b’iyindi migambwe na cane cane abanywanyi b’umugambwe CNDD-FDD, iyo ngendo ikaba yarashimwe n’impande zompi z’iyo migambwe. Kuri ico kibuga hari hategekanijwe ibikoresho vyo gukaraba amazi mu ntumbero yo kwikingira ikiza ca coronavirus,mbere hari n’abantu bara bafise udukoresho two gupima ubushuhe abantu bose imbere yokwinjira muri ico kibuga.Ico gikorwa co kwiyamamaza cabaye n’akaryo ko kwereka abanywanyi b’umugambwe CNL n’abandi bari ngaho ingene bazokoresha amakarata y’amatora  kugira batandukanye ikarata y’indongozi yabo ntihagire mbere ntihazobe n’amajwi  y’impfagusa.Mw’ijambo ryiwe ,umukuru w’umugambwe CNL,Agathon Rwasa yabanje  gushimira abigize akigoro bose kugira bashobore gushika kuri ico kubuga catunganirijwemwo ibirori,hanyuma ati:turi mu kiringo ciza coguhitamwo indongozi nshasha z’igihugu cacu.Niko guca atera akamo abanywanyi b’umugambwe CNL n’abarundi muri rusangi ko guhunda amajwi uwomugambwe mu matora yo ku wa 20 Rusama 2020.Yasavye abayoboke       biwe mbere n’abarundi muri rusangi kwirinda inyifato y’amacakubiri n’ibinyoma.Yaribukije abanywanyi b’umugambwe CNL ibikorwa vy’imyiyamamazo vyategekanijwe kuvaku wa 27 Ndamukiza gushika ku wa 17 Rusama 2020, bizohora bitangura isaha cumi na zibiri zo mu gitondo bikarangira isaha cumi na zibiri zo ku mugoroba hisunzwe itegeko rigenga amatora, rero ntahazogire abahuvya.Umukuru w’umugambwe CNL, akaba yaramenyesheje ko afise icizere kinini c’uko umugambwe wiwe uzotahukana intsinzi mu matora yimirije.Ngo igihe rero uyo mugambwe wotsinda uzorongora igihugu wubahiriza amahoro n’umutekano ku barundi bose hamwe n’abanyamahanga baba mu Burundi.Rwasa yahamagariye abemeye guhiganwa muri aya matora kwuibahiriza ibizoba vyavuye mu matora no kuzoshira aho intahe izoba yashize.Ku wuzoba yatsinze amatora  yasavye ko yotwarira abarundi bose  ata mwana n’ikinono.
Umugambwe CNL wiyemeje kuzoha intara yose imashini yo kunagura amabarabara
Agathon Rwasa yaramenyeshe ko imigambi y’umugambwe arongoye yerekeye ibisata vyose bigize ubuzima bw’igihugu.Ku bwiwe rero,ngo ibisata vy’uburimyi , ubworozi, uburovyi, n’ibindi bikeneye gutezwa imbere bimwe biboneka ku buryo abarundi bashobora gushikira  ivyo bakeneye bakoresheje uburyo buvuye mu musasakara w’umwimbu.Agathon Rwasa akaba yaramenyesheje ko igihe yotahukana intsinzi mu matora yimirije yiyemeje kuzobandanya poritike ya Reta yo  kuvuza abakenyezi bibungenze  hamwe n’abibarukiye kwa muganga  hamwe n’abana barimunsiy’imyaka itanu.Mu ntumbero yo guteza imbere umuhora wo kworosha gusumba uruja n’uruza rw’abantu n’ibintu hagati y’Uburundi n’ayandi  makungu Umukuruw’umugambwe CNL yamenyesheje kandi ko  yashize imbere umugambi wo kwubaka ibarabara ry’indarayi rizohuza Uburundi n’igihugu kibanyi ca Tanzaniya,akazoteza imbere n’umugambi wokurwiza umuyagankuba.
