Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Ibihugu vy’Uburundi n’Uburusiya birabandanya gutsimbataza imigenderanire ihasanzwe

butirrrUburundi n’igihugu c’Uburusiya ngo bifitaniye imigenderanire myiza cane haba mu vy’ubutunzi n’ibindi bisata bitandukanye. Ivyo vyashikirijwe n’icegera ca kabiri c’Umukuru w’igihugu  Joseph Butore ku mugoroba  wo kw’igenekerezo rya 7 Ruheshi 2017  ku kibuga c’indege ca Bujumbura, igihe yari aganutse avuye mu gihugu  c’Uburusiya mu nama mpuzamakungu yerekeye ivy’ubutunzi yabereye mu gisagara ca Saint Petersbourg. Nk’uko Icegera ca kabiri c’Umukuru w’igihugu yabandanije abishikiriza, ngo muri iyo nama baravye ibintu bikurubikumu muri ico gihugu  bavuye mu bihugu bitandukanye. Ica kabiri ngo kabaye akaryo  ko gusubira gutangura bushasha imigenderanire n’ayandi mashirahamwe yipfuza gucudika n’Uburundi ku bijanye n’igisata c’Ubutunzi. Ica gatatu ngo kabaye akaryo keza ko gusigurira abatabizi ivyo Uburundi bufise n’ivyo butunze kugira bashobore gukwega abanyamitahe. Ica kane ngo ni uko ibihugu vyaronse akaryo ko kwipima kugira ngo bibone aho kimwe cose kigeze mw’iterambere. Ica gatanu ngo barabiye hamwe ivyerekeye umutekano, poritike hamwe n’imigambi mikuru mikuru y’iterambere. Ngo baragarutse ku vyerekeye ibihano aho usanga ibihugu biteye imbere vyitwaje ivyo kutavuga rumwe hamwe n’ibibazo vya  poritike, ivyo bigatuma ata karusho kabaho haba ku wabitanze n’uwagihawe. Ngo iyo nama iheze ngo intumwa z’Uburundi yari arongoye zaragendeye intara zimwe zimwe z’igihugu c’Uburusiya bakaba bahereye mu ntara ya Tatalsa ngo akaba ariyo ntara iza imbere baravye ingene uburere buriko buratera imbere. Ngo muri iyo ntara barashoboye kubonana n’abarongoye ubushikiranganji bw’ubudandanji, abarongoye ikigo kijejwe guhimiriza abazana imitahe, abarongoye ihinguriro rikora imodoka zikomeye cane. Yarongeye baravugana ivyo bafise mu gihugu c’Uburundi nabo baramubwira ivyo bafise muri ico gihugu Uburundi bukeneye. Yarongeye aramenyesha ko bababwiye ko ku bijanye n’ingene Uburundi bworohereza abagwizatunga n’ingene abazoza gukorera mu Burundi bazobafasha mu vy’ubuhinga gutyo bazoze ku bwinshi.

