Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abanyagihugu bakwiye kwijukira kuja mu mashirahamwe yo gushumbusha

DSC00604 CopieIkigo ca Reta kijejwe kugenzura uko amashirahamwe yogukinga impanuka no gushumbusha akora « ARCA » caratunganije uruganda mu ntumbero yo guhanahana ivyiyumviro ku buryo ibisata vyo gushumbusha abashikiwe n’impanuka vyotera imbere n’abantu bakabihurumbira. Urwo ruganda rukaba rwabebereye mu nyubakwa y’ubushikiranganji bw’ikigega ca Reta kw’igenekerezo rya 27 Gitugutu 2016. Umwunganirizi w’umushikiranganji bw’ikigega ca Reta, Pierre Sinarinzi yamenyesheje ko ishirahamwe ARCA ryokwubahiriza ibikorwa vya minsi yose n’ishirwa mu ngiro ry’amategeko agenga ico gisata. Yarongeye avuga ko boshikiriza bimwe bimwe biranga amashirahamwe yo gushumbusha muri kino gihe bongere bashikirize na bimwe vyotuma ico gisata gitera imbere. Ntiyibagiye gusaba abakora muri ayo mashirahamwe yo gukinga impanuka kunyarutsa gushumbusha ababituye. Ku ruhande rwiwe, umunyamabanga mukuru w’ikigo ARCA Gervais Ngirirwa, yamenyesheje ko intumbero y’urwo ruganda kwari ukuraba ingene ibintu vyifashe mu bijanye no kwinjiza amafaranga mu gihugu n’ukuntu ivyo bitaba mu bijanye n’amashirahamwe ajejwe gukinga impanuka. Intumbero ya kabiri ngo bashatse guhimiriza abanyagihugu kugirango bijukire igisata co gukinga impanuka kuko mu Burundi bagereranije n’ ibindi bihugu baracari inyuma. Ngo bohimiriza abanyagihugu bakijukira kwinjira muri ayo mashirahamwe kuko akinga impanuka zabo n’iz’ivyo batunze. Intumbero ya gatatu ngo kwari ukugira baronke akaryo ko kumenyesha abanyagihugu ko Reta y’Uburundi yashizeho igisata c’igihugu kijejwe gukingira no gufasha abenegihugu ibijanye no gukinga impanuka muri ico gisata barongoye.Ngo igituma kandi abanyagihugu batabihurumbira ni uko ababituye batabafasha mu kubashumbusha kare, umunyagihugu ugasanga ariko aridoga. Yarongeye aravuga ko muri ARCA bimirije gushiraho inomero itariha mu mwaka uza ku buryo umunyagihugu agize ingorane mw’ishirahamwe kanaka bakamuha impanuro. Yarangije asaba abarongoye ayo mashirahamwe akinga impanuka gushiramwo inguvu kugirango yigishe abanywanyi bayo ingene bokwinjira muri ayo mashirahamwe batarinze kwizana kandi ari igisata kizana iterambere ry’igihugu.

Thérèse Niyonkuru

 

“Inzoga nyinshi ziratuma uwugendana umugera wa SIDA asinzikara”

