Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Ubwenge bw’umukenyezi bwubaka urugo, ubukerebutsi bukarukomeza

DSC03349Ku magenekerezo ya 24 na 25 Ntwarante 2017 umutambukanyi w’Umukuru w’igihugu, Denise Nkurunziza yaragendeye abanyagihugu bo muri komine Isare mu ntara ya Bujumbura aho yatanze inyigisho ku mirwi   itandukanye y’abanyagihugu baho . Akaba yahereye ku bakenyezi b’indongozi aho yaberetse akamaro k’umukenyezi mu rugo no mu gihugu. Ngo umukenyezi ni inkingi y’urugo, iyo inkingi ikomeye n’inzu iraheza igakomera. Muri izo nyigisho Denise Nkurunziza yashaka ko yibukanya n’abo bakenyezi ico Imana yabagize n’ico bashoboye mu buzima bwabo kuko hari vyinshi vyononekara iyo umukenyezi atifashe uko ategerezwa. Mu bisanzwe ngo umukenyezi Imana yamuhaye ingabirano yo kuba umufasha haba mu muryango canke mu kazi, rero ngo ni bamenye ko iyo umuntu aguhamagaye ngo umufashe ni uko haba hariho ico atishoboje.Abo bakenyezi b’indongozi yabahamagariye kuba indongozi zibikwiriye kugira amahoro bisasagare mu miryango no mu gihugu cose, igihugu kibemwo amahoro. Kugira ivyo vyose bishoboke abakenyezi barakeneye ubwenge kugira batunganye imirimo yabo neza ariko ubwenge nyabwo ni ubwo kwubaha Imana umuntu   akitandukanya n’icaha. Yarashimikiye ku caha c’ubusambanyi   n’ububeshi kigeramiye ingo nyinshi muri kino gihe. Yababwiye ko umukenyezi yiyubaha atarenga ibigo kuko bisambura urugo rwiwe n’urwa mugenziwe kandi aba ariko yigisha abana biwe ,abababanyi eka n’abo atwara kuko ngo wiba uhetse ukaba wigishije uwuri mu mugongo. Umukenyezi w’ubwenge akwiye kubumbwa n’utwo afise, ntarya ideni ngo ariherane,ntaraguza yirinda akarenganyo,ntaborerwa,amenya intege nke z’umugabo wiwe akamushigikira, ntagenda aravuga ivy’urugo. Ngo umukenyezi w’umunyabwenge umutima w’umugabo uramwizigira. Mu nyigisho yahaye urwaruka yabahamagariye kwanka kubaho nk’imburabwenge kuko yemera amajambo yose akajana nyabahururu ariko uw’ubwenge we yama agavye. Nabo nyene yarabigishije ku bijanye n’icaha c’ubusambanyi n’uguta ubusugi kw’abigeme kuko ngo ni ingabire y’agaciro Imana yabahaye ngo ni amaraso y’isezerano k’uwo bazubakana aca abahanura kwirinda kwiyandagaza bagire abagenzi beza.Yaranabibukije ko indwara ari nyinshi zifatira mu bihimba vy’irondoka haba ku bahungu canke ku bigeme.

