Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

ODECA : Urwaruka ruhamagariwe kwijukira amakoperative y’abarimyi b’ikawa kugira rwiteze imbere

manajUrwaruka rusabwa kwegera abayobozi b’uburimyi n’ubworozi bo muma komine no mu ntara kugira barufashe kurwereka inzira ibereye yoruteza imbere biciye mu bisata bitandukanye harimwo ic’ikawa. Ivyo vyamenyeshejwe n’umuyobozi w’ikigo ODECA Emmanuel Niyungeko mu kiganiro yahaye ikinyamakuru UBUMWE k’igenekerezo rya 27 Rusama 2020.Nk’uko yabimenyesheje, ngo igisata c’ikawa mu myaka yaheze kuva aho Reta ikuriyemwo akarenge kigahabwa abikorera ivyabo, vyarabonetse y’uko urwaruka rwagiye rudebukirwa buke buke, arico gituma ubu Reta yagarukanye ijisho n’ikirenge ku gisata c’ikawa. Ivyo vyaganiriweko mu nama zagiye ziraba barabona ko hari icokorwa kugira ngo igisata c’ikawa gishobore kugira uburambe bifatiye ku rwaruka rw’ubu n’uruzovuka.

Yaciye aremesha Abarundi abamenyesha ko urwaruka ari rwinshi rufise n’ubumenyi ashima kandi ko mu mashure nshingiro ruriko ruriga ivyoruteza imbere biciye mu migambi mito mito. Niko guca amenyesha ko vyumvikana ko mu mugambi w’ikawa bashira imbere guteza imbere urwaruka biciye mu kunagura no guteza imbere igisata c’ikawa. Ariko rero urwaruka ngo ntirwahawe akanya gakwiye ko kumenyeshwa uruhara rwabo mugisata c’ikawa, ugasanga naho biruko bariko bagira inguvu ngo bashobore gukurikirana ico giterwa. Yaheraheje arutera akamo ngo ruhindure ingendo mu kwegera abayobozi b’uburimyi n’ubworozi mu makomine no mu ntara ndetse no mu kigo ODECA kugira barufashe kurwereka inzira ibereye yoruteza imbere biciye mu bisata bitandukanye harimwo igiterwa c’ikawa. Ariko rero intambwe ya mbere ngo n’ukugira ishaka no kugira umwitwarariko wo gukora ikintu kuko uburyo buri mu bantu , bisubiye ngo abantu na cane cane urwaruka barahimirizwa kuja mu makoperative atandukanye. Nico gituma urwaruka rutosigara inyuma muri ayo makoperative kuko ariho rushobora kuronkera vya nkenerwa, ubwenge, ubuhinga, ndetse no mu ntererano baba bashize hamwe bagashobora kwiteza imbere,  Reta nayo ikabandanya ibashigikira nk’uko ishigikira Abarundi bose. 

Evelyne Niyonzima

 

Urwego CNC rurashima igikorwa caranguwe n’urunani rw’ibimeshamakuru co gukurikirana uko amatora aheruka yagenze

