Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Agathon Rwasa azoserukira umugambwe CNL mu matora y’umukuru w’igihugu yaratanze dosiye muri CENI

zzzzUmukuru w’umugambwe CNL Agathon Rwasa aheruka kwizigirwa mw’ikoraniro kaminuza ry’uwo mugambwe kugira  azowuserukire mu kwitoza mu kibanza c’umukuru w’igihugu yaratanze dosiye yiwe mu murwi w’igihugu w’igenga  ujejwe gutegura amatora CENI ku wa 27 Ruhuhuma 2020.  Rwasa akaba yamenyesheje ko gushira dosiye muri CENI ari kugira umugambwe CNL uze uhiganwe n’iyindi migambwe yemewe n’amategeko mu Burundi.  Yaciye amenyesha kandi ko, iyo amatora atunganijwe neza bifise ingaruka nziza ku barundi bose no kw’iterambere ry’igihugu, ni muri iyo ntumbero Rwasa akaba yasavye  ko amatora yotunganywa neza kugira ngo ntihagire uwuzogira urwitwazo rwo kwidoga ngo  ntashimishijwe n’ibivuye mu matora vyotuma haba imyidogo mu  migambwe itandukanye. Yamenyesheje kandi ko inama zitari nke zitegura amatora haba kubayatunganya, haba ku banyeporitike yagiye aratunganywa, bisigura ko hisunzwe ivyavuye muri izo nama atakizobuza ko amatora agenda neza mbere aho abarundi bashize akaba ariho intahe ishira.  Afatiye ku kungene  amatora yo mu myaka iheze yagenze n’ay’ubu uko ariko arategurwa, Rwasa yamenyesheje  ko demokarasi ibandanya itera imbere akaba afise n’icizere ko ata murundi azova gutora ngo agirirwe nabi ngo n’uko ari umunywanyi w’umugambwe uyu canke uriya. Mu kurangiza, Rwasa yamenyesheje ko abanywanyi b’umugambwe CNL bateguwe bikwiye mu bijanye n’ukwubahiriza agateka ka zina muntu wese kandi bashira imbere umutekano,amahoro n’umubano mwiza ku barundi bose.  Yarasavye ko n’iyindi migambwe yoba hafi abanywanyi bayo kugira abarundi bose basenyere ku mugozi umwe bateze imbere igihugu cabibarutse.

Donathe Ndayisenga  (yimenyereza)

 

Abamenyeshamakuru basabwa kuba maso mu gihe c’amatora mu gutanga amakuru ahumuriza imitima y’abarundi

DSC 0070Uruhara rw’ibimenyeshamakuru n’abamenyeshamakuru ni ntangere mu gihe himirije amatora, ari yo mpamvu yatumye abarongoye ibimenyeshamakuru n’abamenyeshamakuru bakoranira mu ntara ya Ngozi kugira baronswe inyigisho ku bijanye n’uruhara rwabo imbere y’amatora, mu matora nyezina  hamwe inyuma y’amatora. Izo nyigisho zikaba zuguruwe n’umwunganizi w’umushikiranmganji wo kumenyesha amakuru Thierry Gitamoya ku wa 27 Ruhuhuma 2020.Thierry Gitamoya yabanje kumenyesha  ko Reta y’Uburundi iriko irategura amatora aba mu mwidegemvyo, ku mugaragaro kandi adakumira. Akaba ariyo agaragaza ubwigenge bw’igihugu nyakuri. Ayo matora akaba ariyo ya mbere atunganijwe Uburundi butarinze kuzera inze,abarundi bakaba ari bo batanze uburyo bwo kuyatunganya. Thierry Gitamoya yabandanije amenyesha ko kugira iyo ntumbero Reta yihaye iyishikeko  uruhara rw’abamenyeshamakuru ari ntangere kuko ari bo bashikiriza abanyagihugu uko ico gikorwa gitera itaka igihugu kiriko kiragenda. Abamenyeshamakuru basabwa gukoresha ubuhinga bwabo bidakekeranywa ko bazi mu gushiraho icuka ciza gitegura amatora hamwe n’imitima y’abanyagihugu, imbere yuko Uburundi bushikira iryo sango ryiza ry’amatora. Ivyo vyose bikaba bisaba ko boha ijambo bose ku rugero rungana ata nkunzi. 

