Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Mu Nama Nkenguzamateka : Abacamanza bagiye kurongora inzego zitandukanye zo mu rwego rw’ubucamanza baremejwe n’Inama Nkenguzamateka

DSC 0421Ku wa 28 Kigarama 2017, Inama Nkenguzamateka y’Uburundi yaremeje ku bice 97% amazina atanu y’abacamanza yarungitswe n’inama nkuru y’abacamanza kugira barongore inzego zimwe zimwe zo mu rwego rw’abacamanza, babatu muri batowe ku majwi 38 kuri 38 , abandi babiri nabo batowe ku majwi 37 kuri 38. Icatumye ayo mazina arungikwa n’inama nkuru y’abacamanza, ngo n’uko hariho abagiye batakiri mu mabanga yabo, vyari ngombwa ko basubirizwa. Ivyo ni ivyashikirijwe n’umushikiranganji w’ubutungane, Aimée Laurentine Kanyana, aho yariko aratanga umwidondoro w’abo batowe kugira barongore izo nzego zitandukanye. Ivyo bikorwa vy’Inama Nkenguzamateka, vyari birongowe n’umukuru w’urwo rwego, Réverien Ndikuriyo bikaba vyari vyitabwe n’abakenguzamateka 38, ni ukuvuga abakenguzamateka 33 bari bitavye ivyo bikorwa hamwe na 5 bari batumye. Ku wa 28 Kigarama 2017, Inama Nkenguzamateka y’Uburundi yaremeje ku bice 97% amazina atanu y’abacamanza yarungitswe n’inama nkuru y’abacamanza kugira barongore inzego zimwe zimwe zo mu rwego rw’abacamanza, babatu muri batowe ku majwi 38 kuri 38 , abandi babiri nabo batowe ku majwi 37 kuri 38. Icatumye ayo mazina arungikwa n’inama nkuru y’abacamanza, ngo n’uko hariho abagiye batakiri mu mabanga yabo, vyari ngombwa ko basubirizwa. Ivyo ni ivyashikirijwe n’umushikiranganji w’ubutungane, Aimée Laurentine Kanyana, aho yariko aratanga umwidondoro w’abo batowe kugira barongore izo nzego zitandukanye. Ivyo bikorwa vy’Inama Nkenguzamateka, vyari birongowe n’umukuru w’urwo rwego, Réverien Ndikuriyo bikaba vyari vyitabwe n’abakenguzamateka 38, ni ukuvuga abakenguzamateka 33 bari bitavye ivyo bikorwa hamwe na 5 bari batumye. Hisunzwe ingingo y’187 y’ibwirizwa nshingiro ry’Uburundi, Inama Nkenguzamateka y’Uburundi yararungikiwe amazina atanu y’abacamanza bagiye kurongora inzego zitandukanye zo mu rwego rw’ubucamanza kugira iyemeze. Nk’uko umushikiranganji w’ubutungane,  yatanguye abishikiriza ariko atanga umwidondoro w’abo bacamanza, ngo ayo mazina yarungitswe kugira basubire abandi batakiri mu mabanga yabo. Mu ntumbero yo kwubahiriza ibitigiri vy’ubwoko n’intara, muri abo batanu, harimwo abahutu batatu n’abatutsi babiri.Josiane Uwimana yahora ari umucamanza wo muri sentare y’iyungururizo ry’imanza y’i Bujumbura, agiye gukorera muri parake nkuru y’igihugu asubiriye Nzigamasabo Léa Pascasie yashinzwe amabanga yo kuba icegera c’uwurongoye sentare ijejwe kurwanya igiturire. Josiane Uwimana, ni umuhutukazi wo mu ntara ya Muyinga. Laurent Havyarimana yahora ari icegera c’umukuru wa sentare y’iyungururizo y’i Bujumbura, agiye kuba umushikirizamanza muri parake nkuru y’igihugu, ni umuhutu wo mu ntara ya Bururi. Aristide Nsengiyumva yahora ari umushikirizamanza muri parake nkuru y’igihugu yashinzwe amabanga yo kurongora parake nkuru ikukira sentare isubiramwo ya Bujumbura, ni umututsi, wo mu ntara ya Bururi. Déo Niragira, yahora ari umucamanza muri sentare isubiramwo imanza agiye gukorera muri sentare ntahinyuzwa, ni umututsi wo mu ntara ya Muramvya. Eliezer Niragira, yahora ari umucamanza muri sentare isubiramwo mu ntara ya Bururi, agiye kurongora sentare nkuru y’igihugu yo mu ntara ya Rumonge, ni umuhutu wo mu ntara ya Rumonge.Tubamenyeshe ko iryo yemezwa ryayo mazina atanu, ryatangujwe no kwemeza urutonde rw’ibikorwa Inama Nkenguzamateka izokorerako mu ndwi yose.                                                                                              Déo Misigaro

 

 

Mu makomine ya Buraza na Bukirasazi Abanyagihugu basabwa kubana mu bigwati, biteze imbere bari hamwe

DADA CopieKu magenekerezo ya 23 na 25 Kigarama 2017, icegera ca mbere c’Umukuru w’igihugu, Gaston Sindimwo yaragize urugendo rwamushikanye mu makomine  ya Buraza na Bukirasazi, mu ntara ya Gitega mu ntumbero yo gusanga abanyagihugu ku kivi no kuganira nabo ibijanye n’ubuzima bw’igihugu harimwo n’impinyaruro y’Ibwirizwa Shingiro no kubashikiriza akaganuke ka Noweri yarungikanywe n’Umukuru w’igihugu Petero NKURUNZIZA.Ku magenekerezo ya 23 na 25 Kigarama 2017, icegera ca mbere c’Umukuru w’igihugu, Gaston Sindimwo yaragize urugendo rwamushikanye mu makomine  ya Buraza na Bukirasazi, mu ntara ya Gitega mu ntumbero yo gusanga abanyagihugu ku kivi no kuganira nabo ibijanye n’ubuzima bw’igihugu harimwo n’impinyaruro y’Ibwirizwa Shingiro no kubashikiriza akaganuke ka Noweri yarungikanywe n’Umukuru w’igihugu Petero NKURUNZIZA.


Komine Buraza
Kw’igenekerezo rya 23 Kigarama rero, Gaston Sindimwo yaragendeye komine Buraza, aho yifatanije n’abanyagihugu mu bikorwa vy’iterambere,aho bariko baraseha amabuye yo kwubaka ibibuga vyo gukinirako umupira w’amaboko bita  volleyball na basketball.Avuye ngaho yaciye aja kwugurura ishure shingiro ryo muri iyo komine Buraza nyene ku musozi Gicumbi, ryavuye mu nguvu z’abanyagihugu. Iryo shuri shingiro rikaba rigizwe n’ibirasi 6 hamwe n’inzu izokoreramwo abayirongoye. Gaston Sindimwo avuye i Gicumbi yaciye agenda kurorera umupira w’amaguru w’abereye ku kibuga c’umupira w’amaguru  co ngaho ku murwa mukuru wa komine Buraza. Urwo rukino rukaba rwahuza abasigaye mu mitumba ihanamiye komine Buraza n’ababa mw’inkambi y’abateshejwe izabo muri komine Buraza.Ng’uwo mupira w’amaguru watunganijwe mu ntumbero yo guhuza abo banyagihugu bo muri iyo komine ya Buraza na cane cane urwaruka. Uwo mupira w’amaguru ukaba waranzwe n’ubukerebutsi bw’urwo rwaruka ukaba warubereye ijisho, bariko barakina ukabona ko bahana umupiraneza kandi ko boba bafise kazoza keza mu mupira w’amaguru baronse uwuguma abakurikirana.Urwo rukino rukaba rwarangiye ku bitsindo 3 vy’abagumye ku mitumba na 2 vy’ababa mw’inkambi y’impunzi. Urwo rukino rurangiye,Gaston Sindimwo yaciye ashikiriza ijambo abari ngaho, agashima urwo rukino, akongera agahanura abo banyagihugu ko icitwa ikambi y’impunzi cohava kuko ngo ntawushobora kumara imyaka 24 yitwa impunzi kandi ari mu gihugu c’amavukiro kuko bituma asegerereza ntategure kazoza kiwe neza. Akaba yaciye abasaba ko bari kumwe n’ababarongoye bohita ibirwati vy’amahoro kandi bikabamwo ubwoko bwose bagafashanya mu kubumbatira amahoro no mu bikorwa vy’iterambere. Gaston Sindimwo yarahaye agakemanyi abanyagihugu ba ntahonikora bo muri komine Buraza kari kagizwe n’umuceri w’ababa amatoni 4 wasabikanijwe hagati y’abasigaye ku mitumba n’abari mu makambi y’impunzi. Aho yaciye abamenyesha ko Reta y’Uburundi yabahaye ako gafashanyo kugira ibipfurize Noweri nziza hamwe n’umwaka mwiza w’2018 kandi baronke ico bafungura muri iyo minsi mikuru, arongera abasaba gusabikanya n’abandi bataravye ubwoko bwabo canke imigambwe baturukamwo. Yarongeye araronsa imirwi yari yakinye imipira umwe umwe kumurwi ngo bashobore kw’imenyereza neza atakibazo c’umupira bafise. Icegera ca mbere c’Umukuru w’igihugu yarangije urugendo rwiwe muri komine Buraza agiranira ikiganiro n’abaserukiye abandi ku mitumba yose igize komine Buraza. Gaston Sindimwo  yarabamenyesheje ko yaje muri iyo komine bayage kuri kahise keza bakubakireko, kahise kabi nako kababere icigwa bagasezerere ntibize bisubire kuvugwa mu gihugu c’Uburundi.Yabatumiriye kurangwa n’urukundo aho babaye ntibarabe ubwoko canke imigambwe baturukamwo, ahubwo ko bokwama bumva ko ari bene mugabo umwe basangiye igihugu c’Uburundi. Yarongeye arabatumirira gutora ibwirizwa shingiro kuko ibirimwo batosoye ari vyiza kandi vyatosowe nabo bitoreye. Aho yarabamenyesheje ibiri muvyo batosoye nko kukiringo c’Umukuru w’igihugu cova kumyaka 5 kikaja kumyaka 7; ic’Inama Nshingamateka kikaguma ku myaka 5, hakaba Icegera mbere c’Umukuru w’igihugu kimwe, hagaca haba Umushikiranganji wa mbere, ko Umukuru w’igihugu yotorwa ku biringo bibiri hanyuma ntasubire kwitoza, ni ukuvuga imyaka 14. Mu gisirikare ubwoko bukangana kuvuga ku bice 50 kw’ijana ku bwoko bwose, Inama Nshingamateka ku bice 60 kw’ijana vy’abahutu na 40 kw’ijana vyabatutsi; mu butungane bikaba ibice  60 kw’ijana vy’abahutu na 40 kw’ijana vy’abatutsi. Abo baserukiye abandi baciye babaza ibibazo barabiye aho batumbereye nk’ikibazo c’amasoko, amabarabara atuma ibidandazwa bitagenda neza aho bashaka ko bishika. Kuri ivyo bibazo vyose arahaya inyishu ishimishije.
Komine Bukirasazi

