Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abanyagihugu bararonkejwe inyigisho zerekeye irondoka rijanye n’amagara meza

Nata2Umugambi w’igihugu ujejwe irondoka rijanye n’amagara meza, PNSR, waratunganije inyigisho ku benegihugu bo muri komine Mutimbuzi intara ya Bujumbura zerekeye irondoka rijanye n’amagara meza. Izo nyigisho zatanzwe kuva ku wa 23 gushika ku wa 25 Rusama 2017mu bibanza bitandukanye muri iyo komine nko ku musozi Mushasha ya kabiri, imisozi ya Buhanda na Kinyinya ya gatatu, ngo kabaye akaryo keza ko gushishikara kwumvisha abanyagihugu baba mu ntara y’ubuvuzi ya Bujumbura ko kwibaruka ku rugero bifise ingaruka nziza cane kuri bo nk’uko vyashikirijwe na Sinzinkayo Philbert asanzwe akora mu mugambi w’igihugu ujejwe irondoka rijanye n’amagara meza (PNSR) yari yishikiye muri iyo komine nk’umwigisha. Yanavuze ko intara y’ubuvuzi ya Bujumbura iri mu ntara z’ubuvuzi ziza imbere y’izindi mu kwumva umugambi w’irondoka rijanye n’amagara meza. Umuhinga Philbert Sinzinkayo yasavye abanyamutimbuzi gukoresha uburyo bwa kijambere bwo kuvyara ku rugero ku neza y’imiryango yabo. Yabasavye kuvyara bake kugira ngo babategurire kazoza. Abanyamutimbuzi barigishijwe ko uburyo bwa kijambere bwo kuvyara ku rugero ku neza y’imiryango ari urushinge. Urwo na rwo ngo rukoreshwa n’umugore canke umwigeme. Ngo baterwa urwo rushinge rimwe mu mezi atatu iyo bari mu butinyanka canke bazi neza ko batibungenze. Ngo urwo rushinge rubuza urubuto rw’umugore guhishira n’ibindi. Ikindi gikoreshwa ngo ni akanyuzi, ibinini, akagegene, agapfuko k’umugabo, agapfuko k’umugore no gupfunga burundu. Inyuma y’izo nyigisho abazitavye baciye bakurikirana amareresi yerekana ivy’irondoka rijanye n’amagara meza. Inyuma y’izo nyigisho abazitavye baca babazwa ibibazo bitandukanye vyerekeye irondoka rijanye n’amagara meza. Abatoye inyishu nabo bagaca bashikirizwa udushimwe. Ikindi giheza kigakorwa muri ico gihe ni ukwakira uwo wese hari ico aba afise abaza kijanye n’ukuvyara ku rugero eka mbere abahinga b’abavuzi baraheza bakakira n’abo bose bipfuza kwipimisha umugera wa SIDA. Muri iyo komine nko muri zone Gatumba, abipimishije bashika 13 nta n’umwe vyagaragaye ko afise umugera wa SIDA. Mu kurangiza izo nyigisho haratanzwe udutabu ku banyagihugu bose bazitavye, utwo na two tukaba turimwo izo nyigisho kugira ngo bashishikare kuzisomera mu mihana yabo. Umuhinga Philbert Sinzinkayo yamenyesheje ko yasanze abanyagihugu bo muri komine Mutimbuzi bakeneye kuronswa izo nyigisho hateguwe ubundi buhinga bwo kuzitanga bwotuma zishikira benshi. Ngo yasanze nko mu Gatumba batiteguriye kuzikurikirana kuko haje bake cane. Kandi ngo muri ako karere haravugwa ubushurashuzi burenze kuko umugenzo wo guharika wahatse indaro. Yasavye abarongoye abandi muri ako karere ko bokora cane mbere bakanashikiriza icokorwa kugira ngo abenegihugu benshi bashobore kuronswa izo nyigisho.

Nathan Ntahondi

 

Mu ntara ya Bujumbura : Ngo abanyagihugu barakoresha cane uburyo bwa kijambere bwo kuvyara ku rugero

Nata 1Uwurongoye igisata kijejwe guhimiriza abanyagihugu guhurumbira irondoka rijanye n’amagara meza mu mugambi w’igihugu ujejwe irondoka rijanye n’amagara meza, PNSR, Sadique Niyonkuru arashimira cane akongera agahimiriza abanyagihugu bo mu ntara y’ubuvuzi ya Bujumbura kwijukira kurusha irondoka rijanye n’amagara meza kuko ngo bari mu ntara za mbere z’igihugu zimaze gushika ku rugero rushimishije mu gukoresha uburyo bwa kijambere bwo kuvyara ku rugero. Ivyo yabishikirije mu kiganiro yahaye ikinyamakuru UBUMWE ku wa 23 Rusama 2017 aho asanzwe arangurira imirimo mu nyubakwa za PNSR i Bujumbura. Nimukurikire ido n’ido ry’ico kiganiro.

UBUMWE : Mbega mu guhimiriza abanyagihugu guhurumbira irondoka rijanye n’amagara meza mu bigenza gute ?