Ibitaro vyo mu Rushubi vyararonkejwe mfashanyo

Umutabukanyi w’Umukuru w’igihugu, Denise Nkurunziza yaragendeye ibitaro vyo mu Rushubi, muri komine Isare, intara ya Bujumbura aho yari yabashiriye imfashanyo y’amakarato 101 y’amata hamwe n’amakinga 7yo kwunguruza abarwariye mu bitaro . Ayo makarato yaronkejwe abagendana umugera wa sida n’abarwariye muri ivyo bitaro. Muganga arongoye ibitaro vyo mu Rushubi, Claude Nijimbere yamenyesheje umutambukanyi w’Umukuru w’igihugu ko bafise ibikoresho bidakwiye hamwe n’amabarabara atameze neza ivyo bigatuma ruseha baniha itoroherwa gushikira abayikeneye kubera ikorera mu misozi ihanamye yo mu makomine ya Isare, Mubimbi na Mutimbuzi. Denise Nkurunziza akaba yarakengurukiye abakora kuri ivyo bitaro, abasaba kuguma bitaho abarwayi. Mu ntumbero yo gukengurukira umupfasoni w’Umukuru w’igihugu, Denise Nkurunziza ku vyiza amaze iminsi arangurira muri iyo intara, abanyagihugu bakaba bamugabiye inyana y’ishashi yitwa yarukundo hamwe n’utuganuke dutandukanye. Ako kaganuke yagashikirijwe na buramatari w’intara ya Bujumbura, Nadine Gacuti. Umutambukanyi w’Umukuru w’igihugu yarongeye aratanga inyigisho ku bubakanye muri komine Isare, akaba yashimikiye kw’ijambo ry’ubwizigirwa n’ubugororotsi. Denise NKURUNZIZA yasavye abarongozi n’imiryango kuba abizigirwa kuko babaye gutyo n’igihugu cotunga kigatunganirwa. Ngo abizigirwa ni abagabo n’abakenyezi b’agaciro kuko bisuzuma iminsi yose bakirinda gutsitaza abantu bagakora ibihimbara Imana. Yaciye ahamagarira abitavye izo nyigisho kuba abizigirwa kuko umwizigirwa yama akora kugira anezereze benshi ataravye inyungu ziwe. Denise Nkurunziza yarasavye abarongozi kutiyorobeka ngo kuko umurongozi atagira ubwizigirwa ntaho aba ataniye n’imva yo yama yakaka inyuma ariko imbere yuzuye amagufa. Ngo abizigirwa bagumije ibanga mu bihe bitoroshe Imana irabazigama ikabakorera ibitangaza ; nabo iherezo ryabo ryama ari ryiza. Yamenyesheje kandi ko ivyo vyose kugira bishoboke bokwama basenga Imana iminsi yose bakayisaba inkomezi z’ukuba abizigirwa ibihe vyose. Yaciye atumira abanyagihugu kuba abizigirwa mu bikorwa vyo guteza imbere intara yabo.

Thérèse Niyonkuru

Josélyne Ndayegamiye                                                      

 

Mu Nama Nshingamateka : Integuro z’amategeko akuraho amatagisi ku bifungurwa biva hanze mu kiringo c’amezi atatu zaremejwe

