Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

CNIDH:Agateka ka zina muntu karateye intambwe mu mwaka w’2019 mu Burundi

5Agateka ka zina muntu kari kifashe neza mbere kakaba karateye n’intambwe mu mwaka w’2019 kiretse ko hibonekeje ukutihanganiranira hagati y’abari mu migambwe mu mihingo  imwe imwe y’igihugu. Ngo haribonekeje kandi abantu bagipfungwa vy’agateganyo bisabwe n’abarongoye intwaro canke bagapfungwa igihe kirenze igitegekanijwe n’amategeko. Ivyo vyashikirijwe n’uwurongoye umugwi w’igihugu wigenga ujejwe agateka ka zina muntu CNIDH Sixte Vigny Nimuraba ku wa 15 Ndamukiza 2020 mu gihe yariko arashikiriza icegeranyo c’ivyaranguwe n’uwo mugwi mu Nama Nshingamateka.Yarongeye amenyesha ko mu bijanye n’umutekano hibonekeje imigwi y’abawuhungabanya mu ntara za Bubanza na Cibotoke ; iyo migwi ikaba yari ivuye muri Republika iharanira demokarasi ya Kongo (RDC) n’Urwanda. Yavuze ko bakoreye ku madosiye 290 yerekeye ihonyangwa ry’agateka ka zina muntu uwo mugwi washikirijwe hamwe n’ayandi madosiye atatu wonyene wamenye. Muri ayo madosiye 173 yari yerekeye uburenganzira bafise mu bwigenge bwabo no mu vya poritike. Amadosiye 28 yari yerekeye uburenganzira bwabo mu bijanye n’ubutunzi, imibano, akaranga n’imico kama. Amadosiye yandi 53 yari yerekeye ukurondera gufashwa mu kuburana, gufashwa mu kubaho kwabo bifatiye ku bukene, guhabwa impanuro, kubahubura no kubavugira.

