Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abakenyezi bahamagariwe kutishiramwo ko hari umwuga wiharijwe n’abagabo gusa

NA22Kw’igenekerezo rya 21 Rusama 2020, ikinyamakuru UBUMWE  caragendeye igituro c’imiduga y’ishirahamwe MEMENTO yunguruza abantu n’ibintu  ikorera mu gisagara ca Bujumbura  aho umukenyezi Nina Ninette Nineza  akorera umwuga wo kunguruza abantu ba bisi.  Nineza yamenyesheje ko yatanguriye umwuga wo gutwara imiduga minini mw’ishirahamwe ryubaka amabarabara SOGEA SATOM. Yabandanije amenyesha ko mw’ishirahamwe SOGEA SATOM ariho yigiye gutwara imiduga minini minini kandi vyamworoheye kuko ari mw’ibarabara aba ahabona hose. Ku bwa Nineza, ngo  umuntu ari mu modoka ntoya ahuye na nini aragira ubwoba ngo baramugonze. Nineza yamenyesheje ko kugira aje gusaba akazi mw’ishirahamwe MEMENTO,  muri SOGEA SATOM kari karaheza. Yabandanije amenyesha ko akija gusaba akazi muri MEMENTO, umukoresha yabonye ko nk’umukenyezi atazoshobora ako kazi aca amusaba kwimenyereza kugira arabe ingene akora.

Ngo umukoresha wiwe amaze kubona ko ashoboye gutwara abantu  yaciye amuha akazi. Ku kibazo c’uko  ashoye gufatanya amabanga ya inarugo n’akazi ko gutwara abantu n’ibintu, Nineza yamenyesheje ko nk’umukenyezi agerageza akitunganya kuburyo bw’uko akora neza amanga ahamagarirwa gukora mu muryango nka inarugo n’akazi akagerageza akakarangura neza. Nineza ahanura abakenyezi bagenzi biwe kudatoranya imyuga bakora ngo kuko akazi uba ushaka hari aho utakaronka. Ngo vyiza bokora akazi kabonetse naho boba batagakunda, bakaba bararangura akabonetse mukurindira ko akazi bifuza kaboneka. Ku bijanye n’ukugene abantu bamubona kuko arangura akazi ko kwunguruza abantu bitari bimenyerewe ku bakenyezi, Nineza yamenyesheje ko mu ntango yagira isoni  kuko uko abantu bamubona ariko aratwara imodoka yo kwunguruza abantu, baca bahamagarana bakamwerekana ngo ehe urya mukenyezi agendesha ibisi ! Ku bwiwe, ngo kubona akora akazi ko kwunguruza abantu bituma akaburira abandi bakenyezi kureka kubona ko hari umwuga wiharijwe n’abagabo gusa.  

Aline Kanyana

 

Urwaruka rurangije amashure ruhamagariwe kwitunganiriza imigambi yo kwiyungunganya

44Urwaruka rwize rurakwiye kwiha intumbero yo kwironderera akazi iki gihe Reta y’Uburundi itagishoboye gutanga akazi kubariko barangiza amashure haba ayisumbuye canke kaminuza. Ivyo rero bishoboka mu gihe bokoresha neza inyigisho baba baronse kw’ishure na cane cane mu cigwa co kwitunganiriza umugambi wo gukora ivyawe bita “entreprenariat”. Ivyo vyashikirijwe n’umwe mu rwaruka, Salvator Ntirampeba yaganiriye n’ikinyamakuru UBUMWE ku wa 6 Rusama 2020.Salvator Ntirampeba yamenyesheje ko yize amashure yisumbuye, ayarangije acaja muri kaminuza mu gisata kijanye nivyo ubutunzi, ayarangiza mu mwaka w’ 2016. Sarvator Ntirampeba  amaze kubona ko kuronka akazi bitoroshe haba muri Reta canke mu bikorera ivyabo, yaciye yigira inama yo kurondera ico yokora atarinze gutega amaboko, kuko yiyumvamwo ko afise ingabire kandi n’ubumenyi. Yaciye arondera uko yokarisha ubwenge  kubafise ubumenyi mu vyo guhingura ibirimwa, akongera akifashisha ivyo yasoma kurubuga ngurukanabumenyi, ataravye ko yahejeje kaminuza nakare  ngo “ubwenge burarahurwa” kandi ngo “uwutazi ubwenge ashima ubwiwe”. Ntirampeba ashitse aho yaronkera ivyo vyirwa yavyiganye umwete mwinshi, kuko yabona ko bishobora ku mutunga, yize uko bahingura ibiva mu giterwa c’isoya mu bagihinguramwo amata, iforomaji hamwe n’inyama ziva mw’isoya nyene. 

Ivyo vyigwa vyo guhingura isoja vyaramufashije no kumenya akamaro kivyo ahingura kugira amenye neza abo ashobora kubironsa mu gihe ariko arondera ababimushorera, agenda abigisha akamaro kavyo ku magara y’abantu, rero ngo amata y’isoja arafasha cane cane abantu bakuze kuko ifise umurwi wa ndemamubiri biva mu biterwa, bidafise vya binure bituma  imitsi iziba ngo barware indwara y’umutima, ariko muvyo yatahuye amata yisoja ntasubirira ku bana bagikura amata y’inka canke ayandi yibikoko kuko haba hari ivyo umubiri wabo ukeneye. Salvator Ntirampeba yarongeye aramenyesha ko yize no gukora umusururu ukozwe mu kuvanganya ibinyantete isoja, ingano,ibigori, sesame hamwe n’amasaka, uko bashobora kubivanga ku rugero rwiza bivanye nababwihereza.  Uwo musururu, hamwe nivyo ahingura biva mw’isoja ngo birashobora ku mutunga kuko abamaze kumushorera bose  baguma bamurondera kuko  buryoshe cane. Sarvator Ntirampeba amenyesha  ko isoko yo gushoreramwo ivyo ahingura itamugora, gusa ngo agira ikibazo co kuronka umutahe munini wo kugira ashobore kuronka vyinshi ahingure, ashobore no kugira ikibanza  akoreramwo, kuko ubu abijana ku bamurangura. Salvator Ntirampeba yasozereya atera akamo urwaruka ko gukura amaboko mu mpuzu bakareka kurindira akazi ka Reta, ko bakoresha ubumenyi baronse kw’ishure kuko atanumwe bigishije kugira aje gukora akazi ka Reta canke ko mu biro gusa.

Anitha Bizimana

 

Abenegihugu bahamagariwe guhindura umwakaka aho baba mu kwitegurira umunsi mukuru w’ukwikukira kw’Uburundi

aaaazzzzzaaaaaKugira ngo umunsi mukuru w’ukwikukira kw’Uburundi uze uhimbazwe neza, abarundi basabwa ko mu gisagara no mu gihugu hagati borushirizaho gusukura no gusiga amarangi ku nzu. Ivyo vyashikirijwe n’umukuru wa komite ijejwe gutunganya  iminsi mikuru ku rwego rw’igihugu Zéphyrin Maniratunga mw’itangazo yashikirije abamenyeshamakuru rijanye n’integuro y’uwo munsi mukuru wama uhimbazwa igenekerezo rya 1 Mukakaro uko umwaka utashe. Hari kw’igenekerezo rya 19 Rusama 2020. Nk’uko yabimenyesheje, ngo hazohimbazwa imyaka 58 iheze Uburundi buronse intahe y’ukwikukira ku civugo « Shinga icumu mu mashinga, gaba intahe y’ubugabo ku bugingo » kandi ngo ibirori bizoba ibidasanzwe kuko abarundi bazoba bavuye mu matora biteguriye bo nyene ubwabo ata mfashanyo n’imwe ivuye hanze, ivyo bikaba bitsimbataza intahe yo kwikukira n’ubwigenge bw’igihugu. Ngo buzoba bubaye ubwa mbere hahimbajwe umunsi mukuru wo kwikukira igihugu gifise ingoro y’Umukuru w’igihugu nshasha, gifise kandi Umukuru w’igihugu ari kumwe n’uwuzomusubirira muri ayo mabanga bose bitorewe n’abanyagihugu.  Niko guca amenyesha ko hazoba idefire mu gihugu cose ku mirwa mikuru y’intara kandi igitigiri c’abazogira defile kitazorenga 58 ku mirwi yose. Ikindi naco n’uko hazoba ihiganwa ry’abadefira kubera hategekanijwe agashimwe ku bazogira defile neza, bigasabwa kandi ko abazogira defile bose bazoba bambaye amashati y’ibikwembe. Yaheraheje asaba ko mu gisagaraca Bujumbura no mu gihugu hagati haba kurushirizaho gusukura no gusiga amarangi ku nzu kandi ko ubuzi bwose bworondera amabendera y’igihugu mashasha bukayamanika.