Joseph Butore yarongeye aramenyesha ko abarusiya bababwiye ko abanyagihugu baho bakunda icayi n’ikawa vy’Uburundi basanze biryoshe, ivyo vyose abarusiya bakazoshobora kubisanga mu Burundi. Ngo n’abo bababwiye  ko bimbura igitoro vyinshi Uburundi nabwo bugikeneye. Ngo kuri ivyo vyose  bakaba bumvikanye yuko boshiraho imirwi  y’intumwa 2 ku mpande z’ivyo bihugu vyompi kugira ivyo bavuganye bivemwo imigambi irashe. Ngo bavuye mu  karere ka Tatalsa baciye bagenda mu yindi ntara yitwa Mordavie aho bafitaniye imigenderanire n’igihugu c’Uburundi mu vy’ubutunzi. Ngo bakaba baciye bagendera amahinguriro amwe amwe akorera aho . Ngo baragendeye n’ihinguriro ryitwa Lisma ryamaze kwamukamwo ishirahamwe ryitwa Trino rizoza gukorera mu gihugu c’Uburundi amatara akoreshwa n’umuyagankuba. Ngo irindi hinguriro bagendeye rikora intsinga zikoreshwa mu gutanga umuyagankuba n’irindi rikora itsinga z’ubwoko bubiri bukoreshwa mu gutwara umuyagankuba aho utari. Ngo hakaba kandi hari urutsinga rukoreshwa mu guhanahana amakuru rukongera rugakingira urutwara umuriro. Ngo muri ayo mashirahamwe abiri ngo uwutwara ishirahamwe rya REGIDESO  hariho ivyo yashimye bakaba baciye bagiriranira amasezerano yuko REGIDESO yoronka izo ntsinga n’ibindi ayo mashirahamwe akora. Ngo barongeye baragendera ishirahamwe rihingura  umwimbu uva mu biterwa na cane cane imboga. Ngo bahawe ububasha n’Umukuru w’igihugu c’Uburundi bari kumwe n’Umukuru w’igihugu ca Mordavie hamwe n’Icegera ca mbere c’Umukuru w’igihugu wa Mordavie, barateye igikumu ku masezerano yo gufashanya hagati y’igihugu c’Uburundi na Mordavie mu bisata vy’ubutunzi, gutabara imbabare hamwe n’abatishoboye hamwe no mu bisata vy’imico kama n’inkino. Ngo ayo masezerano azofasha cane kugira hashingwe imigambi yo gufashanyamwo. Ngo mu gutahuka  baraciye ku murwa mukuru w’igihugu c’Uburusiya, Moscou aho baciye kuramutsa intumwa idasazwe y’umukuru w’igihugu c’uburusiya mu bihugu vyo muri Afrika na Aziya ngo ico gihe akaba yaramushikirije ubutumwa bwanditse yarungikanywe n’Umukuru w’igihugu c’Uburundi? Petero NKURUNZIZA  kugira abushikirize mugenziwe w’igihugu c’Uburusiya Vladimir Putin.

   Thérèse Niyonkuru

                                                                                                      

 

 

Ubushikiranganji bujejwe ibidukikije bugiye gukurikiranira mu buryo budasazwe ibikorwa mu bijanye no gukingira inzuzi

IMG59Inzuzi Muha, Nyabagera, Kanyosha, Gasenyi, Gikoma na Ntahangwa zica mu gisagara ca Bujumbura akaba arizo zigize akarimbi hagati y’ikomine n’iyindi zikisuka mu Kiyaga Tanganyika. Izo nzuzi zirabangamiye inyubako cane cane uruzi Ntahangwa. Izo nzuzi zikara cane cane mu gihe c’imvura, aho zita inzira ugasanga zirononye inyubako n’ibindi. Uruzi Ntahangwa ruca mu makaritiye abangamiwe cane akaba ari amakaritiye ya Mutanga, Kigobe, Nyakabiga, Jabe, Buyenzi na Ngagara rurabangamiye inyubakwa zo murayo makaritiye. Amakariye ya Mutanga, Kigobe na Nyakabiga arabangamiwe cane. Ibarabara ryitwa Mukarakara rica mu kigobe ryarononekaye ntawukiricako. Mu guta inzira, urwo ruzi rugomba rushikire ingo ziri mu Kigobe gushika naho benezo bataye baromoka kubera hari ikimanga giteye ubwoba. Urwo ruzi rwarononye ibarabara rija ku mugoboka, ubu abagenda n’amaguru nibo bonyene bashobora kuricako, hamwe iryo barabara ryokononekara rwose bizoba bigoye kuko ntayindi nzira ababa ku mugoboka bashobora gucamwo. Ibihome vy’amashure shingiroyo ya mutanga sud bifise imigaga eka n’ishure ritoye ryo mu Nyakabiga aho bita kuri « Jardin public » rirabangamiwe n’uruzi Ntahangwa. Kugira hamenyekane ikigiye gukorwa kugira inyubako ziri ku nkengera z’inzuzi zica mu gisagara ca Bujumbura ntizibandanye zibangamirwa, ikinyamakuru UBUMWE caragendeye umuyobozi mukuru ajejwe gutunganya amatongo no gukingira inyubako, Omer Niyonkuru. Uwo muyobozi yamenyesheje ko uruzi Gasenyi, haruguru y’igitarurwa hari ivyigwa vyakozwe kugira barabe ukungene bokingira uturere mvomerantara. Ngo ivyo vyigwa bizokwerekana ahazoterwa ibiti n’ahazokubakwa uruhome rushigikira isi. Ngo hepfo y’ibarabara rica hambavu y’uruzi Gasenyi, ishirahamwe rijejwe inyubako ABUTIP ririko rirahakora. Ngo hariho umugambi w’Ibanke y’isi yose iriko irafasha kugira ivyigwa vyo gukingira akarere ka Sare. Niyonkuru yarahumurije abegereye uruzi Ntahangwa ko muri ir’ici hari imigambi yo gukingira uturere mvomerantara mukuhatera ibiti, hari n’umugambi wo gusanura amabarabara yo ku Mugoboka no mu Kigobe yabaye nabi. Ngo abahinga basavye ko impome zikingira uruzi Ntahangwa zosubira kubakwa. Ubushikiranganji bujejwe ibidukikije ngo bugiye gukurikiranira mu buryo budasazwe ibikorwa mu bijanye no gukingira inzuzi zica mu gisagara ca Bujumbura.