Umugambwe UPRONA watanguriye icese Imyiyamamazo ku murwa mukuru w’intara ya Mwaro
Abadasigana bavuye mu mihingo itandukanye y’igihugu bahuriye muri komine Gosozi, intara ya Mwaro aho bitavye ibirori vyo kwugurura icese ibikorwa vyo kwiyamamaza mu matora yo mu 2020, vyatunganijwe n’umugambwe UPRONA vyari birongowe n’umukuru  w’uwo mugambwe Abel Gashatsi ari kumwe ‘Icegera cambere c’Umukuru w’igihugu Gaston Sindimwo  ari nawe yashizwe imbere n’uwo mugambwe ngo azohiganirwe ikibanza c’umukuru w’igihugu.Tubamenyeshe ko uwo mugambwe uzokwitoza ku rwego rw’umukuru w’igihugu,mu Nama Nshingamateka no mu nama mpanuzwajambo z’amakomine.Ibikorwa vy’imyamamazo vy’uwo munsi vyashimikiye canecane ku kwereka abadasigana n’abandi banyagihugu bari ngaho uwo umugambwe washize imbere ngo azohiganirwe ikibanza c’Umukuru w’igihugu.Ico gikorwa catanguriye ku masengesho yashikirije n’abaserukiye amadini atandukanye ‘Gatorika, protestanti, na Isiramu) ,hanyuma hakwirikiye ururirimbo rwo guhayagiza Uburundi “Burundi bwacu”n’urwo guhayagiza umugambwe UPRONA.Mw’ijambo ryashikrijwe n’uwuramutswa umugambwe UPRONA Abel Gashatsi yaramenyesheje abari ngaho ko umugambwe w’abadasigana UPRONA wifashe neza cane kandi witeguriye amatora  kuva amatorayomu 2015 agihera.Yaramenyesheje abanyamwearo ko mu migambin’imigabo y’umugambwe UPRONA harimwo kurwanya ubushomeri mu gihugu.

Umugambwe UPRONA  wiyemeje guharanira inyungu z’igoihugu n’abanyagihugu
Umukuru w’umugambwe UPRONA Abel Gashatsi yaraneguye bamwe mu banywanyi b’umugambwe bagerageje guhungabanya no gusambura uwo mugambwe.Abo rero ngo ntibakiri muri bo.Yarahamagariye abadasigana kuzorangwa  n’umutima wo kwihanganiranira muri ibi bihe vy’imyiyamamazo no kuzokwubahiriza ibizova mu matora mu gushiraahointahe izoba yashize.Gashtsi akaba yareretse abari ngaho abazokwitoza ku kurwago rw’Inama Nshingamateka n’inama mpanuzwajambo z’amakomine.Gaston Sindimwo yashize imberen’umugambwe UPRONA ngo azohiganirwe ikibanza c’Umukuru w’igihugu yarashikirije ijambo abadasigana n’ abanyagihugu bari ngaho ko  igihe yotahukana intsinzi mu matora, azoharanira ineza y’abarundi ata mwana n’ikinono.Akaba yiyeleje kuzohindura ibitari bike kandi mu bisata bitandukanye vy’ubuzima bw’igihugu.Gaston Sindimwo yahamagariye  abashizwe imberen’umugamwe ngo bazokwitoze ku nzego zose  guhiganwa batekanye.Mu nteguro yiwe n’ukointara yose yoserukirwa muri Reta y’Uburundi.
Mu bisata vy’ubutunzi ubutungane ,amagaray’abantu n’imibano bikwiye gutezwa imbere
Gaston Sindimwo yaramenyesheje ko arautseyizewe n’abarundi ngo abarongore azoteza imberebimwe biboneka ibisata vy’uburimyi n’ubworozi,ibiterwa njabukamazi nk’ikawa n’icayi.Vyongeye ngo yotunganya uburyo bwo kworohereza abanyamitahe kugira ngo bahiganwe gurtyo butunzi bw’igihugu bwisununure.Ngo hazofantwa n’ingingo zo kugabanya inyungu amabanki yaka ku madeni aha abanywanyi bayo.Ku bijanye n’ubutungane,  Gaston Sindimwo  yemereya abarundi kuzorwanya igiturire yongere ashire imbere ubwigenge bw’urwo rwego.Ku vyerekeye imibano Gaston  Sindimwo yemereye abarundi kuzoshiraho ingingo yo kwigisha ku buntu abanyeshure gushika ku myaka 16, abakukurutse nabo Reta izokwiteho amagara yaboGaston Sindimwo  yemereye abanrundi kuzoronsa inzego z’uùmutekano ibikoresho bikwiye kandi bikomeye vyo kurangura amabanga yabo yo kubahiriza ubwigenge bw’igihugu.Indoto ziwe ngon n’uko muri Reta ibitigiri vy’abagabo n’abakenyezi vyongana mbere n’abatwa bagaserukirwa.