dsc25Inzoga ngo zirafise ingaruka mbi ku buzima bwa kiremwa muntu , iyo rero bihuriranye n’uko umuntu agendana umugera wa SIDA yaba ari ku miti canke atari ku miti ngo zica zisongera isibe. Ivyo vyamenyeshejwe na muganga Evode Nimbona akora mu bushikiranganji bw’amagara y’abantu mu gisata kijejwe gukinga n’ukuvura ikiza ruhonyanganda SIDA mu kiganiro yahaye ikinyamakuru UBUMWE. Nk’uko yabandanije abimenyesha, ivyo ngo babibonera mu bintu bimwe bimwe umuntu asanga inzoga canke umugera wa SIDA bigira nabi ku mubiri kandi agasanga biwuhuriyeko. Yaciye atanga akarorero k’inzoga zishobora gutuma igitigu c’umuntu gisinzikara. Mu vyigwa vyagizwe navyo ngo birerekana ko n’umugera wa SIDA iyo umuntu awugendanye igihe kirekire cane cane ku bantu baba barwaye indwara y’igitigu bivuye ku nzoga canke bivuye ku yindi migera, ngo basanze umugera wa SIDA ushobora gutuma iyo ndwara itera ikomera ningoga gusumba umuntu atagendana umugera wa SIDA bisigura rero ko inzoga nyinshi zituma igitigu gica gisinzikara ningoga.   Ibindi ngo ni uko inzoga cane cane nk’abazinywa cane bamwe bita «imborerwa » ngo ziratuma abasoda b’umubiri bagabanuka, muri ico gihe ibigabanura abo basoda b’umubiri biba bibaye bibiri inzoga n’umugera wa SIDA.   Ikindi ngo ni uko abagendana uwo mugera, baba abari ku miti canke abatari ku miti badashobora kwimenya neza ku bijanye n’ukuntu bofata imiti bigashika bakibagira kuyifata kubera inzoga banyoye. Ikindi yongeye kumenyesha ngo ni uko bishobora n’ugutuma ubutunzi bw’umuryango bugabanuka kuko mu bagendana umugera wa SIDA hari abataronka inguvu ngo baremerane iyo umubiri uba warasinzikaye bigatuma ata ruhara runini bagira mw’iterambere ry’umuryango kubera baba bakitswe n’amagara. Ikindi yamenyesheje kandi ngo ni uko izo nzoga zishobora gutuma batimenya bagaca baja barakwiragiza wa mugera mu bandi bantu mu guhuza ibitsina badakoresheje agakingirizo. Muganga Evode Nimbona   rero akaba yaciye amenyesha   ko umuntu agendana umugera wa SIDA vyoba vyiza ko yok wirinda inzoga ubutisubirako kuko bigoye kumenya urugero yogezako mu kunywa inzoga kandi imibiri y’abantu ikaba itakira co kimwe ivyo bayiha vyose. Igihe naho abonye bimunaniye ko aziheba ngo yoheza akegera abanonosoye ivy’inyifato bamwe bita «psychologues» bakamuhanura kugirango ashobore kuziheba. Ku bijanye n’umuyabaga hamwe n’uwukuze, ngo bokwifata kumwe ariko ngo ku mwana w’umuyabaga biragoye ngo kuko ataba arashikira kwiyumvira nk’umuntu akuze mu gutandukanya icatsi n’ururo kandi ngo ntaba aramenyera inyifato yogira mu kibano. Iyo miyabaga rero ngo ntiba iramenya ivy’ubuzima ari co gituma kenshi abakiri bato bajana n’ibisayangana za nzoga bazinyoye zigaca zibasinzikaza cane ku bijanye n’imibereho yabo gusumba iy’ abakuze. Impanuro muganga Evode Nimbona atanga ngo ni uko abakiri bato bogendera mu mirwi yiyubara kunywa inzoga, hanyuma aho kugendera mu bunywero bakaraba ibindi bibanza bashobora kugenderamwo bibatuma bataronka akanya ko guhura n’izo nzoga.

Christine Manirambona

 

 

Ijambo ryashikirijwe n’Umukuru w’Igihugu c’Uburundi inyuma y’igandagurwa rya Jenerari Athanase Kararuza

 

DSC 1586Ku mugoroba w’igenekerezo rya 25 Ndamukiza 2016, Umukuru w’Igihugu Petero NKURUNZIZA yarashikirije ijambo ryo guhoza umuryango wa Jenerari Athanase Kararuza n’intwaramiheto yagandaguwe n’umupfasoni wiwe mu gitondo c’uwo munsi n’abansi b’igihugu.Twobamenyesha ariko ko n’ikibondo cabo barikumwe yari yakomeretse cane yahavuye nawe nyene yitaba Imana ku wa 28 Ndamukiza 2016.