mapaUrwego rujejwe gukurikirana ingene  ibimenyeshamakuru bikora CNC rurakengurukira abarongoye ibinyamakuru vyakoreye mu runani hamwe n’abamenyeshamakuru baranguye igikorwa co gushikiriza amakuru yerekeye itunganywa ry’amatora kuko berekanye ko bazi umwuga wabo, berekana n’umutima wo gushira imbere ineza ya bose. Ivyo vyamenyeshejwe n’uwurongoye urwego CNC Nestor Bankumukunzi mw’itangazo yashikirije kw’igenekerezo rya 2 Ruheshi 2020 rijanye n’ingene abamenyeshamakuru bakoze imbere y’amatora yo ku wa 20 Rusama 2020, muriyo n’inyuma yayo.  Nk’uko Bankumukunzi yabimenyesheje, ngo imbere y’uko amatora aba, ikigo CNC cari casavye ko ibinyamakuru vy’igihugu biha umwanya ku rugero rumwe abiyamamaza ngo bashikirize imigabo n’imigambi yabo. Ngo bari basavye ko ibinyamakuru vy’abigenga navyo nyene vyoterera muri ico gikorwa co gufasha abiyamamaza gushikiriza imigambi yabo kandi ngo uko vyari vyateguwe niko vyagenze. Niko guca amenyesha ko abamenyeshamakuru bashika 340 baserukira ibinyamakuru 49 bakoreye hamwe mu gushikiriza amakuru ajanye n’ingene imyiyamamazo yatanguye hamwe n’ingene amatora yagenze bongera baranamenyesha ibiharuro vya mbere vy’imfatakibanza vyavuye mu matora. Yarongeye amenyesha ko ico gikowa bagikoranye ubuhinga n’umwitwarariko kugira abantu bose bashoboye kuronka amakuru akwiye kandi ateguwe neza. Ngo mu gihe c’imyiyamamazo ibinyamakuru vyakoze kimwe cose ukwaco bivanye n’uburyo n’umwanya vyari bifise ariko ngo uko vyari kwose ababikeneye barashoboye gukurikira neza ingene imyiyamamazo yariko iragenda babifashijwemwo n’ivyo binyamakuru nyene. Ku bijanye no gushikiriza imigabo n’imigambi y’abiyamamaza, ngo ibinyamakuru vy’igihugu vyaratanze umwanya ungana n’iminota cumi n’ibiri, abavyifuje bakaba barashoboye gukoresha ako kanya mu gushikiriza imigambi borangurira abanyagihugu mu gihe botorwa. Ikindi naco ngo mw’ijoro ryo ku wa 20 Rusama 2020 na bukeye bwaho, abamenyeshamakuru bahurikiye mu runani ntibaryamye naho bari barushe, ngo biriwe barakora barara barakora bongera birirwa barakora mu ntumbero yo kumenyesha ingene amatora yariko aragenda n’ibiharuro mfatakibanza vy’intangamarara vyayavuyemwo. Yarongeye amenyesha ko kubera uko kwitanga, umwete n’ubwira abamenyeshamakuru bakoranye, Abarundi n’amakungu bashoboye kumenya ingene amatora yariko aragenda kuko babaye ijisho n’ugutwi vy’uwipfuza wese kuronka amakuru ajanye n’ico gikorwa cari gihambaye ku gihugu. Ngo ibikorwa baranguye mu nteguro y’amatora vyarafashije bimwe biboneka mu kumenyesha abanyagihugu ingene amatora yari atunganijwe, ikirangaminsi cayo, inyifato yari kubaranga ijanye no kwirinda imvugo ibiba urwanko canke iteranya. Yarasavye abamenyeshamakuru kubandanya bakora neza kuko amatora atararangira kandi ikiringo c’inyuma y’amatora kibasaba kuguma bamenyesha ingene ibikurikira amatora biriko biragenda, yarongeye abasaba ko uwoba yarihenze yogerageza gukora neza gusumba gutyo ngo amategeko agenga umwuga wo kumenyesha amakuru n’ubuhinga bujanye nawo bibe arivyo vyonyene bibabera ishimikiro. Yaheraheje akengurukira abafashije  bose harimwo Reta y’Uburundi, umurwi wigenga ujejwe gutegura amatora ingene wakoranye neza n’abamenyeshamakuru, atibagiye abashigikiye ihiganwa ry’abamenyeshamakuru mu gushikiriza amakuru n’ibiganiro vyafashije gusumba ibindi kugira amatora agende neza.

Evelyne Niyonzima

 