Sadique Niyonkuru : Muri kino gihe mu Burundi hari umurindi munini w’irwirirana ry’abantu kandi amikoro yabo atari menshi. Nico gituma tubigisha kuvyara ku rugero kuko biheza bigafasha imiryango mu butunzi mbere bigatuma n’amagara akingirwa kurusha. Eka mbere na Reta iraheza agakoresha uburyo buke mu gihe atarwirirana rirenze urugero ry’abantu ririho. Twigisha rero abanyagihugu gukoresha uburyo bwa kijambere bwo kuvyara ku rugero ku neza y’imiryango. Kuko kuvyara bake bituma bishoboka kubategurira kazoza keza.

UBUMWE : Hari ico mwishimira mwoba mu maze gushikako muri uwo mugambi wo kuvyara ku rugero ?

Sadique Niyonkuru : Turamaze gukora ibitari bike mu ntara zitandukanye z’igihugu aho benshi bariko baritabira umugambi wo kuvyara ku rugero. Reka mbere ntange nk’akarorero. Intara y’ubuvuzi ya Bujumbura ni imwe mu ntara z’igihugu zikoresha bimwe biboneka uburyo bufasha kwirinda gusama imbanyi utabiteguye. Muri iyo ntara y’ubuvuzi mu mwaka w’2015 abakoresheje uburyo bwa kijambere bwo kuvyara ku rugero bangana n’ibice 35,7 kw’ijana mu gihe mu mwaka w’2016 bwanganye n’ibice 49,8 kw’ijana. Muri uwo mwaka w’2016, abakenyezi bibarukira kwa muganga banganye n’ibice 65,4 kw’ijana mu gihe ibitigiri vyerekana ko abakenyezi bibarukiye kwa muganga mu gihugu cose bangana n’ibice 79,76 kw’ijana. Muca mwumva ko iyo ntara y’ubuvuzi ya Bujumbura ariy’akarorero. Ariko rero naho biri uko ngo nta nyambo ibura agahonzi, muri iyo ntara ibiharuro vyerekana ko abakenyezi bashika ibice 34,6 kw’ijana bavyarira mu mihana yabo. Ni co gituma dusaba abakenyezi bose bo mu ntara y’ubuvuzi ya Bujumbura ko bokwama bibarukira kwa muganga kuko baheza bagakingira amagara y’abo n’ayibibondo vyabo.

Nathan Ntahondi

 

Umunsi mukuru mpuzamakungu wahariwe ubuhinga bwa none bwo gutumatumanako amakuru : Umugambi wo gushiraho ikigo cohuriramwo inkuru zose ngo uriko urategurwa

ruruiNgo mu Burundi umugambi wo gushiraho ikigo cohuriramwo inkuru zose ziri hirya no hino mu buzima bw’igihugu (big data) uriko urategurwa. Ivyo vyashikirijwe n’umushikiranganji wo gutumatumanako amakuru Nestor Bankumukunzi mu nama yari yatunganijwe igihe hari haramutse hahimbazwa umunsi mpuzamakungu wahariwe ivy’ugutumatumanako amakuru ku civugo «mega donnée, mega impact» akaba ari nawe yari ayihagarikiye. Hari kw’igenekerezo rya 19 Rusama 2017. Nk’uko umushikiranganji Nestor Bankumukunzi yabandanije abimenyesha ngo uwo munsi mukuru wama uhimbazwa uko umwaka utashe mu kwezi kwa Rusama. Ngo barabiye kuri ico civugo, ngo mu bisata bitandukanye vy’ubuzima bw’igihugu haba mu Burundi canke mu bindi bihugu biri hirya no hino usanga hariho amakuru menshi, mbere agahanahanwa biciye ku rubuga ngurukanabumenyi(internet) hakoreshejwe mashini n’ibindi. Kenshi rero ngo usanga izo nkuru ari nyinshi ku buryo hari uwugize ico azikuyemwo kugira azikoreshe ari mu bijanye no gutunganya ivyishirahamwe ryiwe, canke kubihugu kugira bishobore kwitunganya ngo biraheza bigakoresha izo nkuru ziri hirya no hino. Ngo nko mu ma banki no mubindi bisata vyose vy’igihugu haba mu burimyi, mu rudandazwa, mu ndero n’ahandi usanga ayo makuru asanzaye umuntu adashobora kuyakoresha neza ngo ayakorereko ashobore no gutunganya neza imigambi y’iterambere, ngo kuburyo iyo hageze gufata ingingo kanaka usanga bigoye kuyakorerako. Ivyo rero ngo bigoye kubera usanga ari menshi gutyo hagaca hakenerwa ko hoba ikintu coyashira hamwe ku buryo umuntu yoyagira ari hamwe, ico kintu kandi kikamufasha kuyihweza neza no gufata ingingo ahereye kuri ayo makuru atandukanye.