Ido n’ido ry’iryo ryajambo :

 

Barundi, Barundikazi,

Uno munsi, igenekerezo rya 25 Ndamukiza 2016, wabaye umunsi w’amarira n’amaganya ku muryango w’intwazangabo Jenerari Athanase Kararuza, ku nzego zo kwivuna abansi no ku barundi bose. Hakiri kare, aho intwazangabo Kararuza yariko ashikana ikibondo ciwe kw’ishure, akarwi k’inkozi z’ikibi kihaye inkumbi mu kumugandagura bunyamaswa, kamugandagurana n’abo bari kumwe mu muduga, harimwo n’umutambukanyi wiwe.

Imbere ya vyose dusavye Imana Mushobora vyose imwakire mu bwami bwayo, yongere ifashe umuryango wiwe, incuti ziwe, mbere n’abarundi bose. Turahojeje umuryango wiwe, turahojeje kandi inzego z’igisirikare, z‘igiporisi n’igendereza bari basanzwe bakorana bafatanye munda hamwe n’abo bahora bakorana mu biro vy’Icegera ca mbere c’Umukuru w’igihugu.

Uburundi burabuze intwari, umugabo w’ijunja n’ijambo, intwazangabo yateye iteka Uburundi n’abarundi haba mu gihugu canke mu makungu, aho yabaye n’icegera c’uwutwara Ingabo za MISCA, mu gihugu ca Centrafrique. Bitayeko Yararwanije yivuye inyuma abashatse gutembagaza inzego zitorewe n’abanyagihugu mu mwaka uheze, yongera arafasha bimwe bidasanzwe kubungabunga amahoro n’umutekano mu gihe c’amatora n’inyuma y’aho.Turamusabiye ku Mana Mushoboravyose imwakire mu bwami bwayo, yongere ihe umutima wo kwihangana no kwigumya umuryango wiwe, tutibagiye incuti, abagenzi n’abakunzi biwe aho bari hose.

Turasaba dushimitse, twicishije bugufi, ko Imana yotuja imbere, kugira abakoze ako kabi kabishe batabwe muri yompi, bongere bahanwe mu maguru masha, hakurikijwe amategeko.

Barundi, Barundikazi,

Dusavye inzego z’umutekano ko mu kiringo kitarenze indwi imwe gusa abo babisha boba bamenyekanye, bafatwe kandi barengutswe imbere y’ubutungane.

Ibi bibaye uno munsi, ejo hahise hatewe iyindi ntwazangabo, mbere no mu ndwi yahera ako karwi k’ababisha bihaye inganda mu kwica abantu kabaziza amabanga bafise mu nzego zijejwe kwivuna abansi canke guhagararira umutekano w’abarundi n’igihugu, ndetse n’abenegihugu aho bakorera nko mw’isoko no mu bunywero. Ntaho bataniye n’abakora ububisha bw’iterabwoba.

Turasavye abarundi ngo bame barikanuye, babandanye bakomeza ya makomite y’umutekano ahurikiwemwo na bose, kugira ababisha bafise iyo migambi iburizwemwo kandi bafatwe bahanwe batarakora ibara. Igihambaye dusaba abarundi iyo bava bakagera, ni uko bokwama bagendera ubwitonzi, ubwira n’ubumwe vyaranze Jenerari Kararuza Athanase, ntibagwe mu mutego w’abo babisha, nyabuna tugire urunani rw’intamenwa dutuze utwo turwi tw’iterabwoba.

Mu kurangiza, twibukanye amajambo akomeye ari mu ruririmbo ruhayagiza igihugu cacu avuga ngo “Imana yakuduhaye ikudutungire“. Turasabiye umwana yazize ubusa agakomeretswa n’ivyo bisasu vyatewe umuduga warimwo abavyeyi biwe ko Imana yomufasha ikarokora ubuzima bwiwe.

Tuboneyeho n’akaryo ko kuremesha abarundi bose muri rusangi ko nk’uko utundi turwi tw’inkorabara twasambuwe, n’aba baduhekuye bagiye kuja ahabona, bateshwe kandi bafatwe, bahanwe hakurikijwe amategeko.