Muri izo nyigisho zahawe  abarongoye ibimenyeshamakuru n’abamenyeshamakuru zaje gushimangira izindi bari bararonkejwe mu ntara za Kayanza, Muramvya hamwe n’iyo yabereye i  Ngozi, zo gukundisha igihugu, Umukuru w’igihugu yahaye imirwi myinshi y’abanyagihugu, abamenyeshamakuru badasigaye inyuma. Izo nyigisho zogushimangira, zikaba zatanzwe na Jacques Bukuru aho yabamenyesheje  akamaro n’uruhara rw’ibimenyeshamakuru mw’itunganywa ry’amatora. Icigwa kigira kabiri kikaba cashikirijwe na Pierre Claver Ndayicariye akaba yagize irimbura  ku bikorwa vyakozwe n’abamenyeshamakuru mu bihe vy’amatora yo mu myaka y’ 2005, 2010, 2015 hamwe itora ry’ibwirizwa shingiro mu  2018  ni ico abamenyeshamakuru baterereye. Icigwa kigira gatatu caronkejwe abamenyeshamakuru n’abarongoye ibimenyeshamakuru catanzwe n’umwigisha wo muri kaminuza y’Uburundi Adolphe Sururu umuhinga mu mvugo itababaza  ku mutima afatiye  ku majambo ashikirizwa n’abanyeporitike imbere y’amatora, mu matora nyezina, n’inyuma y’amatora badakoresheje amajambo ababaza imitima yabanyagihugu. Thierry Gitamoya yasozereye amenyesha ko izo nyigisho zizofasha gutuma hashikirizwa amakuru atuma abanyagihugigu binjira mu matora n’imitima itekanye y’abarundi. Abamenyeshamakuru baze biyage ko habaye abagabo bijunja n’ijambo babifashijwe n’ubwenge Imana yabahaye n’ubwenge bagiye barakaburirwa mu nyigisho bagiye bararonka.
Anitha Bizimana

 

Reta y’Uburundi irajwe ishinga no guteza imbere no kwagura ikibuga c’indega ca Bujumbura

DSC01177Icegera ca kabiri c’Umukuru w’igihugu yarongeye amenyesha ko Reta y’Uburundi irajwe ishinga no guteza imbere no kwubaka ikibuga c’indege mpuzamakungu ca Bujumbura gutyo gifashe mu kuzamura ubutunzi bw’igihuguno kurwanya ubukene.Ivyo yabivuze igihe yariko yugurura inama igira gatanu ihuza abahinga bo bigo bitunganya bikongera bikagenzura umutekano w’indege zitwara abantu n’ibintu vyo mu karere ka Afrika y’ubuseruko yabereye i Bujumbura ku wa 27 Ruhuhuma 2020.  Joseph Butore yarongeye amenyesha ko Reta y’Uburundi itegera neza uruhara igisata co gutwara abantu n’ibintu biciye mu muhora wo mu kirere (ikoreshwa ry’indege) mw’iterambere ry’ibihugu vyo mu karere n’Uburundi burimwo. Ico gisata ngo gituma ingenzi zigendera Uburundi ziyongera mbere n’urudandazwa rukiyongera bigatuma haboneka n’akazi gutyo bigafasha kurwanya ubukene. Icegera ca kabiri c’Umukuru w’igihugu yarashimiyre ikigo ca Afrika kijejwe kugenzura uruja n’uruza rw’indege zunguruza abantu n’ibintu  n’umutekano wazo (CASSOA) cizigiye Uburundi kugira butunganye iyo nama  y’abahinga igira gatanu.   Kugira iyo nama kandi ibere ku murwa mukuru w’ubutunzi Bujumbura ngo vyatumwe n’umwumvikano no gukorera hamwe biranga ibigo bigenzura umutekano w’indege mu bihugu vya Afrika y’ubuseruko n’ivyo muri Afrika vyose.