Ngo mu bisata vyose bitandukanye vy’igihugu, hamwe hose barafise ingene babika amakuru ariko ngo gushika ubu usanga ayo makuru adashizwe hamwe kandi badashobora kuyihweza neza. Mu Burundi rero ngo umugambi wo gushiraho ikigo cohuriramwo inkuru zose ziri hirya no hino mu buzima bw’igihugu kugira amakuru ashobore kwihwezwa n’uko yofatirwako kugira hafatwe ingingo, uriko urategurwa. Ngo Reta irarajwe ishinga n’ugushikana abanyagihugu kw’ ikoreshwa ry’ubuhinga bwa none bwo gutumatumanako amakuru Mu kiganiro yahaye abamenyeshamakuru ku wa 15 Rusama 2017mu ntumbero gutegura uwo munsi mukuru, umushikiranganji w’amaposita, ugutumatumanako amakuru n’ibinyamakuru, Nestor Bankumukunzi yaramenyesheje ko Reta irajwe ishinga n’uko abenegihugu bakunda bakongera bagakoresha ubuhinga bwa none bwo gutumatumanako amakuru. Ngo uwo muhora utuma itumatumanako amakuru ryoroha cane. Niko gusaba abenegihugu bose n’abanyamahanga kwijukira gukunda ubuhinga bwa none bwo gutumatumanako amakuru mu kubukoresha neza. Nestor Bankumukunzi   yamenyesheje kandi ko mu bitegekenijwe hari ukuzotanga mu gisagara ca Bujumbura umuhora ngurukanabumenyi « Wi-Fi » mu gihe umugambi wo gukwiragiza umuhora w’ingurukanabumenyi mu gisagara ca Bujumbura uzoba urangiye.

Nathan Ntahondi

Evelyne Niyonzima  

 

Inama Nshikiranganji yaremeje integuro y’Ibwirizwa risubiramwo igitabu c’amategeko mpanavyaha

deuMu ntumbero yo gutosora ingingo zimwe zimwe ziri mu gitabu c’amategeko mpanavyaha, inama y’abashikiranganji yakoranye ku magenekerezo ya 10 na 12 Rusama 2017, irongowe n’Umukuru w’igihugu,Petero NKURUNZIZA yarihweje yongera iremeza integuro y’Ibwirizwa risubiramwo igitabu c’amategeko mpanavyaha. Ivyo bikaba vyashikirijwe kw’igenekerezo rya 12 Rusama 2017, n’umunyamabanga mukuru akaba n’umuvugizi wa Reta, Firipo Nzobonariba. Iyo nteguro y’Ibwirizwa risubiramwo igitabu c’amategeko mpanavyaha yashikirijwe n’umushikiranagnji w’ubutungane,ivuga ko igitabu c’amategeko mpanavyaha gikurikizwa muri iki gihe cagiyeho mu mwaka w’ 2009. Naho bisa n’uko ari ica vuba, ngo birakenewe ko hari ivyosubirwamwo kugirango ibihano bimwe bimwe bikomezwe, n’ingingo zimwe zimwe zirimwo zitosorwe kugirango zitahurike neza. Aha twovuga nk’igihano co gukora ibikorwa vy’akamaro rusangi gisubirira umunyororo ku wakoze icaha gitoyi, canke ku bakoze ivyaha bakiri bato. Ico gihano kivunjwa cahora kingana n’umunyororo w’umwaka umwe, iyi nteguro ikaba igishira ku myaka ibiri kugirango intumbero yavyo yo kugabanya ibitigiri vy’abafungwa mu mabohero ishikweko. Iyi nteguro ngo iratomora neza ibijanye no kunyuruza abantu, irerekana ibihano bijanye n’urudandazwa rw’abantu n’ingene abakorewe ico caha bakingirwa, irategekanya ibihano ku muntu canke ishirahamwe ritegura umugambi wo kwihombesha ku mayeri no mu bubeshi kugira ntirishobore kuriha ivy’abandi, rirategekanya ibihano ku bijanye no gukora, kudandaza canke kunywa ibinyobwa bibujijwe, iratomora neza ibijanye no gukoresha abantu mu bushurashuzi, ivyo guhohotera ibikoko, igashira ibijanye n’amatungo adasigurika mu vyaha vyegereye ico kurya canke gutanga ibiturire. Iyi nteguro ngo irahana kandi ukwiyerereza, usegerereza be no gukoresha abandi mu gusegerereza. Iyi nteguro ikaba yaremejwe ibanje gutorwa no kwunganirwa. Mu bikorwa vy’iyo Nama Nshikiranagnji, abagize Reta y’Uburundi barize izindi nteguro z’amabwirizwa 4 n’integuro y’itegeko imwe nazo zika ari izi zikurikira: Integuro y’Itegeko ritangaza vy’imfatakibanza ko itongo rizokwubakwamwo inyubakwa zizokoreramwo Inama Nshingamateka na Nkenguzamateka rikenewe ku neza rusangi, yashikirijwe n’Umushikiranganji w’Amazi, Ibidukikije, no gutunganya Amatongo. Reta y’Uburundi ngo yarafashe icemezo co kwubakira Inama Nshingamateka na Nkenguzamateka, inyubakwa zizokoreramwo mu ntara ya Gitega, hakaba harabonetse ikibanza kingana n’amahegitare 7 ahitwa Nyabututsi. Ariko abahinga nabo bakaba basanze ico kibanza ari gito cane ku nyubakwa nk’izo, icokwira kikaba coba kingana na hegitare 70. Kubera ko ico kibanza kizoba ari ico kwubakwamwo inyubakwa zihambaye z’igihugu kandi Reta ikaba ifise hegitare 7 gusa, Reta ibwirizwa gukura mu minwe y’abanegihigu ayo mahegitare 63 asigaye, ikabaha umuzibukiro. Inama y’abashikiranganji yamenyeshejwe yuko abenegihugu bene amatongo bashigikiye uwo mugambi ariko basaba yuko bobanza kuronswa umuzibukiro ubereye ahasigaye ko ata ngorane. Iyo nteguro yaremejwe.

