Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Ibisubirira ubumwanya mu buzima bwa minsi yose biriko birakorwa

mainMu gihe ikiringo c’amezi 18 cari catanzwe  abafise ububiko bw’ubumwanya n’abari babutumyeko hanze kizorangira ku wa 8 Ruhuhuma 2020, ngo ikigo Akshar Krupa cahora gikora ubumwanya, kigiye gukora ubumwanya bushobora kubora mu kiringo c’imyaka 2, iyo buri mu kuzimu n’ubundi bubora butari mu kuzimu. Haruhande y’ico kigo, ngo n’ishirahamwe PACOBU naryo nyene ngo mu bubiko bwaryo basanzwe bafise ivyo bikoresho bishobora gusubirira ubumwanya, ndetse bagaterwa akamo  ko kubandanya bakora mwene ivyo bikoresho kubera ikiringo cahawe abasanzwe badandaza ubumwanya kigiye guhera. Ivyo ni ivyashikirijwe n’umuyobozi w’isuku n’ibidukikije, mu bushikiranganji bw’ibidukikije, uburimyi n’ubworozi, Jeanne Francine Nkunzimana, ku wa 7 Nzero 2020, mu kiganiro yahaye ikinyamakuru UBUMWE.Nk’uko uwo muyobozi w’isuku n’ibidukikije, Jeanne Francine Nkunzimana  yabishikirije , ngo ikiringo c’amezi 18 catanzwe kuva ku wa 8 Myandagaro 2018 co guhagarika ikoreshwa ry’ubumwanya mu Burundi, kizorangira mu kwezi kwa Ruhuhuma 2020. Imyiteguro yo kurondera ibisubirira ubwo bumwanya ngo irabandanya, kuva iryo tegeko rigiyeho, ngo baciye batunganya ingendo mu gihugu hagati kugira barabe ko abanyagihugu barizi. Izo ngendo ngo kwari ukugira abanyagihugu babe baritegura kugira barondere ibizosubirira ubwo bumwanya mu buzima bwabo bwa minsi yose.Ivyo umuyobozi w’isuku n’ibidukikije akabivuga yisunze ko kuva kera na rindi, abarundi batamye bakoresha ubumwanya, aho bakoresha amakapo, ibisimbo n’ibivumvu, ivyo bikoresho navyo ngo Abarundi bari basanzwe bavyikorera, bigakoreshwa ikiringo kinini. Umuyobozi w’isuku n’ibidukikije agatera akamo Abarundi kubandanya bakora mwene ivyo bikoresho kubera ko mu minsi ya vuba, bashobora kuronka isoko yavyo. Vyongeye, muri izo ngendo mu gihugu hagati, ngo kwari ukuraba ko ubumwanya butacinjira mu gihugu kuko barishikiye no ku mipaka, aho bavuganye n’abajejwe intwaro kugira babandanye bamenyesha iryo tegeko, mu ntumbero yo gutegura abanyagihugu ntibazovuge ko ribaguyeko giturumbuka, gutyo babandanye bakora ivyo bikoresho vya kera.

Ikigo PACOBU kiriko kirakora ibisubirizi vy’ubumwanya
Ku bijanye n’igisagara ca Bujumbura, umuyobozi ajejwe isuku n’ibidukikije atera akamo ababishoboye gukora ivyo bishobora gusubirira ubumwanya  ku bwinshi, aho bamaze kubona ko ikigo PACOBU gishobora kuba gisanzwe gihingura mwene ivyo bikoresho. Mu rugendo bagize muri ico kigo, ngo basanze mu bubiko  hari ivyo bahinguye  bimaze imyaka ibiri, aho bamenyesheje ko imvo zituma bitagurwa, ari kubera ubumwanya bukigurishwa ku masoko. Abo mu bushikiranganji ngo barabateye intege ko ubwo bumwanya bugiye guhagarikwa, ahubwo ko bokwitegura guhingura vyinshi, bishobora gusubirira ubwo bumwanya.Haruhande y’ikigo PACOBU, ngo hariho n’ikindi kigo cari gisanzwe gihingura ubumwanya citwa Akshar Krupa, abo nabo ngo biyemeje guhingura ubumwanya bubora mu kiringo c’imyaka 2, igihe buri mu kuzimu ariko ngo hari n’ubundi bubora n’aho butoba buri mu kuzimu. Ico kigo ngo carabujijwe kubandanya gikora ubumwanya butabora, ndetse bakaba bariko barakurikirana imirimo y’ico kigo. Mu minsi ngo barategekanya urugendo mu gihugu hagati kugira barabe ko ivyo basabwe bariko barabikora na cane cane gukora ibisubirira ubumwanya.

Amacupa avamwo amazi agiye gihingurwa
Ku bijanye n’amacupa akoze mu bisa n’ubumwanya, bashiramwo amazi, ngo ntiharaboneka ibishobora kuyasubirira. Mw’itegeko ribuza ikoreshwa ry’ubumwanya, ngo riravuga ko ivyo bitararonka ibisubirizi, imbere y’uko vyinjizwa mu gihugu, barabisabira uruhusha, aho bene kuvyinjiza berekana ico bagiye kubikoresha, n’ingene bazosubira kuvyegeranya, kugira ntibigire ingaruka ku magara y’abantu n’ibidukikije. Izo ngingo zose ngo barazishimira, ndetse ngo hakaba n’ikigo kigiye kuja kirahingura mwene ayo macupa, ico kigo naco citwa “Pyrothec”. Ico kigo kikaba caramaze gusaba ko cokorana n’ubushikiranganji mu kubaronsa abahinga bashobora gutunganya ukuntu bokorana n’amahinguriro akoresha mweneyo ayo macupa. Ayo masezerano yoza avuga ukuntu ayo macupa yokwegeranywa kugira ashikanwe muri ico kigo.Imbere y’uko ayo macupa asubira guhingurwamwo ibindi, ngo basavye abadandaza amazi mu bibanza bihuriramwo abantu benshi gutunganya ibibanza, aho umuntu ahejeje gukoresha iryo cupa aca arita muri ico kibanza gitunganije “poubelles”. Ishirahamwe “Savonor” rihingura amazi ya Aquavie ngo riramaze gutunganya ikibanza nk’ico ku kiyaga. Mu bijanye no gutunganya amatuta, Abarundi basabwe gukoresha ibihubahuba kubera bibora ningoga, ubumwanya bubora, ngo igiciro cabwo kirahanitse. 

Birabujijwe gukoresha irirenga rimwe amacupa avamwo amazi
Ku kibazo co kumenya ingaruka mbi ziturutse kw’ikoreshwa akarenga rimwe amacupa akoze mu bisa n’ubumwanya, ishirwa mu ngiro ry’itegeko ribuza ikoreshwa ry’ubumwanya, ngo harateguwe itegeko nshikiranganji ririherekeza, muri iryo tegeko, ngo baravuga neza ko abantu bazoba bahingura ibintu bisubirira ubumwanya  bazokworoherezwa nk’abasanzwe bahingura ibintu ngirakamaro ku banyagihugu. Muri iryo tegeko nshikiranganji, ngo barabuza ko ayo macupa yokoreshwa irirenga rimwe. Igihe ico kigo kizotangura guhingura ayo macupa, ngo vyotuma babura ivyo bakoresha kubera ayo macupa yoba ariko akoreshwa kenshi.Kabaye n’akayo ko gutera akamo Abarundi ko amategko ategurwa, atunganywa yitonderwa kugira ashobore kubagirira akamaro, atari ayo kubakandamiza. Akwunguko k’iryo tegeko ngo abarimyi bazokabona kubera amatongo yabo azosubira kumera. Iryo tegeko kugira rijeho, ngo baravye ingaruka mbi zituruka ku bumwanya, aho bushobora kumara imyaka irenga 400, aho buhambwe mu kuzimu.

