Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Mu ntara ya Ngozi : Abarundi basabwa kwisuzuma ingeso zabo baheze basubire ku Mana

DSC 0033ggggAbarundi basabwe kwisuzuma, basarangure ingeso zabo, gutyo bagaruke ku Mana. Eka ngo bakwiye kwihana ivyaha, ubwiyorobetsi, ubusuma, ubusambanyi, n’izindi ngeso mbi zose. Muri ico gihe, ngo ivyo bazosaba bazoheza babironke. Izo ni zimwe mu nyigisho zatanzwe n’umutambukanyi w’Umukuru w’igihugu, Denise NKURUNZIZA, ku wa 2 Ndamukiza 2017, mu misa yo guhimbaza Imana mu rushengero rw’urutare rw’i Buye, imisa yari yitambwe n’Umukuru w’igihugu, Petero NKURUNZIZA.Nk’uko umutambukanyi w’Umukuru w’igihugu, Denise NKURUNZIZA yabandanije abishikiriza afatiye ku vyanditse mu gitabu co gucura intimba, ikigabane ca 3, umurongo wa 40, abarundi yabateye akamo ko kwihana bagaruke ku Mana. Muri ico gihe, ngo inzuzi z’ubugingo zizodudubiza mu barundi. Mu gihe, amezi atatu atangura umwaka yarangiye, ngo ni akaryo keza ko kwisuzuma barabe ivyo batahuye mu nyigisho baronse muri ico kiringo cose. Eka ngo abarundi bakwiye kwiha ikibazo co mu mutima, bakisuzuma, bagasarangura ingeso zabo muri ico kiringo c’amezi atatu aheze. Mu gihe abarundi binjira mu mashengero bacafuye, ngo nivyo bituma ibitangaza bidakoreka. Ariko ngo nibigarura bakihana, bakiyeza, ngo ivyo bakeneye bazobironka. Abarundi rero baterwa akamo ko kwihana kubera ngo atawuzi umunsi n’isaha, ngo nivyiza kwihana bakiri bazima. Eka ngo umuntu yihana agihumeka, na kare ngo umuntu niwe yisabira imbabazi akiri muzima. Muri Zaburi ya 50 naho, ngo ico Imana ivuze iragishitsa. Umuntu wese ari mu bikorwa bitagororotse, ngo Imana irateba ikamugaragaza. Eka ngo twihisha amaso y’abana b’abantu, ariko Imana yoyo ivyo turimwo vyose iba ibibona. Mu migani igice ca 29, ngo ibicumuro vyose birangana imbere y’Imana, nta gitoya nta gikuru. Imana ngo ni umuvyeyi, ntigihaniraho,kuko Yezu yaratanze ikiguzi. Kuri ivyo, ngo kwihana rero ni uwu musi Imana itaratugaragaza kubera ivyaha vyacu. Mw’ibaruwa Paulo yandikiye abakorinto, aravuga neza ko ari twe two kwisuzuma kubera ko ari twebwe nyene tuzi ivyo dukora, ariko ngo Imana yoyo irabizi. Ivyaha ngo nivyo bituma dusoma ijambo ry’Imana ntituritahure. Mu gitabu ca Yoweli igice ca 2 umurongo w’12, haranditswe ko dukwiye kwisonzesha kugira duhebe ivyaha vyanse ko duheba. Imana ngo ni munyakigongwe, uwugiye ayigana iramubabarira, eka ngo ibiganza vyayo vyama vyuguruye. N’umwana w’icangazi yarisuzumye arigaya araheza aragaruka kandi ngo yarakiriwe. Vyongeye kubera imbabazi zayo, ngo twigaruye itwakira uko turi kwose, na none ngo amaherezo y’inzira ni mu nzu. Mu cete canditswe na Yohani igice ca 21, kuva ku murongo w’8 gushika ku w’9, aravuga ko kwatura ivyaha imbere y’Imana uba uriko uravavanura na shetani, kuko ngo uba usa n’uwuyimeneye ibanga. Muri Matayo igice ca 26, umurongo wa 20, haranditse ukuntu Yuda yagurishije umwana w’Imana amadenariyo 30. Yuda amaze kubona uko bariko barafata Yezu, yarageze ahantu ngo aricuza ataco agikiza, aho yahavuye asubiza y’amadenariyo. Icigwa twokuramwo rero ngo ni uko twokwihana, twimenye uko turi ngo ntituzoheza ngo dutsindwe n’urubanza.