Icegera ca mbere c’Umukuru w’igihugu, Gaston Sindimwo mu rugendo rwamushikanye mu ntara ya Gitega, kw’igenekerezo rya 25 kigarama 2017,  yarifatanije n’abakristo bo mw’ishengero rya «Méthodiste Libre» ryo ku mutumba Rukoki zone Kangozi, komine Bukirasazi, mu masengesho yo guhimbaza umusi mukuru wa Noweri.Mw’ijambo yashikirije abakristo bari ngaho yarabamenyesheje ko Noweri ari umuco aca abifuriza ko uwo muco woshwara abanyagihugu bo ku mutumba  Rukoki bose no muri komine Bukirasazi yose.Gaston Sindimwo akaba rero yabanje gushimira Imana  yo yabashikanye kuri uwo munsi mukuru wa Noweri ari bazima, aca arabashikiriza indamutso yarungikanywe n’Umukuru w’igihugu, Petero Nkurunziza, aho yabifurije Noweri nziza n’umwaka mushasha mwiza w’2018, yongera anabashikiriza n’agakemanyi kagizwe n’umuceri, Prezida NKURUNZIZA yari yamurungikanye kugira bahimbaze neza Noweri ; aca abasaba gusabikanya n’ababanyi bose ataco baronse kugira bahimbaze uwo munsi mukuru wa Noweri , gutyo bagaragaze urukundo kuko ari rwo bahamagariwe kugira nk’abakristu. Gaston Sindimwo yarongeye abamenyesha ko mu vyo boshimira Imana harimwo ko igihugu  cose kirimwo amahoro, aca abatumirira kuyabumbatira mu kuba abaremesha amahoro mu bikorwa vyabo vyose no mu mibano yabo yose. Yaciye abasaba kubumbwa n’ivyo Imana yabahezagije kuko biba bibakwiye, bakongera bakarandurana n’imizi ishari n’inzigo, ko bosabikanya ivyo bafise kuko arico cerekana urukundo, bagasabikanya bataravye amadini bavamwo hamwe n’imigambwe. Yaciye asaba indongozi gusubiza abazimiye mu ruhongore kugira inzamba ivuze baze bagendere rimwe ntihagire uwuzosigara inyuma no kwakira abahunguka mu rukundo n’umuvukano. Gaston sindimwo  Yarangije akenguruka ingabire y’ishashi y’inka bamuhaye bise Yarukundo, nawe abemerera ko nawe muvyo Imana izomuhezagiza azobashigikira mu kubandanya igikorwa co kwubaka urushengero rwabo, mu kwongereza imifuko y’isima yari yarabahaye mbere kugira ingoro y’Imana nayo isayangane. 
Anitha Bizimana (Uwimenyereza) 

 

 

Inama Nkenguzamateka yarasozereye ibikorwa vyo mu kwezi kwa Gitugutu 2017

IMG 20180101 121543Kw’igenekerezo rya 29 Kigarama 2017 Inama Nkenguzamateka yarasozereye ibikorwa vy’isasa risanzwe rya Gitugutu 2017. Umukuru w’Inama Nkenguzamateka, Révérien Ndikuriyo yamenyesheje ko Imana Nkenguzamateka yaranguye ibikorwa bitari bike muri kino kiringo c’amezi atatu aheze mu bisata vyose nkuko bitegekanijwe n’Ibwirizwa Shingiro rya Republika y’Uburundi. Ngo mw’isasa rya Gitugutu 2017, Reta yarungitse integuro z’amabwirizwa 19 ariko Inama Nkenguzamateka yarashoboye kwiga no kwemeza integuro z’amabwirizwa 11, aho twovuga integuro ry’ibwirizwa risubiramwo igitabu c’amategeko agenga amasoko ya Reta co ku wa 4 Ruhuhuma 2008, integuro y’ibwirizwa rigenga amafaranga Reta izokoresha mu mwaka wa 2018, integuro y’ibwirizwa rigenga abagendana ubumuga n’integuro y’ibwirizwa rigenga imirimo y’urwego rujejwe kugenzura ingene ibimenyeshamakuru bikora. Ndikuriyo yamenyesheje ko abakenguzamateka bagendeye bongera barifadikanya n’abanyagihugu mu kurangura bikorwa vy’iterambere. Kubijanye no gukomeza imigenderanire hagati y’Inama Nkenguzamateka hamwe n’amashirahamwe mpuzamakungu be n’izindi Nama Nkenguzamateka, Ndikuriyo yamenyesheje ko yitavye inama ku butumire bw’indongozi n’abategetsi b’igihugu ca koreya Y’epfo kugira arahure ubwenge bwotuma igihugu citeza imbere. Umukuru w’Inama Nkenguzamateka arashima kubona Reta yarumvise akamo k’abanyagihugu bari basavye ko ibwirizwa shingiro ry’Uburundi ryohinyanyurwa. Umukuru w’Inama Nkenguzamateka arashima kandi ko Reta y’Uburundi ko yafashe nka nkama umwitwarariko w’abanyagihugu wo gutunganya ingene intererano y’amatora yokwegeranywa. Ngo nubwo hari abafise umutima wo gukunda igihugu, haracariho abantu birirwa baranegura igikorwa co guterera amatora. Kurivyo, Ndikuriyo yaribukije ko amahera yose ibihugu vyahora bitanga mu gihe c’amatora ava mu makori atangwa n’abanyagihugu b’ivyo bihugu arico gituma bikwiye ko abarundi bokwikora ku makori batanga bakitunganiriza amatora. Umukuru w’Inama Nkenguzamateka yaboneyeho akaryo ko kurarika abo bose babishoboye guterera  amatora, yongera ararika kandi abahora bafasha Uburundi mu mirimo itandukanye harimwo n’uwo gutunganya amatora ko bokunganira abarundi mu gikorwa gishimishije co kwitunganiriza amatora.Kw’igenekerezo rya 29 Kigarama 2017 Inama Nkenguzamateka yarasozereye ibikorwa vy’isasa risanzwe rya Gitugutu 2017. Umukuru w’Inama Nkenguzamateka, Révérien Ndikuriyo yamenyesheje ko Imana Nkenguzamateka yaranguye ibikorwa bitari bike muri kino kiringo c’amezi atatu aheze mu bisata vyose nkuko bitegekanijwe n’Ibwirizwa Shingiro rya Republika y’Uburundi. Ngo mw’isasa rya Gitugutu 2017, Reta yarungitse integuro z’amabwirizwa 19 ariko Inama Nkenguzamateka yarashoboye kwiga no kwemeza integuro z’amabwirizwa 11, aho twovuga integuro ry’ibwirizwa risubiramwo igitabu c’amategeko agenga amasoko ya Reta co ku wa 4 Ruhuhuma 2008, integuro y’ibwirizwa rigenga amafaranga Reta izokoresha mu mwaka wa 2018, integuro y’ibwirizwa rigenga abagendana ubumuga n’integuro y’ibwirizwa rigenga imirimo y’urwego rujejwe kugenzura ingene ibimenyeshamakuru bikora. Ndikuriyo yamenyesheje ko abakenguzamateka bagendeye bongera barifadikanya n’abanyagihugu mu kurangura bikorwa vy’iterambere. Kubijanye no gukomeza imigenderanire hagati y’Inama Nkenguzamateka hamwe n’amashirahamwe mpuzamakungu be n’izindi Nama Nkenguzamateka, Ndikuriyo yamenyesheje ko yitavye inama ku butumire bw’indongozi n’abategetsi b’igihugu ca koreya Y’epfo kugira arahure ubwenge bwotuma igihugu citeza imbere. Umukuru w’Inama Nkenguzamateka arashima kubona Reta yarumvise akamo k’abanyagihugu bari basavye ko ibwirizwa shingiro ry’Uburundi ryohinyanyurwa. Umukuru w’Inama Nkenguzamateka arashima kandi ko Reta y’Uburundi ko yafashe nka nkama umwitwarariko w’abanyagihugu wo gutunganya ingene intererano y’amatora yokwegeranywa. Ngo nubwo hari abafise umutima wo gukunda igihugu, haracariho abantu birirwa baranegura igikorwa co guterera amatora. Kurivyo, Ndikuriyo yaribukije ko amahera yose ibihugu vyahora bitanga mu gihe c’amatora ava mu makori atangwa n’abanyagihugu b’ivyo bihugu arico gituma bikwiye ko abarundi bokwikora ku makori batanga bakitunganiriza amatora. Umukuru w’Inama Nkenguzamateka yaboneyeho akaryo ko kurarika abo bose babishoboye guterera  amatora, yongera ararika kandi abahora bafasha Uburundi mu mirimo itandukanye harimwo n’uwo gutunganya amatora ko bokunganira abarundi mu gikorwa gishimishije co kwitunganiriza amatora.