DSC04356Abashingamateka baremeje integuro y’ibwirizwa risubiramwo amabwirizwa agenga amatagisi atangishwa ku mbibe z’igihugu mu karere kagize ishirahamwe rya Afrika y’ubuseruko (ibwirizwa inomero 1/10 ryo ku wa 30 Ruheshi 2009) ; amatagisi nyongeragaciro (Ibwirizwa inomero 1/12 ryo ku wa 29 Mukakaro 2013) n’ibwirizwa rishiraho amafaranga atozwa ku bikorwa abo mu ntwaro batunganiriza abenegihugu (Ibwirizwa inomero 1/12 ryo ku wa 26 Rusama 2006). Izo nteguro zemejwe n’abashingatmateka bose bari bitavye ibikorwa vy’inama ya bose yo ku wa 29 Ntwarante 2017. Imbere yo kwemeza izo nteguro umukuru w’Inama Nshingamateka, Pascal Nyabenda amaze guha ikaze abashingamateka bari bitavye iyo nama n’umushikiranganji w’ikigega ca Reta, Domitien Ndihokubwayo yaciye asaba uwo mushikiranganji gushikiriza imvo n’imvano y’itegurwa y’izo nteguro z’amategeko. Umushikiranganji w’ikigega ca Reta Domitien Ndihokubwayo yashikirije ko Reta yitwararitse cane ibijanye n’ihindagurika ry’ibiciro vy’ibifungurwa.   Ngo kubera ivyo biciro biguma biduga, ngo Reta yafashe ingingo yo gukura amatagisi ku bifungurwa biza bivuye hanze y’igihugu kugira ngo umwenegihugu aronke akoyoko. Nk’uko Domitien Ndihokubwayo yabishikirije muri iyo mvo n’imvano ngo iyo ngingo izotuma ivyo bifungurwa vyongereza ku mwimbu w’igihugu kugira ngo abarundi baronke ivyo bafungura badatamye cane. Ngo nk’uko vyagenze mu mwaka w’2012 ngo izo nteguro zafatiye ku matagisi atangishwa ku mbibe z’igihugu, amatagisi nyongeragaciro n’amatagisi atangishwa mu ntwaro. Nk’uko Domitien Ndihokubwayo yashishikaye abishikiriza ngo kugira ngo ntihagire abikika mu kiza mu kwiba igihugu ngo hazotegurwa urutonde rw’imfungurwa zizoba zidatangishwa ayo matagisi. Ngo ayo;tegeko ashirwa mu ngiro   rero Inama Nshingamateka na Nkegnuzamateka ziyemeje. Mbere yaciye asaba ko abashingamateka boyemeza. Mu nyuma umukuru w’Inama Nshingamateka, Pascal Nyabenda yaciye asaba umurwi wamaho wakoreye kuri izo nteguro gushikiriza icegeranyo cawo. Ndikumana Pierre Claver, icegera c’uwurongoye uwo murwi niwe yashikirije ivyakozwe n’uwo murwi. Uwo murwi rero washikirije impungenge y’uko ikiringo c’amezi atatu cafashwe cerekeye izo nteguro ari gito cane kubera ibirere umuntu atazi igihe bizokwisubirako umwimbu ukaboneka ari mwinshi. Aha umushikiranganji yishuye ko mu gihe vyoboneka ko ico gihe kibaye gito ngo hazoca hafatwa izindi ngingo. Ngo ico kiringo kirashobora kuzoshirwa nko ku mezi atandatu. Eka mbere umushikranganji yarerekanye n’ingaruka iyo ngingo izogira ku mafaranga Reta ikoresha. Uwundi mwitwarariko w’abashingamateka ni uko ngo muri ka hise iyo Reta ifashe ingingo bene izo wasanga abacuruza ari bo baronka akarusho kurusha abaguzi. Ngo none hazokorwa iki ubu kugira ngo umuguzi abone vy’ukuri ko izo ngingo zimugiriye akamaro. Aha umushikiranganji w’ikigega ca Reta Domitien Ndihokubwayo   yamenyesheje ko hasanzwe hariho umurwi washizweho mu mwaka w’2012 wari ujejwe gukurikirana ishirwa mu ngiro ry’ingingo nk’izo zari zafashwe ico gihe. Ngo niyaba ngomba uwo murwi uzoshobora kwongera guhabwa ico gikorwa. Abashingamateka rero barahawe ijambo kugira ico bashikirije kuri izo nteguro. Bamaze kuzica hirya no hino baciye bose bazemeza.

Nathan Ntahondi

 

Amazi y’ikiyaga Tanganyika agiye kuza arapimwa hamenyekane urugero rw’ubucafu buyarimwo