 

Evelyne Niyonzima

 

Abarundi bareretse amakungu ko bikukiye mu kwitorera indongozi nshasha ku mugaragaro no mu mwidegemvyo

peterKw’igenekerezo rya 20 Rusama 2020, abarundi bakwije ibisabwa n’amategeko bazindutse bitaba amatora y’indongozi nshasha.  Ayo matora akaba atandukanye n’ayari amaze gutunganywa mu Burundi kuko yari amatora atatu yabereye mu mwanya umwe, ni ukuvuga : itora ry’umukuru w’igihugu,itorary’abashingamateka hamwe n’itora ry’abajenama b’amakomine.Uburyo bwo gutunganya ayo matora bukaba bwavuye mu ntererano z’abanyagihugu no mu kigega c’igihugu ata mfashanyo zo hanze zirinze gusabwa. Ibimenyeshamakuru vya  Reta n’ivyigenga (amaradiyo, imboneshakure, ibinyamakuru vyandikwa n’ibikoresha imbuga ngurukanabumenyi) bikaba vyaragize urunani mu ntumbero yo gukurikirana uko ico gikorwa cagenze. Umukuru w’umugwi CENI Pierre Claver Kazihise yamenyesheje ko abarekuriwe gutorera aho bageze hose ari : abajejwe umutekano, abamenyeshamakuru, abakozi ba CENI, abakozi barungitswe gukorera ahandi. Aho abamenyeshamakuru bagiye baraca basanze abatora bazindutse, ibiro vy’itora vyuguruye ku masaha kiretse bimwe bimwe aho ibikoresho vyashitse bicerewe. Indongozi nkuru z’igihugu hamwe n’abitoje mu kibanza c’umukuru w’igihugu barashimye ingene amatora yabaye mu mwidegemvyo ntangere, bongera basaba Abarundi kuguma babumbatiye amahoro n’umutekano n’inyuma y’amatora.

Mu ntara ya Ngozi

Amatora y’Umukuru w’igihugu, abashingamateka n’abajenama ba komine ni amatora atandukanye n’ayandi yari amaze kuba haba muri kahise ka hafi n’aka kure ». Ivyo ni ivyashikirijwe n’Umukuru w’igihugu, Petero Nkurunziza, ku wa 20 Rusama 2020, kw’ishure nshingiro ry’i Buye, muri komine ya Mwumba, intara ya Ngozi, aho yari ahejeje kwitorera abagiye kurongora igihugu mu myaka indwi iri imbere ari kumwe n’umutambukanyi wiwe, Denise Nkurunziza. Yamenyesheje ko ikiyatandukanya n’ayo twari tumaze gutunganya ari uko  muri kahise amatora yatunganywa hagiyemwo ukuboko kw’abanyamahanga ariko ay’ubu atunganijwe ku buryo bw’abarundi ubwabo. Ayo matora rero ngo ni amatora agaragaza neza ukwikukira kw’abarundi, eka ngo ni intsinzi y’abarundi ugereranije n’ayandi yabaye muri kahise. Ku bw’ Umukuru w’igihugu, Petero Nkurunziza, uwa 20 Rusama 2020, ni umusi ushitse Abarundi bari bawunyotewe. Eka ngo ni umunsi kandi washitse igihugu kirimwo amahoro n’umutekano, ku mitumba, amakomine n’intara zose zigize Uburundi. Vyongeye, kubona hazindutse umuco, vyerekana intango nshasha igiye kuba mu Burundi. Muri make ngo ni akanyamuneza ku Barundi kubona bazindutse baratora indongozi zizobaja imbere mu myaka indwi  iri imbere hamwe n’imigambi bipfuza ko yoja imbere.Yarakeje Abarundi batewe akamo ko kwitaba urubanza rwo kwitorera indongozi, nabo bakaba bakitavye. Iryo ngo ni ibakwe ridasanzwe baba baronse ryo gutsimbataza umutima wo gukunda no kuzirikana igihugu. Amenyesha kandi ko ayo matora atandukanye n’ayandi igihugu cari kimaze gutunganya, kuko atunganijwe mu ndinganizo y’ibwirizwa Shingiro Imana ifise ikibanza ca mbere, ariko muri kahise siko vyari bimeze. Bisubiye ngo ni amatora atunganijwe ata munyamahanga avuye hanze aje kuyadurumbanya nk’uko vyibonekeje muri kahise.Muri make, ngo ni amatora agaragaza neza ukwikukira kw’abarundi, ngo ni intsinzi y’abarundi ugereranije n’ayandi yose yari amaze kuba mu gihugu. Ayo Amatora ya 2020 kandi ngo ni ay’abarundi, ibizovamwo ni ivy’abarundi bose, ata n’umwe avuyemwo. Yaboneyeho akaryo ko gutera akamo Abarundi ko kutitambika imbere y’ibizoyavamwo, kuko amatora ari intambwe imwe mu buzima bw’igihugu, atari yo abeshaho abantu, ahubwo atuma turonka inzego twipfuza n’imigambi twipfuza, gutyo bigatuma abanyagihugu biteza imbere.Ati : « Abarundi duce ubwenge, twumve neza ko ibizova muri aya matora ari ivy’abarundi bose  na kazoza ko tugasangiye. Inyifatombi yo kwitambika imbere y’ivyavuye mu matora kwari ukutamenya ». Umukuru w’igihugu yarangirije ku mwizero ko inyigisho zo gukunda no kuzirikana igihugu zatumye Abarundi bamenya gutandukanya icatsi n’ururo.  Amatora yayagereranije n’umurimyi aheruka ateragira, bigashika akimbura canke ntiyimbure, aca ahamagarira abahiganywe kumenya ko atawama imbere.Aho kw’ishure nshingiro ry’i Buye, aho Umukuru w’igihugu yatoreye n’umutambukanyi wiwe, hari hishikiye abaserukira ibihugu vya Kenya na Tanzaniya mu ntumbero yo kwirabira uko amatora yariko aragenda. Uwuserukira igihugu ca Tanzaniya mu Burundi, Jilly Maleko yamenyesheje ko aho baciye hose basanze Abarundi benshi bitavye ayo matora kugira basubirize inzego. Amatora ngo yaranzwe n’amahoro, umutekano n’umwidegemvyo. Akaba nawe nyene yaboneyeho akaryo ko kwibutsa Abarundi ko amatora ari ay’abo ku nyungu z’igihugu cabo, abasaba kuzemera ibiyavuyemwo, kuko bayitabiriye ata gahato kagiyemwo, gutyo bakihitiramwo abo bipfuza. Na mugenzi we aserukira igihugu ca Kenya mu Burundi niko abibona. Yamenyesheje ko ayo matora atanga icizere kuko intwaro rusangi iriko iratsimbatara mu Burundi. Aho nawe nyene atera akamo abahiganywe kuzoshira aho intahe ishize, gutyo igihugu c’Uburundi gihurumbirwe n’abagwizatunga, bashinge amashirahamwe, urwaruka rw’Uburundi ruharonkere akazi. Tubamenyeshe ko Umukuru w’igihugu yashitse aho kw’ishure nshingiro ry’i Buye, igihe c’isaha zitandatu, akaba yatoreye mu biro vya mbere, umutambukanyi wiwe mu biro bigira gatanu.Umukandida w’umugambwe CNL, Agathon Rwasa yitoje mu kibanza c’umukuru w’igihugu yaranguriye igikorwa co gutora  muri komine avukamwo, mu kibanza kiri kw’ishure shingiro Ciri,komine Kiremba ari kumwe n’umupfasoni wiwe. Ahejeje gutora yamenyesheje ko atashimishijwe n’uko umuhora ngurukanabumenyi wahungabanye,akaba yateye akamo abayoboke biwe kurindira ibizova mu matora batekanye.Yasavye Abarundi kuguma babumbatiye amahoro n’umutekano.