 Déo Misigaro                                                                                                               

 

Imyiteguro yo guhimbaza imyaka 100 iheze igisagara ca Ngozi kibayeho irabandanya

DSC 0102 1Kw’igenekerezo rya 29 Ruhuhuma 2020 niho hazohimbazwa isabukuru y’imyaka ijana igisagara ca Ngozi kizoba kirumanije  kuva kibayeho. Ni muri iyo ntumbero ku wa 6 Nzero 2020, ikinyamakuru canyu UBUMWE cegereye musitanteri wa Komine Ngozi kugira ngo ashikirize  uko we n’abo arongoye ndetse n’abanyegozi bose hamwe n’abakunzi b’intara ya Ngozi bariko barategura uwomunsi mukuru. Radjab Songambere yaramenyesheje rero ko imyiteguro yo guhimbaza isabukuru y’imyaka 100  iheze igisagara ca Ngozi kibayeho igeze kure harimwo n’ibiganiro vyatunganijwe bijanye n’iterambere ry’ibisagara   Muri iyo myiteguro ngo barasukuye igisagara mu kugishariza batera amashurwe, barasubiramwo amabarabara barongera baratera ibiti bishariza ico gisagara, harubatswe inyubako rusangi zituma igisagara gisa neza. Barongeye baratunganya isiganwa ry’imiduga kugira bakangurire ababa mu gisagara ca Ngozi ko hageze guhimbaza iyo sabukuru. Radjabu Songambere yamenyesheje kandi ko bashimishwa n’intambwe bagezeko mu kwitegurira iyo sabukuru kuko bamaze gushiraho indwi yahariwe ikinjana, hakaba haratunganijwe inkino zitandukanye hamwe n’intambo ngo hazoba kandi inama hazobamwo ibiganiro vyerekana uko ibisagara bitunganywa hamwe n’iterambere ry’ibisagara.  Musitanteri wa komine Ngozi yarongeye aramenyesha ko hazatswa urumuri rw’intazima ruzakirizwa urwaruka kugira ntibaje baruzimye kizogume ari igisagara giteye imbere.   Mu kubandanya bitegurira iyo sabukuru musitanteri wa komine Ngozi aratumirira abanyagihugu bo mu ntara ya Ngozi ko iryo sango ryageze ko umwe  wese yokwitegura kugira hazohimbazwe iyo myaka 100 mu kanyamuneza ntangere. Abanyagihugu bo mu gisagara ca Ngozi barishimira cane intambwe kigezeko kuko gisigaye cirukirwa n’abantu benshi kubera imirimo ihakorerwa ari myinshi. Igisagara ca Ngozi kikaba cagiye kiratera imbere bivanye n’inyubako zihari, isuku, amabarabara ahaca n’ibindi. Radjabu Songambere yarangije amenyesha ko muri kazoza bategekanya gusukura igisagara kuruta uko biri bakaba baramaze kuronka imodoka hamwe n’ibikono bazoshiramwo  umucafu  kugira ntuzosubire kuharangwa. Bazoshishikara bubaka inyubako rusangi hamwe n’uguhimiriza abanyagihugu gusukura aho baba hamwe no ku mubiri.

Anitha Bizimana

 

Prezida Nkurunziza yarashimiye Imana kubera Abarundi bahimbaje iminsi mikuru yo gusozera umwaka batekanye

DSC 0183Umukuru w’igihugu Petero Nkurunziza aratumirira abakristo bo mu rusengero rw’urutare ko ku munsi w’isabato bovuza inzamba mu mwaka w’2020 mu gushimira Imana ko umwaka w’2019 warangiye itanze amasezerano ku Burundi. Ivyo yabimenyeshereje mu rusengero rw’urutare i Buye  muri komine Mwumba, intara ya Ngozi ku munsi w’Imana wa mbere  utangura umwaka igenekerezo rya 5  Nzero 2020. Prezida Nkurunziza yamenyesheje ko  ashimira Imana kubera mu mwaka uheze yamufashije gusengera mu rusengero rw’urutare rw’i Buye gusumba uko yabaye ahandi kuko ari muhira, kandi mu 2020 azohaba cane. Arashimira kandi Imana ku  masengesho yo kurangiza umwaka, yatunganirijwe muri komine Itaba, intara ya Gitega yagenze neza kandi Imana ikagira amasezerano ku Burundi. Yagize ati: «Imana yaramenyesheje ko yahinduye Uburundi ikibanza co kuyihimbaza, Imana ni umwizigirwa yatanguranye n’Abarundi umwaka w’2020 kandi izowurangizanya nabo». Petero Nkurunziza yarongeye aramenyesha abakristo bari ng’aho   amasezerano Imana yatanze muri ico gikorane cabereye Itaba, kuko habaye ibitangaza bikomeye. Ica mbere ngo n’uko Imana igiye kubandanya ivugana n’abarundi kandi igiye gushira ahabona ivyari vyaranyegejwe, ica kabiri ni ugushira mu Burundi ibimenyetso binini kandi bikomeye umwana w’umuntu atoshobora kunyiganyiza. Prezida yabandanije amenyesha ibindi bimenyetso  Imana yatangiye muri komine Itaba nk’ugutobora amadirisha n’imiryango y’ijuru kugira imigisha n’imihezagiro imanukire ku Burundi;  ica kane n’uko Imana yagaruriye Abarundi ubwenge bwari bwaraboshwe n’umurwanizi, Abarundi babohotse n’Uburundi bwobohoka. Petero Nkurunziza yasozereye asengera ishengero ry’urutare ashimira Imana ko yabarinze bakarangiza umwaka ari bazima, kandi yimika amasezerano yavuzwe ku Burundi ayateragira ku bakristo bo mu rushengero rw’urutare aca asaba Imana ko yobafasha bakayabamwo, arahezagira ishengero n’abarundi. Umupfasoni w’Umukuru w’igihugu ari nawe yasiguye ijambo ry’Imana ry’uwo munsi, yafatiye  ku butumwa bwiza bwanditswe na Matayo  igice ca 5 umurongo wa 3, kavuga ngo” hahiriwe aboro mu mutima kuko ubwami bwo mw’ijuru ari ubwabo”. Iryo jambo niryo Yesu yahereyeko kwigisha agiye ikafaranawumi, ryerekana abahiriwe abaribo yarisubiyemwo incuro 11. Yesu yazanye imvugo itandukanye cane n’imvugo y’abo mw’isi. Iyo babonye uwutunze, ibiboneka baca bibaza ngo niwe muhirwe ariko siko biri, ng’aho yashaka kuvuga ko aboro b’umutima ari bo bama bafise inyota y’ijambo ry’Imana n’iyo gusenga, kuko igitungisha umutima  ari jambo, n’amasengesho akamara inyota y’ivyagezwe kuko Bibiriya itunze.  Pastori Denise Nkurunziza yabandanije amenyesha abakristo b’I Buye  kwamana iyo nyota y’uko Yesu agaruka agasanga bakiri aboro mu mutima, kuko abo aribo bazokwibirwa akabanga kuko azosanga bari maso. Umupfasoni w’Umukuru w’igihugu aratumirira abakristo b’i Buye kwirinda gusenga nk’abafarizayo nk’uko vyanditswe na Luka mu gice ca 18 umurongo w’9. Kuko basenga biyemera mu mutima bagakengera abandi ngo ntibameze nkabo. Abasaba ko bobireka kuko Imana ibona vyose, bokora bikazogaragarira mu vyamwa. Ivyaha si ugusambana gusa, n’ubwibone naco ni icaha.  Umukristo iyo bamukeje aratumirirwa gusengera ayandi mavuta ace bugufi Imana ije hejuru. Denise Nkurunziza yasozereye amenyesha abakiristo b’i Buye ko bokwamana inyota y’ijambo n’amasengesho kuko aboro atari abakenye ibiharage canke impuzu ahubwo ari aboro mu mutima b’ijambo. Ku muhingamo Umukuru w’igihugu yaciye aja kurorera umupira w’amaguru wahuje imirwi ya Lydia Ludic SAA na Messager Ngozi, umurwi Lydia Ludic ukaba ariwo wirahiye le Message Ngozi ku gitsindo 1 ku busa. Mu nyuma y’aho haciye hatana mu mitwe imirwi ya Lumiere FC y’i Mwumba na Mamba vert y’i Karusi yaronse ibitsindo3, Mamba Vert y’i Karusi ironka igitsindo kimwe zikaba zari inkino za kivandimwe. 