Déo Misigaro

        

 

Ngo abanyeshure batera umudugararo muri kaminuza y’Uburundi bazohanwa hisunzwe amategeko ayigenga

CAM00116 mmmmmUmuyobozi wa Kaminuza y’Uburundi, Gaspard Banyankimbona amenyesha ko abanyeshure bariko batera uruhagarara muri kaminuza y’Uburundi bazohanwa hisunzwe amategeko ayigenga. Mbere anasaba abanyeshure cane cane bo mu mwaka wa mbere kudafata inzira mbi yo guhagarika ivyigwa kuko ngo ingaruka z’iyo ngendo igayitse bazozibona. Asaba abigisha bose ba kaminuza kwitaba imirimo yabo uko bisanzwa kuko ngo ivyigwa bitazohagararara. Ivyo yabishikirije kuwa 3 Ndamukiza 2017, mu kiganiro yahaye abamenyeshamakuru, mu biro vyiwe. Ico kiganiro cabaye inyuma y’aho bamwe mu baserukira abanyeshure ba kaminuza barungikiye urwandiko Umukuru w’igihugu bamenyesha ko bazohagarika ivyigwa mu gihe itegeko inomero 100/18 ryo ku wa mbere Ruhuhuma riraba ivyo gutanga imfashanyo ku banyeshure ba kaminuza ritofutwa. Muri ico kiganiro Gaspard Banyankimbona arongoye kaminuza y’Uburundi yibukije ko inyuma y’aho hasohowe itegeko inomero 100/18 ryo ku wa mbere Ruhuhuma 2017 riraba ivyo gutanga agafashanyo ku bagomba kwiga ngo haciye haboneka icuka kitameze neza mu banyeshure ba kaminuza y’uburundi ngo n’abandi banyeshure bo mu yandi makaminuza ya Reta. Ngo uburongozi bumaze kubona iryo tegeko bwaciye burirungikira abo vyega bose harimwo n’abanyeshure. Ngo mu nyuma yaho abarongoye ibisata muri kaminuza n’abayobozi bose baciye bakorana kugira ngo hafatwe ingingo zotuma ico cuka kibi kihava. Ngo urwo rwego rwaciye rwiyemeza gusigurira abanyeshure bimwe bimwe biri muri iryo tegeko. Ngo uwuserukira abanyeshure yaciye yandikira uburongozi bwa kaminuza kugira ngo butange insiguro yerekeye iryo tegeko. Ngo itariki 24 Ntwarante 2017 ngo hari abiyitiriye abaserukira abanyeshure ba kaminuza baciye bandikira Umukuru w’igihugu bamenyesha ko bagiye gutegura imyiyerekano. Ariko ngo vyaragaraye ko urwo rwandiko rwarimwo amahinyu menshi. Gaspard Banyankimbona yavuze ko benshi mubasinye kuri iryo kete batari bazi ibiri muri iryo kete. Ngo barahenzwe. Ngo amazina amwe ntagira imikono uretse ko bashirako inomero za terefone, abandi nabo bagasinyirwa n’abandi. Eka mbere ngo hari n’abanyeshure basanze ivyo bakorewe atawe babitumye kuko hakoreshejwe ibikumu vyabereye mu yindi nama. Umukuru wa kaminuza Gaspard Banyankimbona muri ico kiganiro yamenyesheje ko hazokorwa amatohoza kugira ngo uwagiriwe n’icaha ahanwe hakurikijwe amategeko agenga kaminuza. Ikindi rero uwo muyobozi yavuze ngo abanyeshure bo mu myaka ya mbere ni bo bariko barahendwa. Niko kubasaba ko batojana nyabahururu. Ku bwa Gaspard Banyankimbona avuga ko muri kaminuza hari imirwi itatu y’abanyeshure. Ngo hari abasanzwe bataronswa ako gafashanyo ariko bo ngo bagira bati «nimba ako gafashanyo kodushikira nibakaduhe» ngo hari umurwi ugira kabiri urimwo abaronka agafashanyo ariko bataba muri kaminuza. Ngo kubera ubuzima buzimvye ubu ngo nabo nyene babona iyo mfashanyo hari ico yosahiriza kuri bo. Ngo hari umurwi ugira gatatu ari wo ugizwe n’abanyeshure baronka ako gafashanyo kandi bakaba mu ndaro abo rero ngo ni bo baterekwa iyo mfashanyo ije muri ubwo buryo. Abo rero ngo bashika hafi ibihumbi bitatu kandi biroroshe kubakoresha kuko baba hafi na hafi. Ariko rero ngo abo banyeshure ntibohagarika inyungu z’abanyeshure ba kaminuza bose barenga hafi ibihumbi mirongo ine. Abamenyeshamakuru baciye babaza ibibazo. Bashatse kumenya nimba abo banyeshure ataboba bariko barabakoresha.Eka mbere baribajije nimba uwerekanye ko atari muri ivyo baca bamureka. Hari ngo n’abandi bafashwe n’igisata c’iperereza nimba batoba bafashwe kubera izo imvo. Aha umukuru wa kaminuza Gaspard Banyankimbona yishuye ko atavyo yoca amenye ko hari aboba bariko barabakoresha. Ariko rero ngo abanyeshure baza muri kaminuza bose barenza imyaka cumi n’umunani ngo umwe wese ashobora guhanirwa icaha yakoze ku giti ciwe. Ngo uwerekanye ko atari muri vyo ntaco baramuvugako kuko bisaba gutohoza neza. Ngo aboba barafashwe n’iperereza si kaminuza yabikoze kuko ata busho bwategekanijwe muri kaminuza. Eka mbere ngo kuba umunyeshure wa kaminuza afatwa agapfungwa ngo ntivyoba bibaye ubwa mbere ngo na kera ivyo vyamyeho aho mu gihe abanyeshure baba bariko barakurikirana ivyigwa abandi baba bapfunzwe.