neverMu ntara ya Gitega 
Umunyamabanga mukuru w’umugambwe CNDD-FDD, Evariste Ndayishimiye yitoje mu kibanza c’umukuru w’igihugu yaranguriye igikorwa co gutora  aho avuka, ku kibanza c’itora co kw’ishure shingiro ryo kw’i Bubu iri muri komine Giheta, ari kumwe n’umupfasoni wiwe. Ahejeje gutora yarashimye ko amatora ariko agenda neza yarasavye Abarundi kwirinda    gutoba ayo matora no kwakira neza ibizova muriyo. Yarongeye amenyesha ko amatora atiharijwe n’abanyamigambwe narirya yararikiwe Abarundi bose babirekuriwe n’amategeko.Mu ntara ya Gitega muri rusangi igikorwa catanguye hagati y’isaha cumi na zibiri n’isaha imwe yo mu gatondo mu gihe abanyagihugu bobo bari bashitse kuva isaha cumi n’imwe kandi bari bamaze kuja ku mirongo nk’uko vyamenyeshejwe n’abakuru b’ibibanza vy’amatora muri iyo ntara. Vyongeye imbere yo gutanguza ico gikorwa abajejwe ibiro vy’amatora bareretse amasandugu y’amatora akuyeko imifuniko yayo ko agaragara, hanyuma barayugara,  bayashira mu bibanza yagenewe, baca barashikiriza indahiro ijanye n’amabanga yabo y’uwo munsi wo  gukorera abarundi badahengamye.Nk’uko abamenyeshamakuru bavyiboneye, ibikoresho vyose ku gikorwa c’amatora nk’ubwiherero, amakarata y’amatora, amaragi n’ibindi vyari bikwiye.Ingingo zijanye no kwubahiriza  isuku mu ntumbero yo kwikingira cakiza  ca coronavirus kigeramiye isi yose zari zubahirijwe. Imbere y’ibiro vy’itora vyose hibonekeza ibikoresho vyo gukaraba, uwuje gutora wese yabanza gukaraba imbere yo kuja ku murongo w’abaje gutora. Abatora bakurikirana mu bwitonzi atawusita  abandi ngo arondere kubaca imbere. Abahejeje gutora baca basubira inyuma kubandanya imirimo yabo ya minsi yose.Ku biro vy’amatora haribonekeje intumwa z’imigambwe CNDD–FDD, CNL, UPRONA, urunani Kira-Burundi, hamwe n’iz’uwigenga Dieudonné Nahimana zari zaje gucungera amatora hamwe rero n’abarorerezi baserukiye amashirahamwe adaharanira ivyicaro vya poritike.Twobamenyesha ko mu ntara ya Gitega igitiri c’abiyandikishe ngo bazotore kingana n’444 668 ibiro vy’amatora bikaba ari 1247 nk’uko vyashikirijwe n’umukuru umurwi ujejwe gutunganya amatora ku rwego rw’intara “CEPI”, Joseph Maniraho. Twobamenyesha kandi ko aho nyene hashoboye gushika abarorerezi bo ku mugabane wa Afrika barungitswe n’ubuserukizi bw’ibihugu vya Kenya, Tanzaniya na Nijeriya.   

Mu ntara ya Cibitoke
Mu ntara ya Cibitoke, amatora yagenze neza muri rusangi n’ubwo hari utunenge twagiye turibonekeza. Abari bategekanijwe gutora muri iyo Ntara bangana n’ibihumbi 290. 187 batorera mu bibanza bishika 823. Igihe c’isaha 12 z’igitondo, imirongo y’abaza gutora yari yamaze kuba miremire ariko amatora henshi akaba yatanguye igihe c’isaha 12 n’iminota 20 kubera ko bamwe mu bagize ibiro vy’amatora baje bacerewe. Mu bijanye n’ibikoresho aho twaciye hose vyari bikwiye kiretse muri komine Mabayi, kuri Lycée Communal Ruhororo, hariho akazu k’itora batari bafise urupapuro baharurirako amakarata batanze y’abitoza mu bajenama ba komine. Muri rusangi, imigambwe n’abigenga bariko barahiganwa muri iyo Ntara bari barungitse ababaserukira mu gukurikirana ingene amatora ariko aragenda. Hariho kandi n’abaje baserukira amashirahamwe yigenga nk’abarungitswe na Ekereziya Gatorika, ishirahamwe MAC hamwe na Fontaine Isoko. Muri iyo Ntara, abitoza mu kibanza c’Umukuru w’igihugu bari abatanzwe n’imigambwe CNDD-FDD, CNL, UPRONA, Sahwanya FRODEBU, Urunani Kira-Burundi, hamwe n’abigenga Francis Rohero na Dieudonné Nahimana. Nayo ku bitoza ku kibanza c’abashingamateka yari imigambwe CNDD-FDD, CNL, UPRONA, FNL, Sahwanya FRODEBU, FRODEBU nyakuri, APDR hamwe n’uwigenga Elie Moses Cishahayo bahiganirwa intebe 6.Icegera ca kabiri c’Umukuru w’igihugu Joseph Butore yatoreye mu Masango, komine Bukinanyana. Ahejeje ico gikorwa yashimiye abanyagihugu baho ku kugene bitabiriye amatora, yongera abasaba kwitegurira kwakira neza ibija kuva muri yo. Icibonekeje muri iyo komine, n’uko ku kibanza c’itora Gahabura, umukozi w’akazu kamwe k’itora yahagaritswe bivanye n’uko yashiriye igikumu uwaje gutora aho atipfuza. Muri komine Buganda naho, hari abantu babiri bafashwe baje gutorera ku ma karata  atari ayabo, ariko bakaba baciye babasubiza inyuma. Ikindi cibonekeje nuko muri komine Rugombo, Mparambo 2 na Munyika 1, hari abaheza gutora bagaca baja kwigishiriza ku mirongo ariko abajejwe umutekano bakaba baciye babirukana. Mu ntara ya Cibitoke, vyibonekeje neza ko bamwe mu bakozi  b’umurwi w’igihugu ujejwe gutunganya amatora CENI, batariko barakwirikirana ibivugwa ku ma radiyo, bigatuma batamenya ivyagiye birahinduka. Mu bibanza bimwe bimwe vy’itora bakaba barengejeko umwanya wagenywe kugira ngo ibiro vy’itora bibe vyugaye. Twobamenyesha ko aho twaciye hose ingingo zo gukinga ikiza coronavirus zitubahirijwe nk’uko zitegekanijwe. Ahari amazi bamwe barakaraba abandi ntibakarabe, ndetse bakaba bari begeranye cane kandi baguma baramukanya bakorana mu ntoke.Sentare nkuru ikukira intara ya Cibitoke, yaraciriye imanza z’ikibiriraho abantu 10 bagiriwe n’ivyaha bijanye n’amatora. Muri komine  Rugombo, uwitwa Nibaruta Clémentine, yagiriwe n’icaha c’ukugerageza gutora akoresheje ikarata y’itora y’uwundi muntu kandi adakwije imyaka.

Uwo nawe akaba yaciriwe ihadabu ry’amafaranga ibihumbi 50 vy’amarundi. Uwitwa Manirakiza Justin nawe, yagiriwe n’icaha c’ugutora akoresheje ikarata itari rwiwe aca acibwa ihadabu ry’ibihumbi 100 vy’amafaranga y’amarundi. Muri komine Murwi, Bigirimana Donatien yagiriwe n’icaha c’ugutora akoresheje ikarata y’itora y’uwundi muntu, akaba yaciriwe ihadabu ry’amafaranga ibihumbi 200 vy’amarundi. Uwitwa Twagirayezu Gustave nawe yagiriwe n’icaha c’ukugerageza gutora atabifitiye uburenganzira, akaba yaciriwe ihadabu ringana n’amafaranga ibihumbi 200 y’amarundi. Muri komine Bukinanyana,  uwitwa Jean  Uwimana, yagiriwe n’icaha c’ugutorera uwundi muntu ku nguvu, akaba yaciriwe ihadabu ry’amafaranga ibihumbi 400 vy’amarundi. Muri iyo komine nyene, Bucumi Lazard na Audace  Niyomuhoza, bagiriwe n’icaha co kwigishiriza ku mirongo bakaba baciriwe umwe umwe ihadabu ry’amafaranga ibihumbi 200 y’amarundi. Muri komine Buganda naho, Tuyizere Francine na Cubwa Pascal bagiriwe n’icaha co gutora akarenze rimwe, bakaba baciriwe ihadabu ringana n’amafaranga ibihumbi 200 umwe wese. Muri Buganda nyene, uwitwa Niyonkuru Jean Marie yagiriwe n’icaha c’ukudakora akazi ajejwe kajanye n’ivy’amatora, akaba yaciriwe ihadabu ringana n’amafaranga ibihumbi 800 y’amarundi.   