Abantu 63 nibo bamaze kwandura umugera COVID-19 ku bantu 1058 bamaze gupimwa

Abantu bamaze gupimwa kugira barabe ko batanduye umugera wa Coronavirus mu Burundi bashika 1058 muribo 63 bakaba aribo basanze bamaze kwandura uwo mugera. Muri abo banduye 33 muribo barakize, 29 baracavurwa nayo umuntu umwe akaba ariwe amaze guhitanwa n’ico kiza. Ivyo vayshikrijwe n’umushikiranganji w’amagara y’abantu no kurwanya SIDA, muganga Thaddée Ndikumana mu kiganiro yahaye abamenyeshamakuru ahejeje gukoresha inama abajewe ubuvuzi bo mu ntara zose. Muri iyo nama bariko bashikiriza igitabu canditswe n’abahinga b’abarundi ku kugene abantu bokwifata muri kino gihe c’ikiza ca COVID-19. Umushikiranganji Thaddée Ndikumana yamenyesheje ko ivyo biri mu mice itatu, ubwa mbere ukaba ari ugukurikiza ingingo zafashwe na Reta, ubwa kabiri gupima abanyagihugu hamwe n’imiti yohabwa abanduye uwo mugera. Izo ngingo rero ngo ni izogenderwako mu kurindira ko ishirahamwe mpuzamakungu rijejwe amagara y’abantu  (OMS) rishikiriza neza ingingo ngenderwako igihugu cose cokwisunga. Yamenyesheje ko icibonekeza muri kino gihe ar’uko abantu batanguye guhororokerwa mu gukurikiza ingingo yo gukaraba yafashwe na Reta. Niko gusaba abarundi kubandanya bakurikiza iyo ngendo nziza kuko kiretse gukinga COVID-19 ifasha no gukinga izindi ndwara zifataira kw’isuku rike. Muganga Thaddée Ndikumana yarongeye amenyesha ko abaganga bobandanya bavura abantu barwaye izindi ndwara nk’uko vyahora. Aho akamenyesha ko abantu barwaye nk’umugera wa Sida bobandanya bafata imiti yo gufupfahaza nk’uko vyahora kuko vyibonekeje ko hari bahororokewe. Yamenyesheje ko n’abarwaye marariya, n’izindi ndwara zidakira nk’igisukari, ivuduka ry’umurindi w’amaraso, n’izindi kubandanya bafata imiti kuko bayihagaritse izo ndwara arizo zica zibahitana. Yarongeye amenyesha ko abantu babangamiwe mu Burundi ari urugero rw’abari hagati y’imyaka 35 na 44. Ibitaro abarwaye COVID-19 bavurirwako gushika ubu ni ibitaro Roi Khaled, ibitaro vy’abasirikare vyo mu Kamenge, Kira na BUMEREC. 

Epitace Nduwayo

 

Umuhuza w’Abarundi yarakeje abo bose batumye amatora yo ku wa 20 Rusama 2020 agenda neza

6665544Umuhuza w’Abarundi Edouard Nduwimana amenyesha ko yakiranye urweze ivyavuye mu matora y’Umukuru w’igihugu n’abashingamateka yo ku wa 20 Rusama 2020 nk’umuhuza w’Abarundi n’imvukagihugu. Yaboneyeho akaryo ko gukeza Abarundi bose bitabiriye amatora n’abo bose bagize uruhara kugira habe intambwe nk’iyo mu gutsimbataza demokarasi. Hari ku wa 25 Rusama 2020 mw’ihoteri « Club du Lac » mu gihe umukuru w’umugwi CENI Pierre Claver Kazihise yari ahejeje gushikiriza ibiharuro mfatakibanza vyavuye mu matora y’Umukuru w’igihugu n’ay’abashingamateka. Akaba rero yarashimiye Umukuru w’igihugu Petero Nkurunziza yafashe ingingo yo kudasubira kwitoza, agashira imbere umwe mubo basangiye umugambwe kugira yitoze. Mu bagize uruhara muri ayo matora akaba yarakeje abagize umurwi CENI, abamenyeshamakuru n’abajejwe umutekano kuko bagize uruhara kugira amatora abe meza. Yamenyesheje ko urwego rw’umuhuza rwari rwarabagirishije inama nyinshi mu ntumbero yo gutunganya amatora meza. Yarongeye arakeza abarushije abandi ahereye ku waserukiye umugambwe CNDD-FDD n’abashingamateka bose barushije abandi. Yarongeye atera intege abatatowe kugira bitegurire amatora azokurikira. Umuhuza w’Abarundi yarongeye amenyesha ko ayo matora yerekanye ibitari bike ku buryo Abarundi bamaze kubona ko ivyo bapfa kera vyataye igihe. Aho akamenyesha ko demokarasi yateye iyindi ntambwe mu gutsimbatara mu Burundi umuntu aravye ukungene Abarundi bitabiriye ayo amatora mbere bakayitabira batekanye.