DSC 0438Ibigo bijewe gukingira ibidukikije vyo mu bihugu bine (Uburundi, Tanzaniya, zambiya na Repuburika iharanira demokarasi ya Kongos) bisangiye ikiyaga Tanganyika bizoronswa ibikoresho vyo gupima amazi y’ikiyaga, gutyo hamenyekane urugero ayo mazi yatosekaye. Ivyo bigo ni OBPE kijejwe gukingira ibidukikije mu Burundi hamwe n’ibigo vya Uvira, Kigoma na Mpulungu mu gihugu ca Zambiya. Ivyo rero ni bimwe mu bigize umugambi uzorangurirwa mu bihugu bine bisangiye ikiyaga Tanganyika uzofatwa mu mugongo n’ishirahamwe ry’ubumwe bwa Buraya UE ku rugero rw’imiriyoni 6 z’amafaranga y’amanyaburaya. Ivyo ni ivyashikirijwe n’umuyobozi nshingwabikorwa ajejwe gukingira ikiyaga Tanganyika, Jean Marie Nibirantije, ku wa 29 Ntwarante 2017, hari mu kiganiro yahaye ikinyamakuru UBUMWE. Nk’uko umuyobozi nshingwabikorwa ajejwe gukingira ikiyaga Tanganyika, Jean Marie Nibirantije yabandanije abishikiriza, ngo uwo mugambi uzoba uje gukinga ibintu vyose bihumanya ikiyaga Tanganyika. Iyo micafu igihumanya ngo si imicafu ivuye mu mahinguriro gusa, ngo hariho n’amazi mabi ava mu mihana iri mu bisagara vyo ku nkengera z’ikiyaga, umwavu w’ikizungu uba wakoreshejwe mu ndimiro ku mitumba ihanamiye ico kiyaga hamwe n’ubucafu bwo kwa muganga iyo butunganijwe nabi. Uwo mugambi rero ngo uje gufasha kugira ushobore gutorera inyishu ibibazo vyo kumenya urugero ikiyaga kiba cahumanyeko.Vyongeye, ngo nico gituma muri uwo mugambi bazoronsa uburyo n’ibikoresho ikigo nka OBPE mu Burundi hamwe n’ibigo vya Uvira, Kigoma na Mpulungu kugira bize birapima uko amazi yifashe, ivyo rero ngo bizofasha kugira hamenyekane urugero amazi y’ikiyaga yononekayeko. Muri uwo mugambi nyene, ngo hazoba gutanga inyigisho muri ivyo bihugu bine bisangiye ico kiyaga kugira abanyagihugu bavyo bamenye uko nabo bofasha kugira ico kiyaga gikingirwe. Mu ntumbero yo kuzitira tutaronerwa, ngo hazobaho n’uburyo bwo guhanahana amakuru yikwije kandi mu buryo bwa none. Mu gice ca kabiri c’uwo mugambi, ngo hakazoba ukwigisha abanyagihugu ibijanye no gukingira ibidukikije, mu ntara no mu makomine ari ku nkengera z’ikiyaga Tanganyika. Ku bijanye n’izo nyigisho, ngo ku rwego rw’ibihugu bine bisangiye ico kiyaga, ngo bazotunganya inyigisho babifashijwemwo n’abahinga, ivyigwa bizoba vyateguwe n’abo bahinga nivyo bizotangwa muri ivyo bihugu bine. Mu ntumbero yo kwumva kumwe amategeko yo gukingira ico kiyaga, ngo bazobandanya gutegura amategeko, bayashire ku rugero rumwe, gutyo babikore kumwe na cane cane mu burovyi na cane cane ibikoresho hamwe n’urugero bashobora kuvuga ko amazi y’ikiyaga yononekaye. Ivyo rero ngo bizofasha kugira ibintu bashobore kubibona kumwe.