Vyongeye ngo Uburundi bwariyemeje gukurikiza amasezerano mpuzamakungu yose agenga ivyo gutwara abantu n’ibintu n’indege. Ivyo bikaba vyatumye imihora yo kwunguruza abantu n’ibintu ihuza Uburundi n’ibindi bihugu yongerekana. Reta y’Uburundi yarabishizemwo inguvu zikomeye mu guhimiriza amashirahamwe atwara abantu n’ibintu n’indege gukorera mu Burundi. Ayo mashirahamwe amaze gutahura akamaro ko gukorera mu Burundi vyatumye abipfuza kugendera igihugu c’Uburundi na bamukerarugendo biyongera. Yaboneyeho n’akaryo ko kumenyesha ko Reta y’Uburundi irajwe ishinga no guteza imbere no kwubaka ikibuga c’indege « Melchior Ndadaye ». Ni naho biciye mu gufashanya n’ibindi bihugu, igihugu c’Ubushinwa ciyemeje gusanura, kwagura no guteza imbere ico kibuga. Ibikorwa ngo birimirije gutangura kugira uruja n’uruza rw’indege zikorera mu Burundi rwiyongere kandi hisungwe ibisabwa n’amakungu muri ico gisata. Yarongeye amenyesha baravye igenzurwa riheruka gukorwa ku bijanye no gukingira indege ryakozwe muri Nyakanga 2018 no muri Munyonyo 2019 basanze Uburundi bwarateye intambwe mbere n’ingingo nyinshi zafashwe. Aho akaba ari mu ntumbero yo gutorera inyishu intamabamyi ziri muri ico gisata mu Burundi. Yarongeye amenyesha ko Uburundi buzi neza ko ubuhinga bwo gucungera uruja n’uruza rw’indege n’umutekano wazo bitegerezwa gutsimbatazwa hakurikijwe ibisabwa n’ishirahamwe mpuzamakungu rijejwe kugenzura indege zunguruza abantu n’ibintu (OACI). Ivyo bikaba bizotuma amashirahamwe mpuzamakungu y’indege yunguruza abantu akorera mu Burundi kandi biheza bigaha n’icizere ingenzi.  Yamenyesheje ko hakiri intambamyi naho ingingo nyinshi zafashwe ariko gusaba ikigo CASSOA kubandanya gifashha Uburundi mu gushitsa ihangiro bwihaye. Kw’izina rya Reta y’Uburundi yarashimye abafashije bose mu bijanye n’uburyo hamwe n’ubuhinga kugira iyo nama ibere mu Burundi.Umushikiranganji ajejwe gutwara abantu n’ibintu, ibikorwa vya Reta no gutunganya amatongo Jean bosco Ntunzwenimana nawe yamenyesheje ko kuva Uburundi bwinjiye muri iryo shirahamwe ry’ibihugu vya Afrika y’ubuseruko EAC, ikigo CASSOA cafashije vyinshi mu guhindura amategeko igenga ico gisata kugira yisunge ibisabwa. Niko kumenyesha ko Uburundi bwavuye ku rugero rwari hasi bukagera ku bice 80 kw’ijana mu bijanye no gukurikiza mategeko agenga igisata co gutwara abantu n’ibintu n’indege. Mw’igenzurwa riherutse kuba naryo ngo ryerekanye ko Uburundi bwateye intambwe ku bice 20 kw’ijana ugereranije n’igenzurwa ryaheruka.Umuyobozi mukuru w’ikigo kijejwe kugenzura no gucungera umutekano w’indege mu Burundi, Emmanuel Habimana yamenyesheje ko  bateguye iyo nama kugira bashike kw’ihangiro ry’ibintu bitatu. Ubwa mbere bishimangira ko mu Burundi harangwa amahoro muri kino gihe himirije amatora. Ubugira kabiri inyuma y’aho Uburundi bwateye intambwe idasanzwe mw’igenzurwa riheruka gukorwa abaje muri iyo nama bagasanga harangwa amahoro. Ubugira gatatu iyo nama yabereye mu Burundi abanyamahanga barenga 80 bitavye iyo nama binjiza vyinshi mu gihugu.