Nathan Ntahondi

 

Umurindi w’irwirirana ry’abantu mu Burundi ngo uzotuma haba ingaruka mbi ku bidukikije

kanyanaUbushikiranganji bujejwe ibidukikije n’ituganywa ry’amatongo n’ibisagara bwaratunganije inama ku wa 31 Ntwarante 2017 kugira hemezwe icigwa kijanye n’ihindagurika ry’ibihe mu Burundi. Aho hari kugira Uburundi bushire mu ngiro ivyavuye mu nama mpuzamakungu yerekeye ihindagurika ry’ibihe igira 17.Umuhinga yagize ico cigwa, Jean Marie Sabushimike yamenyesheje ko ari ikintu kiriho kandi ingaruka zaryo rigaragara ku vyerekeye ibisata bigize ubuzima bw’iihugu. Yabandanije asigura ko kubera ihindagurika ry’ibihe usanga imirima yonononekaye, indwara z’ivyaduka zigatera mu gihugu, amabarabara n’inzu bigasidagurika. Ngo ico cigwa carerekanye ko ihindagurika ry’ibihe ririho kandi ribangamiye igihugu. Sabushimike yaramenyesheje ko ku vyerekeye irwirirana ry’abantu, hatagize igikorwa rizoshobora gutuma ihindagurika ry’ibihe rigira ingaruka kurusha uko biboneka muri iki gihe. Ngo ivyigwa bitandukanye vyarerekanye ko, irwirirana ry’abantu riri ku rugero ruteye ubwoba. Ngo uriko uraraba ibiharuro vyari vyitezwe ugaca uraba n’ibiheruka gushirwa ahabona muri Gitugutu 2016, aho abarundi bashitse ku miriyoni 11 n’ibihumbi amajana 200, ivyo biharuro bikaba vyari vyitezwe muri 2025. Sabushimike yamenyesheje ko ivyo vyigwa vyakozwe vyerekana ko abarundi bazoba bageze ku miriyoni 25 mu mwaka wa 2050, ngw’aho naho k’ubuzima bw’igihugu ni hirya y’ejo. Yabandanije amenyesha ko iryo rwirirana ry’abantu rikenewe gucungerwa kuko niryo rituma isi ndimwa igabanuka, abantu bakagerera ahadashoboka, bigatuma amashamba agabanuka, ugaca usanga n’ubutunzi bw’igihugu ntibwifashe neza, bigaca bigorana ingene abantu biteza imbere.

Aline Kanyana

 