Ivyo bikerekana ko Abarundi bose hamwe bafatanye mu nda vyose bishoboka. Ikindi cigwa gikomeye ni ukubona Abarundi bitunganiriza amatora ata buryo buvuye hanze, iyo ikaba intambwe nshasha mu gihugu c’Uburundi. Ikindi yakuyemwo ngo n’uko hari ibibazo biriko birarangira umuntu aravye ukungene amatora yagenze mu ntara zitandukanye. Yamenyesheje ko batoye imigambwe mu butandukane bw’amoko n’ibindi. Akamenyesha ko abanyeporitike bakwiye kubona ko aribo babazanamwo amacakubiri bashaka gushika ku nyungu zabo. Ikindi n’uko Abarundi bamaze gutahura inyungu zabo ku buryo wasanga hari abatoye Umukuru w’igihugu ku bashingamateka naho bagatora abari mu mugambwe wundi kubera bamaze kubona abobagirira akamaro arico gituma amajwi y’abatoye. Umukuru w’igihugu atandukanye n’ayo abashingamateka. Yarongeye atera akamo abanyeporitike bahiganywe kugwana mu nda, abakabona yuko muri poritike atawutsinda kandi atawutsindwa. Aho akamenyesha ko ari demokarasi yatsinze aravye amajwi bamwe n’abandi baronse. Ikindi bakwiye kwibuka ni ugushira mu ngiro ivyo bemereye abanyagihugu. Yarongeye asaba abarundi kwirinda imvugo canke ingendo yotuma intambwe ya demokarasi umunyagihugu ahejeje gushikako ataronka inyungu zayo. Abanyagihugu nabo hamwe n’abajejwe umutekano abasaba kubungabunga amahoro n’umutekano ku neza yabo n’iy’igihugu.

Epitace Nduwayo  

 

Mu Nama Nshikiranganji Umugambi urashe mpuzabisata ugira kabiri utuma abanyagihugu bashobora gufungura neza waremejwe

minintrUmugambi urashe mpuzabisata ugira kabiri utuma abanyagihugu bashobora gufungurira neza PSMSAM II warihwejwe wongera uremezwa n’Inama Nshikiranganji yakoranye ku wa 27 Rusama 2020, ku murwa mukuru wa poritike i Gitega irongowe n’Umukuru w’igihugu Petero Nkurunziza. Uwo mugambi washikirijwe n’ibisata vyo mu biro vy’Icegera ca kabiri c’Umukuru w’igihugu.  Abashikiranganji barongeye barihweza n’izindi ngingo zikurikira  :

Integuro y’itegeko nshikiranganji rijanye no gushira ku rugero rumwe imishahara y’abakozi bo mu maporoje Reta itunganya ifashanije n’amashirahamwe n’ibihugu bigenzi vy’Uburundi.Isuzumwa mw’ido n’ido ry’ishirahamwe rijejwe ivyo kwunguruza abantu n’ibintu n’indege Air Burundi rifatanye n’isuzumwa ry’ishirahamwe rijejwe gutunganya imirimo itandukanye ijanye n’uruja n’uruza rw’indege ku kibuga c’indege ca Bujumbura SOBUGEA mu ntumbero yo gushinga agaciro k’ubutunzi bw’ayo mashirahamwe yompi muri ibi bihe hamwe n’ugutanga intumbero itomoye yo gusubiramwo no kuzamura ishirahamwe Air Burundi no guteza imbere ubushobozi bw’ishirahamwe SOBUGEA. Izo ngingo zompi zashikirijwe n’umushikiranganji w’ikigega ca Reta, no gufashanya mw’iterambere ry’ubutunzi.Integuro y’itegeko ryegurira uwitwa Gafeteri Gerard ikibanza kigenewe gushingamwo ihinguriro.Iyo nteguro yashikrijwe n’umushikiranganji wo gutwara abantu n’ibintu,ibikorwa vya Reta, hamwe n’itunganywa ry’amatongo. Integuro y’itegeko ryerekeye itangwa ry’uruhusha rwo gukora ubushakashatsi ku butare bw’akabuyenge mu karere ka Minago-Murago(province Rumonge) kw’ishirahamwe FEMINGO-SPRL.Urwandiko rwerekeye intumbero yokwisungwa mw’isubirwamwo ry’inzego ishirahamwe ritanga amazi n’umuyagankuba REGIDESO rikukira. Izo ngingo uko ari zibizi  zashikirijwe n’umushikiranganji w’amazi meza, amasoko ntanganguvu hamwe n’ubutare.