Epitace Nduwayo

 

Prezida Nkurunziza ahamagarira abamenyeshamakuru b’abarundi kuvuga neza igihugu cabo kandi bakagikunda

DSC 1561Muri rwa rukurikirane rw’inyigisho zo kuzirikana igihugu zitangwa n’Umukuru w’igihugu Petero Nkurunziza, ku wa 28 Ruhuhuma 2020, yari aramutse azitanga ku barongoye ibimenyeshamakuru, abamenyeshamakuru hamwe n’abakora mu bisata vyo kumenyesha amakuru bahuriye ku murwa mukuru w’intara ya Ngozi, aho yabahamagariye kuvuga neza igihugu cabo kandi bakagikunda, ntibabe nka wa mwana w’isema yavuma ibere ryamwonkeje nk’uko vvyamenyeshejwe n’umuvugizi w’Umukru w’igihugu Jean Claude Karerwa Ndenzako inyuma y’izo nyigisho.Nk’uko yabandanije abivuga ngo muri izo nyigisho, abamenyeshamakuru  basabwe  kukizirikana ariko bomenya ko ata na kimwe bari batagizwe n’Imana, n’igihugu hamwe n’abavyeyi. Jean Claude Karerwa Ndenzako yamenyesheje  kandi ko izo nyigisho Prezida Perezida Nkurunziza yari aramutse azitanga ku bamenyeshamakuru incuro ya 4. Izo yatanze uyo munsi zikaba zari izitanguza igice kigira 2 c’inyigisho zo kuzirikana igihugu,  zigizwe n’ibigabane bitatu.

Inyigisho ya mbere yari  iyerekeye iyo abarundi bavuye; iya kabiri  ikaba imenyesha aho bageze ubu,  iya gatatu nayo ikaba izoba yerekeye iyo bagana, akaba azozibandanya mu kwezi kwa Kigarama 2020, igihe igihugu kizoba kiramutswa uwundi mukuru w’igihugu, ngo akazoba rero azoziremesha nk’uwagenywe n’igihugu nk’imboneza muvyo kuzirikana igihugu.  Jean Claude Karerwa yabandanije amenyesha ko muri ico kigabane ca kabiri co kumenya aho Uburundi buteye, Petero Nkurunziza yamenyesheje abamenyeshamakuru ico bategerezwa kuzirikana, ko ata na kimwe bari batagizwe n’Imana, n’igihugu, n’abavyeyi babo. Ivyo bafise vyose babikesha Imana, igihugu. Ngo bagire rero umutima wo kugikunda, ku kizirikana bakagira kandi umutima wo kwihangana. Ngo birashoboka ko abarundi bose harimwo abamenyeshamakuru co kimwe n’iyindi migwi itandukanye y’abarundi bose boba batararonka ivyo bipfuza, canke batarashika aho bashaka gushika, ariko ko bomenya ko imbere ari heza. Umuvugizi w’Umukuru w’igihugu yabandanije amenyesha ko Prezida Nkurunziza yamenyesheje abamenyeshamakuru ko ejo ari heza,  yuko igihugu gifise ubutunzi bwinshi ububoneka n’ubutaboneka,  ko bovuga neza igihugu kandi bakagikunda ntibabe nka wa mwana w’isema yavuma ibere ryamwonkeje, bakagira umutima wo kwizera. Abamenyeshamakuru ngo bategerezwa kumenyesha ko igihugu ari ryo tunga rikuru risumba ayandi yose, bategerezwa kuzirikana ko hari ibidasubirizwa, nta kindi gihugu gishobora gusubirira ic’amavukiro, nta wundi muvyeyi asumba umuvyeyi bafise kandi nta yindi Mana bashobora kuronka. Umukuru w’igihugu yizeje cane abo bajejwe igisata co kumenyeshamakuru ko Uburundi bugeze ku ntambwe ishimishije, kuko kuva aho bushiriye Imana imbere bukagaruka kw’iragi rya Ntare Rushatsi, ibintu vyinshi vyaragaragaye. Igihugu caciye kiba igihugu c’ijunja n’ijambo, kikaba igihugu c’abagabo bigaba bigaburira bakiyubara. Prezida Nkurunziza yasozereye izo nyigisho atumirira abamenyeshamakuru ko boguma muri iyo nzira kandi bazirikana ko guheza neza haba muvyo bavuga, muvyo biyumvira, bizobera umutahe abana babo kuko arico umurundi w’ukuri afise umutima yomenya.  Abamenyeshamakuru  bahamagariwe rero gukora neza kugira baje basigire iragi ryiza abana babo. Twobamenyesha ko imbere y’uko Umukuru w’igihugu atanga izo nyigisho hari habanje kuba inyigisho z’intangamarara zaremeshejwe n’abahanuzi mu biro vy’Umukuru w’igihugu. Inyigisho ya mbere ikaba yari yerekeye ivyinyegeje mu mateka no mu migambi igayitse y’abakoroni; iya kabiri  ikaba yari ijanye n’imico kama y’abarundi.