Anitha Bizimana

 

Abakenyezi bahamagariwe gutora no kwitoza, baserukirwe mu nzego zifata ingingo

eeertIbwirizwa Shingiro ry’Uburundi ritegekanya ko  abakenyezi boronka n’imiburi ibice 30% mu nzego zifata ingingo. Mu ntumbero yo kumenya ukungene abakenyezi bariko baritegurira amatora y’umwaka w’2020, ikinyamakuru UBUMWE caregereye amashirahamwe atandukanye aharanira agateka k’abakenyezi kugira bamenyeshe ingene bitunganije mu ntumbero yo  guhimiriza abakenyezi gutora no kwitoza kugira bashikire vya bice bahabwa n’Ibwirizwa Shingiro.Ibwirizwa Shingiro ry’Uburundi ritegekanya ko  abakenyezi boronka n’imiburi ibice 30% mu nzego zifata ingingo. Mu ntumbero yo kumenya ukungene abakenyezi bariko baritegurira amatora y’umwaka w’2020, ikinyamakuru UBUMWE caregereye amashirahamwe atandukanye aharanira agateka k’abakenyezi kugira bamenyeshe ingene bitunganije mu ntumbero yo  guhimiriza abakenyezi gutora no kwitoza kugira bashikire vya bice bahabwa n’Ibwirizwa Shingiro.
Umunyamabanga nshingwabikorwa mu runani rw’amashirahamwe arwanira amahora n’umutekano, Marie Kinyabuku yamenyesheje ko muri kino gihe hariko hitegurirwa amatora y’umwaka w’2020, bariko baregeranya amashirahamwe yose arwanira agateka k’umukenyezi, akarwanira amahoro n’umutekano ku mukenyezi kugira bavuge rumwe mu bijanye no kuduza ibitigiri vy’abakenyezi mu nzego zifata ingingo.  Yabandanije amenyesha ko bashimikira ku civugo,  Shigikira abakenyezi barenze ibice 30% ». Intambamyi  ngo nuko hari ingorane z’uburyo bwo gushitsa ijwi ry’umukenyezi kure, abantu bakavira hasi rimwe bakabashigikira. Umupfasoni Kinyabuku yamenyesheje ko iyindi ngorane ari   uko abantu bari gufasha guhimiriza abakenyezi gutora no kwitoza basanze bari mu bikorwa vyinshi bitandukanye muri izi mpera z’umwaka. Ngo amashirahamwe yariko aheraheza ibikorwa vyayo. 
Umunyamabanga w’ihwaniro ry’abakenyezi, Jeanne Mpfayoguhora yamenyesheje ko bafise imigambi myinshi yerekeye amatora kuko bifuza ko birya bice 30%  abakenyezi bahabwa n’Ibwirizwa Shingiro bobirenza cane cane mu matora yo ku mitumba. Yabandanije amenyesha  ko hari  abakenyezi 15 ku mutumba bafise igikorwa co gutora abakenyezi 4 bazokwitoza mu matora yo ku mitumba. Ngo hakaba hamaze kuboneka abakenyezi 764 bazokwitoza ku mitumba yo mu gihugu cose. Ihwaniro ry’abakenyezi rikaba rizobafasha kurondera amajwi.   Umupfasoni Mpfayoguhora yamenyesheje ko  bifuza ko amashirahamwe akorera mu bijanye n’abakenyezi bokwigabura mu bice kugira bakwire hose mu gihugu baja guhimiriza abakenyezi kwitoza no gutora. Mw’ihwaniro ry’abakenyezi, ngo bazokwegeranya abakenyezi b’imboneza n’abagomba kwinjira mu mabanga y’igihugu atandukanye kugira bahanahane ivyiyumviro ku bijanye n’uburongozi bwiza. Ngo abakenyezi b’imboneza bazofasha abandi bakenyezi mu kubashingira intahe zijanye n’amabanga bashinzwe.  Umushingamateka w’umutwakazi Liberate Nicayenzi yamenyesheje ko  mw’ishirahamwe mpuzabatwa UNIPROBA baronse uburyo bwa ONUFEMME bwamaze imyaka 2,  imbere y’umwaka w’2012. Yabandanije amenyesha ko ubwo buryo bwatumye bashobora kuja kwigisha abatwakazi bo mu ntara zose z’igihugu  kuja mu migambwe, bayikorere, bayigaragaremwo hanyuma baheze bitoze.  Ngo kubera ata buryo bwo kwiyunguruza buhari,  mw’ishirahamwe UNIPROBA, bahimiriza abakenyezi b’abatwa kwitoza no gutora bakoresheje amaterefone. Ngo  ku rwego rw’intara na komine hariho abatwakazi baserukira abandi bafise amaterefone. Ngo ishirahamwe UNIPROBA rica kurabo batwakazi barongoye abandi kugira babandanye igikorwa co guhimiriza abatwakazi  gutora no kwitoza. Umushingamateka Nicayenzi yamenyesheje ko ku munsi mukuru w’abasangwabutaka bibukije abatwakazi  ko hageze ko bahaguruka kugira ngo baseruke bagire ijambo mu gihugu mu kwitoza no mu gutora. Ngo abatwakazi barafise ingorane zo kudakurikiranira hafi ivy’igihugu kubera batitaho inama, mu bikorwa rusangi n’ukumviriza iradiyo. Ngo ivyo biva ku mikoro make y’abatwakazi kubera baguma biruka barondera ibifasha imiryango yabo. Iyindi ngorane nuko abakenyezi benshi babatwakazi batize. Nicayenzi yamenyesheje ko ibindi bica intege abarundikazi ari uko batora abantu hanyuma ntibazosubire kubakubita ijisho. Yabandanije amenyesha ko  bikenewe  ko abantu batowe bokwitaho abanyagihugu barongoye. 
Uwurongoye ishirahamwe Dushirehamwe, Thérèse Ndoricimpa yamenyesheje ko  babonye ko abakenyezi bari mu nzego  zifata ingingo badakwiye, baca biha ihangiro ryo  kubakangurira  gutora bakitoza. Ngo muri Dushirahamwe bihaye ihangiro ryo gusaba imigambwe ko yobaha abakenyezi babona ko bofata iyambere bakazitoza kandi bagatorwa. Ngo abo bakenyezi bashizwe imbere baciye babagirira inyigisho zijanye n’uburongozi bwiza kugira bamenye ingene biyamamaza. Ndoricimpa yamenyesheje kw’ibibuza abakenyezi kuja mu nzego zifata ingingo ku rugero rushimishije ari uko  ariho bagitangura  kuja muri poritike. Yabandanije  amenyesheje ko hari aho abakenyezi babuzwa kwitoza n’uko abo bubakanye baba  bitoje bakabona ko aribo bategerezwa guhebera abagabo babo. Ngo  ikindi kibuza abakenyezi kwitoza ni udukorwa two mu rugo kuko iyo batumvikanye n’abagabo babo ngo mu mwanya batahari bahababere hari ibipfa. Ngo ishirahamwe Dushirehamwe ryarahaye inyigisho abagabo  ku bijanye n’ingene boshigikira abakenyezi babo bakitoza mu kubabera mu kibaza iyo batahari mu kubereka ingene bakira ibihuha bivuga ko iyo umukenyezi agiye muri poritike aba agiye gusambana. Ndoricimpa yamenyesheje ko yizeye ko mu mwaka w’2020, abakenyezi bazoronka vya bice 30% mu matora yo mu mitumba. 
Umuhuzabikorwa ku rwego rw’igihugu mw’ishirahamwe ryishinze guteza imbere umwigeme w’umurundikazi APFB, Alice Nkunzimana yamenyesheje ko  kuva mu mpera z’umwaka w’2018  no mu mwaka w’2019 bafise imigambi bakorerako yo guhimiriza umwigeme  gutora no kwitoza. Yabandanije amenyesha ko bahimiriza kwitoza kubera babona ko umwigeme hari ivyo asaba bidashobora kuronkerwa inyishu bataronse aho babivugira. Ngo umwigeme  agiye mu nzego zifata ingingo uhereye  ku mutumba birafasha ko ivyifuzo vy’abigeme bironka inyishu. Nkunzimana yamenyesheje ko imico y’abarundi iri mu bibuza  umwigeme w’umurundikazi kuja kwitoza, igatuma nawe nyene yikumira.  