Aline Kanyana

 

 

Abagiye gutunganya amatora ku rwego rw’intara barashikirije indahiro ibinjiza muri ayo mabanga

DCDSSSSC 1292Mu ntumbero yo kwitegurira amatora yo kwemeza Ibwirizwa Shingiro ryo mu 2018 , abagize imirwi y’intara yigenga ijejwe gutunganya amatora CEPI bararahiye ku wa 29 Kigarama 2017. Ibirori vy’uwo munsi bikaba vyabereye mw’ihoteri La Detente yo mu gisagara ca Bujumbura, bihagarikiwe n’abagize umurwi w’igihugu wigenga ujejwe gutunganya amatora CENI barongowe na Pierre Claver Ndayicariye asanzwe ari n’umukuru w’uwo murwi.Mu ntumbero yo kwitegurira amatora yo kwemeza Ibwirizwa Shingiro ryo mu 2018 , abagize imirwi y’intara yigenga ijejwe gutunganya amatora CEPI bararahiye ku wa 29 Kigarama 2017.Ibirori vy’uwo munsi bikaba vyabereye mw’ihoteri La Detente yo mu gisagara ca Bujumbura, bihagarikiwe n’abagize umurwi w’igihugu wigenga ujejwe gutunganya amatora CENI barongowe na Pierre Claver Ndayicariye asanzwe ari n’umukuru w’uwo murwi. Abatowe barahira bavuga bati : « Jewe naka, ndarahiye ko nzokwitwararika n’umutima wanje wose kandi ataho mpengamiye igikorwa co gucungera  ko amatora agenda neza no guharura amajwi nk’uko ari». Ivyo birori bikaba vyari vyitabwe n’abashingamateka n’abakenguzamateka batandukanye, abaserukira imigambwe,abaserukira ubushikiranganji bumwe bumwe busanzwe bufasha mu bikorwa vyo gutegura  no gutunganya amatora,abaserukira amashengero n’amadini, abaserukira amashirahamwe adaharanira ivyicaro vya poritike n’abandi.Mw’ijambo ry’ikaze, Pierre Claver Ndayicariye yamenyesheje ko urubanza rw’uwo munsi  ari urwo kurahiza abatowe mu ntara bagiye kwinjira mu mirwi y’intara yigenga ijejwe gutunganya amatora CEPI. Ni urubanza kandi rwo gutanguza  icese ibikorwa vy’abo bagiye kurahira. Abo nabo ngo bajejwe amabanga yo kuringaniza amatora ku rwego rw’intara ariko bakitwa ko baserukira umurwi CENI  bakawubera ugutwi n’ijisho mu ntara. Nibo kandi bajejwe gushinga ya mirwi yo mu makomine ijejwe gutunganya amatora bita CECI. Pierre Claver yamenyesheje ko muri  abo batowe harimwo abatanzwe n’imigambwe, abo nabo akabasaba ko ivyegeranyo vy’ivyo bazorangura bazobishikiriza umurwi CENI batobishikiriza imigambwe cane ababarungitse. Ngo kuva bagiheza kurahira haba ubwoko,igitsina n’idini vyabo bicitse CENI ngo kandi uwuvyumva uko azotunganya neza amatora adakebaguzwa. Yarabasavye kandi kuba abashingantahe n’abapfasoni bagendera ibanga n’ijambo, bafata kumwe abantu bose. Yongeye abasaba ko bagerageze gukoresha ubwenge n’ubukerebutsi Imana yabahaye. Yabahamagariye gushiramwo ishaka mu gikorwa bagiye kurangura kuko ngo n’umurimo usaba kwitanga, akabamenyesha ko umushahara bazoronka utangana n’ivyo bazokora.Ngo ni igikorwa c’igihugu kandi bagikoze neza kizovyara ivyamwa vyiza vyo gutsimbataza mu Burundi bwacu ingendo ya Demokarasi.    

Gloriose Nshimirimana

(Uwimenyereza)

 

 

Abarundi bose bahamagariwe kuzirikana ico bari, harimwo n’abaronse ubwenegihugu mu bihugu babamwo

Umukuru w’igihugu , Petero NKURUNZIZA ahamagarira abarundi bose kuzirikana ico bari na cane cane abaronse ubwenegihugu mu bihugu babamwo, bishika bakiyibagira. Ako kamo yagateye abarundi n’abarundikazi mw’ijambo yabashikirije ryo kubifuriza umwaka mushasha muhire w’2018, kw’igenekerezo rya 31 Kigarama 2017, buca ari uwa mbere Nzero 2018, uhuriranye n’umunsi wa mbere w’indwi. Yaboneyeho n’akaryo ko gutanga ikigongwe ku banyororo bamwe  bamwe bapfungiwe mu mabohero atandukanye abandi bagatezurirwa ibihano hisunzwe ingingo y’113 y’Ibwirizwa Shingiro, mu ntumbero yo gusasagaza amahoro mu gihugu. Nimwisomere ido n’ido ry’iryo jambo. 