Anitha Bizimana

 

Prezida Nkurunziza yaratanguje icese irima ry’impeshi

IMG 20200229 WA0017Umukuru w’igihugu, Petero Nkurunziza ari kumwe n’umuryamgo wiwe  yaratanguje icese isekeza ry’irima ry’impeshi, aho yasengeye imbuto mu kibanza c’abarundi bariko barateragira imbuto zitandukanye, yongera nawe nyene araziteragira. Ico gikorwa kikaba cabereye ku musozi Rutanga, komine Gashikanwa intara ya Ngozi ku wa 29 Ruhuhuma 2020.

Prezida Petero Nkurunziza yabanje gusengera imbuto ashimira Imana yaremye ijuru n’isi, Imana y’ubushobozi aho yari aramutse asabira umuhezagiro imbuto mu kibanza c’abarundi bose anaduza ishimwe ku Mana yabagiriye neza hakaboneka umwimbu mwiza w’agatasi. Umukuru w’igihugu yabandanije  ashimira Imana  ku kirere ciza, akazuba  be n’akayaga ndetse n’akavura  keza kaguye.Yabandanije ashimira Imana ko baje mu mwanya mwiza wo gutangura guteragira mu gihugu cose ari abana b’abantu, ububasha n’ubushobozi biri mu mbuto bitangwa n’Imana. Mu kibanza c’abarundi bose bateruye imbuto mu biganza vyabo,ko abanje guhezagira amaboko y’abarundi bose bagiye guteragira mu gihe c’impeshi hamwe n’imbuto zose zigiye guteragirwa kugira zije zimezwe n’Imana, yongere izeze. Umukuru w’igihugu yasavye Imana ko muri izo mbuto zitewe hobonekamwo n’umusesekara urwijwe incuro gatatu gusumba uwabonetse ku gatasi. Umukuru w’igihugu yasozereye iryo sengesho asaba  Imana ko yotanga imvura, izuba hamwe n’akayaga ku rugero rwiza. Yarateye akamo abarimyi ko kwizera  Imana, gutyo baje bibuke kuyishimira hageze iyimbura. Twobamenyesha ko imbuto zizoterwa ku mpeshi,Umukuru w’igihugu yasengeye zari zigizwe n’ibiharage, ubwishaza, ibigori, ibiraya, ibijumbu, ingano n’isoya. Uwo munsi bakaba bashoboye gutera ihegitari 1,5 ibiharage ubwishaza n’ibigori. ku mugoroba w’uwo munsi, Umukuru w’igihugu yararorereye inkino zariko zibera ku kibuga c’umupira w’amaguru RUKUNDO c’i Buye, aho imirwi ya Allellua Fc na Club des Amis yatanye mu mitwe, urwo rukino rukaba  rwarangiye umurwi Allellua Fc ufise ibitsindo 4 kuri 2 vya Club des Amis.

Anitha Bizimana

 

Abarundi bahamagariwe kuguma barikanuye kugira umwansi ntazohave abaca mu ryahumye mu bihe vy’amatora