Aline Kanyana

 

«Imana yemeye ko igiye gushira ahagaragara ivyari vyaranyegejwe ku Burundi n’Abarundi»

DSC 0860Umukuru w’igihugu Petero Nkurunziza yarasozereye, ku wa 31 Kigarama 2019, amasengesho yo gushimira Imana yazigamye umuryango wiwe n’abarundi mu mwaka w’2019 wose, akaba yabeyereye muri komine Itaba, intara ya Gitega,  yari yatanguye ku wa 26 Kigarama.Prezida Nkurunziza yarasabiye rero Uburundi n’abarundi ari kumwe n’umutambukanyi wiwe Denise Nkurunziza bafashe idarapo ry’igihugu bapfukamye.Prezida Nkurunziza  yarashimiye kw’izina ry’abarundi, Imana yabahezagiye inabemerera gushira ahagaragara ivyari vyaranyegejwe vyose kandi ko igiye kubandanya ivugana nabo.Umukuru w’igihugu Petero Nkurunziza yarasozereye, ku wa 31 Kigarama 2019, amasengesho yo gushimira Imana yazigamye umuryango wiwe n’abarundi mu mwaka w’2019 wose, akaba yabeyereye muri komine Itaba, intara ya Gitega,  yari yatanguye ku wa 26 Kigarama.Prezida Nkurunziza yarasabiye rero Uburundi n’abarundi ari kumwe n’umutambukanyi wiwe Denise Nkurunziza bafashe idarapo ry’igihugu bapfukamye.Prezida Nkurunziza  yarashimiye kw’izina ry’abarundi, Imana yabahezagiye inabemerera gushira ahagaragara ivyari vyaranyegejwe vyose kandi ko igiye kubandanya ivugana nabo.Prezida Nkurunziza  yarashimiye abanyagitega kuko iminsi yose abashitsi bahamaze ataco babuze narirya bababereye vyose. Yarashimye mu kibanza c’umuryango wiwe kubw’amahishurirwa n’ibimenyetso abanyagitega babahaye hamwe n’amajambo yabiherekeje ngo ni ishimwe ku bakurikiranye amasengesho, aca amenyesha ko umuryango wiwe wanezerewe, abemerera ko ibimenyetso bahawe bazokwama babihagararira kandi n’ivyo babagabiye bazobifata neza- baragabiye utuganuke dutandukanye umuryango w’Umukuru w’igihugu hamwe n’inka; ngo mbere bakomeze ubucuti hagati y’abarundi na cane cane abanyagitega. Yarashimiye abitavye ubutumire bw’amasengesho  yo gushimira Imana mu butandukane bwabo bwose aca asaba ngo iminsi bahabaye Imana ize ivyandike mu gitabu c’intibagiranwa. Yarashimiye n’abakozi b’Imana bose basenze muri ico gikorane ngo bazanye ukuri kandi bazosubira inyuma bayaga ivyiza babonye mu Burundi yongera ashimira abagize ico bakora cose hamwe n’abamenyeshamakuru bitanze batiziganya kuko ivyagiye birakoreka vyabaye inyungu za bose bitabaye ivy’abarundi ngo nabo bacitse abavugabutumwa. Muri ayo masengesho nyene, yarongeye amenyesha ko Imana yarungitse amasezerano yo mu 2020, amenyesha ko Uhoraho Imana Mushobora vyose agiye kubandanya avugana n’abarundi kandi ashize ahagaragara ivyari vyaranyegejwe vyose, isambuye n’inkomezi zose z’umwansi w’Uburundi ahari hose kw’isi nzima, ngo Imana igiye gushira mu Burundi ibimenyetso binini kandi bikomeye , kandi iremye ivy’inkomezi bihambaye mu Burundi, ivy’umwana w’umuntu atoshobora kunyiganyiza, ikindi naco n’uko Imana yatoboye amadirisha n’imiryango vyo mw’ijuru kugirango umugisha n’imihezagiro vyururuke ku gihugu c’Uburundi, abarundi bakire rero umugisha uvuye mu kiganza c’i buryo c’Imana, yaramenyesheje kandi ko Imana yagaruriye abarundi ubwenge bwari bwaratakaye n’ubwenge bwari bwaraboshwe n’umurwanizi. Niko guca amenyesha ko abarundi bagiye kuba abadasanzwe kw’isi kandi Uburundi bwabohotse. Yarangije abipfuriza umwaka mwiza mushasha w’ 2020 ngo uze ubabere umwaka w’intsinzi muri vyose baroranirwe bongere bagire amagara meza, yongera ahezagira Uburundi n’abarundi bose ngo ayo masezerano abe ayabo n’abuzukuru babo, ngo baze bayagumize ku mitima yabo gutyo bajane umuhezagiro w’Imana mu miryango yabo no mu vyabo. Muri ico gisabisho yarangije aragiza igihugu c’Uburundi Imana, asaba imbabazi ku vyaha vyose vyakozwe n’abarundi n’abakirongoye bose kugira baze batangure amateka mashasha imitima yabo ari mishasha yongera ashima ko yabahaye Uburundi baremwa bitwa abarundi nk’ihanga ry’abarundi kandi ngo nta kindi gihugu citwa Uburundi vyongeye ngo nta n’irindi hanga ryitwa abarundi. Yaheraheje amenyesha ko arico gituma bariko basozera umwaka batanga ishimwe ry’ibihambaye Imana yabakoreye, ashima ko yabazigamye itanga amahoro n’umutekano yongera irwanira abarundi intambara babona n’izo batabona, itanga ikirere ciza n’akazuba ,  irinda indongozi amasanganya, bagira ikiganza ciza arico gituma basozereye umwaka bari mu ntsinzi y’Imana. Yarongeye ashima ukuntu Imana yabanye n’abitavye amasengesho kuko yabahishuriye amabanga binjira mu mwaka w’ 2020 bazi iyo baja niyo bava kandi batahukanye amasezerano yo mu 2020. Yasenze amenyesha ko mu mwaka w’2020 Imana yobarwanira intambara zose ikabaha intsinzi ku bansi babo bose, n’inyonga zayo ngo zibe ku barundi bose gutyo bimenyekane ko abarundi ari ihanga ryera amahanga yose abimenye kandi abubahe. Buramatari w’intara ya Gitega Venant Manirambona nawe mw’ijambo ryiwe, yarashimiye Imana kuko muri iyo minsi bamaze baharonkeye vyinshi, ashimira Imana n’uko yabarinze. Yarongeye amenyesha