Barundi, Barundikazi, Ncuti z’Uburundi;
Turiko turasezera umwaka w’2017, twongera twinjira mu mwaka w’2018 turi mu mahoro, umutekano n’impore impande zose z’igihugu cacu. Turakengurukiye Imana Mushobora vyose yazigamye kandi ikarinda Uburundi n’Abarundi muri uyu mwaka urangiye w’2017. Nihabwe Ishimwe n’Icubahiro biyibereye bivuye mu mitima ikengurutse y’Abarundi.Turipfurije Abarundi bose iyo bari hose, tutibagiye n’abo bose baba mu Burundi umwaka muhire w’2018, uze ubabere umwaka w’Amahoro n’Imigisha bikomoka ku Mana. Tubipfurije umwaka mwiza, umwaka w’akanyamuneza mu banyu no mu vyanyu, umwaka wo gutera intambwe mw’iterambere. Muwuhimbaze musangira akabisi n’agahiye, murangwe n’umutima w’Urukundo wamye uranga ba sokuru na ba sokuruza bacu.Turakengurukiye cane abo bose bitanze kugira amahoro n’umutekano bisasagare mu gihugu cose, aha twovuga Abenegihugu, abajejwe intwaro, abajejwe umutekano no kwivuna abansi abajejwe ubutungane, tutibagiye n’incuti z’Uburundi zadufashe mu mugongo mu migambi itandukanye.Icivugo ngenderwako muri uyu mwaka ni iki gikurikira: “Tuzirikane Igihugu cacu, tumenye iyo tuva n’iyo tuja”. Iki civugo kandi tuzobandanya kucisunga gushika mu mwaka w’2019. Ntawobideha, Abarundi batari bake ntibaratahura neza Igihugu icarico, bigatuma rimwe na rimwe bafata inzira zidashika bitewe no kutamenya canke guhemukira igihugu na benewabo. Barundi, Barundikazi, Ncuti z’Uburundi; Twese dutegerezwa kuzirikana ico turi nk’abarundi, maze tugahera aho, tukibaza ico duhamagariwe gukora n’ico dutegerezwa gukora nk’Abana b’Uburundi. Dutegerezwa kandi kuzirikana ko aha turi hari abandi kandi ko inyuma yacu hazoza abandi, gutyo tukama na ntaryo twitwararika gusiga Iragi ryiza n’Izina ryiza bizobera Ikimazi abana, abuzukuru n’abuzukuruza bacu.Ako kamo gatewe Abarundi bose iyo bava bakagera, tutibagiye n’Abarundi baronse ubwenegihugu mu bihugu babamwo. Si ivy’imbeshere, bamwe mu Barundi baba hanze y’Igihugu birashika bakiyibagira.Twipfuza ko abazimiye bozimuruka, bave i buzimu baje i buntu. Ba sokuru barayamaze ngo: « Amazi arashuha ntiyibagira ibumbeho », kandi ngo « Amaherezo y’inzira ni mu nzu». Vyongeye, «Akamuntu kamara iyagwe».Kurya atawohindura umuvyeyi, ntihagire uwihenda yibwira ko hari igihugu coza kimusumbira igihugu c’amavukiro. Uburundi ni ubw’Abarundi, ni umurima w’isangi twasangijwe n’Imana, ni ingabanwa idasanzwe Umurundi wese ahamagariwe kuzirikana, kubungabunga no guteramira ijoro n’umurango, muri vyose na hose.Mu kubungabunga neza iyo ngabanwa, dutegerezwa kumenya kahise kacu, tukamenya imigenzo n’imico vyamye biranga Uburundi n’Abarundi; tukamenya ivyiza canke ibibi vyakozwe n’Abarundi ubwabo n’ivyakozwe n’abanyamahanga; tukamenya cane cane ingene Abarundi bagiye baravyifatamwo mu gutorera inyishu ibibazo vyabo. Dutegerezwa gutegera ko ukutamenya ari ingwara kandi ko abantu benshi bicwa no kutamenya. Kumenya kahise bidufasha cane kwama tuzirikana igihugu cacu, ako kahise kakatubera umushinge wo kwubakirako kazoza keza.Ba sokuru barayamaze ngo: « Uja mu kibira utazi ugaca inkoni utazi ». Tuzirikane Igihugu cacu, tumenye iyo tuva n’iyo tuja, tumenye umwonga uhuma n’uwudahuma, twirinde kugenza umutwe nk’uruyuzi; twirinde kuba ibitwengerabarozi.Kurya muri kahise ba sokuru bamye bagwaniriza umwansi hamwe, bakagwanira igihugu bafatanye mu nda, bakarahira bakarengwa kuba abaja b’abanyamahanga kandi bakabishitsa, bagahana bimwe biboneka abaca kubiri n’imigenzo n’imico yabo, natwe nitugire urunani rw’intamenwa twankire abashaka kutunyaga ubwigenge bwacu ngo badusubize mu buja.Urugamba dusigaranye uno musi ni urugamba rw’iterambere hamwe n’urugamba rwo kurandurana n’imizi udusigarira tw’amacakubiri y’amoko yabibwe n’abakoroni. N’aho abagishira imbere amacakubiri y’amoko basigaye ku rushi, ntawosya bwose. Nkako, abakurambere barayamaze ngo: « Ubuto bw’urutobo ntiburubuza kurura».
 Barundi, Barundikazi, Ncuti z’Uburundi; Umutekano si agaseseshwarumuri mu Burundi. Ikimenyamenya ni abakozi bitaba imirimo yabo ata nkomanzi; impunzi zirenga 215.000 zimaze gutahuka n’izindi zirenga 40.000 zimaze kwiyandikisha ngo zitahe; ingenzi ziva mu mihingo yose y’isi zigendera Uburundi, tutibagiye uruja n’uruza rw’abantu mu gihugu cose ijoro n’umutaga ataco binona.Turasubiye gutera akamo benewacu bari hanze y’igihugu ngo batahuke, bategere ko atawurimira amasaka aho atagira amasabo, kandi ko Uburundi budukeneye twese. Turashimiye abamaze kwitaba akamo tudahengeshanya kubatera, tubasaba no kubwiza ukuri abo basize inyuma.Intambwe nziza twateye mu gutsimbataza Amahoro n’umutekano mu mpande zose z’Igihugu tuyikesha ubutwari bw’Inzego zijejwe umutekano. Imigwi 310 y’abagizi ba nabi yarasambuwe, inkoho 128 n’amagrenade 325 vyarafashwe, ibisasu ntezwantoke 1.260 n’ibindi birwanisho birasamburwa.Abajejwe intwaro n’abajejwe umutekano bararwanije bimwe biboneka urudandazwa rudakwirikije amategeko rw’ubutare, gutyo harafatwa   itoni zirenga 19 za karumbeti (coltan), itoni imwe n’igice ca gasegereti (cassitérite), itoni 7 n’igice za nickel, itoni 77 z’ikawa, itoni 2 z’isukari, itoni 71 z’imipfuko y’umwavu w’ikizungu, n’amaritiro y’ibinyobwa bibujijwe arenga ibihumbi 700 yafashwe agaseswa.Mu bijanye na Poritike, abagize Inama Nkuru y’Igihugu ijejwe kunywanisha Abarundi, hamwe n’abagize Inama Nkuru y’Igihugu ijejwe gukinga ihonyabwoko, ivyaha vyo mu ntambara n’ivyaha vy’agahomerabunwa baraye bagenywe hisunzwe Amasezerano ya Arusha n’Ibwirizwa Shingiro.Mu gisata c’ubutunzi, ikigo kijejwe kwegeranya amakori n’amatagisi carinjije imiriyaridi zirenga 753 ku miliyaridi 720 zari zitegekanijwe, hakaba hiyongeyeko ibice 18% dufatiye kuyegeranijwe mu mwaka w’2016.Amasoko y’amakomine yari yashizwe mu minwe y’abikorera utwabo yarasubijwe amakomine ku rugero rungana 98%, ubutunzi bwayo buboneraho kwiyongera bigaragara; muri rusangi bukaba bwiyongereye incuro zine.Mu mugambi wo kurwanya inzara, Reta yaratanze  amatoni 46.000 y’umwavu w’ikizungu, amatoni 9.266 y’ishwagara, amatoni arenga 32.000 y’imbuto zirobanuye z’umuceri, imitsinda y’ibitoke 46.500, ibiro 800 vy’imbuto z’imboga, ibiti vy’ivyamwa 20.000  n’imivyaro 500.000 y’amabungo.Harakozwe kandi ubushakashatsi ku biterwa mbumbarugo bitandukanye nk’ibiraya, ibiharage, imyumbati, ibitoki, ibijumbu, amateke, n’ibindi.Mu gisata c’ibiterwa njabukamazi, Imivyaro yababa umuriyoni n’igice yarahawe abarimyi, itoni zirenga 10.000 z’ikawa zaradandajwe, zinjiza amahera arenga imiriyaridi 52 z’ amahera y’amarundi, bisigura ko umwimbu wiyogereye ku bice 10%. Itoni zababa 10.000 z’icayi zaradandajwe ku mahera y’amarundi arenga imiriyaridi 46, amadorari y’abanyamerika ashika hafi imiriyoni 26 arinjira mu gihugu. Haratewe kandi imbuto nshasha z’ibigazi, ariko n’ibigazi vya kera bitibagiwe, hakaba hitezwe umwimbu ungana n’amatoni 20.000.
Barundi, Barundikazi, Ncuti z’Uburundi; Utwigoro tw’abenegihugu two guteza imbere igihugu twoba impfagusa umugambi w’igihugu wo kurwanya igiturire n’amabi agikomokako udashigikiwe na zina murundi wese.Mw’irangurwa ry’uwo mugambi, amadosiye 242 yarakozwe, hibonekeza ko amahera y’amarundi yababa umuriyaridi n’amadorari y’abanyamerika ashika 500.000 ategererezwa kugaruzwa akinjizwa mu kigega ca Reta.Harafashwe kandi ibidandazwa bitandukanye vyinjiye mu gihugu hadakurikijwe amategeko, harakorwa n’amatohoza mu buzi bwa Reta, aho haca hibonekeza hafi imiriyaridi 4 z’amahera y’amarundi zitashitse mu kigega ca Reta. Dusavye ababijejwe kwihutira kuyagaruza.Mu gisata c’ubutungane, amasentare yaraciye imanza zishika 18.500, amahera arenga umuriyaridi arinjira mu kigega ca Reta biciye kuri sentare igwanya ibiturire n’ikigo kijejwe kwandika amatongo.Igisata kijejwe kuburana imanza za Reta catumye Reta ikingirwa kuriha amahera arenga imiriyaridi 28 z’amahera y’amarundi n’amadorari yababa imiliyoni 225 ku vyerekeye imanza zaburanywe ngaha mu gihugu, hamwe na miriyaridi zirenga 14 z’amahera y’amarundi ku manza Reta yaburanye hanze, ni ukuvuga amadorari arenga gato imiriyoni 11. Ubushikiranganji kandi bwaragaruje amatongo yababa hegitari 544 yari yarigaruriwe n’abantu.Ishirwa mu ngiro ry’ikigongwe c’Umukuru w’Igihugu ryatumye harekurwa abanyororo bangana 2.576. Ababuranyi bafise amikoro make hamwe n’abafise ubumuga bangana 1.511 bararonkejwe abashingwamanza bababuranira ku buntu. Ibitabu 9 vy’amategeko navyo vyari bisanzwe vyanditse mu rurimi rw’Ikinyamazuru vyarahinduwe mu rurimi rw’Ikirundi. Mu gisata c’amagara y’abantu, umugambi wo kuvura ku buntu abana bari munsi y’imyaka itanu n’abakenyezi bibungenze warabandanije kandi uzobandanya no muri uyu mwaka dutanguye. Bitewe n’inyifato z’uburyarya, ingendo zigayitse no kurenza urugero zimaze kugaragara, Reta yarafashe ingingo zibereye kugira uwo umugambi urangwe n’ubutungane. Twipfuza ko uwo mugambi uba uw’Abarundi kandi bubaha amategeko agenga ingo n’imiryango.Mu mugambi wo kurwanya marariya yari yabaye ikiza, ingo 2.243.645 zararonse imisegetera mu gihugu cose, hararwanywa kandi ingwara ya korera mu makomine ya Rugombo, Mpanda, Isare, Ntahangwa na Nyanza Lac. Reta yarabandanije gutanga ku buntu imiti ipfupfahaza ku barwayi ba SIDA, imiti y’igituntu n’iy’imibembe, abana nabo bararonswa incanco zitegekanijwe, kandi Uburundi buri mu bihugu vya mbere muri Afirika muri iyo migambi.Mu gisata c’indero, harakwiragijwe ibitabu vy’abigisha n’ivy’abanyeshure bo mu mashure y’umwaka w’indwi mu gihugu cose; harashingwa itegeko rigarukira indero n’inyifato runtu vy’abanyeshure bo mu mashure shingiro ya Reta n’ay’abikorera utwabo; abigisha badafise amasaha akwiye bungururizwa mu yandi mashure akenye abigisha. Haratangujwe kandi inyigisho mu gice ca kabiri n’ica gatatu muri Kaminuza y’Uburundi arizo bita Master na Doctorat. Mu gisata c’ubutare n’agataka, haratangujwe ibikorwa vyo gucukura ubutare bita akabuyenge muri komine Mutambu mu ntara ya Bujumbura, haratanguzwa n’ibikorwa vyo kwimba inzahabu, ifeza n’umujumbu i Mabayi mu ntara ya Cibitoke.Mu bijanye n’umuyagankuba, harashizwe mu ngiro amasezerano hagati y’amashirahamwe REGIDESO na INTERPETROL yo kugwiza umuyagankuba ku rugero rwa 30MW, ubu umuyagankuba ukaba wariyongereye cane mu gisagara ca Bujumbura.Haratangujwe kandi ibikorwa vyo kwubaka urugomero rw’umuyagankuba kuri Rusumo. Eka n’ibikorwa vyo gutanga umuyagankuba mu makomine atandukanye biriko birarangurwa, kandi twimirije kwubaka umuyagankuba ukomoka ku zuba mu ntara za Gitega, Makamba na Rutana.Mu gisata c’ibikorwa vya Reta, haraherahejwe hongera harugururwa ibarabara riva i Nyanza- Lac, rigaca i Mabanda rigashika i Mugina, igice ca mbere; iriva Nyakararo rigaca i Mwaro rigashika mu Kibumbu (30 km); ibarabara rikuru (RN 13), igice ca 2, riva i Butaganzwa rigashika mu Ruyigi (19 km), yose hamwe akaba afise uburebure bw’ibirometero 94. Haraguzwe kandi imodoka izimya umuriro ikorera ku kibuga c’indege.Ibikorwa vyo kwubaka Ikirimba c’Umukuru w’Igihugu navyo biriko birasozerwa, tukaba tuboneyeho akaryo ko gushimira abo bose babandanya badusahiriza mw’iterambere ry’Igihugu, twongera tumenyesha ko Uburundi bwamaze kurengana urugero rw’imfashanyo zo kubaho ku musi ku musi, ico dukeneye nyabuna ni Intererano n’Ingurane zigenewe imigambi y’iterambere.Mu bijanye n’iterambere ry’amakomine, ikigega FONIC cabandanije guha amakomine amahera yo kurangura imigambi, haratangwa n’ingurane ingana hafi imiriyaridi 35 ku bantu bashika 15.000 ngo barangure imigambi y’iterambe.Mu bikorwa rusangi, Reta ifadikanije n’abenegihugu yarubatse amashure y’intango, ayisumbuye na kaminuza, amavuriro, amabiro y’Indongozi mu ntara, mu makomine no ku mitumba, amavuriro, ibitaro, ibibuga vy’inkino, amasoko, ibigwati, n’amazi meza.Eka n’izindi nyubakwa zitandukanye zarubatswe mu gihugu nk’amahoteri yo kwakira ingenzi, amasengero, n’ibindi. Vyongeye, kuva dutanguye ibikorwa rusangi, uno mwaka ni ho twinjiye inyubakwa nyinshi kandi ziteye igomwe.