Integuro y’Ibwirizwa risubiramwo igitabu c’amategeko yerekana ingene imanza z’ivyaha zitohozwa, ziburanishwa, zicibwa n’ingene zikurikizwa, yashikirijwe n’Umushikiranganji w’Ubutungane. Igitabu cayo mategeko gikurikizwa ubu kiriho kuva muri Ndamukiza 2013, ariko naho womenga ntikirasaza cane, haribonekeza ubukozi bw’ikibi bushasha buza buravuka, bisaba ko muri ico gitabu hajamwo ingingo nshasha, na cane cane mu bijanye no gusaka aho usanga nko ku vyaha bimwe bimwe umutahe wo gusaka utorindirwa, ndetse no gusaka mw’ijoro bikaba ngombwa. Iyi nteguro irarekurira kandi abajejwe amatohoza gusaka no mu mashini nyabwonko bakanavomamwo ivyo bakeneye bibafasha mu matohoza yabo. Irategekanya ndetse no gusaka hakoreshejwe ubuhinga buhanitse aho uwujejwe amatohoza ashobora gukorera ku mashini yiwe akabona ingene icaha cakozwe. Iyi nteguro irabandanya utwigoro two guteza imbere ubutungane kugirango ivyaha bishasha vyibonekeza ubu bitari bihasanzwe navyo nyene bihanwe. Ni muri iyo ntumbero ishiraho uburyo bushasha bw’amatohoza butari buhasanzwe nko gukurikirana ibijanye n’itumatumanako, gutohoza biciye muri bwa buhinga bwa none, gufata amajwi n’amasanamu mu bibanza bimwe bimwe be n’imiduga, n’ibindi.Iyi nteguro iragabanya kandi ibiringo mu bijanye n’itohoza n’icibwa ry’imanza ku vyaha vy’itonga kugirango izo manza zinyaruke. Iyi nteguro nayo nyene yaremejwe ibanje gutosorwa.

Integuro y’ibwirizwa ritunganya ibijanye n’amabohero yashikirijwe n’Umushikiranganji w’Ubutungane.

Isubirwamwo ry’ibwirizwa ritunganya ivy’amabohero rigamije ahanini kuriroranisha n’ayandi mabwirizwa n’amategeko ahari, aha twovuga nk’Ibwirizwa Shingiro, igitabu c’amategeko yerekana ingene imanza z’ivyaha zitohozwa, ziburanishwa, zicibwa n’ingene zikurikizwa, igitabu c’amategeko mpanavyaha, n’ibindi. Ngo ije kandi kugaragaza umwitwariko wa Reta ku bijanye no kwubahiriza agateka ka muntu, no gushira mu ngiro amasezerano mpuzamakungu ajanye n’ukugene abapfungwa bafatwa, Uburundi bwemeje. Iyindi ntumbero ngo ni uko ibohero ryoba ikibanza gifasha umupfungwa kwirimbura akisubirako, kugirango niyarivamwo bimworohere gusubira kubana n’abandi neza. Iyi nteguro ngo iratunganya kandi ibijanye n’imirwi imwe imwe y’abapfungwa aho ni abakenyezi, abagendana ubumuga, n’abana. Ngo irahinyanyura kandi ingingo zimwe zimwe zataye igihe mu kuziroranisha n’amategeko akurikizwa, aha twovuga nk’izijanye n’igihano co gupfa cafuswe mu gitabu mpanavyaha c’Uburundi. Haruhande yo guhinyanyura izo ngingo zimwe zimwe, ngo iyo nteguro irashiramwo n’ibindi bishasha bituma abapfungwa boroherezwa. Irongera igategekanya n’uburyo bushasha abapfungwa bacungerwa kugirango ntibatere akajagari mu mabohero. Iyo nteguro yaremejwe.

Integuro y’Ibwirizwa ritunganya Inama nkuru ijejwe gukinga no gutuza ihonyabwoko, ivyaha vyo mu ntambara be n’ivyaha vy’agahomerabunwa Integuro y’ibwirizwa ritunganya Inama nkuru y’Ubumwe bw’abrundi no gusubiza hamwe. Izo nteguro uko ari zibiri zashikirijwe n’Umushikiranganji w’Intwaro yo hagati mu gihugu n’inyigisho zo gukunda igihugu. Ibwirizwa Shingiro ry’Uburundi ngo ririho kuva muri Ntwarante 2005 rirategekanya mu ngingo yaryo y’268 ko mu ntumbero y’uko abarundi benshi bagira uruhara mu gutunganya ivy’igihugu, Reta ishiraho Inama Nkuru zikurikira : Inama Nkuru y’Ubumwe bw’abarundi no gusubiza hamwe Inama Nkuru yo gukinga no gutuza ihonyabwoko, ivyaha vyo mu ntambara be n’ivyaha vy’agahomerabunwa