ko mu nyigisho zose zatanzwe bigiye vyinshi ku Mukuru w’igihugu n’umutambukanyi wiwe bongera biga n’ingene bokwifata imbere y’Imana. Yarongeye ashimira n’abashitsi kuko babasanzemwo urukundo rudasanzwe, akengurukira imvukira n’abakunzi ku kuntu bitanze mu gushigikira ibikorwa mu buryo butandukanye bwose. Ikindi naco, kw’izina ry’abanyagitega, yarashimiye Umukuru w’igihugu aho yamuhaye umuheto n’umwampi vyerekana ikimenyetso c’ubutegetsi bwiza n’inganji, amuha icumu ryerekana ko igisabisho co gukengurukira Imana cabagiye imbere, yarongeye amuha inkinzo ikimenyetso c’uko amasengesho yabaye inkingi y’igihugu. Yaranamenyesheje ko Umutambukanyi w’Umukuru w’igihugu Denise Nkurunziza yabereye umuco abarundi bose mu nyigisho yama atanga, arico gituma nawe nyene yaciye amuha itara n’igikombe vyerekana ko abakenyezi bamubonamwo akarorero n’umuco. Niko guca amenyesha ko bipfuza ko aho umuryango w’Umukuru w’igihugu uzoba uri hose bokwama mu gisabisho gishigikira abarundi.  Ikindi yamenyesheje n’uko abanyagitega n’abarundi bashima imigisha iva ku muryango w’Umukuru w’igihugu kuko iyo bagiye guteragira babanza guhezagira imirima n’ibitungwa aca Abashikiriza iganuke rigizwe n’inka 11, impene 11, inkoko 11 hamwe n’ibiseke bitandukanye. 
Indongozi zisabwa gusenga Imana kuko ariyo ntango n’iherezo y’ikintu cose
Tubibutse ko mu rukurikirane rw’ayo masengesho,mu gitondo c’umunsi ugira 3, hakaba hari ku wa 28 Kigarama 2019, Prezida Nkurunziza yararemesheje inyigisho ku indongozi aho yabasavye gusenga Imana kuko ari yo ntango n’iherezo y’ikintu cose. Bisubiye ngo ntaco bafise batahawe n’Imana. Nk’uko yabimenyesheje, yishimikije amajambo ari mu vyahishuriwe Yohani 22 : 616, ngo indongozi zikwiye kumenya ibihe bijanye n’ububasha bw’Imana kandi ngo si igihe cose abantu baronka amasezerano. Yabamenyesheje kandi ko  guhishurirwa amabanga biza mu munezero w’Imana kandi abanyabwenge bamenya iyo baja arico gituma bategerezwa kubaha Imana, kuyikorera no kuyigororokera. Prezida Nkurunziza yarabahaye impanuro zibatuma bisunga ijambo ry’Imana aho yababwiye ko hahiriwe uwitondera amajambo yavugishijwe kuko abayumva ari benshi ariko abayitondera ari bake, acabawira ko ata murongozi agenda yirebanga ahubwo ategerezwa kuronka umukozi w’Imana amufasha kumenya kwubaha Imana. Yaheraheje asabira indongozi nshasha zizotorwa mu mwaka w’2020 ngo zize zigire imbuto y’uburongozi no kurandura imbuto y’uburongozi butaribwo.  Umukozi w’Imana Mathias Lojas nawe nyene yigishije ico gihe,  yashimikiye ku majambo ari mu gitabu ca  Yohani igica ca 4 umurongo wa 34 aho yerekanye ibikorwa biranga umurongozi mwiza. Niko guca amenyesha ko umurongozi mwiza yubaha Imana akayishira imbere muvyo akora vyose, ko aba ingazi ishobora kuduza abo arongoye, gukuraho imbuto mbi mu bantu no kugumya amategeko. Yaciye yongera amenyesha ko umurongozi agumije amategeko, umurwanizi amutinya, shetani igatinya igihugu, Imana ikaba iri kumwe nawe. Mu nyigisho ziwe yaheraheje amenyesha ko Uburundi bugiye gutangaza amahanga kuko burongowe n’indongozi zubaha Imana. 
Abantu bose bahamagarirwa kwubaha n’ukwizigirwa biva ku mutima
Abantu bose babahamagarirwa kwubaha n’ukwizigirwa bivuye ku mutima. Ivyo vyamenyeshejwe n’umuvugabutumwa Paul Bendela Manyenye yari yaje avuye mu gihugu ca Tanzaniya, mw’ijambo ry’Imana yigishije abari bitavye amasengesho yo gushimira no gutazira Imana ku muhingamo w’iryo genekerezo rya 28 Kigarama 2019.Paul Bendela Manyenye yarashimye rero ukuntu indongozi z’igihugu c’Uburundi zishira imbere Imana, aca amenyesha ko iyo umurongozi ari kumwe n’Imana mu gihugu haca haba ibintu vyiza kandi ibanga riri mu gukundwa n’Imana. Mu nyigisho ziwe kandi yarakeje abarundi kw’iterambere bagezeko aravye inyubakwa bamaze kwiyubakira, aca abasaba ko bokengurukira Umukuru w’igihugu c’Uburundi Petero Nkurunziza kuko ariwe babikesha. Yaciye anamenyesha ko ivyo yiboneye bitandukanye n’ivyandikwa ku Burundi biciye ku rubuga ngurukanabumenyi aca abahamagarira kutaja baravyizera ariko bizere ivyo indongozi zibabwira gutyo barangwe n’ukwubaha n’ukwizigirwa biva ku mutima.Yarongeye amenyesha ko Uburundi bugiye gushirwa hejuru bube akarorero muri Afrika kuko bwashize Imana imbere bisubiye kandi ngo umwe wese arafise ubutunzi buzokiza Uburundi. Ngo kugira igihugu gihinduke bivana no kwizera abarongozi baco,  ukabakunda kuko utabubashe uheza ugatakaza intumbero. Paul Bendela yarongeye amenyesha ko ivyo boshira imbere ari ugukunda Imana mu gusenga mu bwenge no mu nkomezi zabo kuko ubwenge butegerezwa kwama buhingurwa, umutima nawo wama ushaka gushima no kwizera Imana. Yishimikije amajambo ari mu gitabu ca  Luka igice c’10 umurongo wa 27 yamenyesheje ko igihugu cose gitegerezwa kwubaha abarongozi nabo bagakunda abo barongoye arico gituma bahamagarirwa kwubaha hamwe n’ukwizigirwa kuko ubwizigirwa bugaragaza ukwubaha kuva mu mutima.