Mu ntara ya Kayanza

Umukandida w’urunani Kira-Burundi,Domitien Ndayizeyeyitoje mu kibanza c’umukuru w’igihugu,yaranguriye igikorwa co gutora ku Murago. Ahejeje gutora yasavye umurwi CENI kuzoshikiriza ivyayavuyemwo mu muco.Abarundi nabo yabatumiriye kuzokwakira ivyavuye mu matora batekanye kandi bagume ku mirimo yabo ya minsi yose. Umuhuza w’abarundi nawe Edouard Nduwimana ari kumwe n’umutambukanyi wiwe batoreye kuri ECOFO Kigarama iri ku mutumba Businde komine Gahombo intara ya Kayanza. Yasavye Abarundi kuguma batekanye no kubandanya imirimo yabo. Abanyamigambwe naboyabasavye kwubahiriza ivyo biyemereje bo nyene nk’inyifato nziza itegerezwa kubaranga imbere y’amatora, mu matora nyezina ninyuma yayo. Mu ntara ya Bubanza
Umukuru w’Inama Nshingamateka  Pascal Nyabenda yatoreye ku Musenyiari naho avuka,muri komine Mpanda arikumwe n’umupfasoni wiwe.

Mu ntara ya Bubanza,

igitigiri c’abiyandikishije kugira bazotore kingana n’ 233.964, bagabanganijwe mu biro vy’itora 649. Ku kibanza c’itora co ku mutumba  Kizina, muri komine Gihanga, igihe c’isaha umunani  z’umusase hari hamaze gutora abanyagihugu barenga ibice  80 kw’ijana (80%) vy’abiyandikishije, ni ukuvuga ku biyandikishije 2938 abangana n’2391 bari bamaze gutora.


Mu ntara ya Bujumbura 

Uwashizwe imbere n’umugamwe Sahwanya FRODEBU, Léonce Ngendakumana yatoreye muri komine  Isare.

estaaMu gisagara ca Bujumbura 
Uwashizwe imbere n’umugambwe UPRONA Gaston Sindimwoyitoje mu kibanza c’umukuru w’igihugu,yaranguriye igikorwa cogutora ku kibanza co kw’ishure ryisumbuye rya Nyakabiga,komine Mukaza. Ahejeje gutora yamenyesheje ko yashimye ukugene amatora yabaye mu mutekano, aca asaba umurwi CENI kuvyifatamwo neza. Yavuze kandi ko mw’ihiganwa ryose hama haba uwutsinda n’uwurushijwe, aca asaba Abarundi kuzokwemera ibizoba vyavuye mu matora. Uwigenga Dieudonné Nahimana yitoje mu kibanza c’umukuru w’igihugu yaranguriye igikorwa co gutora mu Kibenga, komine Muha iri mu gisagara ca Bujumbura. Yasavye Abarundi kuguma babumbatiye umutekano barindire ibiva mu matora batekanye.UwigengaFrancis Roheronawe nyene yitoje mu kibanza c’umukuru w’igihugu yaranguriye igikorwa co gutora mu Kinanira, komine Muha,mu gisagara ca Bujumbura. Yasavye Abarundi kuguma bafatanye mu nda.

Mu ntara ya   Makamba  
Mu ntara ya Makamba igikorwa co gutora indongozi nshasha cagenze neza. Ku kibanza c’itora co mu Gakara ku mutumba  Nyankara, zone Nyange, komine Makamba, igikorwa co gutora catanguye isaha cumi na zibiri zo mu gitondo nk’uko vyari bitegekanijwe. Ibikoresho  vyari bikwiye nk’uko umukuru w’umurwi ujejwe gutunganya amatora muri iyo ntara, Philémon Nahabandi yabishikirije  abamenyeshamakuru. Muri iyo ntara hitoje imigambwe CNDD-FDD, CNL,UPRONA, Sahwanya-FRODEBU, urunani Kira-Burundi,hamwe n’abigenga  Dieudonné Nahimana, Francis Rohero. Umukuru wa CEPI Makamba akaba yamenyesheje  ko hibonekeje igitigiri kinini c’abatoreye ku kibanza c’amatora co mu Gakara, muri iyo komine naho atariho bari biyandikishirije kuko  amategeko abarekurira gutorera aho bageze hose mu gihugu.Kuri ico kibanza nyene igihe c’isaha umunani z’umusase n’inusu hari hamaze gutora abantu 982 ku 1319 biyandikishije.

Mu ntara ya  Kirundo
Muri rusangi mu ntaraya Kirundo, abitavye amatora bashitse kare cane mu gitondo ku bibanza vy’itora.N’aho biri uko, abajejwe gutunganya igikorwa co gutora baracerewe gushira mu bibanza ibikoresho vya  nkenerwa mu gutora.Ku bijanye n’ingingo zokwikingiracakiza cacoronavirus,ibikoresho vyo gukaraba vyari bihari.Ku bibanza vy’itora  7 abamenyeshamakuru bashitseko,ku biro vyose vy’amatora hari intumwa z’imigambwe CNDD-FDD, CNL, UPRONA hamwe n’abigenga, hakaba hari n’abarorerezi b’amashirahamwe adaharanira ivyicaro vya poritike nka « Fontaine-Isoko"  n’iz’umurwi wegamiye ishengero katorika ujejwe ubutungane n’amahoro« CEJP" Muri komine Kirundo abanyagihugu ibihumbi 50 nibo bari bitezwe gutora uwo munsi.Abagabo n’abakenyezi,abakiri bato n’abageze mu zabukuru bari bashitse kubiro vy’amatora imbere y’isaha cumi na zibiri zo mu gatondo.

Kw’ishure ry’imyuga rya komine Kirundo,   abaje gutora bari bahashitse isaha  cumi n’imwezirenga iminuta 45 kandi hakibonekeza imirongo miremire. Igihe c’isaha cumi na zibiri n’iminuta 5 niho ibintu vyose vyaja mu buryo, abahagarikizi b’amatora barashikiriza indahiro ko baja kubahiriza amategeko badahengamye.Ku kibanza c’itora co kw’ishure nshingiro Bushaza cari kigizwe n’ibiro 3 vy’itora,baribashizeho indobo z’amazi kugira abaje gutora bashobore gukaraba,mu ntumbero yogukinga ca kiza ca coronavirus. N’aho biri uko, hari bamwe mu baje gutora batakaravye.Ku kibanza c’itora ca ECOFO Kanyinya, ibintu vyari vyifashe kumwe,abaje gutora bari batonze ku mirongo kandi begeranye cane. Ku kibanza c’itora  co kw’ishurenshingiro ryegemiye idini rya iba Islamu, hariho ibikoresho vyo gukinga ikiza cacoronavirus, mbere n’abajejwe gutunganya amatora bari bambaye udutambara dufuka umunwa n’amazuru  muntumbero twabigenewe. Twobamenyesha ko muri komine Kirundo abiyandikishije bose kugira batore bangana n’ 54.963 baribategekanijwe gutorera mu bibanza vy’amatora 39, bigizwe n’ibiro vy’itora bingana n’156.

Mu ntara ya Cankuzo
Ikibanza c’itora c’ishure ryisumbuye rya komine Cankuzo cari kigizwe n’ibiro vy’itora 8. Hari hitezwe abatora bangana n’2860. Igikorwa co gutora  caracerewe iminuta iri hagati ya 10 na 25 ku biro bimwe bimwe vy’amatora.Iruhande y’imigambwe CNDD-FDD, CNL na UPRONA yari yaharungitse intumwa, hari n’umurorerezi w’umurwi w’abavugabutumwa b’ishengero katorika baharanira ubutungane n’amahoro CEJP.Mu ntara ya Cankuzo yose hari hitezwe abitaba amatora bangana n’154.701.Muri komine Cankuzo hari ibiro vy’itora 21  bigabanganijwe mu bibanza vy’itora 6.Imigambwe CNDD-FDD, CNL, UPRONA yari yaharungitse  intumwa zo gucungera ico gikorwa co kimwe n’uwigenga Dieudonné Nahimana. Hariho kandi n’abarorerezi b’amashirahamwe adaharanira ivyicaro vya poritike.Ku kibanza c’itora co c’ishure ryisumbuye rya komine Cankuzo  hari  uwaje gutora yafashwe ahejeje gutabura ikarata y’itora aca ajanwa kuri parake  ya Cankuzo kugira bamwumvirize.