DSC 0518 CopieBarundi, Barundikazi, Ncuti z’Uburundi;
Turakeje bimwe bivuye ku mutima abo bose bitanze batiziganya mu bikorwa rusangi. Ni mukomere ku muheto.Mu bikorwa twimirije kurangura harimwo:Kubandanya gutsimbataza amahoro n’umutekano no kurwanya ibikorwa vy’iterabwoba. Gusozera ibikorwa n’Imigambi bisigaye mu bitegekanijwe n’Ibwirizwa Shingiro.Inyigisho zidasanzwe zo kuzirikana Igihugu cacu zizobandanya, tuzokora ibishoboka vyose turandurane n’imizi imbuto mbi, cane cane y’amacakubiri yabibwe n’abakoroni muri Bene Burundi, gutyo dutegure kazoza keza k’Igihugu cacu.Tuzobandanya gutera akamo no kujijura abahunze ngo bahungukeke badatevye, baze kwifatanya na benewabo guteza imbere Igihugu.Abenegihugu bazohabwa ijambo bashikirize aho bahagaze, no ku migambi ihambaye y’Igihugu nk’uko twamye tubagisha inama.Ibikorwa nyezina vyo kwubaka Ikivuko ca Rumonge bizotanguzwa, Ikivuko ca Bujumbura naco gisanurwe.Tuzomenyekanisha ivyo dufise mu bisata nyamukuru vyohurumbirwa n’abanyamitahe.Umugambi wo kugwanya ibiturire n’urudandazwa rudakurikije amategeko uzobandanya.Ikibuga c’indege ca Bujumbura kizosubirwamwo kugira cisunge amategeko mpuzamakungu agenga indege n’ibibuga vy’indege, kijane n’ibihe n’iterambere ibindi bihugu bigezeko.Urwaruka ruzoronswa inyigisho zirufasha kwitegurira rwo nyene imigambi kandi rumenye rwongere rumenyere kwironderera akazi.Muri ico kigabane nyene, harategekanijwe ikigega kizoha ingurane urwaruka rwipfuza kwishingira imigambi y’iterambere.Hazosigwa kaburimbo kw’ibarabara riva mu Kibumbu rigashika i Gitega, iriva i Nyamitanga rigashika i Bujumbura; iriva i Ngozi rigashika ku rubibe rw’Uburundi n’Urwanda, no kwegeranya uburyo bwo gusubiramwo ibarabara riva i Nyaza Lac rigana i Bujumbura riciye mu Rumonge.Hazokwubakwa n’amabarabara menshi y’imigenderanire, na cane cane ayashika ahari inyubakwa rusangi.Tuzobandanya imigambi ihambaye twatanguye nko kugabanya ubusumbasumbane bw’imishahara y’abakozi ba Reta;  kugwiza umuyagankuba; gukingira ibidukikije; kuvura ku buntu abakenyezi bibungenze n’abana bari munsi y’imyaka itanu; kwigisha ku buntu abana bo mu mashure y’intango; gutanga imisegetera, n’iyindi migambi myiza yo kuramira abenegihugu. Barundi, Barundikazi, Ncuti z’Uburundi;Vyaba ivyaranguwe canke ivyimirije kurangurwa, ntitwobidondagurira rimwe. Tubaciriye ku mayange bimwe bimwe, ibindi navyo abashikiranganji n’izindi ndongozi zijejwe ibisata bitandukanye bazobandanya kubibashikiriza ido n’ido.Dufatiye ku civugo ngederwako, umuntu yokwibaza ati none hokorwa iki kugira tuzirikane Igihugu cacu, tumenye iyo tuva n’iyo tuja? Reka tubacire ku mayange bimwe mu bitegekanijwe:Gufasha Abarundi kumenya neza amateka y’Igihugu baheze bayisunge mu gutegura kazoza. Muri iyo ntumbero, Umurwi w’Igihugu ufasha Abarundi kumenya Ukuri no kunywana waranaguwe, dusavye Abarundi kuwushigikira mu bikorwa vyawo.Guha ikibanza kibereye imico, imigenzo n’akaranga vyaranze Abarundi n’intwari zarwaniye Igihugu n’abandi bashize imbere Inyungu z’Igihugu.Kwiga no gutegura umugambi wo kwubaka Ikigo c’Imico n’Akaranga vy’Uburundi.Kujijura Abarundi, bamenye bongere bazirikane ko igihugu ari ic’Abarundi, ko ari twebwe nyene dutegerezwa kugitunganya, abadufasha bakaza tubibasavye kandi tuberetse aho dukeneye intererano yabo.Kumenya amateka n’amategeko y’Igihugu, kuyakwirikiza no kwubahiriza agateka ka zina muntu.Kuzirikana ko dutegerezwa gukingira ubwigenge bwacu no gutsimbataza Intahe y’Ukwikukira na Demokarasi.Gukomeza imigenderanire n’ibindi bihugu n’amashirahamwe vyubahiriza ubwigenge bw’igihugu cacu.Kwitegurira ubwacu imigambi y’iterambere kandi tukiga kuyirangura tutarinze kuzera inze.Gushira imbere urwaruka mu migambi yose, kugira rwige, rumenyere hakiri kare ko ibikorwa arivyo bizoruteza imbere bigateza imbere n’Igihugu.Gukingira ubutunzi bw’igihugu, kurwanya igiturire n’urudandazwa rutemewe n’amategeko.Gukomeza no gukingira ingo n’imiryango vy’Abarundi.Gufata Inginzo zibereye, umwe wese mu vyo ajejwe mu ntumbero yo gushira ibintu mu buryo no gutera iteka Igihugu cacu. Barundi, Barundikazi, Ncuti z’Uburundi; Imbere yo gusozera, twashaka dusubire kubibutsa ko dutegerezwa guhinduka no guhindura ingendo, aho turi hose tukarata ubwiza bw’igihugu cacu citwa Uburundi, tukagaragaza akanyamuneza ko kwitwa Abarundi kandi tukabigendera. Ni iteka rihambaye. Dufise Igihugu ciza kirimwo vyose abandi bahurumbira. Twambaye ikirezi, igisigaye ni ukumenya ko cera no kwirinda ko hari uwokitwambura.Ese Abarundi twese twogaruka kw’Iragi rya ba sokuru. Kuva ku ntwaro z’Abami gushika mu gihe co guhabuza Intahe yo Kwikukira, Imana yamye ari Umucisho, Umuheto n’Inkinzo vy’Uburundi n’Abarundi. Imana-Umwami-Uburundi cari Icuvugo c’Ingoma y’Uburundi. Natwe ntiduhengeshanya kuririmba ngo «Burundi bwacu… Imana yakuduhaye ikudutungire».Kurya Imana itigeze itetereza ba sokuru na ba sokuruza, niko natwe itazodutetereza ni twayiyegereza kandi tukayishira imbere mu migambi n’ibikorwa vyacu.Ikindi gihambaye co kwitwararika, ni uko ibihe vyahindutse. Dutegere rero ko guhinduka kw’ibihe gutegerezwa kujana no guhinduka kw’abantu mu vyiyumviro n’inyifato, tuvyare abo dushoboye kurera, twirinde gusiga umuryano mu muryango. Tuboneyeho akaryo ko kugabisha abatitavye akamo ko kwandikisha abagize ingo zabo nk’uko bisabwa n’Itegeko rigenga ingo n’imiryango ko kugarariza bihanwa n’amategeko.Turamaze imisi dutanguye Urugendo ruzodushikana ku kwikukira nyakuri, aho Umurundi n’umunyamahanga wese aba mu Burundi bazokwigaba bakigaburira, bagatunga bagatunganirwa, bakishira bakizana, bakaramutswa iteka n’itekane, bakongera bagatunganya imigambi y’iterambere batarinze kuzera inze. Ubwo ni bwo Burundi twipfuza kuzoraga abana bacu.Iryo hangiro ntitworishikako tutazirikanye ko Uburundi ari Umurima w’isangi twasangijwe n’Imana, maze twese tukijukira kububungabunga no gusabikanya itunga rusangi, Ubutungane n’Ingingo bikatubera inkingi n’inkinzo, tugahinda ikibiri atawukebera uwundi, tukaragirana atawusobanurira uwundi, tugasangira ikivi n’ikigega, tugasangira akabisi n’agahiye, tukama twibuka ko dusangiye ugupfa no gukira.Mu ntumbero yo gusasagaza amahoro, iteka n’itekane mu gihugu, twisunze Ingingo y’113 y’Ibwirizwa Shingiro, tugiriye Ikigongwe abakatiwe gupfungwa imyaka itarenga itanu, Abakenyezi bibungenze n’abonsa, abagendana ubumuga bugaragara, abamaze mu mvuto ica kabiri c’ikiringo bakatiwe, n’abandi; bose hisunzwe uburemere bw’ivyaha bagirizwa n’inyifato yabo mu mabohero barimwo.Kubera iyo ngingo, abanyororo barenga 2000 bagiye kwidegemvya. Tubasavye kwirinda ico cose cotuma igiti kibakora mu jisho kabiri.Mu kurangiza, twashaka kubararika ngo muze mwitabe nihagera kuvuga aho muhagaze ku mpinyanyuro z’ingingo zimwe zimwe z’Ibwirizwa Shingiro ry’Igihugu. N’iki ni igikorwa c’iteka umwenegihugu wese atokwidohoramwo, na cane cane iyo  yemera ko  yikukiye kandi ko n’Igihugu ari iciwe.Tuboneyeho akaryo ko gushimira abamaze kugaragaza umutima wo gukunda Igihugu cabo no gutsimbataza Intahe yo Kwikukira mu gushikana intererano zabo aho zagenewe, twongera dusaba abasigaye kwifatanya na Benewabo. Ku kaba nkako, ni igikorwa c’iteka cavuye mu nama n’ingingo, kizotuma Abarundi twishingira Amateka n’Amategeko bidushikana ku migambi n’imigabo ifasha Abenegihugu gushikira Iteka n’Itekane.Mubandanye mwigina umwaka mushasha munezerewe, mwongera mwitaba n’imirimo yanyu, ariko mudasinzira umukondorazosi canke ngo musesagure. Abajejwe Intwaro, abajejwe Umutekano n’abajejwe Ubutungane, tubasavye kwama barikanuye nkuko bama, kugira amahoro n’umutekano ntibihungabane muri iyi misi y’akanyamuneza ka Noweli n’umwaka mushasha.Dutangarije Abarundi bose ko Umuco n’Ubwiza bw’Uhoraho bigiye kwigaragaza ku Burundi n’Abarundi mu mwaka w’2018. Vyongeye, ivy’Uburundi bigiye kubaduka; Imana Mushobora vyose niyo cabona.Turasubiriye kubipfuriza mwese umwaka mwiza w’2018, umwaka w’Amahoro y’Imana no kuroranirwa muri vyose na hose. Tuwuhimbaze twese twitwararitse kazoza keza kacu n’ak’igihugu. “Tuzirikane igihugu cacu, tumenye iyo tuva n’iyo tuja”.