Ayandi madosiye 24 nayo yari yerekeye ubwigenge bw’abantu n’ibijanye n’ibintu bifatiye ku vyaha ariko uwo mugwi ufitiye uburenganzira bwo gukurikirana. Yarongeye amenyesha ko muri ayo madosiye 290 n’ayo atatu bakurikiranye uwo mugwi wasanze ufise uburenganzira bwo gukurikirana amadosiye 204 ni ukuvuga ibice 70,1 kw’ijana. Wasanze kandi udafise uburenganzira bwo gukurikirana amadosiye ashika 86 bakurikije ingingo ya 44 y’ibwirizwa rishinga uwo mugwi. Muri ayo madosiye kandi ayashika 188 yararangiye kwigwa nayo 103 akaba akiriko arakurikiranwa. Yarongeye amenyesha ko muvyo uwo mugwi  kandi waranguye  harimwo kugendera ubusho n’amabohero bakwongera bagatanga n’impanuro ku batagetsi mu ntumbero yo gufata neza abanyororo n’abo bose baba bapfunzwe vy’agateganyo. Uwo mugwi waragendeye ubusho 79. Muri ico gikorwa uwo mugwi ukaba warashoboye wumvirije abantu  2.413 bagizwe n’abagabo 2055 n’abakenyezi 237 harimwo 4 bafise abana bonka, urwaruka n’imiyabaga 116 n’abigeme 5. Kubera gutabariza abanyororo, abashika 154 bararekuwe. Uwo mugwi rero urashimishwa no kubona ibitigiri vy’abapfungwa vy’agateganyo vyateye bigabanuka muri uwo mwaka w’2019. Aho ni mu gihe ku banyororo 2.413 bari bapfunzwe abashika 87 bari bararengeje ikiringo co gupfungwa vy’agateganyo. Ku vyerekeye kugendera amabohero, umugwi CNIDH ngo  wagendeye ayashika 13 wongera uriga dosiye y’umwe umwe. Uwo mugwi wasanze ibitigiri vy’abanyororo ari umurengera. Uwo mugwi kandi urarajwe ishinga n’abanyororo barenza igihe co gupfungwa vy’agateganyo kuko ku banyororo 11.464 abashika 5.224 bari bapfunzwe ivyo agateganyo. Ku bijanye no gukinga ihohoterwa rya kiremwa muntu no gufatwa nabi nk’uko bitegekanijwe n’amasezerano mpuzamakungu, uwo mugwi wasanze hari abahohotewe n’abaporisi. Aho akavuga ababikorewe mu ntara ya Bubanza no muri parike ya Bubanza. Uwo mugwi warakurikiranye kandi abandi bantu bahohotewe na parike y’iyungururizo ya Ntahangwa. Uwo mugwi kandi warakoreye ku bijanye no gukubagura canke gufata ku nguvu abakenyezi. Wasanze hari abanyeshure 11 bafashwe ku nguvu kuri Lycée ya komine Murungurira muri komine Ntega, intara ya Kirundo mu mwaka w’ishure w’2018 ushira uw’2019. Umugwi CNIDH kandi warashikije abaserukira ubutungane abantu bahohotewe n’abapfunzwe ataco bagira wamaze gutohozako. Uwo mugwi wararonse abantu 13 bantahonikora basaba kwunganirwa mu bijanye n’ubutungane mu mwaka w’2019. Umukuru w’umugwi CNIDH, Sixte Vigny Nimuraba yarongeye amenyesha ko bashikirije Reta ibintu vyose bijanye no guhungabanya agateka ka zina muntu. Aho bakaba basavye ko agateka ka zina muntu kokingirwa hamwe n’ingingo zofatwa kugira gakingirwe. Uwo mugwi ukaba warashikirije Reta abajejwe intwaro, ubutungane n’abaporisi bagirizwa ivyo vyaha. Mu gisata c’ubutungane naho ku wa 23 Nzero 2019 hararekuwe abanyororo bashika 3000. Harongeye haravyurwa urubanza rwerekeye igandagurwa rya prezida Melchior Ndadaye. Ku bijanye n’ibimenyeshamakuru uwo mugwi umenyesha ko hari abamenyeshamakuru bo mu kinyamakuru Iwacu bapfunzwe. Ku bijanye n’uburenganzira bwo gutunga ibintu witirirwa, uwo mugwi umenyesha ko hibonekeje imiryango 4 yambuwe ivyayo n’abajejwe intwaro kandi bataronse inshumbusho. Umugwi CNIDH usaba Reta kwubahiriza amasezerano mpuzamakungu mu bijanye no gutanga ivyegeranyo. Usaba ubutungane kwubahiriza ibijanye no gutohoza ivyaha. Abarongoye imigambwe n’inani z’imigambwe basabwa kwubahiriza amambwirizwa n’amategeko agenga amatora. 
Epitace Nduwayo na 

Janvier Niyonkuru (Uwimenyereza) 

 

Abakenyezi birimizi barahamagarirwa kwijukira kuja mu mashirahamwe

1Abakenyezi bahurikiye mu mashirahamwe atandukanye y’uburimyi barakenguruka intambwe bagezeko mu kwiteza imbere, kurima kijambere, hamwe no gufungura neza kubera inyigisho baronkerayo ari naco gituma bahamagarira abagisigaye inyuma guhamvya abandi. Ako kamo katewe n’abarongoye amashirahamwe atandukanye y’abakenyezi  bavuganye n’ikinyamakuru UBUMWE ku magenekerezo ya 8 na 9 Ndamukiza 2020.Ni muvyisomere.

Dorothée Banyankirubusa : Asanzwe arongoye ishirahamwe TERIMBERE ry’abarimyi b’umuceri bakorera muri zone Kinama mu gisagara ca Bujumbura.  Iryo shirahamwe  ry’abakenyezi ryatanguye kuva mu mwaka w’1991 rikaba riri mu ya mbere yatanguye hano mu Burundi ayandi mashirahamwe yagiye aravuka akaba yarahuye ubwenge kuri iryo shirahamwe. Iryo shirahamwe twaritanguye rifise intumbero yo kurwanya ubukene, abakenyezi twari kumwe twashaka kwitunganiriza uburaro bwiza kuko tutagira aho tuba heza twaba mu nzu z’ubwatsi. Abakenyezi rero twarashoboye kwubaka inzu zitari nke ku banyeshirahamwe tubanje kubumba amatafari duca turonka ababunganira abo rero baragize intambwe ya mbere, nakare ngo ibigiye inama bigira Imana.  Mw’ishirahamwe turongera tukarimira hamwe umuceri ari vyo bidufasha mu kwiteza imbere  kuko iyo twejeje turashobora kwikenura mu vyo dukenera mu buzima bwa minsi yose, turanafasha n’abatamakazi bari mu bo twatanguranye mw’ishirahamwe ubu bageze mu zabukuru, duca tubaronsa ivyankenerwa, gushika no kuvyambarwa, ayandi mafaranga tukayajana kuyabikisha muri banki kugira azodufashe kurima hageze. Ibibazo  vyinshi vyatewe n’ibihe Uburundi bwagiye buracamwo vyasubije inyuma ishirahamwe, ihindagurika ry’ibihe n’uko aho turima hagenda haragabanuka bivanye n’uko bagiye bahubaka. Izindi ntambamyi naho tugerageza kuzitorera inyishu n’uko abakenyezi baruka ubu batagifise umwete cane wo kurima tugaca tubasaba gutanga amahera y’umukozi ashobora kuduza ikivi.

