Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Mu Nama Nkenguzamateka : Integuro z’amabwirizwa agenga isubirwamwo ry’amatagisi atozwa ku bifungurwa biva hanze ya EAC yaremejwe

xscssAbakenguzamateka baremeje integuro y’ibwirizwa risubiramwo amabwirizwa agenga itozwa ry’amatagisi ku bidandanzwa biva hanze y’akarere k’ibihugu bigize ishirahamwe rya Afrika y’ubuseruko, irishiraho amatagisi nyongeragaciro n’irigenga amatagisi y’ibidandazwa vyinjira mu Burundi. Ivyo vyabaye mu nama ya bose y’abakenguzamateka yatunganijwe ku wa 5 Ndamukiza 2017. Umukuru w’Inama Nkenguzamateka Révérien Ndikuriyo ni we yari arongoye ibikorwa vy’iyo nama ya bose. Amaze guha ikaze abakenguzamateka n’umushikiranganji w’ikigega ca Reta, Domitien Ndihokubwayo yaciye amusaba gushikiriza imvo n’imvano y’isubirwamwo ry’ayo mabwirizwa. Umushikiranganji w’ikigega ca Reta Domitien Ndihokubwayo yamenyesheje ko haciye igihe ibirere bihindagurika maze umwimbu mu gihugu ugashishikara uba muke. Ivyo rero ngo vyatumye Reta ifata ingingo yo kworohereza abenegihugu kugira ngo basume mu buryo butavuna kuko ibiciro vy’ibifungurwa bimwe bimwe ku masoko vyaciye biduga ibiciro kandi amikoro y’abenegihugu ari mato cane. Ngo rero Reta yafashe ingingo yo gukuraho amatagisi atozwa ku bifungurwa bimwe bimwe bivuye hanze kugira ngo biboneke mu gihugu maze abenegihugu babironke bitazimvye cane. Ivyo ariko ngo ntibizomara igihe kinini mu ntumbero yo kubuza ko hari aboca bikika mu kiza akaba ari bo bunguka maze umwenegihugu ntihagire ico bimwungura. Ngo Reta izogenda ikurikiranira hafi ico iyo ngingo iriko irazanira umwenegihugu. Umukuru w’Inama Nkenguzamateka, Révérien Ndikuriyo yaciye aha ijambo umukuru w’umurwi w’Inama Nkenguzamateka wamaho ujejwe gukurikirana ibibazo vy’ubutunzi, ibidukikigje n’uburyo Reta ikoresha, Immaculée Ndabaneze kugira ngo ashikirize ico umurwi arongoye washitseko mu vyigwa wagize kugira ngo iryo bwirizwa risubirwemwo. Muri ico cegeranyo nk’uko Immaculée Ndabaneze yabishikirije ngo uwo murwi wakoranye n’umushikiranganji aho washoboye kumubaza amafaranga yoba yarinjiye mu kigega ca Reta mu myaka itatu iheze hakurikijwe itegeko inomero 1/22 ryo ku wa 26 Rusama 2006. Aha ngo umushikiranganji yaciye atanga uturonde rw’ingene ayo mafaranga yabonetse hisunzwe urutonde rw’ibifungurwa rwafatiweko. Ikindi barondeye kumenya ni agahombo gashobora kuzoca kaboneka mu gihe ayo matagisi akuweho mu mwaka w’2017. Aha umushikiranganji yishuye ko hazoba agahombo kangana ibice 8 kw’ijana vy’amafaranga ategekanijwe kwinjira mu kigega ca Reta. Ngo ico kinogo kizokuzuzwa n’izindi ngingo zerekeye itozwa ry’amatagisi n’amakori zizogenda zirafatwa. Abakenguzamateka uko bari bitavye ibikorwa vy’uwo munsi bagiye bemeza ibwirizwa rimwe rimwe inyuma y’uko umurwi wamaho ujejwe ibibazo vy’ubutunzi, ibidukikije wagenda ushikiriza icegeranyo cawo kw’ibwirizwa rimwe rimwe ryose. Integuro y’ibwirizwa risubiramwo ibwirizwa rigenga amatagisi atangwa ku bidandanzwa bivuye hanze y’akarere karimwo ibihugu biri mw’ishirahamwe rya Afrika y’Ubuseruko ryemejwe n’abakenguzamateka 36 ; iyigenga isubirwamwo ry’ibwirizwa rigenga amatagisi nyongera gaciro n’amatagisi y’ibidandazwa vyinjira mu gihugu yatowe n’abashingamateka 38. Inyuma y’ivyo bikorwa abaserukira imirwi ibiri y’abakenguzamateka bagize ingendo kwirabira ibiriko birarangurwa mu gisata FONIC n’ishure ry’imyuga ryubatswe n’abashinwa mu Kigobe barashikirije ivyegeranyo vy’izo ngendo ahanini biboneka ko abakenguzamateka bashimye kuzotumako abashikiranganji bakurikirana ivyo bisata kugira ngo bishure ku bibazo vyabo mu ntumbero yo gutanga ivyiyumviro vyokwisungwa mu kurangura imirimo muri ivyo bisata.