Imana ihangaze Uburundi

n’abarundi

Murakoze

 

Umwimbu w’umuyagankuba ngo woba ugiye kwiyongera mu mwaka w’2016

DSC 0075Muri rusangi ingomero z’ umuyagankuba ngo zifashe neza muri iki gihe imvura igwa ari nyinshi, akaba ari naco gituma umwimbu w’umuyagankuba ugiye kwongerekana. Ivyo vyashikirijwe na Wilson Itangishaka ajejwe igisata c’umuyagankuba mw’ishirahamwe rijejwe gutanga amazi n’umuyagankuba Regideso mu kiganiro yahaye ikinyamakuru UBUMWE.

Yamenyesheje ko muri kino gihe ingomero zimwe zimwe z’umuyagankuba zifashe neza izindi nazo zifise utugorane duto duto bifatiye ku vyuma vya kera bishaje. Ngo bimwe bimwe birakenewe gusanurwa no gusubirizwa. Wilson Itangishaka yarongeye amenyesha ko imvura ibandanije igwa nk’uko biri   ubu, ingomero zizoba zifise amazi akwiye, ivyo bikazotuma hakaboneka umuyagankuba ukwiye nk’uko bari babitegekanije bakizubaka. Ariko rero ngo ikizobatwara uburyo muri kino gihe c’imvura nyinshi ngo ni uko ibishanga biba vyinshi cane muri izo ngomero uwutabizi akibaza ko ari amazi menshi kandi atari vyo. Yabandanije amenyesha ko mw’ itangwa ry’umuyagankuba naho hariho abo bidashimisha ,ngo biterwa n’uko umuyagankuba uba ari muke. Ivyo navyo ngo baravye urugomero rwa nyuma rwubatswe mu 1988 gushika ubu akaba ata rundi rurubakwa,ngo kandi ibisagara vyagiye biraguka,amashirahamwe akaba menshi i Bujumbura canke mu gihugu hagati, ngo ntacari categekanijwe kugira umwimbu w’umuyagankuba wongerezwe.Ico bivako rero ngo ni uko abashaka amatara baguma ari benshi kandi ata kindi bategekanije kugira umwimbu wongerekane.

Ariko rero ngo mu gisagara ca Bujumbura umwimbu umaze kurwizwa na 3 ngo ariko nko mu ntara za Ngozi,Gitega na Ruyigi ibisagara vyaragutse n’amahinguriro nayo nyene yarongerejwe. Ngo nico gituma bagerageza gusabikanya umwimbu baba bafise.Yamenyesheje ko naho umwimbu wokwongerekana, ivyo bizokwamaho kuko ivyuma bishaje kandi bitegerezwa gusubirizwa, ariko ngo mu migambi bafise mu mwaka w’2016 ngo ni uko bazokora igishoboka cose kugira barwize umwimbu w’umuyagankuba banezereze abanywanyi.

Evelyne Niyonzima

 

Umwimbu w’umuyagankuba ngo woba ugiye kwiyongera mu mwaka w’2016

DSC 0075Muri rusangi ingomero z’ umuyagankuba ngo zifashe neza muri iki gihe imvura igwa ari nyinshi, akaba ari naco gituma umwimbu w’umuyagankuba ugiye kwongerekana. Ivyo vyashikirijwe na Wilson Itangishaka ajejwe igisata c’umuyagankuba mw’ishirahamwe rijejwe gutanga amazi n’umuyagankuba Regideso mu kiganiro yahaye ikinyamakuru UBUMWE.

Yamenyesheje ko muri kino gihe ingomero zimwe zimwe z’umuyagankuba zifashe neza izindi nazo zifise utugorane duto duto bifatiye ku vyuma vya kera bishaje. Ngo bimwe bimwe birakenewe gusanurwa no gusubirizwa. Wilson Itangishaka yarongeye amenyesha ko imvura ibandanije igwa nk’uko biri   ubu, ingomero zizoba zifise amazi akwiye, ivyo bikazotuma hakaboneka umuyagankuba ukwiye nk’uko bari babitegekanije bakizubaka. Ariko rero ngo ikizobatwara uburyo muri kino gihe c’imvura nyinshi ngo ni uko ibishanga biba vyinshi cane muri izo ngomero uwutabizi akibaza ko ari amazi menshi kandi atari vyo. Yabandanije amenyesha ko mw’ itangwa ry’umuyagankuba naho hariho abo bidashimisha ,ngo biterwa n’uko umuyagankuba uba ari muke. Ivyo navyo ngo baravye urugomero rwa nyuma rwubatswe mu 1988 gushika ubu akaba ata rundi rurubakwa,ngo kandi ibisagara vyagiye biraguka,amashirahamwe akaba menshi i Bujumbura canke mu gihugu hagati, ngo ntacari categekanijwe kugira umwimbu w’umuyagankuba wongerezwe.Ico bivako rero ngo ni uko abashaka amatara baguma ari benshi kandi ata kindi bategekanije kugira umwimbu wongerekane.