Akaranga k’intwaramiheto ngo kagereranywa n’igitinyiro c’intambwe

wwwwpoUmukuru w’igihugu,Petero NKURUNZIZA amenyesha ko akaranga k’intwaramiheto kagereranywa n’igitinyiro c’intambwe.Ivyo yabishikirije mu cigwa yashikirije mw’ishure kaminuza ry’intwaramiheto ISCAM, ku wa 7 Ndamukiza 2017, mu bikorwa vyari bijanye n’indwi ubumenyi n’imico kama mw’ishure kaminuza ISCAM. Prezida NKURUNZIZA, akaba yararonse akaryo ko kwibutsa intwaramiheto z’Uburundi ko zisabwa gukomeza umuryango narirya ariwo bagize muri urwo rwego. Ico kigo ngo ni umuryango kuko ngo abashaka gusambura canke kugirira nabi igihugu bahera ku miryango. Izo nyigisho zatunganijwe ku civugo nyamukuru kivuga kiti: « Winjira mu kibira utazi, ugaca inkoni utazi ». Nk’uko umuvugizi w’igisirikare, koroneri Gaspard Baratuza yabandanije abishiriza, ngo abasirikare bagize umuryango, ngo bategerezwa kuwushigikira, kuwukorera ku buryo ata kintu coza kiwusenyura. Ikindi ngo ku bijanye n’akaranga k’umusirikare, ngo ufatiye ku vyambarwa vyiwe na cane cane ku nkofero aho hariko umutwe w’intambwe, abasirikare ngo ni intare, bategerezwa kugira umutima nk’uw’intare no kubaho nk’intare. Intare rero ngo ntinuranura, igendera mu zindi ntare ndetse ngo aho iba nta tundi dukoko duto duto tuza kuharunguruka. Umukuru w’igihugu, Petero NKURUNZIZA akaba yavuyeho abemereye ko mu kwezi kwa Ruheshi azoja kuremesha ikindi kiganiro kijanye n’intahe yo kwikukira, kukaba nkako, ngo urwo rwego nirwo shimikiro y’intahe yo kwikukira. Tubamenyeshe ko yasozereye urugendo mw’ishure kaminuza ry’intwazangabo mu gisirikare atera igiti, ikimenyetso c’uko yifatanije nabo mu ndwi yahariwe ubumenyi n’imico kama.

Igisirikare cubatse neza gishingira ku nyigisho zikwiye ku ntwazangabo

Igisirikare cubatse neza gitegerezwa gushingira ku nyigisho zibereye, akaba ari muri iyo ntumbero kaminuza ya gisirikare ISCAM ngo ihamagariwe kwigisha intwazangabo zishoboye kurangura imirimo yose zishinzwe mu gisirikare c’Uburundi. Ivyo vyamenyeshejwe n’Umukuru w’ingabo z’Uburundi Liyetena jenerari Prime Niyongabo ku wa 3 Ndamukiza 2017 mu birori vyo kwugurura icese indwi yahariwe ishure kaminuza Iscam. Yarongeye amenyesha ko mu bisirikare vyose vyo kw’isi intwazangabo itegerezwa kurangwa n’indero, gukunda igihugu, kwubaha abamukurira, kutagira aho ahengamiye muvya poritike, gukora yumvikana n’abo bari kumwe hamwe no kwubahiriza agateka ka zina muntu n’ibindi mu ntumbero yo kubera akarorero keza abo ajejwe gutegeka. Ngo nico gituma ata ntwazangabo n’imwe irekuriwe kuyoberwa ayo mateka ku rugero urwo arirwo rwose afise. Ngo intwazangabo rero zitegerezwa kwamiza ku muzirikanyi ko igisirikare c’Uburundi kizokomera koko mu gihe hari ubwiyunge mu gisirikare kandi ari naho kizosayangana mu makungu. Ibiganiro vyashikirijwe muri iyo ndwi ngo vyatowe mu ntumbero yo gufasha igisirikare c’Uburundi kuba ic’ igihugu koko. Umukuru w’ishure kaminuza Iscam nawe, Grégoire Ndorarigonya yamenyesheje ko igisirikare c’Uburundi ngo gitegerezwa kwubahiriza ubwiyunge hagati yaco, kutagira aho cegamiye mu vya poritike hamwe no kurangura imirimo kijejwe kitaravye nkunzi nk’uko biri mu ngingo y’256 y’Ibwirizwa Shingiro. Yarongeye amenyesha ko icivugo c’uwu mwaka ari: «Ukutagira aho cegamiye mu vya poritike niyo nyifato ngenderwako ku gisirikare cose kigomba gukorera igihugu no ku neza y’abanyagihugu ». Ico civugo ngo catowe baravye intumbero y’iryo shure kaminuza ISCAM yo guharanira ubuntu, ubwigenge mu vya poritike bibereye abantu bategurirwa kuzorongora abandi no gukingira imbibe z’igihugu nk’uko biri mu ngingo y’253 y’Ibwirizwa Shingiro. Naho biri uko ngo abari mu nzego z’umutekano barafise uburenganzira bwo kuronswa ubumenyi ku vyerekeye ubuzima bw’igihugu mu vyo imibano na poritike no kuronswa inyigisho zo gukunda igihugu. Ngo muri iyo ntumbero ubuyobozi bwa Iscam bufadikanije n’ubushikiranganji bw’intwaro hagati mu gihugu n’inyigisho zo gukunda igihugu bwaratanze inyigisho zo gukunda igihugu kuva ku wa 5 gushika ku wa 7 Kigarama 2016 aho muri Iscam. Muri iyo ndwi rero ngo hararmeshejwe ibiganiro bitandukanye hamwe n’inkino hagati y’abanyeshure bo muri Iscam hamwe n’izindi zabahuje n’imigwi yo haze nko mu mupira w’amaguru aho bahuye n’umurwi wo muri zone Musaga ,komine Muha. Ibirori bikaba vyarangiye ku munsi wa gatandatu hatanzwe n’udushimwe ku bababaye aba mbere. Arashima kubona iryo shure ribayeho haraheze imyaka 42 rimaze gusohora intwazangabo 1.800. Mu mwaka uheze naho ngo ryakiriye abanyeshure bashika 109 bo mu murwi wa 47, mbere rikaba ryakira n’abanyeshure baturuka mu bihugu vya Afrika y’ubuseruko kuva mu mwaka w’2012 kandi uwo mugambi ukaba uzobandanya. Bisubiye ngo iyo kaminuza iriko irakurikiza ukugene inyigisho zitunganijwe mu zindi kaminuza ku vyerekeye impapuro z’umutsindo za BMD. Aho agashimira indongozi mu gisirikare zashizeho umuwi wo kuraba ukugene ibwirizwa ryo ku wa 30 Kigarama 2011 ritunganya ukundi gusha inyigisho muri kaminuza ryoshirwa mu ngiro.