Mu gisagara ca Bujumbura: Umugambwe Sahwanya FRODEBU  watanguriye icese imyiyamamazo muri zone Kinama
Inziraguhamuka z’umuagmbwe Shwanya FRODEBU  baturuka mu mihingo nka yose y’igihugu bahuriye mu buraruko bw’igisagara ca Bujumbura, muri zone Kinama ,komine Ntahangwa ,mu gisagara ca Bujumbura  aho bitavye ibirori vyo kwugurura icese ibikorwa vyo kwiyamamaza mu matora yo mu 2020,vyari birongowe n’icegera c’uwurongoye uwo mugambwe Léonce Ngandakumana .Aka ariwe yashikirije inziraguhemuka n’abandi abari bari ngaho imigabo n’imigambi vy’uwo mugambwe mubijenya naporitike,ubutunzi,n’imibano.Akaba yaramenyesheje ko igihe abarundi bwkizera umugambwe Frodebu uzoshimikira cane cane ku guteza imbere agateka ka zina muntu,udasinye inyuma igisata c’ubutunzi ,mbere nibaramuka bawizeye ukaba uzoteza imbere  ibijanye n’inyubako rusangi ,amabarabara n’ibindi.Ngo umugambwe FRODEBU uzokwitaho igisata c’indero ,amagara y’abantu. Twobamenyesha ko icegera c’uwurongoye umugambwe Sahwanya FRODEBU yariyabanje kwereka inziraguhemuka n’abanyagihugu bari ngaho abazitoza ku rwego rw’Inama Nshingamateka n’Inamampanuzwajambo z’amakomine mu gisagara ca Bujumbura.
Mu gisagara ca Bujumbura Dieudonné Nahimana niho nawe nyene yatangurije imyiyamamazo ahiganirwa ikibanza c’umukuru
Uwigenga Dieudonné Nahimana yamaze umunsi wose w’igenekerezorya 27 Ndamukiza 2020, aja mu makomine agize igisagara  ca Bujumbura.Akaba yahereye urwo rugendo mu ntumbero kwiyamamaza kw’isoko ya Kinindo , hanyuma abandiriza muri zone Ruziba  mu bumanuko bw’igisagara ,acamuri zone Kanyosha hanyuma zone  Musaga,  ahingukira muri zone Rohero,akaba yarusozereye muri zone Kinindo aho abanyagisagara bagizwe ahanini n’urwaruka bari bamurindiriye kugira bumve imigambi n’imigabo yiwe.Dieudonné Nahimana yemereye abarundi ko ashaka ko Uburundi buba igihugu aho umuvukagihugu wese agira aho aho aramutwa ,nk’uko abarundi bakunda kuvuga ngo “gira aho uba wubahwe”kandi batarinze kwikokora cane ,bakongera bakarima bakorora bakaronka n’umusesekatra wo gushora. Yemereye abarundi kwitanga kugira abarundi banywane vy’ukuri,baronke amazi meza ,aho babaye ,umuyagankuba ,amavuriro n’ibitaro bikwiye, amasoko n’amashure n’izindi nyubako rusangi.Aha rero akaba yashimikiye kuburimyi, n’ubworozi, adasize inyuma guteza imbereigisatac’ubudandaji.Ku vyerekeye igisata c’inder,Nahimana Dieudonné yemereye abarundi kuzokinagura kugira hatangwe inyigisho z’akanovera zijanye n’ivyo abarundi bakenye mu bihe tugezemwo.Aha akaba yashimikiye  ku nyigisho z’imyuga mu ntumberoyo kurwanya ubushomeri, n’izishingiye ku kwitunganiriza imigambi n’ukwiyungunganya.Yaremereye urwaruka ruri mu mashure kuzobaronsa aho bashobora kwimenyereza akazi mu buzi butandukanye kugira baramutse baronse akazi bazobe babifisemwo uburambe.Yemereye abarundi koigihe bomwizera baka muhunda amajwi azokingira Uburundi  amacakubiri yongere abuteze imbere, n’ubwingenge bwabwo butsimbatare.