Mu ntara ya Ruyigi
Ku biro vy’amatora vyose  abamenyeshamakuru bashitseko muri komine Ruyigi,basanze batanguye ico gikorwa igihe c’isaha cumi na zibiri zo mu gitondo,ndetse hakaba hari hibonekeza  imirongo miremire mu masaha y’igitondo.Ku bibanza vy’amatora 6 vya komine Ruyigi bagendeye basanze ibikoresho bikwiye.Barahasanze kandi abarorerezi b’amwe mu mashirahamwe yo mu gihugu hagati adaharanira ivyicaro vya poritikeNk’ishengero ry’ubutumwa bushingiye ku mpuhwe muri Afrika MAC inama y’abepisikopi mu Burundi (CECAB) hamwe na « Fontaine-Isoko », n’intumwa z’imigambwe CNDD-FDD,CNL, FNL, z’abakandida bigenga nka  Francis Rohero na Dieudonné Nahimana.Gushika isaha zitandatu z’umusase ibiro vyose vyari bimaze kwakira igice c’abiyandikishije. Nk’uko vyashikirijwe n’abajejwe ibiro vy’amatora amajwi y’abatumye ababatorera ngo yashobora gutera ibibazo kubera ko bayategekanirije abantu batarenga 20.

Mu ntara ya Rumonge 
Ku kibanza c’itora co kw’ishure ryisumbuye rya Rumonge  ku mutumba Rukinga,  igikorwa cogutora catanguye  isaha cumina zibiri n’iminuta 40.Ku biro vy’itora 3 vyo kw’ishure nshingiro ryaGatete nk’igihe c’isaha zitanu hafi abiyandikishije ngo bazotore  bari bamaze kurangura ico gikorwa, ni  ukuvuga abantu 333 kuri 360 biyandikishije.Umupfasoni Claudette Munezero yatoreye aho mu Gatete, bwari ubwa mbere arangura ico gikorwa co gutora, yaragaragaje umunezero kuba afise uburenganzira bwo kwitorera indongozi kandi akaba yabikoze mu mwidegemvyo no mu mutekano ntangere. N’uwitwa Eric Hatungimana yashimye ukungene ayo matora yagenze neza.Mu ntara ya Rumonge yose hari hitenzwe abazitaba amatora bangana n’239 429 bari bagabanganijwe mu bibanza vy’itora186 hamwe n’ibiro 690. Imigambwe CNDD-FDD, CNL,Sahwanya-FRODEBU, FNL, FPN Imboneza  co kimwe n’inani z’imigambwe zibiri (KIRA-Burundi et COPA) abigenga babiri, Ezéchiel Ndayishimiye na Jean Pierre Niyongabo,bari baharungitse intumwa zo gucungera ico gikorwa.Muri zone Buruhukiro,ku kibanza c’itora co kw’ishure nshingiro Gitwe,igikorwa co gutora cagenze neza. Igihe c’isaha zitandatu hibonekeza abantu bake ku mirongo, kuko  benshi mu bari bitezwe kuhatorera bari barangije ico gikorwa basubiye ku mirimo yabo ya minsi yose.

Mu ntara ya Muramvya 
Ku kibanza c’itora co kw’ishure nshingiro ryo mu Kibumbu, komine Mbuye igihe c’isaha zitanu z’umurango  ku biyandikishije  350 abashika  216 bari bamaze kurangura igikorwa co gutora. Mbere isaha cumi zo ku mugoroba bose bari bahejeje gutora. Naho biri uko hari umugabo yafatanywe amakarata y’itora ashika kw’icumi  kuri  iryo shure nyene.

Mu ntara ya Mwaro
Mu ntara ya Mwaro, abiyandishikije kugirango bazotore bangana n’154.952 bagabanganijwe mu bibanza vy’itora 142 n’ibiro vy’itora 459. Ku bibanza  bimwe bimwe vy’itora igikorwa co gutora catanguye gitevye gatoya kubera ibikoresho bimwe bimwe vyacerewe kuhashika na cane cane irangi rikoreshwa ku bahejeje gutora. Intumwa z’imigambwe CNDD-FDD, du CNL, de l’Uprona, du FNL, hamwe n’urunani   Kira-Burundi niho zari zashitse gukurikirana ingene ico gikorwa kiriko kiragenda.Eka n’abarorerezi b’amashirahamwe adaharanira ivyicaro vya poritike nka AJAP, Fontaine Isoko n’ishirahamwe rikukira abagatorika CEJP bari ngaho.

Ku kibanza c’itora cokw’ishure ry’intango Bugera, muri komine Ndava,abitavye igikorwa co gutora bari bahashite imbere y’isaha cumi na zibiri zo mu gatondo.Muri ico kibanza bari bashizeho ibikoresho vyo gukaraba mu ntumbero yo kwikingira ikiza ca coronavirus.Muri komine  Nyabihanga, ku birovy’itora vya Kivuzo, hari umuntu yafashwe afise amakarata y’itora menshi.Muri komine Bisoro harahagaritswe umuntu yari afise ikarata irikoumwidondoro  udahuye n’uwuri kw’ikarata  karangamuntu yiwe, baca baja kumugirako itohozwa. Muri rusangi abanyagihugu bo mu ntara ya Mwaro barazindutse kare ku bibaza gutora ku buryo isaha zitandatu z’umusase ibice 60 kw’ijana   vy’abari bitezwe bari bahejeje gutora, basubiye kumirimo yabo. Isaha cumi zo kumugoroba bakaba bari batanguye guharura ivyavuye mu matora.