Umukuru w’igihugu Petero Nkurunziza mu gisabisho ciwe co gusozera amasengesho y’uwo munsi, yarashimye ko Imana yabagaburiye ijambo ryayo, ikanabaha ku butumwa yarungikanye abakozi b’Imana hamwe n’abari bitavye amasengesho ngo Imana ize ibibahezagirire yongere ivyandike mu gitabu c’intibagiranwa. Yarongeye abasabira ku mana ngo ibahe kwerekwa no kuvugishwa baze bakore ibihambaye n’ibikomeye.Umukuru w’igihugu Petero Nkurunziza mu gisabisho ciwe co gusozera amasengesho y’uwo munsi, yarashimye ko Imana yabagaburiye ijambo ryayo, ikanabaha ku butumwa yarungikanye abakozi b’Imana hamwe n’abari bitavye amasengesho ngo Imana ize ibibahezagirire yongere ivyandike mu gitabu c’intibagiranwa. Yarongeye abasabira ku mana ngo ibahe kwerekwa no kuvugishwa baze bakore ibihambaye n’ibikomeye.Urwaruka rusabwa kwegera Imana n’abavyeyi kugira ruronke umuhezagiro w’ImanaMu gitondo c’umunsi ugira gatatu w’amasengesho, hari kw’igenekerezo rya 29 Kigarama 2019, Umukuru w’igihugu, Petero Nkurunziza yaratanze inyigisho ku rwaruka, aho  yabasavye kwegera Imana, igihugu n’abavyeyi kugira ruronke umuhezagiro w’Imana. Nk’uko yabimenyesheje, yishimikije amajambo ari mu gutabu c’Itanguriro igice ca 27  kuva ku murongo wa  26 gushika ku wa 29, havuga ingene Yakobo yatwaye umuhezagiro wa Esaya, yongera yigisha n’ijambo rivuga ko uburongozi bufatiye ku kwubaha Imana. Yabamenyesheje ko ingabire Imana yatanze iruta izindi ari urwaruka bisubiye ngo nibwo butunzi bwa mbere kuko rusambutse igihugu kiba gisambutse. Niko guca amenyesha kandi ko ataco bari batagizwe n’Imana hamwe n’abavyeyi babibarutse kandi ata n’umwe basangiye indinganizo y’Imana atari abavyeyi, kubw’ivyo rero ngo umugisha wabo uva kuri bo kuko aribo mutahe wa mbere. Prezida Nkurunziza yaciye asaba urwaruka kwubaha kuko ngo na Dawidi ata ntambara n’imwe atanesheje kubera yubaha Imana yongera abasaba kwegera abavyeyi kuko bitanga umuhezagiro kandi ariho bazoronka uburongozi bufatiye ku kwubaha Imana. Yasozereye inyigisho abamenyesha ko kugira baronke umuhezagiro uva ku Mana bokwegera igihugu n’abavyeyi, bogumbira Imana yo yabahaye abavyeyi, bokwambara nk’abantu bagumbiranye n’Imana, bohishurirwa amabanga y’Imana, bagashirwa hejuru bakongera bagateramira ivyo Imana yabahishuriye.Twobamenyesha ico gihe ko n’umuvugabutumwa Mathias Lojas yari yabanje gutanga inyigisho zifatiye kw’ijambo rivuga kuba umusore adasanzwe yishimikije amajambo ari muri Zaburi y’119 ku murongo uvuga ngo umusore yokwezesha inzira yiwe iki ? Niko guca ababwira ko uko bangana kwose ari abanyenkomezi kandi Imana yabashizeho ngo bahagararire imbere y’amahanga, bisubiye ngo ni abadasanzwe mu bwami bw’Imana. Yaciye abamenyesha ko bakwiye guhagurutsa ubuzima gushika ku rundi rugezo, ariko ngo kugira bishoboke bategerezwa gukunda ijambo ry’Imana mu kwiyegereza no kugendana n’Imana, kubaho ubuzima bwabo buri mw’ijambo ry’Imana kuko uwugendera mw’ijambo ry’Imana Yesu aba ashinze imizi muri we kandi ataco atoshobora gukora.
Abantu bose bahamagarirwa kugira impwemu imwe y’Imana
Abantu bose bahamagarirwa kugira impwemu imwe y’Imana, bakabona kumwe  kuko iyo bafise impwemu imwe ico bagomba cose giheza kigakoreka. Ivyo vyamenyeshejwe n’Umwungere arongoye akarere k’amashengero MINEVAM y’i Bujumbura , Dieudonnée Nsavyimana mw’ijambo ry’Imana yigishije abari bitavye amasengesho yo gushimira Imana ku muhingamo w’ iryo genekerezo rya 29 Kigarama 2019.Yatanze  inyigisho ico gihe afatiye ku majambo ari mu gitabu co Guharura igise ca 11 : 16, 17 aho yabasavye kugira impwemu imwe y’Imana kuko ngo nibayigira ico bashaka bazokironka, bisubiye ngo abarundi barafise ico yabavuzeko kandi ngo izobishitsa. Mu nyigisho ziwe kandi yaramenyesheje ko iyo umuntu yageragejwe bituma asenga Imana, amenya umukunzi n’umwansi kandi ngo igeragezwa ryegereza amasezerano yabo, acabasaba kuvugishwa amahoro ku ndongozi no ku gihugu. Yaheraheje abasaba kwakira impwemu imwe y’Imana kugira abanyavyaha babihebe gutyo amahoro aze ku gihugu.Umukuru w’igihugu Petero Nkurunziza nawe yamenyesheje ko uwo munsi wari uwo guhaga ivy’Imana, aca ashimira abari bitavye amasengesho bose yo kuri uyo munsi, yongera ashima amenyesha ko Imana yabahinduriye amateka  y’ubuzima bwabo.Mu ntahe yashingiye Imana, yarashimye ivyakoretse mu mwaka w’2019 ashima kandi ko wasozerewe harangwa amahoro n’impore mu mpande zose z’igihugu, rero ngo Imana yabereye abarundi umwizigirwa ibaha kumererwa neza. Yarashimye Imana kubw’ikirere ciza yatanze baraheza barimbura umwimbu mwinshi ku mpeshi no ku gatasi, aho yatanze imfungurwa benshi barabaho. Niko guca amenyesha ko ubutunzi bw’Uburundi bwaduze gusumvya iyindi myaka bivanye n’uko mu kigo cegeranya uburyo bwinjira hagati mu gihugu hari hategekanijwe ko bazokwinjiza amafaranga ashika imiriyaridi 800 ariko  ngo bari bamaze gushikana imiriyaridi 950, gutyo rero umwimbu mu butunzi ngo wiyongereye hafi ibice 20 kw’ijana. Ikindi yashimiye Imana n’uko uyo mwaka hinjijwe ibintu bikomeye vyubatse mu Burundi harimwo ikirimba c’Umukuru w’igihugu, Imana yongera izigama indongozi zose. Imana kandi ngo yerekanye ibitangaza kuko mu mateka y’igihugu amatora agiye gutunganywa abarundi benshi bariko barahunguka mu gihugu cabo.Yarashimye ko abarundi batunganije amatora y’ibwirizwa shingiro  bongera bakoresha n’uburyo bwabo, bongera batanga amahera y’amatora aho ayo amafaranga yose yabonetse ndetse aba n’umusesekara. Ngo Imana yateye iteka abarundi batari bake baronka ibibanza vyiza haba mu makungu no mu karere. Yasozereye abatangariza ko  kubw’ayo masengesho amatora yo mu 2020 azogenda neza gusumba ayandi yatunganijwe mu gihugu kuko azoba atekanye arimwo umugisha w’Imana kandi azotuma abarundi baja mw’iterambere ridasanzwe.