Imicafu yo kwa muganga iri mu yibangamiye ikiyaga Tanganyika

Muri uwo mugambi nyene, bazotunganya ibikorwa nyezina vyo kugabanya ubuhumane bw’amazi y’ikiyaga. Mu ntumbero yo gutuza imicafu yo kwa muganga ishobora gucafuza ikiyaga biturutse ku nkukura canke bigaturirwa nabi, ngo bazofasha kugura ibikoresho bigezweho vyo guturira iyo micafu « incinérateurs modernes » mu mavuriro ari mu karere k’ikiyaga Tanganyika kuva mu Gatumba gushika i Nyanza - lac. Iyo micafu yo kwa muganga ngo idatunganijwe neza, ngo itwawe n’inkukura canke ikanyengetera mu kuzimu iyo yaturiwe nabi ishobora kubangamira amagara y’abantu. Ivyo bikoresho ngo biri ku rutonde rw’ibizogurwa hamwe uburyo basavye vyoba bihuye. Mu gisata nyene c’amagara y’abantu, mu bihugu bine bisangiye ico kiyaga, ngo hazotunganywa inyigisho ku bahinga bato bato bo mu bushikiranganji bw’amagara y’abantu kugira bafashe mu bijanye n’isuku. Vyongeye, ngo hazogurwa n’ibimodokari vyo gutwara imicafu yo kwa muganga kugira bayishikane aho ishobora guturirwa itagiye irasanzara mw’ibarabara. Mu mashure ari mu karere k’ikiyaga Tanganyika, ngo bazoronswa ibisandugu aho bashobora kwegeraniriza imicafu baba bakubuye mu masomero atandukanye. Bisubiye, ngo mu ntumbero yo gushigikira ishirahamwe SETEMU mu gikorwa co gusukura igisagara, bazoronsa iryo shirahamwe amapompe afasha kuduza amazi acafuye kugira ajanwe muri ca kibanza co kuyungurura amazi acafuye co ku Buterere, n’aho na Reta yemeye kugura mwene ivyo bikoresho. Ivyo ngo bakazoshobora kuzovyikorako hagize imwe murizo ipfa. Mu gisagara ca Bujumbura gisanzwe kiri ku kiyaga Tanganyika, ngo bazorondera amapompe afasha gusukura imiserege itwara amazi y’imvura kugira bayikuremwo urwondo, amazi nayo abandanye. Ku bajejwe intwaro ku rwego rw’amakomine, ngo bazotanga inyigisho ku batowe mu makomine ari ku nkengera z’ikiyaga Tanganyika kugira bamenye akamaro ko kugira isuku ry’ikiyaga Tanganyika. Izo nyigisho ngo zizotangwa mu bihugu bine bisangiye ico kiyaga kubera ko igihugu kimwe gisutseyo imicafu, n’ibindi bihugu birashikirwa. Mu bisagara vya Kigoma, Mpulungu na Uvira, ngo hazoba ivyigwa vy’ukuntu botunganya neza amazi acafuye kugira uburyo busubiriye kuboneka bishirwe mu ngiro.

Déo Misigaro

 

 

Ibihugu vy’Uburundi n’Ububirigi ngo vyiteguriye kunagura imigenderanire yavyo

cffddKw’igenekerezo rya 28 Ntwarante 2017 umukuru w’Inama Nshingamateka, Pascal Nyabenda yarakiriye mu biro iwe intumwa idasanzwe y’igihugu c’Ububirigi mu karere k’ibiyaga binini Renier Nijsken n’abari bamuherekeje. Bakaba rero baravuganye ibitari bike bahereye ku bijanye n’imigenderanire hagati y’igihugu c’Uburundi n’igihugu c’Ububirigi. Ivyo vyamenyeshejwe n’umuvugizi w’Inama Nshingamateka, Alexis Badian Ndayihimbaze inyuma y’uwo mubonano. Nk’uko yabandanije abimenyesha ngo Umukuru w’Inama Nshingamateka yamenyesheje ko ahimbawe no kubakira na cane cane ko yaheruka kubonana n’intumwa z’Ububirigi kera yongera abamenyesha ko biteguriye kubakira kandi batigeze bazibira imiryango ati ahubwo nibo bugaye imiryango. Izo ntumwa rero ngo zarashatse kumenya cane cane ibikorwa vy’Inama Nshingamateka aho bigeze, umukuru w’Inama Nshingamateka akaba ngo yababwiye ko hariho amategeko aya n’ariya ari ku rutonde mu bikorwa bigezweho muri kino gihe hanyuma ngo bakaba baravuganye ku bijanye n’ugufashanya kwari kumaze igihe gusa n’uko gucumbagira, intumwa idasanzwe y’igihugu c’Ububirigi mu karere k’ibiyaga binini Ambassadeur Renier Nijsken ngo akaba yamenyesheje ko igihugug ciwe cabonye ko hari ibintu bitagenze neza ku mpande zose (Uburundi n’Ububirigi), ati ariko rero bazanywe no gutera intambwe nshasha . Ngo yaciye kandi abaza aho bofasha umuntu arabiye aho ibikorwa bigeze. Iyo ntumwa idasanzwe ngo yaravuze ko hariho itegeko Inama Nshingamateka yatoye rigenga amashirahamwe mpuzamakungu ngo ririmwo ingingo zimwe zimwe zisa n’iziteye amakenga, umukuru w’Inama Nshingamateka ngo akaba yamumenyesheje ko ico kitoba ikibazo kirekire cotuma haba ukudafashanya canke ngo gitosekaze imigenderanire ahubwo ngo ayo mashirahamwe abonye intambamyi muri iryo tegeko zotuma ibikorwa vyayo bitagenda neza ngo yoheza akegera   umushikiranganji w’intwaro yo hagati mu gihugu n’uwujejwe imigenderanire n’ugufashanya bakabivugana mu   nama. Utunenge twibonekeje natwo ngo bagaheza bakadushikiriza Inama Nshingamateka na Nkenguzamateka kugirango bashobore kudutosora , izo ngingo zihinyanyurwe ibikorwa bishishikare kugenda neza impande zose zumve zitekaniwe. Ikindi kibazo bashitseko ngo ni amakenga boba bafise ku bijanye n’uguhindura Ibwirizwa Shingiro. Umukuru w’Inama Nshingamateka ngo akaba yabamenyesheje ko ivyo biraba abarundi kandi ari uburenganzira bwabo narirya Uburundi ari igihugu cigenga kandi cikukiye. Ni ukuvuga ko iyo rihejeje guhinyanyurwa baheza bagasaba umunyagihugu uwariwe wese akavuga ko aryemeye canke aryanse.