2Anarissa Ndamuhawenimana: Asanzwe aserukira ishirahamwe BAVYEYI TURERERE UBURUNDI ryo mu ntara ya Bubanza, rikaba rifise irerero ry’impfuvyi. Mw’ishirahamwe kugira dushobore kubafungurira abakenyezi turi  kumwe  turarima ibiterwa bisanzwe biba mu ntara kama y’Imbo dusanzwe duherereyemwo. Ivyo navyo bikaba ari ibigori, umuceri, imyumbati, ibijumbu, ibiharage hamwe n’imboga. Twebwe abakenyezi duhurikiye muri iryo shirahamwe turateye imbere cane kuko turaharonkera inyigisho zo kurima kijambere, kumenya amategeko agenga igihugu n’ayakingira umukenyezi, tukamenya kandi imigambi igezweho y’uburimyi n’ibindi kugira umukenyezi nawe ntasigare inyuma mw’iterambere, kanatsinda ntirishoboka umukenyezi adateye imbere. Izo nyigisho turonkera mw’ishirahamwe ntizigarukira ngaho gusa, ubwo bumenyi turaheza tukabushikana mu miryango iwacu bigatuma turima kandi tukwongera tukworora kijambere kuko uburimyi bwama bujana n’ubworozi. Mw’itongo ry’umukenyezi ari mw’ishirahamwe usanga rikayangana, ukabona vy’ukuri ko hari umukenyezi aciye ubwenge.  Naho twateye imbere mukuja hamwe, ingorane zozo ntituzibura bivanye na cane cane n’ihindagurika ry’ibihe, iyo ikirere kigenze nabi umwimbu twari twiteze ntuheza ngo uboneke. Iyo rero umwimbu utabonetse, birahungabanya cane umurimyi kuko aba yakoresheje inguvu nyinshi na cane cane umukenyezi aba ariho aziga agahuzu kiwe n’ak’abana iyo ari umunywanyi.  Ikindi gihora kitugora mw’ishirahamwe ni igihe ifumbire tutayironse ku gihe bivuye ku gusamara canke igashika itevye navyo biratuma umwimbu utagenda neza kuko aca «umugani ngo uwugutanze kurima aba agutanze gusoroma». Abakenyezi batari mw’ishirahamwe nobatumirira kwinjira mu mashirahamwe asanzwe ari aho batumbereye kuko «nyamwigendako ntarimira impeshi» kandi «akanyoni katagurutse ntikamenya iyo bweze». Hejuru yo kwiteza imbere bazoronkerayo inyigisho zibamenyesha ko hari ivyo barekuriwe mu rugo, ntibagume barenganywa umengo bobo bategerezwa gutega amashi abagabo kandi nabo bashoboye.