Mu ntara ya Bururi 
Amatora y’indongozi nshasha yagenze neza  mu ntara ya Bururi mu bibanza abaserukira ururani rw’ibimenyeshamakuru rwagendeye, n’aho hagiye haribonekeza umwumvikano muke wari hagati y’abarongoye ibiro vy’amatora n’abanywanyi b’imigambwe imwe imwe ihiganwa cane cane ku rwego rw’umukuru w’igihugu. Aho tukavuga cane cane umugambwe CNL na hamwe hamwe umugambwe Sahwanya FRODEBU na UPRONA. Abanyagihugu bakaba batanguye gutora hakiri kare ku buryo isaha cumi zo ku muhingamo ata bantu bari bakiri ku mirongo ku biro nka vyose vyo muri komine Bururi. Naho biri uko, ku biro vy’amatora bimwe bimwe, habaye gucerwa iminota mikeyi mu gutangura gutora.Ikindi abarorerezi b’imigambwe imwe imwe banebaguye n’uko hari aho bemerera abarorerezi kwinjira batevye.Aho twaciye kw’ishure shingiro rya Kiremba ya mbere hari hategekanijwe ko hatorera abantu 1466  bagabanganije ku biro vy’itora 4Kw’ishure shingiro rya Kiremba ya kabiri naho hari hategekanijwe gutorera abantu bangana  1351 bagabanganijwe ku biro vy’itora 4Kw’ishure ryisumbuye rya Kiremba-Sud naho hari hategekanijwe gutorera abantu 837  bagabanganije mu biro vy’itora 3Kw’ishure shingiro rya Buta naho hari hategekanijwe ko hatorera abantu 800  bagabanganijwe mu biro vy’itora 2. Kw’ishure ryisumbuye rya komine Nyabigega zone Muzenga, hari hategekanijwe gutorera abantu 1684 bagabanganijwe kubiro vy’itora 5Kw’ishure shingiro rya Munini muri zone Munini, ku biro hari hategekanijwe abantu bangana 667. Hari abarorerezi b’imigambwe CNDD-FDD, Uprona, n’uwigenga Dieudonne Nahimana. Ku biro bigira kabiri aho hari gutorera abantu bangana 332, igihe c’isaha zitandatu z’umutaga hari hamaze gutorera abantu biyongereye ku banditsweho bangana 44.Kw’ishure shingiro rya Buhinga naho hari ibiro vy’amatora bibiri.Ku biro vya mebre, hari hategekanijwe gutorera abantu 360.Igihe twahaca isaha zitandatu z’umutaga harri hari hamaze gutora abangana 236 harimwo n’abiyongerako bangana 18. Ku biro vya kabiri hari hategekanijwe gutorera abantu bangana 357.Twasanze hamaze gutorera abantu bangana 200.Kw’ishure shingiro rya Karimbi hari hategekanijwe gutorera abantu bangana  1599 bagabanganije ku biro vy’itora 4.Ku biro bigira akabiri ahari hategekanijwe gutorera abantu bangana 450, twahaciye isaha zitandatu hamaze gutora abashika 384 harimwo abiyongerako bashika 42.  Ku biro vy’amatora bigira gatatu hari hategekanijwe gutorera abantu bangana 384, ayo masha nyene hari hamaze gutora abashika 333 harimwo abiyongerako bangana 40. Ku biro bigira kane hari hategekanijwe gutorera abantu bangana 380, hakaba hari hamaze gutorera abashika 291 isaha indwi z’umutaga.Kw’ishure shingiro rya Kabuye hari ibiro vy’amatora bishika 6.Hari hategekanijwe gutorera abantu 2146.Ku biro vya mbere hari hategekanijwe gutorera abangana 359, twahaciye hamaze gutora abantu bangana 270 harimwo abashika 50 biyongereyeko.Ku biro vy’amatora bigira kabiri hari hategekanijwe gutorera abantu bashika 358 hakaba hari hamaze gutora abangana 263 harimwo abiyongerako bangana 50. Ku biro vy’amatora bigira gatatu hari hategekanijwe gutorera abantu bangana 358 hari hamaze gutora abangana 272 harimwo abiyongerako 50 gushika isaha indwi. Ku biro bigira kane naho hari gutorera abantu bangana 358 hakaba hari hamaze gutora abantu bangana 277 harimwo 50 barengako.Ku biro bigira 5 naho hari hategekanjwe gutorera abantu bangana 358 hakaba hari hamaze gutora abashika 255 harimwo 50 biyongerako. Ku biro bigira gatandatu hari hategekanijwe ko hatorera abantu bangana 355 hakaba hari hamaze gutorera abashika 248 harimwo abiyongerako bangana 50, aho hakaba ahari igihe c’isaha 10 z’umuhingamo. Kuri ivyo bibanza vy’itora, imigambwe CNDD-FDD, CNL, UPRONA, Sahwanya FRODEBU, urunani Kira Burundi, yari yaharungitse intumwa ziyiserukira co kimwe n’abigenga Dieudonné Nahimana, Francis Rohero. Hariho kandi abarorerezi b’amashirahamwe adaharanira ivyicaro vya poritike nka CEDJ, MAC, CEAR, na  Fontaine Isoko.Twobamenyesha ko igihe co mu gitondo hari hahagaritswe abantu bashika batanu b’umugambwe CNL kubiro vy’amatora vyao kw’ishure ryisumbuye rya  komine Kiremba bagirizwa ko bariko barigishiriza ku mirongo. Muri bo bane bakaba bahavuye barekurwa. Abo bane kandi bari bafise uruhusha rwo guserukira umugambwe CNL nk’abarorerezi, bakaba mbere baciye barekurirwa kubandanya igikorwa cabo. No ku biro vya mbere vyo kw’ishure shingiro rya Karimbi, abarorerezi b’umugambwe CNL barasohowe bagirijwekobashatse guhungabanya ibikorwa vy’itora. Hari n’uwurongoye ibiro vy’amatora kw’ishure ryisumbuye rya  komine Kiremba yafatanywe amakarata y’amatora, akaba yaciye ahagarikwa n’inyamiramabi. Abaporisi n’abasirikare baherutse kwinjira mur’izo nzego batoye bakoresheje urupapuro rw’akazi kandi bakaba batoreye ku biro bitandukanye kubera koku biro vyose batarenza abantu 50 biyongerako. Aho twaciye hose, twasanze umuryango ujejwe gutabara imbabare mu Burundi (Croix Rouge) bari bategekanije ibikoresho vyo gukaraba (isabuni n’amazi).
Uranani rw’abamenyeshamakuru

 

Ibikorwa vyo gusibura ishami rya mbere ry’uruzi Rusizi biri mu vyihuta kugira Gatumba ikingirwe

Mu bikorwa vyihuta vyo gukingira zone ya Gatumba, muri komine ya Mutimbuzi, intara ya Bujumbura ngo n’uko hoba ibikorwa vyo gusibura ishami rya mbere ry’uruzi Rusizi ryo ku rubibe ruhana n’igihugu ca Kongo kubera ko uno munsi ishami rya kabiri ry’urwo ruzi Rusizi ariryo rikora gusa. Ariko ingingo yoza itorera umuti ikibazo c’umwuzurira wibonekeza muri iyo zone, ngo n’uko hoba ukwimura abantu babaye aho hantu, ariko iyo ngingo ngo yosaba uburyo bwinshi Reta na cane cane mu gushumbusha abafise inzu zikomakomeye hamwe no kwubakira abafise amikoro make. Ivyo ni ivyashikirijwe n’icegera c’umuyobozi mukuru w’igiporisi kijejwe gukinga ibiza, akaba kandi n’umunyamabanga nshingwabikorwa w’urwego rw’igihugu rujejwe gukinga ibiza no gutabara abo vyashikiye, OPC1 Anicet Nibaruta, ku wa 19 Rusama 2020, hari mu kiganiro yahaye ikinyamakuru UBUMWE, inyuma yaho imiryango irenga 9000 yateshejwe ivyayo kubera umwuzurira wibonekeje muri zone ya Gatumba kubera amazi y’uruzi Rusizi yabateye mu mihana iwabo.

Mu bikorwa vyihuta vyo gukingira zone ya Gatumba, muri komine ya Mutimbuzi, intara ya Bujumbura ngo n’uko hoba ibikorwa vyo gusibura ishami rya mbere ry’uruzi Rusizi ryo ku rubibe ruhana n’igihugu ca Kongo kubera ko uno munsi ishami rya kabiri ry’urwo ruzi Rusizi ariryo rikora gusa. Ariko ingingo yoza itorera umuti ikibazo c’umwuzurira wibonekeza muri iyo zone, ngo n’uko hoba ukwimura abantu babaye aho hantu, ariko iyo ngingo ngo yosaba uburyo bwinshi Reta na cane cane mu gushumbusha abafise inzu zikomakomeye hamwe no kwubakira abafise amikoro make. Ivyo ni ivyashikirijwe n’icegera c’umuyobozi mukuru w’igiporisi kijejwe gukinga ibiza, akaba kandi n’umunyamabanga nshingwabikorwa w’urwego rw’igihugu rujejwe gukinga ibiza no gutabara abo vyashikiye, OPC1 Anicet Nibaruta, ku wa 19 Rusama 2020, hari mu kiganiro yahaye ikinyamakuru UBUMWE, inyuma yaho imiryango irenga 9000 yateshejwe ivyayo kubera umwuzurira wibonekeje muri zone ya Gatumba kubera amazi y’uruzi Rusizi yabateye mu mihana iwabo.Nk’uko Anicet Nibaruta yabandanije abishikiriza, ngo mw’ijoro ryo ku wa 19 rishira uwa 20 Ndamukiza 2020, amazi y’uruzi Rusizi yarataye inzira kubera yabaye menshi aza gutera imihana yo mu Gatumba. Ico gihe, ngo baharuye imiryango irenga 7000 yataye ivyayo, aho benshi muribo inzu zari zabomotse badafise aho bakika umusaya. Imiryango 148 muri iyo ngo bayijanye mu Maramvya, mu kibanza bita “mafubo”, iyo miryango ngo barayironkeye aho iba, mu nzu zubatswe zihabwa ubushikiranganji bwo gufatana mu nda, izo nzu zikaba zubatswe n’ikigega co gushigikira amakomine FONIC. Iyindi miryango ngo bayisize mu kigwati c’amahoro, aho naho ngo hari abantu bari barubatse inzu, ariko zibaka zari zimaze imyaka irenga 5 benezo bataraza kuzibamwo, iyo miryango izibayemwo nk’intizo.