Inama Nkuru y’Umutekano Inama Nkuru ijewe ibibazo vy’Ubutunzi n’Imibano

Inama Nkuru ijejwe ivyo kumenyesha amakuru Muri iki gihe, ngo icibonekeza ni uko Inama Nkuru zimwe zimwe muri izo zikora biboneka, aha tukavuga Inama Nkuru y’Umutekano be n’ Inama Nkuru ijejwe ivyo kumenyesha amakuru, izindi nazo zikaba zitarabaho, nk’ Inama nkuru y’Ubumwe bw’Abarundi no gusubiza hamwe. Ku bijanye n’Inama Nkuru ijejwe gukinga no gutuza ihonyabwoko, ivyaha vyo mu ntambara be n’ivyaha vy’agahomerabunwa, igengwa n’Ibwirizwa ryo muri Nyakanga 2003, vyumvikana ko ribwirizwa gusubirwamwo kugirango ryisunge Ibwirizwa Shingiro ryo mu 2005. Ku vyerekeye Inama Nkuru y’Ubumwe bw’Abarundi no gusubiza hamwe, ishirwaho ryayo ngo riri mu ntumbero yo kwubahiriza ibwirizwa nshingiro kuko kuva rigiyeho, iyo Nama Nkuru ntiyigeze ijaho. Izo nteguro zaremejwe zibanje guhinyanyurwa. Urwandiko rwerekeye ingene Uburundi bwinjira mu mashirahamwe n’imiryango y’ibihugu vyo muri aka karere, rwashikirijwe n’Umushikiranganji mu biro vy’Umukuru w’igihugu ajejwe ibibazo vyo mw’Ishirahamwe ry’Ibihugu vyo muri Afrika y’Ubuseruko (EAC). Uburundi ngo nta muhora bufise ku ma bahari, bukaba buri hagati na hagati ya Afrika y’Ubuseruko na Afrika yo hagati, bikaba arivyo vyatumwe iyinjira mu mashirahamwe y’ibihugu vyo muri ibi bice vya Afrika biba umwitwariko. Iyinjira muri ayo mashirahamwe canke imiryango ni inkingi igira kane muri wa Mugambi w’ishusho ry’Uburundi mu mwaka w’ 2025, na wa mugambi wo kunagura ubutunzi no kurwanya ubukene ukaba wari washize ico kibazo mu kibanza ca kabiri. Kubera aho Uburundi busanzwe buri ahatari heza ufatiye ku bindi bihugu, butegerezwa kubikorerako mu guteza imbere ubutunzi. Uburundi rero ngo bwariyemeje kwinjira mu muryango w’Ibihugu vyo muri Afrika y’Ubuseruko, ariko budahevye kuba mu muryango w’Ishirahamwe ry’Ibihugu vyo mu biyaga binini, Isoko rusangi yo mu bihugu vya Afrika y’Ubuseruko n’Ubumanuko, n’Ishirahamwe ry’ibihugu vyo muri Afrika yo hagati. Ngo ni muri iyo ntumbero rero uwo mugambi wateguwe. Ugamije gufatira ku bituma Uburundi batabonera akunguko kaboneka mu kwinjira muri ayo mashirahamwe kugirango bubikorereko mu gutera imbere. Uwo mugambi rero uzofatira ku nkingi zine nkuru nkuru ari zo: gukomeza intwaro ibereye no kwinjira mu mashirahamwe yo mu karere,   gukomeza amahoro, umutekano n’igihugu cubakiye ku mategeko,   guteza imbere inyubako zituma ubutunzi bwiyongera (amabarabara, ingomero z’umuyagankuba, gutumatumanako…),   gukomeza ugufashanya mu vy’ubutunzi, urudandazwa, ivy’imibano, n’ibidukikije. Inama y’abashikiranganji imaze kwihweza urwo rwandiko yasanze vyoba vyiza uwo mugambi ubaye urabangira, ukarindira uwundi nyamukuru uraba iterambere ry’igihugu muri rusangi usanzwe uriko urategurwa ko usohoka , uwo nawo ukazoza uwisunga. Mu tuntu n’utundi, abashikiranganji barahanahanye amakuru ku biraba ubuzima bw’igihugu Umushikirangani w’amasoko ntanganguvu n’ubutare akaba yaramenyesheje ingingo zafashwe kugira haboneke agahengwe ku bijanye n’igitoro kimaze iminsi gikenye, Inama y’abashikiranganji ikaba yasavye yuko ingingo ruhasha zofatirwa abanyuruza igitoro kuko bari mu basongera isibe.