3Genéviève Ntirampeba : Ari mwishirahamwe ry’abagendana umugera wa Sida mu Ntara ya Rutana, twatanguye ishirahamwe dufise intumbero yo guhimiriza abakenyezi bagendana umugera wa Sida uko bitwara,ko batorera amaboko bakaguma ku kivi hamwe n’abandi bakenyezi. Abakenyezi bagendana umugera wa Sida bari mw’ishirahamwe bararima ibiterwa mbumbarugo turabahimiriza kurima imboga nyinshi, hamwe n’itomati kugira bashobore gufungura neza, bagire amagara meza. Abo bakenyezi kandi twarabatahuje ko imbere yuko bashora umwimbu bobanza bakavyihereza nabo hamwe n’abana babo kugira bagire amagara meza, hanyuma bagashora umusesekara. Abakenyezi bari mw’ishirahamwe bameze neza ntiwomenya ko bagendana umugera wa Sida, bari ku kivi mw’iterambere nk’abandi Abarundi bose, bakorera hamwe, hariho n’abashoboye kuronka agatahe gato bakadandaza bikabafasha kwiteza imbere.Tugiye hamwe, n’uwukeneye kugura utwo agura aca ashorera uwo bari kumwe mw’ishirahamwe bakabona kunganiranira. Bivanye n’intambwe tugezeko mw’iterambere  turiko turagera kw’ihangiro kuko abo bakenyezi bagarukanye umwizero ko nabo bafise ubuzima, ivyo batari bazi igihe baza mw’ishirahamwe. Ikindi dushimikirako cane hejuru yo kwiteza imbere n’ugutanga kwitwara neza inyigisho ku banywanyi zo kureka kwanduza  umugera wa Sida abandi,bakitwaraneza bakaremenshanya bakaguma ku kivi.

Anitha Bizimana

 

«Uburundi buriko bwandika amateka mashasha»

rauAbarundi ngo baramaze kubona icabaryanishije, muri kino gihe ngo Uburundi buriko bwandikisha amateka mashasha, aho Umukuru w’igihugu yatowe n’abanyagihugu agiye kurangiza ibiringo yandikiwe n’amategeko. Eka ngo ni n’ubwa mbere amatora abaye hari umwuka mwiza wa poritike. Ivyo ni ivyashikirijwe n’umukuru w’Inama Nkenguzamateka, Révérien Ndikuriyo, ku muhingamo co ku wa 13 Ndamukiza 2020, mu nyubakwa za “Lycée Scheppers”, iri muri komine Mukaza, mu gisagara ca Bujumbura, mu nama yo gutsimbataza amahoro n’umutekano n’iterambere ku batowe baserukira abanyagihugu n’abarongoye imirimo itandukanye bo mu gisagara ca Bujumbura.Nk’uko umukuru w’Inama Nkenguzamateka, Révérien Ndikuriyo yabishikirije, ku bagiye guhiganwa mu matora, yamenyesheje ko mu matora haburana babiri, hagatsinda umwe. Inyuma y’amatora, yabasavye kuzoshira aho intahe ishize. Uburundi ngo buriko bwandika amateka mashasha, aho ari imbonekarimwe Umukuru w’igihugu atorwa akamara ibiringo arekuriwe n’amategeko. Ku wa 18 Nyakanga 1961, aho umugambwe UPRONA watsinda, uwari awurongoye ari nawe yaharaniye intahe yo kwikukira, umuganwa Ludoviko Rwagasore yaciye agandagurwa, ku wa 13 Gitugutu 1961. Eka ngo n’uwaharaniye intwaro rusangi, Melchior Ndadaye ntiyaronse akanya ko gushira mu ngiro ivyiyumviro vyiwe vya poritike kubera ko yaciye agandagurwa, ku wa 21 Gitugutu 1993, inyuma y’amezi atatu, umugambwe wiwe Sahwanya FRODEBU uhejeje gutsinda amatora. Vyongeye, ngo ni ubwa mbere amatora abaye mu Burundi hari umwuka mwiza wa poritike. Icipfuzo ngo n’uko ayo mateka mashasha Uburundi buriko burandika yomara imyaka myishi kugira igihugu kibandanye gitera imbere.Ku banyeporitike, yabasavye guhiganisha ivyiyumviro vya poritike, bame na ntaryo bashikiriza ivyiyumviro vyubaka igihugu. Bisubiye, ngo amatora agiye kuba amahoro n’umutekano bitsimbataye mu gihugu cose, aho n’imirwi y’abasuma yatujijwe mu gihugu cose. Vyongeye, ngo amatora agiye kuba impunzi ziriko ziratahuka, aho impunzi zishika 1000 zakirwa n’inzego zibijejwe ku ndwi ku ndwi.