Umwaka mwiza!Imana ihezagire Uburundi

 

 

Amasengesho yo gushimira Imana yatunganijwe n’umuryango w’Umukuru w’igihugu : Prezida NKURUNZIZA arashimira Imana kuvyo yakoreye Uburundi gushika umwaka w’ 2017 urangire

Umukuru w’igihugu Petero NKURUNZIZA amenyesha ko Imana ishaka ko abantu bagira umutima ushima. Ivyo akaba yabimenyesheje ku wa 26 Kigarama 2017, mw’ijambo yashikirije ryo gutanguza amasengesho yo gushimira Imana no kuyitazira yatunganijwe n’umuryango wiwe, yabereye mu ntara ya Kayanza ku kibuga c’inkino c’i Gatwaro,muri komine Kayanza kuva ku wa 26 gushika ku wa 31 Kigarama 2017 . Twobamenyesha ko ijambo ry’urufatiro ry’ayo masengesho ryari iryo mw’isezerano rya kera mu gitabu ca Mika igice c’7 kuva ku murongo w’14 gushika ku murongo wa 20 rivuga riti : « Ragiza abantu bawe inyobozo yawe, ari bo mukuku wawe wiziziye, bibera ukwabo mu kibira co hagati kuri Karumeli : barishe i Bashani n’i Gileyadi, nko mu gihe ca kera.  Nzokwereka ibitangaza nk’ivyo mu gihe wava mu gihugu ca Egiputa.  Amahanga azobibona amaramare, naho ubushobozi bwayo bwari bwinshi, bifate ku munwa, amatwi yabo azibe. Bazorigata umukungugu nk’inzoka, basokoroke mu binyegero vyabo nk’ivyikwega hasi bahinda agashitsi, bazoza k’Uhoraho Imana yacu batinya, bafise ubwoba. Ni iyihe Mana ihwanye nawe, iharira ibigabitanyo, ikirengagiza igicumuro c’amasigarira y’abo yiziziye ? Ntuhorana uburake iminsi yose kuko uhimbarwa no kugira imbabazi. Uzoduhindukirira utugirire ikigongwe, uzosiribangira ibigabitanyo vyacu vyose i bwina mu kiyaga. Ukuri kwawe uzogushitsa kuri Yakobo n’ikigongwe kuri Aburahamu, ari vyo nyene wahariye ba sogokuruza uhereye mu bihe vya kera.»Prezida NKURUNZIZA yamenyesheje rero ko intumbero y’ayo masengesho ari iyo gushimira Imana kuvyo yakoreye abarundi n’Uburundi hamwe no gusaba Imana ngo igume ihezagira Uburundi mu mwaka w’2018. Yarashimikiye kandi kw’ ijambo ry’urufatiro aho yavuze ko rijanye n’abantu bihanganye, abarundi rero ngo barihanganye kandi ngo ukwihangana gusozerera ku ntsinzi. Iryo jambo ngo ririmwo indemesho ku gihugu no ku barundi rikongera rikabamwo umwitwarariko ku barundi n’abansi b’igihugu. Ngo ni akanyamuneza kubona abarundi bamaze umwaka w’2017 bari mu kanyamuneza n’umutekano ari naco gituma bakwiye gushimira Imana. Iyo minsi itandatu ihariwe ayo masengesho yabasavye abayitavye gushima Imana kuko hariho abataronse umwanya wo kuhashika kubera bari barwaye canke bafise izindi ngorane nayo ngo ico Imana ishaka ni umutima ushima, harimwo kuyishimira no kuyishingira intahe.Twobamenyesha kandi ko imbere y’iryo jambo, umutambukanyi w’Umukuru w’igihugu, Denise NKURUNZIZA,yasengeye ico kibanza asaba Imana kuzigama ico kibanza n’abitavye ayo ayo masengesho mu kiringo cose bazohamara.Buramatari  w’intara ya Kayanza, Anicet Ndayizeye nawe mw’ijambo ryiwe ry’ikaze yamenyesheje ko muvyo bashima vyakoretse muri iyo ntara ari uko haranzwe n’amahoro n’umutekano.Twobamenyesha kandi ko ayo masengesho yari yitabwe n’abanyacubahiro benshi kandi yatangujwe n’urugendo rwari rurongowe n’umuryango w’Umukuru w’igihugu ari kumwe n’abarongoye inzego zitandukanye z’igihugu, hakurikira abaserukiye amakomine agize iyo ntara hamwe n’imirwi y’abaririmvyi . 