Imiryango irenga ibihumbi 9 niyo yateshejwe ivyabo n’imyuzurira mu Gatumba
Ku wa mbere Rusama 2020, amazi y’uruzi Rusizi yarasubiye kandi gutera abanyagatumba, aho kuri ya miryango irenga 7000, hiyongereyeko iyindi, uno munsi igiporisi kijejwe gukinga ibiza, giharura imiryango irenga 9000 yateshejwe ivyabo, muri zone ya Gatumba, muri komine ya Mutimbuzi, mu ntara ya Bujumbura. Iyo miryango yose ngo yegeranirijwe mu bibanza bitatu arivyo Kinyinya ya mbere, aho hari imiryango 2320, kuri iyo ngo hariho imiryango 185 yashoboye kuronswa uburaro bwubatswe n’umuryango utabara imbabare, aho hasigaye imiryango 2135. Mu kibanza cahahoze ishirahamwe Sobel, mu Maramvya ngo hariyo imiryango 496, iyindi miryango 1841, iri mu Kigaramango. Iyo miryango yegereranirijwe mu Kigaramango, ngo bafise intumbero yo kubimurira mu Maramvya kubera ari ikibanza kitabereye kubamwo, aho n’akazu kasurwumwe bidashoboka ko bakimba kubera amazi ari hafi cane. Ibanki Bancobu ikaba yaratanze uburyo bwo kwubaka uburaro bw’imiryango 600 y’abantu bazoba bakuwe aho mu Kigaramango. Kuva ivyo vyago bishikira abanyagatumba, ngo Reta ibicishije ku mushikiranganji w’umutekano, ku wa 21 Ndamukiza 2020, ari kumwe na mugenzi we w’intwaro mu gihugu hagati, yaragiye kugarukira kuri iyo miryango yitwaje agakemanyi ahanini ko kugarukira ku bibondo n’abavyeyi yitwaje amata, ibisuguti n’ibindi bifungurwa. Aho kabaye n’akaryo ko gutera

akamo ababishoboye ko kugarukira kuri abo banyagatumba bashikiwe n’ivyago.

Inzego za Reta, abikorera ivyabo n’amashirahamwe mpuzamakungu yaragarukiye kubanyagatumba
Ako kamo k’umushikiranganji w’umutekano ngo karitabwe, kuko ibisata bitari bike vya Reta  vyarakitavye. Aho akavuga ubushikiranganji bwo gufatana mu nda, ubw’amagara y’abantu, ubw’indero, intara ya Cibitoke, amakomine 8 agize intara ya Bujumbura havuyemwo iya Mutimbuzi yashikiwe n’ivyo vyago, abakozi bakuru bakuru b’imvukira z’intara ya Bujumbura, abikorera ivyabo, nk’ishirahamwe rihungura umwavu w’ikizungu FOMI, ishirahamwe rihingura amabati n’ivyuma vyo kwubaka, ishirahamwe ryo gutwara imizigo DHL, iryo ryoryo ngo rikaba ryaje incuro zibiri, umugwizatunga yitwa Lionel Uwintwari hamwe n’umuririmvyi yitwa “Champagne”, abo bose ngo baraje kugarukira kuri iyo miryango bitwaje agakemanyi kagizwe n’ibifungurwa, abandi ivyo kwipfuka, ibikoresho vyo gukinjika no kubika amazi. Haruhande y’ivyo bisata vya Reta n’abagwizatunga, ngo n’umugambwe uri ku butegetsi CNDD-FDD, nawo nyene wararungitse intumwa zaje zirongowe n’umunyamabanga mukuru wawo, bitwaje imfashanyo igizwe n’ibifungurwa n’impuzu. Eka n’amashirahamwe mpuzamakungu yegamiye ishirahamwe mpuzamakungu ONU nayo nyene yaragize ico afasha, muri ayo akavuga PAM, OIM, OCHA, n’ayandi. Ishirahamwe rijejwe ibifungurwa kw’isi PAM ryoryo ngo ryatanze ibifungurwa vy’amezi abiri ndetse n’umuryango utabara imbabare ukaba wafashije gutunganya ibibanza vyo kwakira abo bantu no kwubaka uburaro. Eka ngo n’urwaruka rwo mw’isengero katorika ryo mu Maramvya narwo nyene rurafise ivyo rwatanze kugira rugarukire kuri abo banyagatumba. Kubw’icegera c’umuyobozi mukuru w’igiporisi kijejwe gukinga ibiza, OPC1 Anicet Nibaruta, ngo kubona iyo mirwi yose yaragarukiye kuri abo bantu, vyerekana umuco mwiza w’abasokuru wo gufashanya mu bihe bigoye.

Ubushuhe bw’amazi y’ibahari Indiyano niyo yatumye hagwa imvura y’umurengera
Ku kibazo co kumenya aho ayo mazi yateye abanyagatumba yazananye, kubwa OPC1 Anicet Nibaruta, aragaruka ku mvura nyishi yibonekeje mu myaka ya 2015 n’uw’2016, iyo myaka ngo twaronse imvura nyishi. Abahinga batanze insiguro y’uko hari habaye ihindagurika ry’ubushuhe bw’amazi mw’ibahari “pacifique”. Ariko ngo uno mwaka, aho ikigo kijejwe gutegekanya ivy’ibirere n’imiyaga IGEBU, ngo mu kwezi kwa Gitugutu umwaka w’2019, bari bamenyesheje ko igihugu c’Uburundi kizoronka imvura nyishi ku bice vyinshi vy’igihugu, aho akavuga intara kama z’Imbo, Bututsi hamwe n’intara kama ya Mugamba ko zizoronka imvura nyishi, ngo uko babivuze niko vyagenze.Ivyo rero ngo vyatumwe n’ihindagurika ry’ubushuhe bw’amazi mw’ibahari Indiyano, Uburundi nabwo ngo bukaba bwegereye iryo bahari kuko kuva I Burundi gushika i Dar Es Salaam ngo hari ibirometero birenga gato 1000. Amazi  y’iyo bahari ubushuhe bwaraduze kuva ku biharuro biri munsi ya -0,4°C bija kuri 2°C, urwo rugero ngo ni runini cane, ayo mazi ashushe kubera imiyaga iva muri iyo bahari, ngo ituma hibonekeza imvura nyishi, ni ico yise mu rurimi rw’icongereza “Indian Ocean Dipole”, IOD mu mpfunyapfunyo. Iyo mvura ngo isumba iyo mu myaka ya 2015 n’uw’2016 kubera iyo miyaga iva mw’ibahari itwegereye. Iyo mvura ngo ntiyigeze itanga agahengwe kuva mu kwezi kwa Gitugutu 2019 gushika mu kwezi kwa Ndamukiza 2020, ubu muri Rusama ngo niho itanguye guhera. Ayo mazi yose ngo aca yegerana azanywe n’inzuzi zisuka mu ruzi Rusizi akongerezwa n’inzuzi ziva mu buseruko bw’igihugu ca Kongo. Izo nzuzi zisuka muri Rusizi ngo nizo zituma rwuzura, rugaheza rukihereza imihana y’abanyagatumba, inkorerezi ngo cabaye ikiyaga Tanganika naco nyene cariko kiraduga. Uturere twabangamiwe ni Kinyinya ya mbere na Kinyinya ya kabiri hamwe na Mushasha ya mbere na Mushasha ya kabiri.

Akarere ka Gatumba kari n’ibintu kisangije
Akarere ka Gatumba ngo kari n’ibintu kisangije, ni igice c’Uburundi kiri mu kiyaya c’Imbo, ni akarere kandi kari hasi cane ndetse n’abantu bahabaye hadatunganijwe. Vyongeye, ngo ikiyaya c’Imbo kibangamiwe kandi n’imisozi igihanamiye aho ata biti biteyeko, gutyo amazi akamanukana umurindi munini n’isuri igizwe n’isi ndimwa itwagwa n’inkukura. Iryo suri rica rija mu nda y’uruzi rikagoma, bigatuma amazi aca arenga inkombe zarwo. Ikindi ngo kuva mu magume yo mu mwaka w’1993, ngo ni akarere kakiriye abantu benshi ndetse ngo kikaba naco gituma habaye imyuzurira hononekara vyinshi. Kera ngo uruzi Rusizi rwari rufise inzira imwee, aho rwaca ku rubibe duhana n’igihugu ca Kongo. Abazungu b’ababirigi ngo nibo baciye inzira ya kabiri, bitumwe n’uko uruzi Rusizi amazi yarwo yaja kwonona imirima y’ibikaju, ivyo navyo vyafasha guhingura isukari mu karere ka Kiriba Ondesi. Ishami rya Rusizi ya kabiri, ni rirya abantu bajabuka bagiye mu Gatumba hari igitarurwa kinini. Mu bintu bihanze Gatumba rero ngo n’uko ikikijwe n’izo nzuzi zibiri.