Nathan Ntahondi

 

 

Imyaka 23 iraheze Prezida Cyprien Ntaryamira yitavye Imana mw’isanganya ry’indege mu Rwanda : Abarundi basabwa kugiriranira amasezerano n’Imana kugira ngo babone ibihe vyiza

xwcsKw’igenekerezo rya 6 Ndamukiza 2017, mu mihingo yose y’igihugu haratunganijwe ibirori vyo kwibuka umuhisi Prezida Cyprien Ntaryamira yitavye Inama mw’isanganya ry’indege mu gihugu c’Urwanda, hari ku wa 6 Ndamukiza 1994. Ibirori nyamukuru bikaba vyabereye mu gisagara ca Bujumbura, aho vyari vyatewe iteka n’Umukuru w’igihugu Petero NKURUNZIZA ari kumwe n’umutambukanyi wiwe. N’abandi banyacubahiro benshi bakaba bari bitavye ivyo birori. Ivyo birori rero vyatanguriye ku nkuka y’imisa yaherejwe n’Umwungere wa Diyoseze nkuru ya Bujumbura,Musenyeri Evariste Ngoyagoye muri Cathédral Regina Mundi,aho yasavye abarundi kugiriranira amasezerano n’Imana kugira ngo babone ibihe vyiza. Musenyeri Evariste Ngoyagoye yamenyesheje ko kubona abarundi bama bibuka uko umwaka utashe incungu z’igihugu n’abarundi benshi bagiye bahitanwa n’ubuwicanyi ari uko hariho ivyizigiro ko abapfuye bazozuka. Ngo ni ico gituma abarundi bakwiye kugiriranira isezerano n’Imana kugira ngo baze babone ibihe vyiza. Yagarutse ku vyabaye ku bantu ba kera bavugwa muri Bibiriya bagiriraniye amasezerano n’Imana. Ngo Imana yaragiriraniye isezerano na Ibrahimu maze uwo nawe yabaye rurangiranwa kw’isi. Ngo Yezu yabwiye abigishwa biwe yuko uwuzogumya amajambo yiwe atazokwigera apfa. Ngo abavyumvise ntivyabatanganje gusa ahubwo ngo baranavyanse. Ngo bamubwiye ko ivyo avuze atari vyo ahubwo bamwise ko ari ishetani. Nk’uko Musenyeri Evariste Ngoyagoye yashishikaye abisigura ngo iyo umuntu batanguye kumwita ishetani ngo ibintu biba bigeze kure. Ngo haba hasigaye ko bamutera amabuye. Abarundi rero ngo iyo bataba bemera ko abapfuye bazozuka ntibaba bama bibuka ababo bapfuye. Niko gusaba abarundi bose uhereye ku ndogozi z’igihugu n’abarundi bose kwama barondera kugiranira amasezerano n’Imana kugira ngo babone amahoro mu mitima yabo. Ngo mu gihe c’i Karema co gutegura umunsi wa Pasika ngo bikenewe ko haba ugutegura imitima mu gutanga imbabazi, ukwicisha bugufi no kwirega. Ibirori vy’uwo munsi vyabandinirije ku ntatemwa y’umuhisi Cyprien Ntaryamira iri mu ngoro yitiriwe uwa mbere Munyonyo. Aho naho niho hashikiririjwe ivyaranze ubuzima bw’ umuhisi Ntaryamira Cyprien. Haciye hakurikira ugushira ingori z’amashurwe ku ntatemwa yiwe eka mbere n’izabashikiranganji, Simbizi Cyriaque na Ciza Bernard baguye hamwe muri iryo sanganya ry’indege. Prezida NKURUNZIZA yari kumwe n’umutambukanyi wiwe akaba ariwe yatanguye gushira urugori rw’amashurwe kuri iyo ntatemwa. Haciye hakurikira abaserukiye abaserukira ibihugu vyabo mu Burundi, umuryango w’umuhisi Cyprien Ntaryamira, abakuru b’imigambwe uhereye ku baseruye umugambwe CNDD-FDD, Uprona n’iyindi. Ivyo birori vyasozerewe no gutega yompi ijambo ryashikirijwe na Cyprien Ntaryamira igihe yashikira ubutegetsi. Iryo na ryo ryari ryerekeye kugarukana amahoro mu gihugu. Ico gihe yasaba abarundi kwubahana. Ku bwa Cyprien Ntaryamira ngo abahutu, abatutsi n’abatwa bose ni abana b’igihugu bategerezwa gukingirwa kumwe ata kuvangura. Yari yiyemeje kugarukana ubwitonzi mu nzego zose z’igihugu.