cinjireIgiporisi c’Uburundi carerekanye abantu babiri bagirizwa kuba bari mu bagize igitero ku bitaro vy’i kibuye mu ntara ya Gitega hamwe n’inkoho zibiri zakoreshejwe. Abo bafashwe bakaba bari mu murwi munini wari umaze gusamburwa mbere bamwe bakaba bamaze gushikanwa mu Mpimba kandi uwo murwi wari umaze kwonona ibitari bike mu kwica no mu kwiba mu gisagara ca Bujumbura. Ivyo bikaba vyamenyeshejwe na Pierre Nkurikiye avugira ubushikiranganji bw’umutekano kw’igenekerezo rya 25 Ruhuhuma 2020 mu ntumbero yo guhumuriza abarundi n’abanyamahanga baba mu Burundi. Igiporisi c’Uburundi carerekanye abantu babiri bagirizwa kuba bari mu bagize igitero ku bitaro vy’i kibuye mu ntara ya Gitega hamwe n’inkoho zibiri zakoreshejwe. Abo bafashwe bakaba bari mu murwi munini wari umaze gusamburwa mbere bamwe bakaba bamaze gushikanwa mu Mpimba kandi uwo murwi wari umaze kwonona ibitari bike mu kwica no mu kwiba mu gisagara ca Bujumbura. Ivyo bikaba vyamenyeshejwe na Pierre Nkurikiye avugira ubushikiranganji bw’umutekano kw’igenekerezo rya 25 Ruhuhuma 2020 mu ntumbero yo guhumuriza abarundi n’abanyamahanga baba mu Burundi .Pierre Nkurikiye yamenyesheje ko uwo murwi wiba ukica ukoresheje ibirwanisho bicira umuriro, urimwo inkozi z’ikibi nyinshi aho igice  kinini cawo  kimaze gufatwa mu bundi bugizi bwa nabi bwagiye burakorwa. Kw’igenekerezo rya 1 Munyonyo 2019 izo nkozi zikibi zarateye mu kabare ko mu gisagara ca Bujumbura aho bita kwa Giriberi aho bishe abantu 3 abandi barakomereka, baratera na grenade igihe bariko barahunga. Ngo hari n’umupfasoni yishwe mu Buyenzi bongera  baramutwara n’amahera atari make Uwo murwi nyene ngo warishe n’abakenyezi 2 n’umwana  bo muri zone  Kanyoshakomine Muha n’uwundi mukenyezi 1 wo mu Kizingwe wone Kanyosha nyene.

Uwo murwi nyene warivye mu ma zone  ya Ngagara na  Kinama. Abaporisi  barashoboye gufata abatari bake kuko hari 9 bamaze gushika mu Mpimba. Bamwe mu bakoze  igitero  giheruka  kubera ku bitaro vy’ikibuye i Gitega aribo Niyonkuru Alfredd na Bikorimana Jean Baptiste ari nawe yatanga imiduga nyene  yo gukora ubwo bubisha barafashwe n’iyo miduga   yarafashwe. Yabandanije amenyesha ko mu bitero bimaze iminsi bikorwa n’abagizi ba nabi mu ntara ya Bujumbura, inkozi z’ikibi 22 zarahasize ubuzima, inkoho 12 zirafatwa n’ibindi bikoresho, abaporisi babiri baricwa abandi barakomereka hamwe n’abari muri uwo murwi bafashwe. Ivyo bitero bikaba vyabereye muri komine Isare mu  ntara ya Bujumbura. Muri izo hakaba harishwe 2 n’ibikoresho birafatwa nk’inkoho 1 n’ibikono vy’amasasu ku misozi ya Nyambuye na Nyarushinge iri muri iyo komine nyene. Muri rusangi rero ngo ivyononekaye muri ivyo bikorwa vyo gutuza ako karwi hariho inkozi z’ikibi 22 zahasize ubuzima harimwo n’umwigisha wo kw’ishure ryisumbuye rya Maranatha ari nawe yari arongoye ako karwi n’abaporisi 2 bariko bagerageza gutuza ako karwi ngo bakingire abanyagihugu. Ibikoresho bariko barakoresha vyafashwe harimwo inkoho 12, grenade 1 n’uturadiyo duto two guhanahana amakuru n’icuma c’inkoho.Yarangije amenyesha ko kuri ubwo bugizi bwa nabi bwose bwakozwe inkozi zikibi z’ikinze agahumbezi kubera muri kino gihe abantu bahanze amaso amatora  twimirije, agahumuriza abarundi n’abanyamahanga ngo batekane bongere babandanye ibikorwa vyabo ariko ngo bagume barikanuye babicishije muri ya nyabune ijejwe umutekano . 

 Josélyne Ndayegamiye

 
Ouvrir