EVVDSC 0581 CopieIndongozi zisabwa kumenya ibihe no gukunda Imana
Prezida NKURUNZIZA asaba indongozi kumenya ibihe kuko ari ikintu gikomeye kuribo. Ivyo yabishikirije mu gitondo ku wa 27 Kigarama 2017 mu nyigisho yari yatunganirije indongozi. Muri izo nyigisho yishimikije ijambo riri muri Zekariya 8 : 1-8 na 11-23 hamwe n’iriri muri Zekariya 9 : 1-8, aho yamenyesheje ko kubona muri izo nyigisho hari hakoraniye abantu batandukanye ari ikintu gikomeye kandi harimwo ubushobozi, kandi kubona yatanguye kuyobora igihugu yaramenye Imana ari ikintu gikomeye.Rero ngo indongozi nziza izirikana ko ubutegetsi yaronse bwavuye ku Mana rero ngo indogozi bategerezwa kumenya iyo bavuye n’aho bageze. Yaciye abasaba gukunda Imana kuko nayo ikunda abayikunda ngo babe abarondera Imana no kumenya imigenderanire bafitaniye n’Imana, ngo kuba ngo kuba indongozi n’iteka baba barahawe n’Imana ariko rero ngo kuba  umurongozi harimwo ivyiza n’ibibazo.Yaranamenyesheje ko Imana ikunda Uburundi kuruta n’ibindi bihugu kw’isi kuko isanzwe ikunda abantu bayishimira kuvyo yakoze aca asaba indongozi kuza baratahura ko uko Imana ibakunda satani biyibabaza. Kubw’ivyo yaciye abasaba kuza baraguma ku Mana kuko iyo bayivuyeko biyibabaza igaheza igafata ingingo zayo, ngo baze barafata ingingo zibafasha kandi zigafasha n’abandi. Prezida NKURUNZIZA yasozereye asaba indongozi guteramira amasezerano y’Imana kandi ngo ivy’Imana yasezeranye ku Burundi igiye kubishira ku mugaragaro afatiye ku butunzi bw’ubutare Uburundi bufise buriko buraja ahabona.Ikindi twobamenyesha ni uko imbere y’izo nyigisho Umukuru w’igihugu c’Uburundi yari yabanje kwugurura icese inzu igenewe inama y’i hoteri Musumba iri ku murwa mukuru w’iyo ntara akaba ari naho yaciye yigishiriza indongozi.


Imana ngo yakingiye vyinshi Uburundi n’abarundi mu mwaka w’2017
Ku muhingamo w’igenekerezo rya 27 Kigarama 2017,mu mwanya w’amasengesho no gutaziza Imana,Prezida NKURUNZIZA yaramenyesheje ko hariho impamvu zo gushimira Imana kubera ivyiza bitari bikeyakoreye abarundi n’Uburundi abicishije mu ntahe yashingiye Imana yahaye umuryango wiwe amagara meza mu mwaka w’2017,irabarinda indwara.Ikindi Imana yakoze ngo imirima isa neza kandi umwimbu wabaye mwinshi mu gihugu,Imana ngo yararinze amasanganya mu ngendo zose zagizwe mu gihugu irinda abarundi idwara z’ivyaduka indwara za Ebola irinda inkoko z’Uburundi indwara y’akamangu.  Yaramenyesheje ko ikindi co gushima ari uko Imana yarinze Uburundi imiriro ya Nyakanga,ikabarinda ivyago bikomeye vyama vyatikije abantu mu bindi bihugu.Prezida NKURUNZIZA yaranashimye ukungene ishengero mu gihugu c’Uburundi ryazigamwe, bisubiye ngo rizigamwe n’igihugu kiba kizigamwe.Imbere yaho kandi umuvugabutumwa yaje ava muri Repuburika iharanira demokarasi ya Kongo (RDC ), Stephano Munongo niwe yari yabanje kwigisha ijambo ry’Imana ryo kuri uwo munsi rikaba ryari ryishimikije amajambo ari muri Yohani 15 : 18-25 « rivuga ngo “isi niyabanka mumenye ko jewe yatanguye kunyanka itarabanka….nico gituma isi ibanka mwibuke rya jambo nababwira ngo umushumba ntaruta shebuja namba barampamye namwe bazobahama , namba batitondeye ijambo ryanje n’iryanyu ntibazoryitondera ariko ivyo vyose bazobibagirira babahora izina ryanje kuko batazi uwantumye iyo mba ntaraje ngo ngire ico mbabarira nta caha baba bafise nanone ntibari n’ico bireguza icaha cabo uwunyanka….ngo banyankiye ubusa ». Ngo si wewe wa mbere wanswe kandi ngo ntibatanguriye kuri wewe kandi ntibazoguherezako. Stephano Munongo yishimikije ayo majambo yamenyesheje ko hariho abantu baraba abantu bikabatuma banka abo baravye bene kurabwa nyene bagaca bacika inkokora. Abo bantu ngo nibamenye ko ataribo ba mbere baba banswe ahubwo ko kw’isi yose abantu bagabuye mu mirwi 3 minini minini. Uwa mbere ngo ni 40 kw’ijana w’abantu bakunda umuntu ata mpamvu, uwa kabiri ngo n’ibice 40 nyene w’abantu bazohura n’umuntu bakamwanka ata deni abafitiye, umurwi wa 3 ngo n’ibice 20 kw’ijana w’abantu batari mu bakunda umuntu canke ngo bamwanke, ngo bari hagati na hagati kenshi bakazanira amajambo aryohereza umuntu bumvise kuriwe ku bamukunda n’abamwanka. 