Vyahinduwe mu Kirundi na 

Jean Robert Nshorirambo

 

Ibiharuro mfatakibanza vyerakana ko CNDD-FDD uza kw’isonga mu matora yo ku wa 20 Rusama 2020

Ibiharuro mfatakibanza vyashikirijwe n’Umukuru w’umugwi w’igihugu wigenga ujejwe amatora CENI ku wa 25 Rusama 2020 vyerekana ko mu matora y’Umukuru w’igihugu yabaye ku wa 20 Rusama 2020 umugambwe CNDD-FDD uza kw’isonga  n’amajwi 3.082.210 ni ukuvuga ibice 68,72 kw’ijana, umugambwe CNL uza ubwa kabiri n’amajwi 1.084.788 ni ukuvuga ibice 24,19 kw’ijana nayo umugambwe UPRONA ubwa gatatu n’amajwi 73.353 ni ukuvuga ibice 1,64 kw’ijana. Ibiharuro mfatakibanza vyashikirijwe n’Umukuru w’umugwi w’igihugu wigenga ujejwe amatora CENI ku wa 25 Rusama 2020 vyerekana ko mu matora y’Umukuru w’igihugu yabaye ku wa 20 Rusama 2020 umugambwe CNDD-FDD uza kw’isonga  n’amajwi 3.082.210 ni ukuvuga ibice 68,72 kw’ijana, umugambwe CNL uza ubwa kabiri n’amajwi 1.084.788 ni ukuvuga ibice 24,19 kw’ijana nayo umugambwe UPRONA ubwa gatatu n’amajwi 73.353 ni ukuvuga ibice 1,64 kw’ijana. 