Indongozi zisabwe gusabira imiryango yazo n’ivyazo kugira baze bajabuke mu mwaka mushasha bafise imihezagiro iva ku Mana
Mu gitondo co ku wa 30 Kigarama 2019, Umukuru w’igihugu yaratanze kandi inyigisho ku ndongozi, aho yabahimirije gusabira imiryango yabo n’ivyabo vyose kugira baze bajabuke mu mwaka wa 4 mushasha w’2020 bafise imihezagiro iva ku Mana. Nk’uko yabimenyesheje, yishimikije amajambo ari mu gitabu c’itanguriro igice ca 32: 1-2 hamwe no kuva k’umurongo wa 22 gushika ku wa 31, yigishije insiguro y’urugendo rushasha bagiye gutangura aho yababwiye ko urugendo atari urwabo ahubwo ari urw’Imana, aca abasaba ko iminsi bamaze mu masengesho batoyibagira kuko ariho baronkeye ubutunzi bw’Imana. Yaciye abasaba guhagarara mu bihe vy’Imana kugira baronke imihezagiro y’Imana kuko bayironse ishikira n’abenegihugu kandi bose bashikirwa. Ikindi yabamenyesheje n’uko inzira yo kurondera umuhezagiro ari ukumenya ivyiza vy’Imana. Yaheraheje abasaba gusabira ababo n’ivyabo umuhezagiro uzobajabutsa mu mwaka mushasha ngo uzobabere uwa mbere gusumba iyindi myaka yose.    Umuvugabutumwa Mathias Lojas mu nyigisho yatanze, nawe yaramenyesheje ko igihe indongozi zerekanye ko zakoze ibikorwa vyiza hari vyinshi bigaragaza impinduka yabo. Yaciye amenyesha ko ibimugaragaza aca yigana, amera nk’ingazi, atera ubwoba umurwanizi Satani, yongera amenyesha ko mu Banyefeso 4 : 8 havuga ko umurongozi ari ingabire iva ku Mana arico gituma igihe igihugu kiri mu burongozi bw’Imana, abakibamwo baba bahawe ingabire iva mw’ijuru, rero ngo umurongozi Ni ingabire ku Mana no ku gihugu. Ngo umurongozi akomeye mu Mana aja imbere y’abandi akabereka inzira nziza y’ukugororoka, y’ukwera n’iyo gushirwa hejuru. Yishimikije amajambo ari muri Romani 2 : 19, yamenyesheje ko umurongozi ari umuco arico gituma igihe akorera mu muco igihugu kidaheza ngo kije mu mwiza kuko umuco ufise ubushobozi kuruta umwiza. Yarongeye amenyesha kandi ko no muri Romani 2 : 20 havuga ko umurongozi azana ivyamwa vy’umuhanuzi. Yaheraheje abasaba ngo biyerekane nk’indongozi z’ibikorwa vyiza kandi babe akarorero muri vyose. Umuvugabutumwa Paul Bendela Manyenye nawe mu nyigisho yatanze uyo munsi, yishimikije amajambo ari mubanyefeso 4, 26-32 no muri Guharura12, 5-8, yigishije kw’ijambo rivuga ubushobozi bwo guharira. Yababwiye ko nibahariranira Imana izobaharira aca abasaba kuvyigira kuri Yesu we yapfuye kubwabo. Ikindi yamenyesheje n’uko Imana yamweretse ko Umukuru w’igihugu c’Uburundi Petero Nkurunziza afise imbabazi kandi n’igihugu c’Uburundi kizoba akarorero kubera indongozi zashize Imana imbere.  
Abarundi basabwa kwirinda gucokora igihugu cabibarutse kuko igihugu ari inkoramutima
Abarundi basabwa kwirinda gucokora igihugu cabibarutse kuko igihugu ari inkoramutima ku buzima bwabo. Ivyo vyashikirijwe ku muhingamo w’igenekerezo rya 30 Kigarama 2019, n’umukozi w’Imana Laurent Minani arongoye ishengero FECABU ry’i Bujumbura mu nyigisho y’ijambo ry’Imana yatanze ku munsi w’amasengesho yo gushimira Imana. Laurent Minani mu nyigisho ziwe yashimikiye ku majambo ari mu gitabo ca mbere ca Samuel 7 : 14,  afatiye ku majambo ari mu ruririmbo ruhayagiza igihugu c’Uburundi, igihugu kikaba ari  inkoramutima gutyo rero ngo hariho abantu igihugu gikora ku mutima. Niko guca abasaba kwirinda gucokora igihugu kuko bingana no gucokora umuvyeyi yabibarutse, kandi ko Imana idashobora kubakoresha mu gihe batubaha. Yaciye abasaba guhagarara mu mwanya w’Imana kugira bayiheshe icubahiro kandi ngo kubw’ububasha bw’Imana ivyanyazwe vyose bigiye kugaruka maze umugisha wose ugaruke ku Burundi.Mu nyuma y’izo nyigisho, Umukuru w’igihugu c’Uburundi Petero Nkurunziza yarashingiye intahe Imana ku vyiza yakoreye umuryango wiwe no ku gihugu mu mwaka w’2019, ashima Imana ko yamuhaye amagara meza yongera irabazigama mu ngendo bagize zose. Yarashimiye Imana kandi ko yamuzigamiye umuryango bakaba bariko bawuheraheza bashima nk’uko bari barawutanguye. Ngo kubw’imirimo yarangutse mu gihugu naho, ngo mu bisata vyose, mu nzego no mu mashure haranzwe gukora basenyera ku mugozi umwe.   Ikindi naco ngo Imana yahagurukije abarundi guhagararira abarenganijwe, bahagurukira ineza n’iteka ry’Uburundi, yongera itanga intsinzi ku bansi bose ababonetse n’abatabonetse. Yarongeye amenyesha ko ariwe mwaka abarundi bakoreye hamwe mu mashirahamwe no mu makoperative bisigura ko bafise umutima w’urukundo n’uwo gusabikanya. Yarashimiye Imana ko ata biza vyateye ibitungwa n’abarundi n’uko atan’ivyago vyateye Uburundi nk’ibiri mu bindi bihugu, ashima n’uko Imana yatanze ihinguriro rifasha abarimyi umwavu wa kijambere. Ikindi naco ngo Imana yatanze ubwenge n’ubukerebutsi bidasanzwe, yongera irinda Uburundi n’abarundi ibitero vy’iterabwoba. Yaheraheje ashima Imana ko n’iminsi mikuru yose yatunganijwe, haba iy’igihugu n’imiryango  yabaye mu kanyamuneza n’umunezero.
Evelyne Niyonzima