Nathan Ntahondi

 

Mu ntara ya Ngozi : Abarundi basabwa kwisuzuma ingeso zabo baheze basubire ku Mana

DSC 0033ggggAbarundi basabwe kwisuzuma, basarangure ingeso zabo, gutyo bagaruke ku Mana. Eka ngo bakwiye kwihana ivyaha, ubwiyorobetsi, ubusuma, ubusambanyi, n’izindi ngeso mbi zose. Muri ico gihe, ngo ivyo bazosaba bazoheza babironke. Izo ni zimwe mu nyigisho zatanzwe n’umutambukanyi w’Umukuru w’igihugu, Denise NKURUNZIZA, ku wa 2 Ndamukiza 2017, mu misa yo guhimbaza Imana mu rushengero rw’urutare rw’i Buye, imisa yari yitambwe n’Umukuru w’igihugu, Petero NKURUNZIZA.Nk’uko umutambukanyi w’Umukuru w’igihugu, Denise NKURUNZIZA yabandanije abishikiriza afatiye ku vyanditse mu gitabu co gucura intimba, ikigabane ca 3, umurongo wa 40, abarundi yabateye akamo ko kwihana bagaruke ku Mana. Muri ico gihe, ngo inzuzi z’ubugingo zizodudubiza mu barundi. Mu gihe, amezi atatu atangura umwaka yarangiye, ngo ni akaryo keza ko kwisuzuma barabe ivyo batahuye mu nyigisho baronse muri ico kiringo cose. Eka ngo abarundi bakwiye kwiha ikibazo co mu mutima, bakisuzuma, bagasarangura ingeso zabo muri ico kiringo c’amezi atatu aheze. Mu gihe abarundi binjira mu mashengero bacafuye, ngo nivyo bituma ibitangaza bidakoreka. Ariko ngo nibigarura bakihana, bakiyeza, ngo ivyo bakeneye bazobironka. Abarundi rero baterwa akamo ko kwihana kubera ngo atawuzi umunsi n’isaha, ngo nivyiza kwihana bakiri bazima. Eka ngo umuntu yihana agihumeka, na kare ngo umuntu niwe yisabira imbabazi akiri muzima. Muri Zaburi ya 50 naho, ngo ico Imana ivuze iragishitsa. Umuntu wese ari mu bikorwa bitagororotse, ngo Imana irateba ikamugaragaza. Eka ngo twihisha amaso y’abana b’abantu, ariko Imana yoyo ivyo turimwo vyose iba ibibona. Mu migani igice ca 29, ngo ibicumuro vyose birangana imbere y’Imana, nta gitoya nta gikuru. Imana ngo ni umuvyeyi, ntigihaniraho,kuko Yezu yaratanze ikiguzi. Kuri ivyo, ngo kwihana rero ni uwu musi Imana itaratugaragaza kubera ivyaha vyacu. Mw’ibaruwa Paulo yandikiye abakorinto, aravuga neza ko ari twe two kwisuzuma kubera ko ari twebwe nyene tuzi ivyo dukora, ariko ngo Imana yoyo irabizi. Ivyaha ngo nivyo bituma dusoma ijambo ry’Imana ntituritahure. Mu gitabu ca Yoweli igice ca 2 umurongo w’12, haranditswe ko dukwiye kwisonzesha kugira duhebe ivyaha vyanse ko duheba. Imana ngo ni munyakigongwe, uwugiye ayigana iramubabarira, eka ngo ibiganza vyayo vyama vyuguruye. N’umwana w’icangazi yarisuzumye arigaya araheza aragaruka kandi ngo yarakiriwe. Vyongeye kubera imbabazi zayo, ngo twigaruye itwakira uko turi kwose, na none ngo amaherezo y’inzira ni mu nzu. Mu cete canditswe na Yohani igice ca 21, kuva ku murongo w’8 gushika ku w’9, aravuga ko kwatura ivyaha imbere y’Imana uba uriko uravavanura na shetani, kuko ngo uba usa n’uwuyimeneye ibanga. Muri Matayo igice ca 26, umurongo wa 20, haranditse ukuntu Yuda yagurishije umwana w’Imana amadenariyo 30. Yuda amaze kubona uko bariko barafata Yezu, yarageze ahantu ngo aricuza ataco agikiza, aho yahavuye asubiza y’amadenariyo. Icigwa twokuramwo rero ngo ni uko twokwihana, twimenye uko turi ngo ntituzoheza ngo dutsindwe n’urubanza.