Aline Kanyana

 

 

Ubutungane butegerezwa kwigenga kandi bugashikira bose

cdezsKw’igenekerezo rya 30 Rusama 2017, ishirahamwe rijejwe gukurikiranira hafi ibikorwa vya Reta « OAG » rifadikanije n’ishirahamwe Cordaid hamwe n’ishirahamwe ry’abacamanza b’abakristu bo mu Burundi ryaratunganije uruganda rwo kurabira hamwe ivyavuye mu cigwa cakozwe ku bijanye n’ingene abantu boshikira ubutungane bwo mu Burundi vyoroshe. Nk’uko umuhanuzi wo mu bushikiranganji bujejwe ubutungane, Gérard Bangayimbona yabimenyesheje mw’ijambo ryo kwugurura urwo ruganda ngo Reta yariyemeje ibicishije muri poritike y’ubushikiranganji bw’ubutungane gushiraho ubutungane bwigenga, buvuga ukuri, kandi bushikira bose. Igikorwa ca Reta biciye muri iyo poritike ngo ni ico gukora ibishoboka vyose kugira ngo hakosorwe utunenge twibonekeza haba ku bitura ubutungane canke ku bacamaza. Reta y’Uburundi rero ngo iritwararitse ivyo abanyagihugu bakeneye naho ifise amikoro make. Gérard Bangayimbona yarongeye amenyesha ko ahantu hose kw’isi, umuntu yama yipfuza ko haba ubutungane bwuzuriza bose kandi bwigenga. Ngo ugushikira ubutungane kuri bose ni ikimenyetso cerekana umubano mwiza mu kibano. Uwatanze inyigisho ku bijanye n’ingene hoba gushikira ubutungane kuri bose, Fabien Segatwa yamenyesheje ko umuntu wese yaba muto canke mukuru yotegerezwa kwitura ubutungane igihe afise ikimubakiye, yaba umurundi canke umunyamahanga agashikira ubutungane ata ntambamyi zirinze kujamwo. Ariko rero ngo mu gihe tugezemwo hariho ibintu vyinshi bituma abantu bamwe bamwe badashobora kwitura ubutungane. Ivyo navyo ngo biva ahanini ku bukene abanyagihugu n’igihugu bafise. Ikindi ngo ni uko ubutungane atari ukuja muri sentare gusa, ariko ngo umuntu ashobora kuburonka ku musozi yituye abashingantahe bo ku mugina, umukuru wa zone, ku wurongoye igiporisi mu nzego nyinshi nka CNC, n’ahandi henshi kandi abo bose ngo bagakora bisunze akaranga k’ubucamanza mu guca urubanza rudahengamye gutyo bakuzuriza bose , bagaheza bagaca urubanza rwiza. Fabien Segatwa yamenyesheje ko hari vyinshi vyo gukora kugirango habe gushikira ubutungane kuri bose. Ivyo navyo ngo ni uko muri sentare hoba umuntu ajejwe igikorwa co kuza arereka abantu baje kwitura ubutungane aho baca n’ico bategerezwa gukora gutyo ngo bakareka kuza barajuragirika, ngo hojaho itegeko rishiraho abacamanza bo ku mugina gutyo Reta ikabaha akarusho kugirango ntibaze baraka igiturire, ngo mu guca urubanza hagukurikizwa amategeko y’igihugu kandi abacamanza babwirizwa gukora bigenga, abamenyesha nabo ngo bakabwirizwa guha umwanya abacamanza bakaza barashikiriza ikiganiro c’ingene bokwigisha abantu kumenya amategeko, n’ibindi.