Christine Manirambona

 

Umuntu wese afise itongo mu gisagara ahamagariwe gutanga ikori ry’agataka

IMG045Kuva mu mwaka w’ 2016 harashizweho itegeko rishasha rigenga ikori ry’agataka. Muri iryo tegeko rishasha, umuntu wese afise itongo mu gisagara ategerezwa gutanga ikori ry’agataka kiretse inyubako za Reta, amashure n’amasengero kiretse iyo afise ikibanza bacisha amafaranga. Uwurongoye igisata kijejwe amafaranga igisagara ca Bujumbura gikoresha, Ferdinand Ntunga yamenyesheje ko umuntu wese afise itongo mu gisagara ategerezwa kurimenyesha akagirako akariha ikori ry’agataka uwo munsi nyene. Yabandanije amenyesha ko imenyekanishwa n’irihwa ritegerezwa kuba ryabaye imbere y’itariki 31 Ntwarante uko umwaka utashe. Ngo iyo umuntu arengeje ico kiringo, aratanga ihadabu ringana n’ibice cumi kw’ijana ( 10%) bakaza barongerako 1% uko ukwezi guheze. Ngo iyo umutangakori yabeshe aracibwa ihadabu ringana n’ibice ijana kw’ijana (100%), hari naho ashobora no gufungwa bivanye n’urugero rw’icaha. Muri iki gihe mu biro vy’umukuru w’igisagara ca Bujumbura haraboneka umurongo muremure w’abantu baje kumenyesha amatongo yabo kugira bashobore kuriha ikori ry’agataka. Abo banyagihugu biboneka ko barushe, usanga bashobora kuhamara umunsi wose batarashobora gutunganirizwa kubera abantu ari benshi nayo abakozi bategekanijwe kugira baharure amakori umuntu atanga atari benshi. Kubera ubwo bwinshi bw’abantu, Umushikiranganji w’intwaro yo hagati, Pascal Barandagiye yarasohoye itegeko nshikiranganji n°530/548 ryo ku wa 28 Ntwarante 2017ryashikirijwe uwo munsi nyene n’umukuru w’igisagara ca Bujumbura Fredy Mbonimpa ryongera abanyagisagara ca Bujumbura ikiringo c’ukwezi c’ukumenyekanisha n’ukuriha ikori ry’agataka.