Déo Misigaro

        

 

Ngo abanyeshure batera umudugararo muri kaminuza y’Uburundi bazohanwa hisunzwe amategeko ayigenga

CAM00116 mmmmmUmuyobozi wa Kaminuza y’Uburundi, Gaspard Banyankimbona amenyesha ko abanyeshure bariko batera uruhagarara muri kaminuza y’Uburundi bazohanwa hisunzwe amategeko ayigenga. Mbere anasaba abanyeshure cane cane bo mu mwaka wa mbere kudafata inzira mbi yo guhagarika ivyigwa kuko ngo ingaruka z’iyo ngendo igayitse bazozibona. Asaba abigisha bose ba kaminuza kwitaba imirimo yabo uko bisanzwa kuko ngo ivyigwa bitazohagararara. Ivyo yabishikirije kuwa 3 Ndamukiza 2017, mu kiganiro yahaye abamenyeshamakuru, mu biro vyiwe. Ico kiganiro cabaye inyuma y’aho bamwe mu baserukira abanyeshure ba kaminuza barungikiye urwandiko Umukuru w’igihugu bamenyesha ko bazohagarika ivyigwa mu gihe itegeko inomero 100/18 ryo ku wa mbere Ruhuhuma riraba ivyo gutanga imfashanyo ku banyeshure ba kaminuza ritofutwa. Muri ico kiganiro Gaspard Banyankimbona arongoye kaminuza y’Uburundi yibukije ko inyuma y’aho hasohowe itegeko inomero 100/18 ryo ku wa mbere Ruhuhuma 2017 riraba ivyo gutanga agafashanyo ku bagomba kwiga ngo haciye haboneka icuka kitameze neza mu banyeshure ba kaminuza y’uburundi ngo n’abandi banyeshure bo mu yandi makaminuza ya Reta. Ngo uburongozi bumaze kubona iryo tegeko bwaciye burirungikira abo vyega bose harimwo n’abanyeshure. Ngo mu nyuma yaho abarongoye ibisata muri kaminuza n’abayobozi bose baciye bakorana kugira ngo hafatwe ingingo zotuma ico cuka kibi kihava. Ngo urwo rwego rwaciye rwiyemeza gusigurira abanyeshure bimwe bimwe biri muri iryo tegeko. Ngo uwuserukira abanyeshure yaciye yandikira uburongozi bwa kaminuza kugira ngo butange insiguro yerekeye iryo tegeko. Ngo itariki 24 Ntwarante 2017 ngo hari abiyitiriye abaserukira abanyeshure ba kaminuza baciye bandikira Umukuru w’igihugu bamenyesha ko bagiye gutegura imyiyerekano. Ariko ngo vyaragaraye ko urwo rwandiko rwarimwo amahinyu menshi. Gaspard Banyankimbona yavuze ko benshi mubasinye kuri iryo kete batari bazi ibiri muri iryo kete. Ngo barahenzwe. Ngo amazina amwe ntagira imikono uretse ko bashirako inomero za terefone, abandi nabo bagasinyirwa n’abandi. Eka mbere