Iciyumviro co kwegeranya amafaranga y’amatora ngo cabaye umugisha ku Burundi
Mu gihe isi ihanzwe n’indwara ya Coronavirus, umukuru w’Inama Nkenguzamateka yaboneyeho akaryo ko gushimira icese uwazanye iciyumviro co kwegeranya amafaranga y’amatora yo mu mwaka w’2020, iyo bitagenda uko, ngo ayo mafaranga ntiyari kuboneka. Amatora ashitse Abarundi bari ku kivi aho bariko biyubakira amashure, amavuriro n’ibibuga vy’inkino, aho ibibuga 9 vyashizweko imisezero ya kijambere. Ivyo ngo ni ivyiza bishigikiye ayo mateka mashasha Uburundi buriko burandika.Ku macakubiri yaranze igihugu muri kahise, umukuru w’Inama Nkenguzamateka yamenyesheje abari bitavye iyo nama ko urwego rw’Inama Nkenguzamateka rwasavye ko abo bazanye amacakubiri mu Burundi boshengezwa. Ibisigarira vy’abantu bishwe mu biza igihugu cagiye kiracamwo, yasavye ko  vyoshirwa mu biyo bitameneka kugira abagendera igihugu bazoze barabibereka gutyo  ivyo bintu ntibizosubire kuba mu gihugu c’Uburundi. Ku bijanye n’ikiza ca Coronavirus, yasavye abari ngaho ko bohimiriza abo bajejwe kurongora kwubahiriza ingingo ziriko zirafatwa n’ubushikiranganji bw’amagara y’abantu kugira bikingire ico kiza. Mu gihe abatowe bariko barasozera ikiringo cabo, yarabashimiye kubona bakoranye neza. Mu gihe igisagara ca Bujumbura gihanzwe n’imyuzurira, yasavye ababijejwe kwirinda gutanga ibibanza vyo kwubaka mu bibanza bitarekuwe n’amategeko. Abantu bemere kwubahiriza amategeko, bicishe bugufi niho iyo myuzurira itazosubira kwibonekeza.

Abarundi basabwe kuvyara abo bashoboye kurera
Ku bijanye n’umurindi w’igwirirana ry’abantu, yasavye abari ngaho guhimiriza abo bajejwe kwibaruka abo bashoboye kurera, niho bazokura bafise amagara meza. Ku buringanire bw’igihugu bw’ibirometero kwadarato 27834, ngo habaye Abarundi imiriyoni 12,  ku kirometero kwadarato hakaba abantu 450, ivyo bitigiri ngo ni binini cane. Aho yagarutse ku mwigisha wo mu ntara ya Kayanza yasambanije abana 19, iyo ngo niyo nzira izananamwo ubwo bwinshi bw’abarundi. Uwo mwarimu yamusabiye igihano c’imyaka 475 ngo kubera ubwo ari ubukoko mu bundi. Eka ngo urwego rw’Inama Nkenguzamateka rugiye gutanguza urugamba yise “gukura imfyisi mu ntama” kugira iyo ngeso y’abarimu bagoba izo baragiye ituzwe. Imbere yaho, mw’ijambo ry’ikaze, umukuru w’igisagara ca Bujumbura, Fréddy Mbonimpa yamenyesheje ko ababaye mu gisagara ca Bujumbura babandanya kwubahiriza ingingo zafashwe n’ubushikiranganji bw’amagara y’abantu kugira bikingire ikiza ca Coronavirus. Mu ntumbero yo gutegura amatora meza, ngo bobandanya gutsimbataza amahoro n’umutekano ndetse bakaba baranayaterereye.                                                                                                 

Déo Misigaro

 

Sentare yubahiriza Ibwirizwa Shingiro yarashikirije aho ihagaze ku madosiye y’imigambwe yayituye atakiriwe n’umurwi CENI

DSC 0536Sentare ijejwe kwubahiriza Ibwirizwa Shingiro yarashikirije ku wa 27 Ntwarante 2020, ivyavuye mw’isuzumwa ry’amadosiye  y’imigambwe yari yayituye inyuma y’aho umurwi ujejwe gutunganya amatora CENI wari wanse kwakira amadosiye y’abazoyiserukira mu matora y’abashingamateka n’abagize inama mpanuzwajambo z’amakomine. Urunani Kira-Burundi rukaba rwemerewe vy’imfatakibanza mu ntara zitanu zonyene ari zo. Bururi, Muramvya, Mwaro, Rutana na Rumonge. Imigambwe Frodebu nyakuri iragi rya Ndadaye, FPN Imboneza hamwe na FNL, amadosiye y’abanwanyi bayo, Sentare ijejwe kwubahiriza Ibwirizwa Shingiro ikaba itayemeje mu ntara zose bari basavye. 