Aline Kanyana

 

Haherutse gushirwaho ho urupapuro ndangamunyeshure ruzomuherekeza mu myaka yose y’amashure yisumbuye

DSC03598Umuvugizi w’ubushikiranganji bujejwe inyigisho z’amashure yisumbuye, aya kaminuza n’ubushakashatsi, Juma Edouard yararemesheje ikiganiro ku bamenyeshamakuru ku wa 28 Ntwarante 2017 i Bujumbura kugira ngo amenyeshe abavyeyi n’abanyeshure ndetse n’abanyagihugu bose ko ubwo bushikiranganji bwashizeho urupapuro ndangamunyeshure ruzomuherekeza kuva atanguye umwaka w’indwi w’ishure nshingiro gushika aheze amashure yisumbuye. Ngo ni urupapuro ruzotangwa rumatanye na rumwe ishure ritanga umwaka uheze rwerekana amanota umunyeshure yaronse (bulletin). Urwo rupapuro rero ngo ruzoba ruriko amakuru yose akenewe ku munyeshure haba umwidondoro wiwe wose, amanota yagiye araronka n’amashure yizeko yose hatibagiwe ingingo abarongoye amashure bagiye bamufatira. Abarongoye amashure baragabishwa kutazorihisha urwo rupapuro kuko ruzotangwa ku buntu nk’uko biri ku rupapuro rwerekana amanota y’umunyeshure. Juma Edouard yaramenyesheje ko ata muyobozi n’umwe w’ishure azoba arekuriwe kwakira umunyeshure mushasha adafise urwo rupapuro ndangamunyeshure kuva mu ntango z’umwaka utaha w’ishure w’2017 ushira uw’2018. Ngo ku bazoba bahejeje umwaka w’icenda w’ishure nshingiro, igishasha mu mwidondoro w’umunyeshure ni uko kuri urwo rupapuro habwirizwa kwandikwako inomero yahawe mu gukora ca kibazo ca Reta gitanga uburenganzira bwo kubandanya igice ca kabiri c’amashure yisumbuye. Urwo rupapuro ngo ruzoherekeza umunyeshure aho azoja kwiga hose, ivyo ngo bikazofasha mu kuvavanura na bimwe wasanga umunyeshure ashobora kubandanya amashure gushika aheze, agakora n’ikibazo ca Reta mbere akanagitora adafise ibikenewe vyose vyerekana ko yize neza amashure yose yisumbuye. Wasanga ngo ubushikiranganji bushobora kwima urupapuro rw’umutsindo umunyeshure bumwagiriza kuba adakwije ibisabwa canke ko yasubiyemwo gatatu umwaka w’ishure. Urwo rupapuro ndangamunyeshure kandi ngo ruje gukuraho ingorane nyinshi zibonekeza ku bayobozi b’ishure mu guhanahana amadosiye y’abanyeshure bahejeje amashure yisumbuye cane cane iyo bagiye barahindagura ibigo vy’amashure bizeko. Ngo bizotuma kandi abavyeyi n’abanyeshure badasubira kuruhishwa canke kujuragizwa no kurondera ku mashure atandukanye ibisabwa vyose vyahora bija mu ma dosiye y’abanyeshure. Juma Edouard yabandanije amenyesha ko urwo rupapuro ndangamunyeshure nirwatangura gukora, ata munyeshure numwe azoba yemerewe gusubiramwo umwaka gatatu kiretse ku mvo zumvikana nk’izijanye n’indwara abarongoye ishure bamenyeshejwe kandi bagatohoza neza ko ari zo. Izo mvo kandi ngo zibwirizwa kwandikwa kuri rwa rupapuro ndangamunyeshure. Abayobozi b’ishure baragabishwa ko abazorenga kuri iyo ngingo bazohanwa kandi bongere bishure ku giti cabo ivyo igihugu kizoba catakaje bivuye mu kwandika umunyeshure asubiyemwo umwaka gatatu. Juma Edouard yasozereye ikiganiro ahamagarira abavyeyi n’abanyeshure kwitwararika cane no kubungabunga neza urwo rupapuro ndangamunyeshure kuko ngo uwuzoba atarufise, naho yokwerekana « bulletin » yonyene iriko amanota meza , atazoshobora kwemererwa kubandanya amashure cane cane iyo bibaye ngombwa ko ahindura ikigo c’ishure.

 Schola Uwanyirigira

 
Ouvrir