ngo hari n’abanyeshure basanze ivyo bakorewe atawe babitumye kuko hakoreshejwe ibikumu vyabereye mu yindi nama. Umukuru wa kaminuza Gaspard Banyankimbona muri ico kiganiro yamenyesheje ko hazokorwa amatohoza kugira ngo uwagiriwe n’icaha ahanwe hakurikijwe amategeko agenga kaminuza. Ikindi rero uwo muyobozi yavuze ngo abanyeshure bo mu myaka ya mbere ni bo bariko barahendwa. Niko kubasaba ko batojana nyabahururu. Ku bwa Gaspard Banyankimbona avuga ko muri kaminuza hari imirwi itatu y’abanyeshure. Ngo hari abasanzwe bataronswa ako gafashanyo ariko bo ngo bagira bati «nimba ako gafashanyo kodushikira nibakaduhe» ngo hari umurwi ugira kabiri urimwo abaronka agafashanyo ariko bataba muri kaminuza. Ngo kubera ubuzima buzimvye ubu ngo nabo nyene babona iyo mfashanyo hari ico yosahiriza kuri bo. Ngo hari umurwi ugira gatatu ari wo ugizwe n’abanyeshure baronka ako gafashanyo kandi bakaba mu ndaro abo rero ngo ni bo baterekwa iyo mfashanyo ije muri ubwo buryo. Abo rero ngo bashika hafi ibihumbi bitatu kandi biroroshe kubakoresha kuko baba hafi na hafi. Ariko rero ngo abo banyeshure ntibohagarika inyungu z’abanyeshure ba kaminuza bose barenga hafi ibihumbi mirongo ine. Abamenyeshamakuru baciye babaza ibibazo. Bashatse kumenya nimba abo banyeshure ataboba bariko barabakoresha.Eka mbere baribajije nimba uwerekanye ko atari muri ivyo baca bamureka. Hari ngo n’abandi bafashwe n’igisata c’iperereza nimba batoba bafashwe kubera izo imvo. Aha umukuru wa kaminuza Gaspard Banyankimbona yishuye ko atavyo yoca amenye ko hari aboba bariko barabakoresha. Ariko rero ngo abanyeshure baza muri kaminuza bose barenza imyaka cumi n’umunani ngo umwe wese ashobora guhanirwa icaha yakoze ku giti ciwe. Ngo uwerekanye ko atari muri vyo ntaco baramuvugako kuko bisaba gutohoza neza. Ngo aboba barafashwe n’iperereza si kaminuza yabikoze kuko ata busho bwategekanijwe muri kaminuza. Eka mbere ngo kuba umunyeshure wa kaminuza afatwa agapfungwa ngo ntivyoba bibaye ubwa mbere ngo na kera ivyo vyamyeho aho mu gihe abanyeshure baba bariko barakurikirana ivyigwa abandi baba bapfunzwe.

Nathan Ntahondi

 

Umurindi w’irwirirana ry’abantu mu Burundi ngo uzotuma haba ingaruka mbi ku bidukikije