Umugambwe CNDD-FDD ufise ibice 68,02 kw’ijana uza kw’isonga mu matora y’abashingamateka n’intebe 72 
Mu matora y’abashingamateka umugambwe CNDD-FDD uza kw’isonga n’amajwi 3.036.286 ni ukuvuga ibice 68,02 kw’ijana,  umugambwe CNL uza ubugira kabiri n’amajwi 1.001.230 ni ukuvuga ibice 22,43 nayo umugambwe UPRONA uza ubwa gatatu amajwi 108.865 ni ukuvuga ibice 2,44 kw’ijana. Iyo migambwe itatu akaba ariyo ifise n’intebe mu Nama Nshingamateka aho umugambwe CNDD-FDD ufise intebe 72, umugambwe CNL intebe 27 nayo Uprona intebe imwe. Abatoye bangana 4.464.359 ku bantu bari banditswe bangana 5.113.418, ni ukuvuga ko abatoye bagera ku rugero rw’ibice 87,31 kw’ijana. Amajwi yabaye impfagusa yari 91.701 ni ukuvuga ibice 2,05 kw’ijana nayo amajwi y’abatatoye  hamwe angana 95.004 ni ukuvuga ibice 2,13 kw’ijana. Ariko mu ntumbero yo gukosora ubusumbasumbane bwibonekeje ku bijanye n’ubwoko n’uguserukirwa kw’abakenyezi hakazokwongerwamwo abashingamateka 21 b’abatutsi barimwo abakenyezi 15 n’abagabo 6. Hazokwongerwamwo n’abserukira ubwoko bw’abatwa hakurikijwe ingingo y’108 y’Ibwirizwa rigenga amatora; gutyo bose hamwe babe 24 bongeweko.  Umukuru w’umugwi CENI Pierre Claver Kazihise yaciye ashikiriza intebe umugambwe wose, muri iyo itatu ya mbere yashikanye ibice birenga 2 kw’ijana, waronse ku ntara ku ntara. Muri komine Bubanza umugambwe CNDD-FDD waronse amajwi 174.983 uca uronka intebe 3, umugambwe CNL uronka amajwi 31.942 uca uronka intebe 2. mu natara ya bujumbra umugambwe CNDD-FDD waronse amajwi 185.907 uca utahukana intebe 4, CNL amajwi 86.378 n’intebe 2 nayo UPRONA amajwi 3.463. Mu ntara ya Bururi CNDD-FDD waronse amajwi 66.499 n’intebe 2, CNL amajwi 57.071 n’intebe 2 nayo UPRONA amajwi 7.486. Mu ntara ya Cankuzo CNDD-FDD waronse amajwi 88.794 n’intebe 2, CNL amajwi 30.214 n’intebe 1; nayo UPRONA amajwi 6.183.  Mu ntara ya Gitega CNDD-FDD waronse amajwi 297.915 n’intebe 7, umugambwe CNL amajwi 58.712 n’intebe 2, UPRONA amajwi  8.779. Mu ntara ya Karusi CNDD-FDD waronse amajwi 210.541 n’intebe 6, CNL amajwi 14.157 nayo UPRONA amajwi 3.557. Mu ntara ya Kayanza CNDD-FDD waronse amajwi 210.541 n’intebe 5, CNL amajwi 14.157 n’intebe 2 ; nayo UPRONA amajwi 3.557.  Mu ntara ya Kirundo CNDD-FDD waronse amajwi 244.435 n’intebe 6, CNL amajwi 53.477 n’intebe 2; nayo UPRONA amajwi 5.777. Mu gisagara ca Bujumbura CNDD-FDD waronse amajwi 104.342 n’intebe 2, umugambwe CNL amajwi 144.519 n’intebe 3, UPRONA amajwi 14.389 n’intebe 1. Mu ntara ya Makamba CNDD-FDD waronse amajwi 158.508 n’intebe 3, CNL amajwi 144.519 n’intebe 2 nayo UPRONA amajwi 6.912. Mu ntara ya Muramvya CNND-FDD amajwi 122.989 n’intebe 3, CNL amajwi 21.827 n’intebe 1, UPRONA amajwi 8.874. Mu ntara ya Muyinga CNDD-FDD amajwi 271.234 n’intebe 7, CNL amajwi 48012 n’intebe 1. Mu ntara ya Mwaro CNDD-FDD waronse amajwi 66.774 n’intebe 2, CNL amajwi 42.188 n’intebe 1, UPRONA amajwi 10.792. Mu ntara ya Ngozi CNDD-FDD amajwi 210.541 n’intebe 5, CNL amajwi 14.157 n’intebe 2, UPRONA amajwi 3.557.  Intara ya Rumonge CNDD-FDD ufise amajwi 130.553 n’intebe 3, CNL amajwi 62.691 n’intebe 1, UPRONA amajwi 655. Mu ntara ya Rutana CNDD-FDD amajwi 121.908 n’intebe 3, CNL amajwi 43.136 n’intebe 1, UPRONA amajwi 2.576. Mu ntara ya Ruyigi CNDD-FDD amajwi 140.625 n’intebe 4, CNL amajwi 34.329 n’intebe 1, UPRONA 4.419. Pierre Claver Kazihise yarongeye arashikiriza amazina y’abashingamateka batowe ku ntara ku ntara: Mu ntara ya Bubanza ni Côme Manirakiza umuhutu, Olivier Suguru umututsi, Sylvie Nizigama umuhutukazi bo muri CNDD-FDD hamwe na Alexis Manirakiza umuhutu wo muri CNL.