Estella Niyongere

 

Abarundi basabwa kwitaho kurusha ibigo ndangakaranga kugira ingenzi zishobore kubihurumbira

der Abarundi bategerezwa kwitaho kurusha ibigo ndangakaranga mu ntumbero yo kwerekana ishusho ryiza ry’igihugu. Ivyo vyashikirijwe n’umunyamabanga ntayegayezwa mu bushikiranganji bw’urwaruka, inkino n’imico kama Godefride Hakizimana mu nama ubwo bushikiranganji bwari bwatunganije yo gukarihiriza ubwenge abajejwe gutunganya ibigo ndangakaranga vy’Uburundi kugira bashobore gukingira ibishobora gutitura ivyo bigo. Hari kw’igenekerezo rya 30 Rusama 2017. Nk’uko yabandanije abimenyesha mw’ijambo ryiwe, ngo Reta yarashize inguvu mu migambi yo mu gisata c’imico n’akaranga. Ngo naho biri uko irashira imbere ibigo ndangakaranga narirya bishobora gutuma ingenzi zihurumbira Uburundi gutyo bigatanga n’akazi ku rwaruka. Ariko ngo birababaje kubera hariho ibigo bimwe bimwe bigeramiwe n’ihindagurika ry’ibihe, ibiza hamwe n’ibikorwa vy’abantu bifatiye ku mibano n’ubutunzi. Yabandanije amenyesha ko bategerezwa kugaba kugira ngo ibigo vyose biri ku rutonde ntibiherengetere canke ngo bite akanovera. Abarundi rero ngo bategerezwa kwitaho kurusha ibigo ndangakaranga vyerekana kahise k’Uburundi, ivyerekana iratiro, inyubakwa za kera, mu ntumbero yo kwerekana ishusho nziza y’igihugu. Ngo iterambere rirama ntirishobora kwirengagiza ivyo bigo kuko bituma abavukagihugu n’abanyamahanga babigendera. Ernest Nahimana nawe ajejwe ibibanza ndangakaranga yamenyesheje ko iyo nama yari yateguwe kugira ngo bige ibibazo bigeramiye ibibanza ndangakaranga bishobora gushika umwanya uwo ariwe wose. Ibibanza ndangakaranga vyo mu Burundi ndetse n’ivyo muri Afrika ngo usanga bigeramirwa n’abantu baza kurima mu matongo, abaza guhiga, abicira ibiti hamwe n’iyijanye n’umuriro. Ngo nico gituma muri iyo nama hari hatumiwe abajejwe ibibanza ndangakaranga n’ibibanza kama kugira ngo baganire umwe wese avuge ingorane bafise bongere bafashanye mu gushiraho umuti wo kugabanya izo ngorane nuwo kuziheza burundo.