kanyanaUbushikiranganji bujejwe ibidukikije n’ituganywa ry’amatongo n’ibisagara bwaratunganije inama ku wa 31 Ntwarante 2017 kugira hemezwe icigwa kijanye n’ihindagurika ry’ibihe mu Burundi. Aho hari kugira Uburundi bushire mu ngiro ivyavuye mu nama mpuzamakungu yerekeye ihindagurika ry’ibihe igira 17.Umuhinga yagize ico cigwa, Jean Marie Sabushimike yamenyesheje ko ari ikintu kiriho kandi ingaruka zaryo rigaragara ku vyerekeye ibisata bigize ubuzima bw’iihugu. Yabandanije asigura ko kubera ihindagurika ry’ibihe usanga imirima yonononekaye, indwara z’ivyaduka zigatera mu gihugu, amabarabara n’inzu bigasidagurika. Ngo ico cigwa carerekanye ko ihindagurika ry’ibihe ririho kandi ribangamiye igihugu. Sabushimike yaramenyesheje ko ku vyerekeye irwirirana ry’abantu, hatagize igikorwa rizoshobora gutuma ihindagurika ry’ibihe rigira ingaruka kurusha uko biboneka muri iki gihe. Ngo ivyigwa bitandukanye vyarerekanye ko, irwirirana ry’abantu riri ku rugero ruteye ubwoba. Ngo uriko uraraba ibiharuro vyari vyitezwe ugaca uraba n’ibiheruka gushirwa ahabona muri Gitugutu 2016, aho abarundi bashitse ku miriyoni 11 n’ibihumbi amajana 200, ivyo biharuro bikaba vyari vyitezwe muri 2025. Sabushimike yamenyesheje ko ivyo vyigwa vyakozwe vyerekana ko abarundi bazoba bageze ku miriyoni 25 mu mwaka wa 2050, ngw’aho naho k’ubuzima bw’igihugu ni hirya y’ejo. Yabandanije amenyesha ko iryo rwirirana ry’abantu rikenewe gucungerwa kuko niryo rituma isi ndimwa igabanuka, abantu bakagerera ahadashoboka, bigatuma amashamba agabanuka, ugaca usanga n’ubutunzi bw’igihugu ntibwifashe neza, bigaca bigorana ingene abantu biteza imbere.

Aline Kanyana

 

Akaranga k’intwaramiheto ngo kagereranywa n’igitinyiro c’intambwe

wwwwpoUmukuru w’igihugu,Petero NKURUNZIZA amenyesha ko akaranga k’intwaramiheto kagereranywa n’igitinyiro c’intambwe.Ivyo yabishikirije mu cigwa yashikirije mw’ishure kaminuza ry’intwaramiheto ISCAM, ku wa 7 Ndamukiza 2017, mu bikorwa vyari bijanye n’indwi ubumenyi n’imico kama mw’ishure kaminuza ISCAM. Prezida NKURUNZIZA, akaba yararonse akaryo ko kwibutsa intwaramiheto z’Uburundi ko zisabwa gukomeza umuryango narirya ariwo bagize muri urwo rwego. Ico kigo ngo ni umuryango kuko ngo abashaka gusambura canke kugirira nabi igihugu bahera ku miryango. Izo nyigisho zatunganijwe ku civugo nyamukuru kivuga kiti: « Winjira mu kibira utazi, ugaca inkoni utazi ». Nk’uko umuvugizi w’igisirikare, koroneri Gaspard Baratuza yabandanije abishiriza, ngo abasirikare bagize umuryango, ngo bategerezwa kuwushigikira, kuwukorera ku buryo ata kintu coza kiwusenyura. Ikindi ngo ku bijanye n’akaranga k’umusirikare, ngo ufatiye ku vyambarwa vyiwe na cane cane ku nkofero aho hariko umutwe w’intambwe, abasirikare ngo ni intare, bategerezwa kugira umutima nk’uw’intare no kubaho nk’intare. Intare rero ngo ntinuranura, igendera mu zindi ntare ndetse ngo aho iba nta tundi dukoko duto duto tuza kuharunguruka. Umukuru w’igihugu, Petero NKURUNZIZA akaba yavuyeho abemereye ko mu kwezi kwa Ruheshi azoja kuremesha ikindi kiganiro kijanye n’intahe yo kwikukira, kukaba nkako, ngo urwo rwego nirwo shimikiro y’intahe yo kwikukira. Tubamenyeshe ko yasozereye urugendo mw’ishure kaminuza ry’intwazangabo mu gisirikare atera igiti, ikimenyetso c’uko yifatanije nabo mu ndwi yahariwe ubumenyi n’imico kama.