 

Abantu bangana 117863 nibo biyandikishije mw’iyandikwa riheruka ryo kuwa 9 gushika ku va 12 Gitugutu 2019

Umurwi CENI ujejwe gutegura amatora  waratunganije ikiganiro ku bamenyeshamakuru, mu ntumbero yo gushira ahabona ivyavuye mu kwandika  abatari bashoboye kwiyandikisha mw’itora ry’ibwirizwa nshingiro ryo mu mwaka w’ 2018 hamwe n’imanikwa ry’intonde mfatakibanza z’abazotora vyatunganijwe kuva ku wa 9 gushika ku wa 12 kigarama 2019. Ico kiganiro kikaba caremeshejwe n’uwurongoye umurwi CENI Pierre Claver Kazihise ku wa  30 kigarama 2019.Umurwi CENI ujejwe gutegura amatora  waratunganije ikiganiro ku bamenyeshamakuru, mu ntumbero yo gushira ahabona ivyavuye mu kwandika  abatari bashoboye kwiyandikisha mw’itora ry’ibwirizwa nshingiro ryo mu mwaka w’ 2018 hamwe n’imanikwa ry’intonde mfatakibanza z’abazotora vyatunganijwe kuva ku wa 9 gushika ku wa 12 kigarama 2019. Ico kiganiro kikaba caremeshejwe n’uwurongoye umurwi CENI Pierre Claver Kazihise ku wa  30 kigarama 2019.Pierre Claver Kazihise yamenyesheje ko bakurikije ikirangaminsi bari bihaye muri uwo murwi, CENI  yararonse umwanya wo kubimenyekanisha ko abataronse umwanya wo kwiyandikisha mu gihe c’Ibwirizwa Shingiro bogenda bakandikwa .  Muri iryo yandikwa hakaba hiyandikishije  abantu bagera 117.863, abagore 52343 n’ukuvuga  ababa ibice 45 , 41 kw’ijana n’abagabo 65520,baba ibice (56%) , 55 n’uduce 58 kw’ijana.  Abari bamaze kwiyandikisha ni  5000742, abo banditswe bashasha bangana ibice 2 n’uduce 35 kw’ijana.  Ivyibonekeje nuko abiyandikishije benshi bavuye mu ntara zakiriye abatahutse bavuye mu mahanga. Ibibazo vy’ibonekeje muri iryo yandikwa hari abafatanywe amakarata karangamuntu ya magendu, mu ntara ya Karusi hari abagerageje kwiyandikisha kabiri, ng’aho umukuru w’umurwi CENI yaciye abavunira akagohe ko n’uwoba yarabigize azosanga yifutishije kuko babishize mu mashini nyabwonko bizoca vyibonekeza. Pierre Claver Kazihise yarongeye aramenyesha ko  ibitigiri bari biteze vyabonetse kandi ko bagiye kubitosora kugira haboneke ibitigiri ntabanduka vyabazitaba amatora mu mwaka w’2020.Ku vyerekeye imanikwa ry’intonde kugira abanyagihugu basuzume ko amazina yanditswe neza,  batabashizeko kandi bari baranditswe, abataye ikarata y’itora hamwe n’abantu bose bavuye aho bari biyandikishije barondera kwimurirwa aho bari muri kino gihe. Pierre Claver kazihise akaba yamenyesheje ko ico gikorwa cabaye ngirakamaro kuko harashoboye gutunganirizwa abantu bashika 2768 basanze batari ku rutonde bari biyandikishije, harakosorwa  inyandiko z’imyidondoro ku bantu 26011. Harashoboye gufutishwa aboba batagifise uburenganzira bwo gutora, ibitigiri bisa na birebire kuko ni 1727, imbere yo kubihinyuza bazobanza kuraba koko ko ari ivy’ukuri. Abasavye  kwimurirwa ku zindi biro z’amatora ni 63013. Pierre Claver Kazihise yarongeye amenyesha ko hibonekeje mwiyandikiro,  utunenge tumwe tumwe ku mayandikiro amwe amwe, bitakozwe uko bitegerezwa kuko uwushaka kwimurwa yategerezwa ku bisaba aho nyene yipfuza kuzotorera, kuko aba yahinduje  kuko aba atagishika aho yari yiyandikishirije. Ivyo bigasaba ko amakarata amaze gusohoka , abo bantu batashitse iyo bipfuza kwimurirwa, ko bogenda kuraba amakarata yabo aho bari basanzwe bariyandikishije. Pierre Claver kazihise yarakengurukiye  abari basavye kurorera iyandikwa n’imanikwa ry’intonde, imigambwe ishika kuri 15 n’amashirahamwe 29 yashitse ku kivi agakurikirana  ingene ivyo bikorwa bibiri vyariko biragenda. Bose hamwe abarungitse abarorerezi bakaba ari 15491, bakaba barasavye uruhusha umurwi CENI kandi  bararuronswa. Ariko naho biruko hariho imigambwe 2 n’amashirahamwe 3 basavye uruhusha mugabo batagiye kuzitora, bisigura ko bahaye akazi CENI kadakenewe, Igihe bosubira gusaba izindi bazobanza kwerekana neza ko bazikeneye, atari kuza gutesha umwanya n’ugusahura uburyo CENI. Umugambwe umwe ukaba ariwo washoboye gutanga icegeranyo ; amashirahamwe 2 nayone akaba yaragitanze. Pierre Claver kazihise yasozereye amenyesha ko iyandikwa n’imanikwa ry’intonde vyagenze neza mu gihugu cose, ibiharuro vyabonetse ntibiri kure n’ingereranyo bari bafise. Ivyo biharuro mfatakibanza, bategerezwa gutosorwa, bishoboka kugabanuka nk’igihe bosanga abiyandikishije kabiri, canke bakoresheje amakarata atemewe.

Anitha Bizimana

 
Ouvrir