Vyatororokanijwe na

Jean-Robert

Nshorirambo

 

Abanyagihugu bahamagariwe kwijukira kurima ikawa, kuyikorera no gusubiriza iyishaje

DSC05225Umukuru w’igihugu Petero NKURUNZIZA asaba ubushikiranganji bw’uburimyi n’ubworozi guhimiriza abanyagihugu kurima ikawa, kuyikorera no gusubiriza iyishaje. Ivyo yabivugiye muri zone Ngoma komine Gashikanwa intara ya Ngozi ku wa 19 Rusama 2017 mu gihe yariko aramura ikawa ziri mu mirima yiwe aho ku musozi wa Rutanga. Prezida NKURUNZIZA yamenyesheje kandi ko ubwo bushikiranganji bwokwereka abanyagihugu ibiterwa bibana n’ikawa nk’amateke, icamwa bita «pastèque» n’ibindi mu ntumbero yo kurwiza umwimbu w’ibiterwa mbumbarugo biza bibunganira. Yarongeye amenyesha ko ikawa ari nk’igitoro Imana yahaye Uburundi kugira bushobore kwiteza imbere. Ikawa y’Uburundi ngo ifise akanovera ku buryo n’uwuyinyoye aca akunda Uburundi. Ikawa kandi ngo ni igiterwa gifasha mw’iterambere kuko arico ca mbere kizana amahera y’agaciro mu gihugu afasha kurangura imigambi y’iterambere. Yamenyesheje kandi ko muri uwo murima harimwo ibiti vy’ikawa birenga ibihumbi 3; akaba aziga kuronka umwimbu w’amatoni ari hagati y’atandatu n’indwi. Uwo mwimbu ngo urashimishije aravye ko ari umusaruro wa mbere. Niko kumenyesha ko mu myaka ine umwimbu uzoba wiyongereye ku buryo hashobora kwimbuka hagati y’amatoni 30.000 n’amatoni 40.000. Ibiti vya mbere ngo vyatewe mu mwaka w’2014, ibindi mu mwaka w’2015 n’2016. Izo kawa   rero ngo zamye umwimbu kare kuko mu bisanzwe ikawa itangura kwama ku myaka ine ariko zozo ikaba zamye ku myaka 3.Iyo kawa rero ngo yayiteye mu ntumbero yo guterera agacumu k’ubumwe mw’iterambere ry’igihugu no mu ntumbero yo guteza imbere umuryango wiwe. Imbere yo kwamura izo kawa Prezida NKURUNZIZA yabanje gusenga aho yasavye Imana guhezagira uwo mwimbu n’umwimbu w’ikawa mu gihugu cose. Yasavye Imana kandi umugisha ku muryango wiwe, umugisha ku gihugu cose no ku bazokwihereza iyo kawa narirya ikawa y’Uburundi ifise akanovera keza. Ngo Imana ifashe kandi abarimyi b’ikawa baronke umwimbu ushimishije gutyo bashobore kwikenura n’igihugu citeze imbere mu butunzi. Inyuma yaho, Prezida NKURUNZIZA yarifadikanije n’abanyagihugu bo muri komine Nyamurenza mu kwubaka uruzitiro rw’inyubakwa izokoreramwo umuyobozi ajejwe indero muri komine, Nyamurezwa uwujejwe uburimyi muri iyo komine, umuganga w’ibitungwa muri komine hamwe n’ikigo co gusomeramwo ibitabu. Aho muri komine Nyamurenza nyene Umukuru w’igihugu yarahaye imfashanyo y’umuceri imiryango 300 ya ba ntahonikora, umwe wose ukaba waronse ibiro 10. Iyo mfashanyo yaratanzwe kandi muri komine Gashikanwa n’Umukuru w’igihugu nyene aho imiryango 300 ya ba ntahonikora yaronse ibiro 10 umwe wose. Imbere yaho Prezida NKURUNZIZA yabanje kwifadikanya n’abanyagihugu bo muri iyo komine mu bikorwa rusangi aho bariko bubaka amasomero yo kwungura ishure Nshingiro ryo ku musozi Butaha no muri komine Gashikanwa. Abanyagihugu ngo batanga amaboko hamwe n’ibikoresho bashoboye hanyuma Umukuru w’igihugu nawe akaba yabahaye isima n’amabati. Ivyo tukaba twabimenyeshejwe na musitanteri arongoye iyo komine, Jeanne françoise Ndayiragije. Umukuru w’igihugu Petero NKURUNZIZA yarifadikanije kandi n’abanyagihugu bo muri komine Mwumba mu kwubaka isoko ya kijambere yo mu Vyerwa.

Epitace Nduwayo

 