Igisirikare cubatse neza gishingira ku nyigisho zikwiye ku ntwazangabo

Igisirikare cubatse neza gitegerezwa gushingira ku nyigisho zibereye, akaba ari muri iyo ntumbero kaminuza ya gisirikare ISCAM ngo ihamagariwe kwigisha intwazangabo zishoboye kurangura imirimo yose zishinzwe mu gisirikare c’Uburundi. Ivyo vyamenyeshejwe n’Umukuru w’ingabo z’Uburundi Liyetena jenerari Prime Niyongabo ku wa 3 Ndamukiza 2017 mu birori vyo kwugurura icese indwi yahariwe ishure kaminuza Iscam. Yarongeye amenyesha ko mu bisirikare vyose vyo kw’isi intwazangabo itegerezwa kurangwa n’indero, gukunda igihugu, kwubaha abamukurira, kutagira aho ahengamiye muvya poritike, gukora yumvikana n’abo bari kumwe hamwe no kwubahiriza agateka ka zina muntu n’ibindi mu ntumbero yo kubera akarorero keza abo ajejwe gutegeka. Ngo nico gituma ata ntwazangabo n’imwe irekuriwe kuyoberwa ayo mateka ku rugero urwo arirwo rwose afise. Ngo intwazangabo rero zitegerezwa kwamiza ku muzirikanyi ko igisirikare c’Uburundi kizokomera koko mu gihe hari ubwiyunge mu gisirikare kandi ari naho kizosayangana mu makungu. Ibiganiro vyashikirijwe muri iyo ndwi ngo vyatowe mu ntumbero yo gufasha igisirikare c’Uburundi kuba ic’ igihugu koko. Umukuru w’ishure kaminuza Iscam nawe, Grégoire Ndorarigonya yamenyesheje ko igisirikare c’Uburundi ngo gitegerezwa kwubahiriza ubwiyunge hagati yaco, kutagira aho cegamiye mu vya poritike hamwe no kurangura imirimo kijejwe kitaravye nkunzi nk’uko biri mu ngingo y’256 y’Ibwirizwa Shingiro. Yarongeye amenyesha ko icivugo c’uwu mwaka ari: «Ukutagira aho cegamiye mu vya poritike niyo nyifato ngenderwako ku gisirikare cose kigomba gukorera igihugu no ku neza y’abanyagihugu ». Ico civugo ngo catowe baravye intumbero y’iryo shure kaminuza ISCAM yo guharanira ubuntu, ubwigenge mu vya poritike bibereye abantu bategurirwa kuzorongora abandi no gukingira imbibe z’igihugu nk’uko biri mu ngingo y’253 y’Ibwirizwa Shingiro. Naho biri uko ngo abari mu nzego z’umutekano barafise uburenganzira bwo kuronswa ubumenyi ku vyerekeye ubuzima bw’igihugu mu vyo imibano na poritike no kuronswa inyigisho zo gukunda igihugu. Ngo muri iyo ntumbero ubuyobozi bwa Iscam bufadikanije n’ubushikiranganji bw’intwaro hagati mu gihugu n’inyigisho zo gukunda igihugu bwaratanze inyigisho zo gukunda igihugu kuva ku wa 5 gushika ku wa 7 Kigarama 2016 aho muri Iscam. Muri iyo ndwi rero ngo hararmeshejwe ibiganiro bitandukanye hamwe n’inkino hagati y’abanyeshure bo muri Iscam hamwe n’izindi zabahuje n’imigwi yo haze nko mu mupira w’amaguru aho bahuye n’umurwi wo muri zone Musaga ,komine Muha. Ibirori bikaba vyarangiye ku munsi wa gatandatu hatanzwe n’udushimwe ku bababaye aba mbere. Arashima kubona iryo shure ribayeho haraheze imyaka 42 rimaze gusohora intwazangabo 1.800. Mu mwaka uheze naho ngo ryakiriye abanyeshure bashika 109 bo mu murwi wa 47, mbere rikaba ryakira n’abanyeshure baturuka mu bihugu vya Afrika y’ubuseruko kuva mu mwaka w’2012 kandi uwo mugambi ukaba uzobandanya. Bisubiye ngo iyo kaminuza iriko irakurikiza ukugene inyigisho zitunganijwe mu zindi kaminuza ku vyerekeye impapuro z’umutsindo za BMD. Aho agashimira indongozi mu gisirikare zashizeho umuwi wo kuraba ukugene ibwirizwa ryo ku wa 30 Kigarama 2011 ritunganya ukundi gusha inyigisho muri kaminuza ryoshirwa mu ngiro.

Epitace Nduwayo

na Déo Misigaro

                                                                                                            

 
Ouvrir