Mu ntara ya Cibitoke imyiyamamazo yagenze neza Mu ntara ya Cibitoke, imigambwe yari itegekanijwe kwiyamamaza kuri uyu wa 27 Ndamukiza 2020, ni CNL, UPRONA na PALIPE Agakiza, ariko umugambwe PALIPE Agakiza ukaba utashoboye gutunganya ivyo bikorwa muri iyo ntara. Uwurongoye uwo mugambwe mu ntara ya Cibitoke Sara Nkurunziza, yamenyesheje ko bashimye kwifandikanya n'abandi mu ntara ya Gitega ahariko habera itanguzwa nyezina ry'imyiyamamazo ku rwego rw'igihugu.  Uwurongoye umurwi ujejwe gutunganya amatora ku rwego rw'intara CEPI, Egide Ngendambizi, amenyesha ko kubazokwitoza ku rwego rw'Umukuru w'igihugu ari imigambwe CNDD-FDD, UPRONA, Sahwanya FRODEBU, CNL, urunani Kira-Burundi hamwe n'abigenga babiri, Dieudonné Nahimana na Francis Rohero. Nayo abazokwitoza ku rwego rw'abashingamateka akaba ari CNDD-FDD, UPRONA, FNL, Sahwanya FRODEBU, FRODEBU Nyakuri, APDR,CNL,n'uwigenga Cishahayo Elie Moses.Ku rwego rw'amakomine imigambwe izoba ifise abitoza mu nama mpanuzwajambo y'amakomine muri Cibitoke ni CNDD-FDD, UPRONA, CNL, Sahwanya FRODEBU na FNL.Nayo imigambwe PALIPE Agakiza izokwitoza muri komine imwe, urunani COPA 2020 ni muri komine zibiri na APDR muri komine zibiri. Muri komine Rugombo ku mutumba Rukana1 umugambwe UPRONA wiyamamaje, aho uwuwurongoye muri iyo komine, Célestin Havyarimana yamenyesheje imigabo n'imigambi y'uwo mugambwe, arongera arigisha abanywanyi uko bazotora. Imwe mu migambi mikuru mikuru bashira imbere muri iyo komine, harimwo gutsimbataza amahoro n'umutekano; kuronsa amazi meza abanyagihugu; kuronsa abafise amikoro make udukarata two kwivurizako hamwe no kwubaka inzu y'iratiro ahari amazi y'amashuha ku Ruhwa. Muri komine Buganda, ku mutumba Murambi, hiyamamarije umugambwe CNL. Erenest Nduwimana arongoye uwo mugambwe kuri uwo mutumba yamenyesheje imigambi mikuru mikuru bafise. Harimwo kuronsa amazi meza abanyagihugu n'umugambi wo kudandaza no guhingura ivyamwa. Twobamenyesha ko intara ya Cibitoke ifise intebe zitandatu z'abashingamateka zihiganirwa n'imigambwe indwi hamwe n'uwigenga umwe Elie Moses Cishahayo. 