Gloriose Nshimirimana

 

Uburundi burafise ibikoresho vyo gupima indwara ya Coronavirus

denizaaaaaUburundi bwariteguye gukingira abenegihugu kugirango ikiza ca Coronavirus ntigishike mu gihugu. Ivyo vyashikirijwe  kw’igenekerezo rya 27 Ntwarante 2020 n’umushikiranganji w’amagara y’abantu Thadée Ndikumana igihe yariko aragendera ahari ibikoresho vyo gupima ico kiza mu kigo c’ishure ryigisha ivy’ubuvuzi “INSP», ibitaro vyitiriwe umuganwa Rudoviko Rwagasore ahategekanijwe kwakira abatowe iyo ndwara butandukanye ko bahashize ibikoresho vyo gukaraba.Umushikiranganji w’amagara y’abantu Thadee Ndikumana akaba yamenyesheje ko bafise ibikoresho vyo gupima indwara ya coronavirus, bafise kandi n’abahinga babikoresha. Ngo mu kigo c’ishure ryigisha ivy’ubuvuzi INSP hariho abaganga bagiye kuvyiga mu bihugu vya Kenya hamwe na Afrika y’Epfo bashika kuri 2. 

Ikindi naco n’uko ngo barafise abahinga bashika kuri 10 bakurikirana iyo ndwara. Barafise imashini zishika kuri 6, bagakora ibipimo birenga 300 ku munsi. Thadée Ndikumana yarashimiye Reta y’Uburundi  yashizeho uburyo kugira bashobore gukingira abenegihugu. Yaravuze ko abo biketse bashika kuri babiri babapimye bagasanga ntibarwaye coronavirus.Yaravuze ko abo biketse ko boba bayifise baca babapima kuko hariho n’abarwayi bari mu bitaro “Kira Hospital” boba biketswe, ngo ico gihe bakaba bariko barabapima. Ngo mu Burundi baramaze kwitunganya  ku mipaka ihari ishika 22 hamwe no mu bitaro  hose hakaba hariko abaganga bakurikirana ibijanye n’iyo ndwara. Yarongeye aramenyesha ko hari ibibanza bitatu vyo kwakiriramwo abo bosanga barwaye , naho hakaba ari : Kumudubugu muri komine Gihanga, intara ya Bubanza, ibitaro vy’abasirikare mu Kamenge hamwe n’ibitaro vyitiriwe umuganwa Rudoviko Rwagasore i Bujumbura. Yarongeye aramenyesheje ko hariho imodoka zagenewe gutwara abantu bazoba bafashwe n’iyo ndwara zishika kuri 19, kandi harimwo n’izirimwo ibikoresho bifasha abarwaye guhema. Yariyamirije abantu bose bakwiragiza ibihuha babicisha ku buhinga ngurukabumenyi bavuga ko hariho abamaze kuboneka barwaye kuko ari inkuru z’ibinyoma. 
Thérèse Niyonkuru

 

Abazohiganirwa ikibanza c’Umukuru w’igihugu mu 2020 Mwari mubazi?

Mu kinyamakuru UBUMWE inomero 2052 co ku wa 23 Ntwarante 2020 twaratanguye kubashikiriza umwidondoro n’ibiranga abakwije ibisabwa n’umurwi CENI kugira bazohiganirwe ikibanza c’Umukuru w’igihugu,tukaba twahereye kuri Major Evariste Ndayishimiye yashizwe imbere n’umugambwe CNDD-FDD na Gaston Sindimwo yashizwe imbere n’umugambwe UPRONA. Muri iyi nomero 2053 yo ku wa 30 Ntwarante 2020, turamutse tubashikiriza umwidondoro wa Agathon Rwasa yashizwe imbere n’umugambwe CNL n’umwidondoro wa Francis Rohero yigenga. Mu kinyamakuru UBUMWE inomero 2052 co ku wa 23 Ntwarante 2020 twaratanguye kubashikiriza umwidondoro n’ibiranga abakwije ibisabwa n’umurwi CENI kugira bazohiganirwe ikibanza c’Umukuru w’igihugu,tukaba twahereye kuri Major Evariste Ndayishimiye yashizwe imbere n’umugambwe CNDD-FDD na Gaston Sindimwo yashizwe imbere n’umugambwe UPRONA. Muri iyi nomero 2053 yo ku wa 30 Ntwarante 2020, turamutse tubashikiriza umwidondoro wa Agathon Rwasa yashizwe imbere n’umugambwe CNL n’umwidondoro wa Francis Rohero yigenga. 