Evelyne Niyonzima

 

Umutekano ngo wifashe neza muri rusangi mu gihugu cose

DSC 0060Umutekano ngo wifashe neza muri rusangi mu gihugu cose. Ivyo   Ni ivyavugiwe mu nama Umukuru w’igihugu Petero NKURUNZIZA yagirishije kw’igenekerezo rya 2 Ruheshi 2017, abarongoye abandi mu nzego z’igisirikare, igiporisi, igendereza n’abo mu bushikiranganji butandukanye bwegwa n’ibijanye n’umutekano yabereye muri, komine Muhanga, intara ya Kayanza, navyo bikaba vyashikrijwe n’icegera c’umuvugizi w’Umukuru w’igihugu, Alain Diomède Nzeyimana inyuma y’iyo nama yabaye mu mwiherero. Nk’uko yabandanije abimenyesha ngo naho biri uko hariho ibintu bikenewe kuza birakurikiranwa iminsi yose. Murivyo ngo ni uko mu gihugu hakiriho abantu bafise ibirwanisho batabifitiye uruhusha, ikindi ngo ni uko hakiboneka abanywa ibiyayuramutwe n’inzoga zitemewe n’amategeko hamwe n’uko mu Burundi bwose haba amasanganya y’imiduga n’amapikipiki atuma haba abantu bitaba Imana ku bw’izo mvo. Ikindi yamenyesheje ngo ni uko imbere y’iyo nama buramatari w’intara ya Kayanza yavuze ko muri iyo ntara hasanze harimwo amahoro n’umutekano, abanyagihugu nabo bakaba bari ku kivi mbere n’umwimbu wagenze neza. Ngo Prezida NKURUNZIZA yaratanze inyishu ku bibazo bimwe bimwe vyari vyabajijwe, yongera arabahanura ku bintu vyerekeye amasanganya yo mu mabarabara ahangayikishije abantu ababwira ko bokora ibishoboka vyose ngo kuko iyo amasanganya abaye, hari ibintu vyinshi vyononekara n’abantu bakahasiga ubuzima kandi ngo ntibiheza ngo bitange ishusho nziza ku gihugu. Prezida NKURUNZIZA ngo yaranahanuye abajejwe ubutungane ku bijanye n’abantu baba baciriwe urubanza hanyuma bakarekurwa hamwe n’uko borwanya abantu bafatanywe amafaranga ku mbibe bayatwaye mu bihugu bihana imbibe n’Uburundi, aho naho ngo hakunda gufatwa ababa batwaye ibiceri cane cane bagiye kuyigana mu nyuma hakagaruka ayiganywe. Iyindi mpanuro yabahaye ngo nuko mu kiruhuko c’abanyeshure bazobashira ku kivi kugira babarinde kuja mu buhumbu. Ngo ku zindi ngorane nazo Prezida NKURUNZIZA yabwiye abasirikare n’abaporisi kuzikurikirana, ariko cane cane ngo bagire ingendo yo kwitegurira kazoza. Umukuru w’igihugu Petero NKURUNZIZA ngo yarangije yerekana ko muri ayo mezi 3 aheze batanguye isekeza ryo gutuza ibidandazwa bidaciye mu mategeko hariho akarusho kaboneka. Aho naho ngo yatanze akarorero ko muri komine Kabarore umwimbu w’ubutare wavuye kuri 500kg buja ku matoni 20 ku kwezi, ikawa nayo ngo yari yabonetse mu mwaka uheze ko bagereranije n’iki gihe yirwije n’incuro 4 canke 5. Ngo rero isekeza ryo kwereka abanyagihugu kwitaho ivy’igihugu ni kirumara. Inyuma y’iyo nama Prezida NKURUNZIZA yaciye aja kwifadikanya n’abanyagihugu bo muri iyo komine muri zone Mubogora, ku mutumba Rushubi mu bikorwa rusangi vyo kubaka ishure nshingiro rya Rushubi rigizwe n’ibirasi 6 vy’amashure mato matoharimwo n’ibiro vyabatwara ishure. Yarongeye kandi atanga infashanyo ku miryango ya ba ntahonikora aho umuryango umwe wose waronka ibiro 10 vy’umuceri. Yarongeye kandi akora ivyo bikorwa rusangi muri zone Ruhororo ku mutumba Bucamihigo vyo kwubaka ingoro z’inama yo kw’ishure rya komine Ruhororo.