Ivyokorwa kugira bakingire Gatumba
Ivyihutirwa, ngo n’uko hoba gusibura ishami rya Rusizi ya mbere ryo ku mupaka duhana na Kongo kuko uno munsi ngo hakora ishami rya kabiri, ariko haca amazi yose y’uruzi Rusizi, ivyo ngo vyofasha amazi aciye muri ayo mashami abiri. Mu mwaka w’1962, ngo abanyagatumba barigeze guterwa n’umwuzurira, Reta y’ico gihe ngo yaciye yimura abahaba ibajana ahandi. Eka ngo Gatumba si akarere ko kwakira imiryango y’abantu, inyishu irama ngo kwoba ukwimura abantu bahabaye. Ariko ngo iyo ngingo iragoye kubera ko hari abantu bubatse inzu zikomeye, vyokenerwa ko bashumbushwa, abandi nabo ngo nta mikoro bafise, vyosaba ko Reta ibubakira aho bokwimurirwa.Ibikorwa vy’imfatakibanza vyokorwa, ngo n’uko hoba uguca imikobeko ku misozi ihanamiye ikiyaya c’Imbo, igaterwako ubwatsi n’ibiti bifata isi ndmwa kugira ntibandanye itwagwa n’inkukura. Ikindi ngo hoba gutunganya neza Gatumba, bagaca imifurege itwara amazi avuye ku mazu hamwe nayoba avuye mu Rusizi kugira agume atemba, aja mu kiyaga Tanganika.   

Déo Misigaro                                                                                       

 

ANSS: Abagendana umugera wa Sida barashoborora kwubakana n’abakomeye

Umugera wa Sida ntukiri uko twari tuwuzi mu myaka iheze, aho abayirwaye binubwa, bagacirwa umukenke. Ubu umurwayi wa Sida abana n’abandi, asangira n’abandi no kwubaka   arubakana n’uwukomeye ntamwanduze kandi bakavyara n’abana bakomeye. Ivyo vyameshejwe na Léonie  Nizigiyimana  asanzwe  akora mu gisata co gukurikirana abana b’imiyabaga n’urwaruka mu kigo  ANSS citaho abagendana umugera wa Sida mu kiganiro yahaye ikinyamakuru Ubumwe kw’igenekerezo rya 13 Rusama 2020.Umugera wa Sida ntukiri uko twari tuwuzi mu myaka iheze, aho abayirwaye binubwa, bagacirwa umukenke. Ubu umurwayi wa Sida abana n’abandi, asangira n’abandi no kwubaka   arubakana n’uwukomeye ntamwanduze kandi bakavyara n’abana bakomeye. Ivyo vyameshejwe na Léonie  Nizigiyimana  asanzwe  akora mu gisata co gukurikirana abana b’imiyabaga n’urwaruka mu kigo  ANSS citaho abagendana umugera wa Sida mu kiganiro yahaye ikinyamakuru Ubumwe kw’igenekerezo rya 13 Rusama 2020.Intumbero nyamukuru y’ikigo ANSS ngo ni ugufasha abagendana umugera wa Sida abo aribo bose, abana n’abakuze. Umuntu wese yipimishije, bagasanga afise umugera wa Sida  aca aja mubo bita abanywanyi ba ANSS, bagaheza bagafashwa umwe wese muvyo akeneye kuko hari abo usanga bifise badakeneye gufashwa mu bijanye n’imfungurwa,uburaro canke amafaranga y’ishure ariko ugasanga bakeneye imfashanyo y’umutima kugira bakire iyo ndwara, bamenye  no kubana nayo.Mu gihe umurwayi agendana umugera wa Sida  atishoboye  mu bijanye n’uburyo bwo kubaho baramufasha kwivuza ,kumufungurira  bagafasha n’abana biwe baba barwaye umugera canke batarwaye.

Hari abana usanga abavyeyi babo barapfuye ariko bari abanywanyi b’ikigo ANSS, abo  rero baguma bafashwa baba barwaye canke batarwaye,n’abana bavukana n’abarwaye umugera wa Sida  barafashwa mu bijanye no kwivuza, kwiga  bakongera bakabashikiriza ubushikiranganji  bwo gufashanya kugira babunganire muvyo badashoboye. Gufasha abo bantu rero ngo si ibintu vyoroshe ngo kuko nk’umwana usanga yavukanye umugera  agaca atangura kuja ku miti biragora cane kumutahuza igituma afata umuti kuva avuka kuko haragera igihe akagarariza akanka kunywa imiti   akabaza igituma adakira ngo ayihagarike. Abandi bana bagora cane  ni abana b’imiyabaga baba bari mu myaka itoroshe baba bashushe bashaka gukora ivy’abandi bana bangana  bakora ugasanga bagiye muvyo kunywa inzoga, urumogi, ubusambanyi n’ibindi.  Abo rero ngo nibo bitwararika rwose kugira babigishe  ingene bitwara mu buzima bwa minsi yose no kubana n’abandi. Hari n’abana usanga  barambiwe n’ubuzima babayemwo kuko imiryango ibatunze ibinuba, babafata nabi aho usanga umwana arwaye  adashobora gusangira n’abandi bana, ntibaryamane mbere no gukina bakamwankira ko bakina ngo yohava abanduza canke ugasanga imiryango yabasigaranye ngo ibarere ibarirako ibisigi abavyeyi babasigiye  ntihagire na kimwe ibafasha canke ugasanga umwana ava mu muryango aja mu wundi. N’aho biri uko rero, Léonie Nizigiyimana arashima ukuntu ubuvuzi buguma butera imbere ku buryo umuntu agendana umugera wa Sida ashobora kubakana n’uwukomeye  mu gihe babigiye inama. Mu bisanzwe, ngo iyo umurwayi wa Sida afata imiti neza nk’uko muganga yabimutegetse haragera igihe umugera uba utakiboneka ku buryo yipimishije atawo batora. Muri ico gihe arashobora kubana n’uwukomeye kuko naho bohuza ibitsina batikingiye ntashobora kwanduza. Ariko rero baramusaba ko abimubwira agafata ingingo abizi mbere akaronswa n’inyigisho kugira azomube hafi amwitwararike ku buryo atokwigera yibagira gufata umuti.Yaragarutse ku kuntu abantu batacitwararitse ikiza ca Sida nk’uko umenga ntikiriho. Yaribukije rero ko SIDA ikiriho, ko bobandanya bikingira bakitwara neza bagakingira n’abandi. 

Ikiza ca coronaviruskirakarira cane abagendana umugera wa Sida
Mu kigo ANSS rero ngo ntibasize inyuma inyigisho zijanye no kurwanya umugera wa coronavirus  kuko abantu bagendana umugera wa  Sida ibakarira  kuruta abandi .Iminsi yose imbere y’uko batangura ibikorwa bahera ku  nyigisho y’ukungene ifata n’uko boyikingira. Twobamenyesha ko  mu cegeranyo co mu mpera y’ukwezi kwa Ndamukiza  2020, ikigo ANSS cari gifise abanywanyi bagendana umugera  bagera ku 3565.Muribo abakuze 2211,abana  barwaye 759; 442 batararonka inyishu ,utwana tukivuka  tutarapimwa  142,  n’abatarwaye  umugera wa Sida 11  Mu kurangiza,yarateye akamo abavyeyi kwijukira gupimisha imiryango yabo cane cane iyo harimwo umwe mu muryango arwaye hanyuma basanze harimwo uwanduye akamushikana kwa muganga akavurwa adatezura kugira umugera nturinde kumusinzikaza ngo agire  za ndwara z’ivyuririzi. Si abo gusa yahamagariye abantu bose kwipimisha umugera kuko ntawumenya aho awandurira.Yaboneyeho akaryo ko gutera akamo abagabo kuko ngo ntibakunda kwipimisha canke kwivuza bavuga ngo umugore yipimishije biba bikwiye ariko ngo sivyo nagatoya. 

Joselyne Ndayegamiye                                                                        

 
Ouvrir