Agathon Rwasa (CNL)
Agathon Rwasa azohihiganirwa ikibanza c’Umukuru w’igihugu mu matora yo ku wa 20 Rusama 2020 yizewe n’umugambwe CNL. Agathon Rwasa yavutse ku wa 10 Nzero 1964 i Ciri muri komine kiremba, intara ya Ngozi. Yubakanye n’umupfasoni Haberisoni Annonciate. Ni umurundi, akaba ari umushingamateka, akaba aba i Kiriri mu gisagara ca Bujumbura. Mu mwaka w’1988 yari arangije imyaka itatu ya kaminuza y’Uburundi mu gisata c’inyifato n’inyigisho. Yahagaritse amashure yiwe uwo mwaka nyene bitumwe n’intambara yo mu makomine  Ntega na Marangara, aca aja mu buhungiro aho yamaze umwanya munini mu bikorwa vya poritike vyo guhabuza abarundi. Yagarutse mu gihugu c’amavukiro muri Rusama umwaka w’2008. Kuva mu mwaka w’1984 gushika mu mwaka w’1987 yari arangije imyaka ibiri ya kaminuza mu gisata c’inyifato n’inyigisho kuri kaminuza y’Uburundi.  Kuva mu mwaka w’1981 gushika mu 1984 yari aronse urupapuro rw’umutsindo rw’amashure yisumbuye na seritifika yemeza ko aronse uburenganzira bwo kwiga kaminuza kuri koleje y’i Muramvya. Kuva mu mwaka w’1977 gushika mu 1981 yari mw’ishure nderabigisha ry’i Musenyi aho yarangirije igice ca mbere c’amashure yisumbuye. Kuva mu mwaka w’1970 gushika mu mwaka w’1977 yari mu mashure y’intango ry’i Kiremba aho yatoreye ikibazo ca Reta kimuha uburenganzira bwo kuja mu mashure yisumbuye. Kuva mu mwaka w’1969 gushika mu mwaka w’1970 yari mw’ishure ry’intango ry’i Ciri. 

Agathon Rwasa yararanguye amabanga atandukanye ya Reta  
Kuva muri Mukakaro umwaka w’2015 ni umushingamateka yatowe mu ntara ya Ngozi, akaba ari icegera ca mbere c’umukuru w’Inama Nshingamateka y’Uburundi. Kuva ico gihe nyene ari mu nama mpanuzwajambo ya komine Kiremba akongera akaba n’icegera c’umukuru w’umugwi ujejwe poritike muri urwo rwego. Kuva muri Ruheshi 2009 gushika muri Ruheshi 2010 yari umuyobozi mukuru w’ishirahamwe INSS; yari kandi umukuru w’urwego nshingwantwaro mw’Ibanki y’ubudandaji BANCOBU akongera akaba mu rwego rugenzura ubutunzi bw’iyo banki. 
Ivyaranze Agathon Rwasa muri poritike
Agathon Rwasa yabaye umukuru w’umugambwe CNL kuva muri Nyakanga 2018 gushika ubu, kandi akaba ari nawe aserukira uwo mugambwe imbere y’amategeko. Mu mwaka w’2020 yari umukandida mu mtora ya komine, ayo abashingamatekahamwe n’ay’Umukuru w’igihugu.  Yarabaye umukuru w’urunani Amizero y’Abarundi; araba ukandida mu matora ya komine, ay’abashingamateka n’Umukuru w’igihugu mu mwaka w’2015. Agathon Rwasa yarabaye kandi umukuru w’umugambwe FNL kuva ucemererwa mu mwaka w’2009 yongera awuserukira imbere y’amategeko gushika aho ubushikiranganji bw’intwaro yo hagati mu gihugu bufata izindi ngingo. Agathon Rwasa yari arongoye umuhari warwana n’ubutegetse PALIPEHUTU-FNL kuva ku wa 23 Ruhuhuma 2000 gushika wemererwa gukora nk’umugambwe wemewe n’amategeko ku wa 21 Ndamukiza 2009. Yaritoje mu bajenama b’amakomine, mu bashingamateka n’itora y’Umukuru w’igihugu mu mwaka w’2010. Agathon Rwasa aravuga kandi arandika neza ikirundi, igifaransa, icongereza n’igiswahiri. Arazi gukoresha neza ubuhinga ngurukanabumenyi; akaba akunda inkino, gusoma ibitabu n’umuziki. 