Urwaruka rusabwa gukunda ijambo ry’Imana kuko ariryo soko ry’iterambere
Ku munsi wa gatatu igenekerezo rya 28 Kigarama 2017 haratunganijwe mu gitondo inyigisho ku rwaruka, aho Prezida NKURUNZIZA  yasavye urwaruka gukunda ijambo ry’Imana kuko ariryo soko ry’iyerekwa. Muri izo nyigisho  Prezida NKURUNZIZA yatanze ku rwaruka yashimikiye kw’ijambo «Iyerekwa ku rwaruka». Yamenyesheje ko iyerekwa ari ikintu gikomeye mu buzima bw’igihugu no mu buzima bw’umuryango, kandi ngo iyerekwa riva ku Mana rigaca mu nzira nyinshi.Yaciye atanga akarorero k’abantu bakiri bato bavurwa mw’ijambo ry’Imana ko bagize iyerekwa aribo Dawidi, Nowa, Yosefu, Salomo na Nehemiya ariko kandi ngo iyerekwa nirya bose. Prezida NKURUNZIZA  mu nyigisho yishimikije ijambo riri mw’Itanguriro 41 : 1-36 rivuga ngo Yosefu asobanurira Farawo inzozi ziwe. Ngo na Yosefu yagize iyerekwa ku myaka 17 ari naco gituma yasavye urwaruka gukunda ijambo ry’Imana kuko ariryo soko ry’iyerekwa kandi uwudafise iyerekwa ntaba afise iyariko araja nayo uwufise iyerekwa ngo amenya iyavuye, aho ageze n’iyaja.  Iyerekwa rero ngo ni urugamba rwo kurwanira kuko ngo na Yosefu vyaramugoye amaze kuronka iyerekwa bivanye nuko atagize ibanga inzozi ziwe yaciye azirotorera abo bavukana 11 baca bagira ishari bafata umugambi wo kumwica bamuhora iyerekwa, kubw’ivyo aca abasaba kugira ibanga ivyabo bakabihagararira nk’abantu bari kumwe n’Imana. Yamenyesheje ko hagati y’isezerano ry’Imana n’iyerekwa hari urugendo kandi kugira iyerekwa harimwo urugamba ngo na Yosefu yahuye n’urwanko n’ishari ryabo bavukana, abavyeyi biwe ngo ntivyabaguye neza, abo bavukana bamugirira umugambi wo kumwica, bagira impari, baca bafata ingingo,ntibamwica baca bamuta mu kinogo ariko Imana ica ihagurutsa abandi barahamukura. Ngo bamaze kuhamukura baciye bigira imigambi yo ku mudandaza ariko ngo kubera iyerekwa ryiwe yaciye agurwa n’abantu b’ibwami ahashitse Imana yaciye imuha ingabire yo kumenya ivy’inzozi no kuzisobanura bica bimubera imfunguruzo zo gushitsa iyerekwa kugurura imyango iri imbere. Urwaruka yarusavye kugira ingabire yo kwihangana kuko ukwihangana gushitsa ku ntsinzi, ukutihangana nako kukabatuma bata ingabire Imana yabahaye kandi ngo bongere bayikoreshe kugira ibafashe kuronka abagenzi n’incuti, yongera abamenyesha ko iyerekwa rijana n’ibikorwa ari naco gituma bategerezwa kumenyereza iyerekwa ryabo. Mu gusozera inyigisho z’uyo munsi Prezida NKURUNZIZA yarabashingiye intahe zijanye n’iyerekwa ryiwe aho yavuze ko yiga mu mwaka wa gatanu bamubajije iyerekwa ryiwe acavuga ko azoba Umukuru w’igihugu, kandi ko yaciye mu ngorane nkakurya kwa Yosefu kubera yari impfuvyi babatwaye ibintu bari batunze mugabo abaye umukuru w’igihugu abo biganye n’umwigisha wiwe batangaye kubera yari yarabivuze.


Igihugu c’Uburundi ngo kirakomeye imbere y’Imana
Umunsi ugira gatatu w’amasegesho yo gushimira Imana wabaye umunsi wo gushima kw’iteka yateye Uburundi n’abarundi. Hari kw’igenekerezo rya 28 Kigarama 2017.Nk’uko Prezida NKURUNZIZA yabimenyesheje, ngo umwaka w’ 2017 ni umwaka wa rimwe, uwo munsi ugira gatatu w’amasengesho kandi ngo wabaye uwo gushima kandi kw’iteka Imana yabateye kandi ko akigoro k’abarundi bitavye amasengesho katazokwijana imbere y’Imana ko n’iminsi bamaze izokwandikwa mw’ijuru, bisubiye ngo ntizogendera ubusa kuribo, kubana babo, abuzukuru n’abuzukuruza ngo bijanye n’ukwandikisha ubwami bw’ijuru. Yarashimiye indongozi, urwaruka, abakuze n’abato baje kwitaba inyigisho n’amasengesho, abasabira imigisha ngo Imana ibandike mu gitabo c’intibagiranwa yongera asabira imigisha abarundi bose na Afrika n’isi nzima. Kuri uwo munsi, inyigisho zari zishimikiye ku majambo ari mu gitabu co Guharura 16 : 6-35 no mu vyakozwe n’intumwa 10 :1-4 rivuga ngo umumarayika yiyereka koronariyo. Umuvugabutumwa Apotre Vital niwe yari yaramutse yigisha kw’ijambo rivuga ngo « kumenya ico uhoraho ashaka kukora » Kuri uyo munsi yamenyesheje abari bitavye amasengesho gukora ico Imana ishaka ko bakora. 

Abahambaye n’abato basabwa kumenya no kubona neza Imana 
Indongozi zisabwa kumenya no kubona neza Imana iyariyo, urwaruka narwo rugasabwa gukunda Imana. Ivyo ni ivyashikirijwe na  Prezida NKURUNZIZA mu nyigisho zo mu gitondo zari zisa nizisozera inyigisho zari zateguwe n’umuryango w’Umukuru w’igihugu. Hari kw’igenekerezo rya 30 Kigarama 2017. Izo nyigisho zari zihagaze kw’ijambo rivuga ngo « kumenya no kubona neza Imana iyariyo ».Prezida NKURUNZIZA yamenyesheje ko kumenya no kubona neza Imana iyariyo ko ari ingabanwa zidasanzwe kandi zifise igihe cavyo. Yamenyesheje kandi ko ubutegetsi buva ku Mana kandi bukaza igihe kigeze yongera abasaba ko ikintu cose bagezemwo ari ukugihagararamwo neza no kumenya neza Imana iyariyo, ngo nico gituma rero kumenya neza no kubona imana ari ikidasanzwe ku ndongozi. Prezida NKURUNZIZA yishimikije amajambo ari muri Ezekiyeri 43 : 1-7 ; muri Yuda 24, 25 hamwe n’ayari muri Daniel 4 : 4-5 no kukarongo ka 22-24. Muri Ezekiyeri hafise ijambo ry’umutwe rivuga ngo uhoraho yongera kugaruka mu muryango wiwe, muri Yuda naho hakavuga ngo Yuda aremesha abakristu atazira Imana, Muri Daniel ngo izindi nzozi za Nebukadineza.Yarongeye kandi abamenyesha ko hari ibihe vyo kugenderwa n’Imana no kumva ijwi ryayo, ikindi ngo iyo umuntu amaze kuronka ubwiza bw’Imana acaba igikoresho cayo bisigura ko udashobora kuva imbere yayo itaguhaye igikorwa gutyo ugaca uba umwizigirwa. Yaranababwiye ko hari igihe co gutoranywa, n’ibihe vyo kuremeshwa n’Imana kandi ko umaze kuremeshwa atakintu giheza ngo kiguce ivuto ucurangwa no kuyitazira, kandi hariho n’ibihe vyo kunezerwa mu Mana. Umuryango w’Umukuru w’igihugu   warasengeye  igihugu basaba imbabazi ku vyaha vyakozwe n’abarundi.Ku muhingamo wo ku wa 31 Kigarama 2017 harasozerewe amasengesho yo gusozera umwaka w’2017.Muri ayo masengesho yo guheraheza umwaka Prezida NKURUNZIZA yigishije yishimikije amajambo ari ku bisomwa, Itanguriro 1: 1-3 rivuga ngo Imana irema ijuru n’isi n’ibirimwo vyose; mu vyakozwe n’intumwa 3: 7-10; hamwe no muri Luka 4: 18-19 rifise umutwe w’amajambo uvuga ngo ab’i Nazareti bageza kwica Yesu. Ngo umwaka wa 2 ariwo w’ 2018 harimwo ibintu bine Imana izokorera Uburundi, ngo uzoba umwaka w’umuco n’agakiza, wo gutambuka no kwiterera hejuru, wo kubohora Uburundi umunyororo satani yari yabuboheshejeje n’uwo kwemererwako. Prezida NKURUNZIZA n’umuryango wiwe mu gusozera ayo masengesho barasengeye igihugu basaba imbabazi ku vyaha vyakozwe n’abarundi, barashima baranakenguruka ku vyakoretse mu mwaka wa 2017 kuko Imana yatanze amasezerano yongera irayashitsa, irazigama abarundi, itanga amahoro n’umutekano, yarwanye intambara ziboneka n’izitaboneka. Yarongeye asabira umugisha umusozi ayo masengesho yabereyeko, asaba Imana kuzigama Uburundi mu mwaka wa 2018 ngo ize ibucire inzira, yitwararike ubutunzi bw’igihugu, indongozi nazo izihishurire ibitangaza.Twobamenyesha kandi ko imbere yuko Umukuru w’igihugu yigisha muri ayo masengesho, buramatari w’intara ya Kayanza, Anicet Ndayizeye yari yabanje gushima kukuntu intara yiwe yari yatewe iteka ryo gukorerwamwo ivyo bikorwa, ashimira n’umuryango w’Umukuru w’igihugu wo wiyumviriye iyo ntara, ashimira kandi abashitsi n’abakozi b’Imana bafashije.Abanyakayanza baciye bagabira umuryango w’Umukuru w’igihugu inka zitanu za kijambere kubera umutima n’ibikorwa birangwa n’umuryango w’Umukuru w’igihugu bongera batanga amasuguru 4 y’impene biherekejwe n’ibiseke bitandukanye, abarwizatunga babiri nabo b’iyo ntara aribo Sylvestre Niyonsaba na Anicet Ndoricimpa baca bamugabira umwe wese inka imwe imwe bise Kirimwabagabo na Yamwaka mu ntumbero yo kubifuriza umwaka mwiza.

Evelyne Niyonzima

 

 
Ouvrir