Ariko rero ngo mu gisagara ca Bujumbura umwimbu umaze kurwizwa na 3 ngo ariko nko mu ntara za Ngozi,Gitega na Ruyigi ibisagara vyaragutse n’amahinguriro nayo nyene yarongerejwe. Ngo nico gituma bagerageza gusabikanya umwimbu baba bafise.Yamenyesheje ko naho umwimbu wokwongerekana, ivyo bizokwamaho kuko ivyuma bishaje kandi bitegerezwa gusubirizwa, ariko ngo mu migambi bafise mu mwaka w’2016 ngo ni uko bazokora igishoboka cose kugira barwize umwimbu w’umuyagankuba banezereze abanywanyi.

Evelyne Niyonzima

 

Mu mafaranga Reta izokoresha mu 2016 hashizwe imbere ibisata vy’imibano n’ibituma amafaranga yinjira mu Gihugu

DSC 0872Ngo naho amafaranga Reta izokoresha uwu mwaka w’ 2016 yagabanutse ku rugero rw’ amafaranga y’amarundi angana imiriyaridi 1300 ku yari yarateguwe gukoreshwa mu 2015, amafaranga azoja mu gisata c’imibano ntiyagabanutse cane, hagiye harakurwako amafaranga make make. Ivyo vyamenyeshejwe n’umuvugizi w’ubushikiranganji w’ikigega ca Reta, Désiré Musharitse mu kiganiro yahaye ikinyamakuru UBUMWE.Yabandanije amenyesha ko hariho umwizero ko abadufasha bazohava hagira ico bafasha mu gihe hari abemeye gufasha mu bisata bimwe bimwe nko mu gisata c’amagara y’abantu babicishije mu mashirahamwe atandukanye. Ngo Muri ayo mafaranga Reta izokoresha bashize imbere ibisata vy’imibano n’ibisata bituma amafaranga yinjira mu kigega ca Reta, aho twovuga nko mu gisata c’ amagara y’abantu, indero, uburimyi n’igisata c’umuyagankuba aho Reta yategekanije amafaranga azogura igitoro kizoja mu mamoteri yatsa umuyagankuba mw’ishirahamwe ritanga amatara n’amazi REGIDESO mu gihe c’ici, amazi yagabanutse mu rugomero rwo mu Rwegura. Musharitse yamenyesheje ko muri kwa Mukakaro 2016 hazoba isubirwamwo ry’amafaranga Reta izokoresha. Ngo birashoboka ko Reta izoduza amafaranga izokoresha.Yabandanije amenyesha ko mu mwaka w’2015, abanyabujumbura bamaze amezi ashika 4 badakora kubera imyiyerekano, ikigo kijejwe gutororokanya no kwegeranya amakori OBR carashoboye gutoza amafaranga angana amamiriyaridi 600. Ngo kuri ivyo hariho umwizero ko amafaranga angana imiriyaridi 630 Reta yasavye ikigo OBR azoboneka kubera ubu abadandaza basubiriye gukora.

Ku vyerekeye ingingo yo kutaronka uturusho tujanye n’amanota umukozi ahabwa uko umwaka utashe, ngo abahinga barabonye neza ko abakozi vyitwa ko bahembwa menshi bamaze imyaka 4 bataronka utwo turusho, iyo myaka yohera poritike yo kunganisha imishahara yagiye mu ngiro. Abakozi barenga 90% bazoduzwa imishahara mu kiringo c’imyaka 4.

Aline Kanyana

 
Ouvrir