Uwigenga Francis Rohero
Yavutse ku wa 16 Nzero 1972 muri zone Rohero, karitiye Rohero ya mbere mu gisagara Bujumbura. Francis Rohero afise impamyabushobozi ya “Master” mu gisata c’ubutunzi n’intwaro yaronse mu mwaka w’2003 muri kaminuza y’i Yaoundé II muri Camerun. Francis Rohero arubatse kuva ku wa 25 Myandagaro 2001 n’umupfasoni yitwa Félicité Rohero Nzopfimanabishatse. Bafise abana batatu; imfura kaba afise imyaka 18, uwugira kabiri 14 nayo uwugira kane imyaka 12; imfura akaba ari umuhungu abandi babiri ni abigeme. Amashure yisumbuye yayize kw’iseminari y’i Buta mu ntara ya Bururi mu mwaka w’1993 mu nyuma yabanadanje amashure yiwe kw’iseminari y’i Burasira muri dioyoseze ya Ngozi mu mwaka w’1994. Avuga ko igihe yiga i Buta n’i Burasira hose yama ashira imbere kudakoresha inguvu akaba yafatira akarorero kuri Ghandi na Martin Luther King na cane cane Yezu Kristu. Ivyo vyatumye agira agahinda yumvise abana b’i Buta bagandaguwe bari mw’itiro.    Yabaye muri karitiye Rohero kuva mu mwaka w’1972 gushika mu 1979 mu Nyakabiga kuva 1979 gushika1988 ,Kinanira kuva1988gushika1993,Roherokuva mu 1993 gushika 1994 gushika mu Kamenge kuva mu 1994 gushika mu1997, i Yaoundé kuva mu 1997 gushika mu 2004;  mu Kibenga kuva 2004-2011, mu Kinanira kuva mu 2011 gushika ubu. Ni umukristu asenga muri gatorika ariko akaba afise imiryango y’abaporotisanti n’abaislamu b’abagenzi kubera babanye mu bwana bwiwe haba i Bujumbura canke i Yaoundé. Francis Rohero  yararongoye ishirahamwe ry’abanyeshure b’abarundi baba i Yaoundé muri Camerun mu mwaka w’2000. Yagarutse mu Burundi mu mwaka w’2005. Yarabaye umuhanuzi mu biro vy’Icegera ca kabiri c’Umukuru w’igihugu ariko akaba  yaratanze imihoho mu mwaka w’2006. Kuva akiri i Buta yibaza ko yofasha mu guhindura ibintu bikaja mu nzira. Ni naho yafashanije n’abagenzi biwe bashinga umugwi bise “Orange”. Uwo mugwi ahanini ukuba uhurikiyemwo urwaruka. Intumbero yiwe muri poritike akaba ari “Umugambi w’Uburundi buhiriwe mw’iteka n’itekane” yashikirije mu mwaka w’2016. Amenyesha ko n’ibihuhusi vyo mu mwaka w’2015 bitamukuye ku ciyumviro yamanye co gushira imbere amahoro. Francis Rohero akoresha neza ubuhinga bwa none harimwo no guhanahana inkuru akoresheje ubuhinga ngurukanbumenyi. Muri Gitugutu 2019 niho yamenyesha ko azohiganirwa ikibanza c’Umukuru w’igihugu mu 2020; akaba yatanze ibimuranga mu mugiwi CENI ku wa 3 Ntwarante 2020. Yemerewe n’uwo mugwi CENI ku wa 10 Ntwarante 2020.

Epitace Nduwayo 

 
Ouvrir