Mu ntara ya Bururi: Ku munsi wo kwugurura imyiyamamazo nta n’umwe mu bahiganwa yimamaje
Mu ntara ya Bururi ku munsi wa mbere , igenekerezo rya 27 Ndamukiza 2020 naho wari umunsi wo kwugurura imyiyamamazo nta mugambwe n’umwe, inani z’imigambwe canke abigenga bariko bariyamamaza. Hasanzwe hemerewe guhiganwa, ku rwego rw’abashingamateka, imigambwe 9 hamwe n’urunani Kira-Burundi n’uwigenga umwe.  Iyo migambwe izohiganwa akaba ari: CNDD-FDD, UPRONA, FNL, Sangwe PDR, Sahwanya Frodebu, Sahwanya Frodebu Nyakuri,CNL, CDP, Kira-Burundi n’uwigenga yitwa Bernard Sindayihebura. Abazitoza mu makomine nabo ni :CNDD-FDD, UPRONA, CNL, Kira-Burundi muri komine Vyanda. Imigambwe ihiganwa muri komine Mugamba nayo ni CNDD-FDD, UPRONA, CNL, Sahwanya Frodebu, PSD Dusabikanye, urunani Kira-Burundi, abigenga Antoine Kantiza na Jean Claude Kantungeko. Muri komine Rutovu naho ni umugambwe CNDD-FDD, UPRONA, FNL, CNL n’urunani Kira-Burundi. Muri komine Songa naho ni CNDD-FDD, CNL, UPRONA, Sahwanya Frodebu na FNL. Muri komine Matana naho ni CNDD-FDD, CNL, UPRONA, Sahwanya Frodebu, FNL n’urunani Kira-Burundi. Muri komine Bururi naho ni CNDD-FDD, CNL, UPRONA, Sahwanya Frodebu, FNL, abigenga Thierry Harerimana, Dieudonné Manirakiza, Jean de Dieu Manirakiza na Bernard Sindayigaya. Abanyagihugu banditswe kugira bazotore bangana ibihumbi ijana na mirongo indwi n’icenda n’amajana ane na mirongo umunani n’icenda (179.489). Muri komine Bururi handitswe abantu 47.163, muri komine Matana abantu 28.104, Mugamba 33.222, komine Rutovu 24.144, Songa 28.384 nayo komine Vyanda 18.472. Amabiro y’amatora muri iyo ntara yose hamwe ni 533. Mu’zo hakabamwo 132 muri komine Bururi, Matana 78, Mugamba 100, Rutovu 74, Songa 85 na Vyanda 57. Ivyo biharuro vyose tukaba twabihawe n’abakozi bo muri CEPI Bururi.Naho abari mu mugwi wigenga ujejwe amatora bari bavuze ko ata n’umwe yatunganije imyiyamamazo mur’iyi ntara, haribonekeje irimwo abanywanyi b’umugambwe CNDD-FDD bambaye umwambara uranga uyo mugambwe, baririmba n’indirimbo zawo.

Kubwo urunani rw’ibimenyeshamakuru

 

Ubushikiranganji bw’umutekano burashima ukugene igikorwa co kwiyamamaza kiriko kiragenda

Ubushikiranganji bujejwe umutekano burashima ukugene igikorwa co kwugurura imyiyamamazo cagenze neza muri rusangi mbere cabandanije kigenda neza gushika ku munsiu ugira gatatu wo kwiyamamaza. Naho biri uko ubushikiranganji bw’umutekano bwaranebaguye inyifato n’ingendo mbi z’abanyamigambwe bamwe bamwe mbere n’abarongoye imigambwe bamwe bamwe. Ivyo vyashikirijwe n’umuvugizi w’ubushikiranaganji bw’umutekano Pierre Nkurikiye mu kiganiro yahaye abamenyeshamakuru ku wa 29 Ndamukiza 2020.Mu vyo ubwo bushikiranganji bunebagura Pierre Nkurikiye yatanze  akarorero k’ukugene vyagenze aho amenyesha ko ku munsi wa mbere igenekerezo rya 27 Ndamukiza 2020 mumugambwe CNL hibonekeje ibikorwa binyuranye n’amategeko ubushikiranganji butera ivyatsi. Yamenyesheje ko abanywanyi b’uwo mugambwe bagiriye nabi banywanyi bo mu yindi migambwe bari baciye aho bari biyamamariza barengana. Yavugaze ko banyuruje abantu bashika ku ndwi muribo hakaba umwe yakubiswe abaporisi bakaba bamutabaye aremvye. Uwo nawe ngo akaba yari yafashwe igihe c’isaha indwi ari mw’ibarabara riva i Ngozi rija i Gitega.