Evelyne Niyonzima

 

Denise NKURUNZIZA yarahaye imfashanyo umuryango wibarukiye rimwe abana bane

4578Umupfasoni w’Umukuru w’igihugu, Denise NKURUNZIZA yarahaye imfashanyo umuryango w’umusirikare Gilbert Bavuga wibarukiye rimwe abana bane haraheze imyaka itatu, abo bana bakaba bagizwe n’abigeme 3 hamwe n’umuhungu 1. Iyo mfashanyo yayibahaye ku wa 30 Rusama 2017 ku cicaro c’ishirahamwe «Buntu» kiri mu Kabondo. Umupfasoni w’Umukuru w’igihugu yamenyesheje ko anezerejwe no kubona abo bana bakuze kuko ari igitangaro kubona uwo muryango waravyaye abana 4 kandi bakaba barakuze, ivyo ngo ntibikunda gushika. Yamenyesheje ko yatanguye kubafasha bakivuka mu bitaro vyabasirikare, uwo munsi nawo akaba yakiriye umuryango w’uwo musirikare Gilbert Bavuga mu ntumbero yo kuraba uko abo bana basigaye bangana. Ngo cabaye rero igitangaza mu gihugu c’Uburundi kuko atari benshi bibaruka abana bane. Abarundi rero ngo bobishimira Imana kuri ivyo bintu bidasanzwe na cane cane ko abo bana bafise amagara meza. Yarongeye amenyesha ko kwari ugutera intege abo bavyeyi kuko abana bageze kurya ibiharage n’umuceri hamwe n’amata y’abakuze kuko ubwa mbere banywa amata y’inzoya atari yoroshe no kuronka. Umupfasoni w’Umukuru w’igihugu Denise NKURUNZIZA rero yabahaye ibiro 50 vy’umuceri, ibiro 50 vy’ibiharage, ikarato 5 z’amata bita «natura», amaritiro 5 y’amavuta y’amamesa, amaritiro atanu y’amakoto, ibitenge 2 vy’umupfasoni w’uwo musirikare, ibirengeti 4, amasafuriya 7, ibido 2 n’amasuka 3. Umupfasoni w’Umukuru w’igihugu yarasengeye abo bana ngo baze bamenye ubwenge, bagire ubumenyi gutyo bazogirire akamaro igihugu n’umuryango. Umuryango w’uwo musirikare uba ku musozi Nyakigano, zone Nyagasasa, komine Mugamba, intara ya Bururi. Bari bafise imvyaro zine bafise abahungu 3 n’umukobwa umwe, bose hamwe bakaba babaye abana 8. Uwo musirikare w’ipete ya kaporari akora mu biro bikuru vy’intwaramiheto. Uwo musirikare Gilbert Bavuga yarashimiye umupfasoni w’Umukuru w’igihugu yabafashe mu mugongo kuva abo bana bakivuka mu kubaha amata ameze nk’amaberebere yatumwa hanze. Ayo mata ngo yarabarokoye gushika aho banywa ayasanzwe adandazwa mu Burundi. Yamenyesheje ko abo bana ari rwiwe aravye iyo bavuye kuko iyo bataronka ayo mata batari kurokoka. Yarongeye arashima imfungurwa yamuhaye narirya abo bana bageze gufungura ibiharage n’umuceri. Yamumeneysheje ko abo bana ari rwiwe, abo igihugu, aca asaba ko yobandanya abafata mu mugongo. Yasavye n’abandi bazoba bamwumva gufasha uwo muryango. Umupfasoni w’uwo musirikare Ancilla Nahimana arashimira Imana yamuhaye abo bana bakavuka bakomeye, aca ashimira n’umpfasoni w’umukuru w’igihugu Denise NKURUNZIZA yabafashije kugira baronke amata bakivuka. Yarongeye amenyesha ko atipfuza gusubira kuvyara abanadi bana, asaba Imana ko yomukomereza abo afise

Epitace Nduwayo

 
Ouvrir