Imvukira z’igisagara ca Bujumbura zisabwa kwitaho ururimi rw’amavukiro

cacaaaImvukira z’igisagara ca Bujumbura zisabwa kwitaho ururimi rw’amavukiro ngo kubera ko hari amabanga udashobora kuzezwa utazi ururimi rw’ikirundi. Eka ngo mu gihe imvukira z’igisagara ca Bujumbura zihanzwe n’ibikorwa vy’ubushurashuzi biciye mu guhahamira amaronko, abavyeyi basabwa kugarukira indero y’uruvyaro rwabo, na ntaryo bagarukire imico n’akaranga vy’Uburundi. Izo ni zimwe mu mpanuro Umukuru w’igihugu, Petero NKURUNZIZA yatekereye imvukira za komine ya Mukaza, mu gisagara ca Bujumbura, hari mu nama yagiranye nabo ku wa 16 Rusama 2017, muri zone ya Buyenzi, nk’uko vyashikirijwe n’ icegera c’umuvugizi w’Umukuru w’igihugu, Alain Diomède Nzeyimana inyuma y’iyo nama yabaye mu mwiherero. Nk’uko Alain Diomède Nzeyimana yabandanije abivuga , ngo muri iyo nama Prezida NKURUNZIZA yaramenyesheje ko imvukira za komine Mukaza zikwiye kwishimira ikomine yabo kubera hari icicaro c’imirimo ikomeye hari n’ibiro vy’Umukuru w’igihugu, amabanki, amashure harimwo na za kaminuza, n’ibindi. Ariko rero ngo n’aho muri kahise imvukira z’iyo komine bamwe muri bo bagendanye n’uwaharaniye intahe y’ukwikukira, ngo nta vyinshi baronse vyo kubafasha. Ubu rero ngo muri izo ngendo, Umukuru w’igihugu amaze iminsi agira mu gisagara ca Bujumbura, ngo ni akaryo keza ko kubatera intege kugira bashobore kwiteza imbere. Nk’imvukira za komine Mukaza, ngo bakwiye kuzirikana ko igihugu ari icabo hamwe n’imiryango yabo, kuri ivyo ngo nta muntu azoza agikunda kubarusha. Inyuma yaho abakoronije igihugu baziye mu Burundi, ngo hari imico n’akaranga vyahindutse ku buryo hari ivyahindutse ugereranije nuko basokuru n’abasokuruza bari babayeho. Kuri basokuru ngo umuryango wari umutahe ukomeye, aho umwana bamwereka uko azokura, ingene azoshinga urugo rukaba urw’umuryango. Mu gisagara ca Bujumbura, ngo vyarabagoye bibagira ko igisagara ari agataka kabo, ngo barakwiye rero kuzirikana, bakamenya ivyo bosubiramwo. Mu ntumbero yo gutunganya neza igisagara, yasozereye izo mpanuro ababwira ibintu 15 boshira mu ngiro kugira batunganye neza igisagara ca Bujumbura kugira kimere neza nk’izindi ntara. Muri ivyo bintu, yabasavye kugarukira ururimi rw’ikirundi kubera ko hari amabanga utazi ururimi rw’amavukiro udashobora kuzezwa. Ku bavyeyi, yabasavye kugarukira indero y’abana babo birinde kuja mu bikorwa bidatomoye nk’ubushurashuzi. Ndetse ngo muri komine Muha, muri zone ya Kanyosha ngo haherutse gutorwa inyubakwa yari irerewemwo abana b’abigeme bakora ibikorwa vy’uburaya, akaba arico gituma yabasavye kugarukira imico n’akaranga vy’Uburundi. Imbere yaho, umukuru w’igisagara ca Bujumbura, Freddy Mbonimpa yarashimye iyo ngendo nshasha y’Umukuru w’igihugu yo kugendera amakomine agize igisagara ca Bujumbura kugira baganire n’abanyagisagara akababakiye. Ndetse akaba yarashimye kubona imvukira z’igisagara ziherutse kuronswa ibibanza vyo kwubakamwo 100, aho ngo ni mu gihe basa n’abari baribagiwe. Eka ngo n’umuyobozi mukuru ajejwe gutunganya amatongo n’ibisagara ni imvukira y’igisagara ca Bujumbura, ndetse no mu Nama Nshingamateka ya Afrika y’ubuseruko mu murwi w’abashingamateka baserukiye Uburundi hakaba harimwo imvukira y’igisagara ca Bujumbura. Mu myitwarariko batuye Umukuru w’igihugu, baramusavye ko igisagara ca Bujumbura hamwe n’ibindi bisagara biriko birakura vyogira amategeko abigenga, aho akavuga Bujumbura, Gitega na Ngozi. Mu gihe ikibanza cahozemwo isoko nkuru ya Bujumbura kigiye kwubakwamwo inyubakwa y’akarorero y’ubudandaji, basavye ko kubera ahaherereye agataka kazokwubakwamwo iyo nyubakwa yohabwa igiciro kugira uburyo buzovamwo buzofashe guteza imbere igisagara ca Bujumbura. Tubamenyeshe ko kubona iyo nama yabereye muri zone ya Buyenzi, Umukuru w’igihugu yari yabisezeraniye abaserukiye imvukira z’iyo zone mu mubonano yabahaye ku wa 12 Ndamukiza 2017.

Imvukira zo mu gisagara ca Bujumbura zisabwa kandi kutadohoka kw’ibanga ryo kurera abana babo