Uwundi yafashwe igihe c’isaha umunani n’inusu ari i Burengo bamuzanye inyuma y’ikibuga caberako igikorwa co kwiyamamaza bagira batangure kumugirira nabi nk’uwa mbere, igiporisi  gica kiratabara. Abandi batanu bafatiwe aho bita kwa Hamabari igihe c’isaha cumi na zibiri bariko babajana aho bita ku Nkaka  naho nyene abajejwe umutekano barashobora kubatabara. Ikindi cibonekeje n’uko bashitse mu gisagara ca Ngozi baciye biha amabarabara yose yo mu gisagara ca Ngozi ku buryo n’ababahunga babasangayo. Hari n’uwundi munywanyi wabo bakubise ari ku kibuga cariko kibereko imyiyamamazo bamwagiriza ko ariko arafata amafoto. Yamenyesheje ko abagize iyo nyifato igayitse bari mu bavuye mu zindi ntara. Ubwo bushikiranganji buranebagura imvugo ifobetse y’umukuru w’uwo mugambwe yo guhamagarira abanywanyi biwe kurwana n’abanywanyi b’iyindi migambwe. Yaboneyeho akaryo ko kumenyesha yuko abajejwe umutekano bacungera bose kugira abiyamamaza bishire bizane. Yarongeye amenyesha ko hagize uwubona ko umutekano wiwe ugeramiwe yotabaza abajejwe umutekano. Yarongeye amenyesha ko no ku wa 29 Ndamukiza hagiye haribonekeza inyifato zimwe zimwe zitabereye. Aho akavuga ko ku mitumba ya Kigangabuko na Kinyinya mu ntara ya Ruyigi abanywanyi ba CNL bakubise abantu babiri bavuye mu mirima harimwo uwitwa Elie Nyandwi na Thérence Ndayisenga. Ahandi ni ku misozi ya Mbasi na Mwitoye yo muri komine Tangara mu ntara ya Ngozi aho igihe c’isaha icenda abanywanyi b’umugambwe CNDD-FDD n’aba CNL barwanye ku buryo hari batatu bo muri CNL bakomeretse n’umwe wo muri CNDD-FDD. Ariko igiporisi  carahashitse kirahagarika n’abantu batanu harimwo babiri bo muri CNL na batatu bo muri CNDD-FDD. Ku musozi Mukenke mu ntara ya Kirundo naho harafashwe abantu bashika kuri batanu bagirizwa ko bashaka guhungabanya ibikorwa vy’umugambwe CNL. Ku misozi Nyankuba na Kinama muri komine Mubimbi intara ya Bujumbura abanywanyi b’umugambwe CNL barategerewe n’abantu bataramenyekana igihe c’isaha imwe y’ijoro barabakomeretsa. Yaboneyeho akaryo ko gukebura abantu bavuye mu myiyamamazo kugira isaha cumi na zibiri z’umugoroba bacambaye impuzu z’umugambwe. Pierre Nkurikiye yamenyesheje ko izo nyifato mbi zibonekeje ku banywanyi b’imigambwe ibiri. Naho hibonekeje izo nyifato mbi ngo ubushikiranganji bw’umutekano burashima ukugene ivyo bikorwa biriko biraba hakurikijwe amategeko. Ubwo bushikiranganji buhanura abanyagihugu kuvavanura n’ingendo yo kwihanira. Ababikora nabo batabihagaritse  abajejwe umutekano bazobafata babagirire amadosiye bayashikirize ubutungane. Kw’izina ry’ubushikiranganji Pierre Nkurikiye arashima  uko abiyamamaza bikingira ikiza ruhonyanganda ca Cornavirus. Abariko bariyamamaza basabwa kubandanya ibikorwa vyabo neza bisunga amategeko n’ivyo biyemeje mu gukorana n’abajejwe intwaro  n’umurwi CENI, kwubahiriza ibibanza baba bavuze ko bazokoreramwo kuko arivyo abajejwe umutekano baba bacungereye, bahinduye naho bamenyeko bica bitera umutekano muke.

Epitace Nduwayo

Janvier Niyonkuru     

 
Ouvrir