Mu ntara ya Bujumbura naho hatowe Zénon Ndaruvukanye umuhutu, Jean Pierre Sinzikayo umututsi, Suada Mboneko umuhutukazi, Dieudonne Nahimana umuhutu bo muri CNND-FDD, Jean Berchmas Mbanye umuhutu na Didace Nzambimana umuhutu bo muri CNL. Mu ntara ya Bururi naho hatowe Athanase Hatungimana umututsi, Petronie Bucumi umuhutukazi, bose bo muri CNDD-FDD hamwe na Lyduine Habarugira umuhutukazi na Emile Manirakiza umuhutu bo muri CNL. Mu ntara ya Cankuzo hari Salvator Bigirimana umuhutu, Elodie Niyonkuru umuhutukazi, bo muri CNDD-FDD na Antoinette Ndikumagenge umuhutukazi wo muri CNL. Mu Cibitoke Dr Joseph Butore umuhutu, Emmanuel Bigirimana umututsi, Alice Niyitunga umuhutukazi, Justin Niyobuhungiro umuhutukazi  bo muri CNDD-FDD; Simon Bizimungu umuhutu na Donathile Bacimisi umuhutu bo muri CNL. Mu ntara ya Gitega hatowe Lazare Mvuyekure umuhutu, Venant Sinzikayo umuhutu, Jeanne Marie Ntagahoraho umututsi, Zainabu Nzeyimana umuhutukazi, Denis Karera umuhutu, Desiré Butoyi umututsikazi, Suavis Habonrugira umuhutukazi bo muri CNDD-FDD hamwe na Thérence Manirambona umuhutu na Marie Immaculée Ntacobakimvuna umuhutukazi bo muri CNL. Mu ntara ya Karusi ni Léonidas Nakumuryango umuhutu, Euphrasie Nakamana umuhutu, Evariste Kayobera umututsi, Dieudonné Ndizeye umututsi, Nadine Barampama umuhutu na Céline Nijimbere bo muri CNDD-FDD. Mu ntara ya Kayanza Daniel Gelase Ndabirabe umuhutu, Patrice Nduwimana umuhutu, Sylvestre Ngendakumana umututsi, Pierre Claver Niyubahwe umuhutu, Anicet Ndayizeye umututsi bo muri CNDD-FDD hamwe na Léopold Hakizimana umuhutu na Jean Marie Harahagazwe umututsi bo muri CNL. Mu ntara ya Kirundo Rémy Bigerumusase umuhutu, Benigne Nishimwe umuhutu, Antoinette Nibizi umututsikazi, Jean Claude Hasabintwari umuhutu na Cathérine Rwasa umututsikazi bo muri CNDD-FDD hamwe na Révérien Banteyebwoba umuhutu na Ildephonse Baryanintimba umuhutu bo muri CNL. Igisagara ca Bujumbura Elias Buregure umututsi na Georges Hakizimana umuhutu bo muri CNDD-FDD, Bernard Ndayisenga umuhutu, Pascal Gikeke umuhutu, Alice Inamuco umututsikazi bo muri CNL hamwe na Gaston Sindimwo wo muri UPRONA.  Mu ntara ya Makamba hari Zachée Misago umuhutu, Janvière Ndirahisha umuhutukazi, Dévote Ntisumbwa umututsikazi bo muri CNDD-FDD, Onésphore Nijimbere umuhutu na Laurent Harushimana umuhutu bo muri CNL. Muramvya ni Emmanuel Niyungeko umuhutu, Silas  Niragira umuhutu na Frebonie Nizigiyimana umtutsikazi bo muri CNDD-FDD hamwe na Nicodème Nduwimana umuhutu wo muri CNL. Intara ya Muyinga Sabine Ntakarutimana umuhutukazi, Martin Nivyabandi umututsi, Rédempteur Gahatira umuhutu, Hassan Nduwimana umuhutu, Aline manirambona umuhutu, Jean Manirabarusha umuhutu, Jean Nshimirimana umututsi na marie Ros Ndayishimiye umututsi, bo muri CNDD-FDD na pamphile Malayika wo muri CNL. Mu ntara ya Mwaro naho Appolinaire Sindayikengera umuhutu, Bernadine Nduwimana umututsikazi bo muri CNND-FDD na Zénon Bigirimana umuhutu wo muri CNL. Mu ntara ya Ngozi Claude Nahayo umuhutu, Dieudonné Hiboneye umututsi, Justine Mpawenayo umuhutu, Constantin Niyonzima umuhutu, Epimeny Nibizi umututsi, Jacqueline Nkurunziza umuhutu bo muri CNDD-FDD, Agathon Rwasa umuhutu na Felix Mpozeriniga bo muri CNL. Mu ntara ya Rumonge naho Tharcisse Rutumo umuhutu, Solène Ngendakumana umututsi, Déo Nduwimana umuhutu bo muri CNDD-FDD na Obed Ntakiyiruta wo muri CNL. Mu ntara ya Rutana naho ni Révérien Nahayo umuhutu, Parfait Mboninyibuka umututsi, Francine Manirakiza umuhutukazi, bo muri CNDD-FDD na Bède Nyandwi wo muri CNL. Mu ntara ya Ruyigi naho ni Nestor Ntahontuye umuhutu, Jocqy Chantal  Nkurunziza umututsikazi, Tharcien Gahungu umuhutu, Marie Rose Niyonsaba umuhutukazi bo muri CNDD-FDD na Pascal Bizumungu umuhutu wo muri CNL. 
Epitace Nduwayo

 
Ouvrir