Bukeye bwaho ku wa 17 Rusama 2017, Umukuru w’igihugu Petero NKURUNZIZA yaragirishije inama imvukira zo muri komine Ntahangwa, aho yabasavye mbere n’izindi mvukira zo mu gisagara ca Bujumbura zidasigaye inyuma gukomeza imico, imigenzo n’akaranga vyamye biranga abarundi. Ivyo navyo kugira bishoboke ngo bihera mu ndero y’urwaruka kuko ubwenge buhera ku ndero yo ku ziko nayo ubumenyi buva ku mashure nk’uko vyashikirijwe n’umuvugizi w’Umukuru w’igihugu Jean Claude Karerwa, igihe iyo nama yari irangiye. Nk’uko Karerwa yabandanije abimenyesha, ngo Prezida NKURUNZIZA yasavye rero abavyeyi bo mu gisagara ca Bujumbura kutadohoka kw’ibanga ryo kurera abana babo kuko ariryo shingiro ry’ubutunzi n’iterambere rirama ry’igihugu. Ngo yabagirishije inama ku muce ugira kabiri w’ingendo yatanguje mu ntango z’umwaka aho yagendeye ikomine zose zigize igisagara ca Bujumbura uko ari zitatu. Ico gihe akaba yarabemereye ko n’imiburiburi azobagirisha inama gatatu ku mwaka kugira baganire ukugene boteza imbere igisagara cabo, baganire kandi ibijanye no kubumbatira amahoro n’umutekano hamwe n’ibijanye n’imibano. Ngo akaba rero yaheruka muri iyo komine ku wa 26 Nzero 2017. Umukuru w’igihugu ngo yari yazanywe no kwigisha kuko ubwa mbere yari intangamarara aho yababwira ko agiye gutanguza inyigisho zifasha abanyagihugu kuzirikana ukugene bokwigenza n’ukugene boteza imbere igisagara cabo. Izo nyigisho kandi ngo ziriko ziratangwa mu ntara zitandukanye z’igihugu. Mu kigabane ca mbere ngo yashimikiye ku gitabu c’ijambo ry’Imana mu gitabu c’umuhanuzi Hoseya (Ozée), ikigabane ca kane, umurongo wa gatandatu, aho handitse ngo «abantu banje bishwe no kutamenya». Afatiye kuri ico kigabane yarabigishije ibijanye n’imigenzo, imico n’akaranga, iyo Uburundi bwavuye, iyo buja n’aho buteye uwu munsi. Yarabahaye kandi n’inyigisho zobafasha kugira igisagara cabo n’igihugu bitere imbere. Ngo yababwiye kandi ko igihugu cubakiye ubwa mbere ku mico, imigenzo n’akaranga ariko kubasaba gukomeza imico n’akaranga vy’abarundi. Ngo Prezida NKURUNZIZA yarababwiye kandi ko abarundi bakwiye kumenya iyo bava n’iyo baja kuko uwutazi kahise kiwe,akaba yaboneyeho n’akaryo ko kubereka iyo Uburundi bwavuye guhera ku ntwaro za cami, ivyo bakoreye Uburundi, aca abasaba kugendera kw’iragi ryiza abami babasigiye. Abandi bagiriye akamaro Uburundi n’abarundi ngo ni uwarondeye intahe y’ukwikukira. Niko gusaba abanyagisagara n’abarundi bose ngo bagerageze gukora kugira baze basigire iragi ryiza abana babo. Iherezo ryiza naryo ngo rizoheza ribe intango nziza ku rwaruka rw’Uburundi. Asaba rero abarundi guhinduka, guhindura ingendo, imvugo n’ingiro kuko ari naho bashobora guhindura ibintu. Izo nyigisho rero ngo zizotangwa ku kiringo c’amasaha ari hagati ya 20 na 30, akaba yabemereye ko azoza araca hirya no hino kugira banoganze izo nyigisho. Yarabibukije ko yisunze ibiri mu bigenga abantu, abarundi bafise ubwoko bumwe kuko bavuga ururimi rumwe, basangiye igihugu kandi basangiye imico n’imigenzo. Abazungu rero ngo baje mu Burundi bafise intumbero yo kugabura abarundi kugira bashobore kubaganza, babambura impuzu y’ubuntu, babambura impuzu y’Abarundi, babambika impuzu y’ubwoko ari navyo vyabazingamitse. Niko kubasaba kuvavanura n’iyo nyifato mu ntumbero yo gutegura kazoza keza k’abana babo n’igihugu cabo. Mw’ijambo ry’ikaze umukuru w’igisagara ca Bujumbura, Freddy Mbonimpa yarashimiye Umukuru w’igihugu ku kubona yaratanguye kugendera imvukira zo mu gisagara kuva mu mwaka uheze w’2016 mu ntumbero yo kwigira hamwe ukugene boteza imbere igisagara. Kubona abagendera rero ngo ni ingendo nshasha kuko abandi batwaye Uburundi batigeze bagirisha inama imvukira zo mu gisagara ca Bujumbura. Yamenyesheje ko muri izo mvukira harimwo abantu bafise ubuhinga bwinshi kandi butandukanye kugira bateze imbere igisagara cabo. Yamenyesheje ko ingorane zihanze iyo komine Ntahangwa n’igisagara cose ari imisozi ihanamiye igisagara ca Bujumbura, aho inkukura ivayo iza gutwara ibintu mu gisagara, ariko gusaba ko cokingirwa. Yarasavye kandi ko hoba itegeko rigenga igisagara iririho rishira igisagara ca Bujumbura mu zindi ntara. Yasavye ubushikiranganji bubijejwe ko bworitunganya mu maguru masha kugira naco gishobore gukora nk’uko ibindi bisagara bikora. Arashima ko ahahora isoko nkuru ya Bujumbura 0hagiye kwubakwa ariko agasaba ko vyoha umutahe igisagara kuko agataka ari ako igisagara Ca Bujumbura.

Do Misigaro na

Epitace Nduwayo          

          

 
Ouvrir