Epitace Nduwayo

na Déo Misigaro

                                                                                                            

 

Abadandaza basabwa gukora ibishoboka vyose kugira umwimbu w’ibiterwa mbumbarugo bigiye kwimburwa hamwe n’ikawa ntuherere mu bihugu vyo mu karere. Eka ngo bokwirinda no gukora urudandazwa rudaciye mu mategeko kubera ababikora vyerekana ko badafise umutima

loiutAbakozi bajejwe gutunganya ibigo vyo gusoma no gutsimbataza imico kama (Clac) basabwa guhimiriza no gukundisha abanyagihugu ivyo bigo. Ivyo vyashikirijwe n’umushikiranganji w’urwaruka, inkino n’imico kama Jean Bosco Hitimana igihe bari baramutse basozera inyigisho nkarishabwenge bari bamazemwo iminsi mu ntara na komine ya Gitega. Hari kw’igenekerezo rya 31 Ntwarante 2017. Nk’uko umushiranganji w’urwaruka inkino n’imico kama yabimenyesheje mw’ijambo ryiwe, ngo intumbero y’izo nyigisho kwari ugukarihiriza ubwenge abakozi bose bajejwe ivyo bigo, kubahimiriza no guhimiriza abakozi bose guhindura ingendo mu gukunda ibikorwa no kwitaho imirimo bajejwe y’igihugu, gutanga ivyegeranyo vy’ukuri vy’irangurwa ry’ibikorwa vyabo ku gihe gitegekanijwe n’amategeko, gukunda igihugu biciye mu kugikorera. Yaranamenyesheje ko muri uwo mwanya w’izo nyigisho kabaye akaryo keza ku bazikurikiranye kuko bahakuye ubumenyi butandukanye buzobashoboza kurangura imirimo yabo kurusha uko bahora. Yasavye abaronse izo nyigisho kuzoshira mu ngiro impanuro bahawe mu guhimiriza no gukunda abanyagihugu ivyo bigo kuko bazohakura ubumenyi butari buke bikazogirira akamaro igihugu. Ikindi yamenyesheje ngo ni uko uwo mugambi wo guhimiriza abakozi kugira ngo bahindure ingendo uterekeye ubwo bushikiranganji gusa ariko ko abakozi bose bo mu bisata vyose vy’ubuzima bw’igihugu batewe akamo ko kwiyamiririza ingendo ivuga ngo Reta iguhenda ko iguhemba nawe ukayihenda ko uriko urakora. Umwe wese rero ngo harageze ko ahindura inyifato akabona ko atezwa imbere n’ibikorwa akora, ivyo navyo ngo bigashoboka igihe umuntu wese akunze akazi akora kandi akagakora neza. Yaheraheje asaba abari bahejeje kuronka izo nyigisho guhindura ingendo kugira abandi bazobafatireko akarorero keza yongera ashimira abatanze izo nyigisho n’abazikurikiye bose. Kuri uwo munsi nyene kabaye n’akaryo keza ku barongoye ibigo vy’iyandikiro ry’ibinyamakuru Burundi eco iyandikiro ry’ibinyamakuru vya Reta (PPB), bemeye kugiriranira amasezerano yo gufashanya n’ikigo Cebulac ko gushikiriza amajambo ku bijanye n’ingene bagiye gukorana. Nk’uko umuyobozi mukuru w’iyandikiro ry’ibinyamakuru Ubumwe na Renouveau Louis Kamwenubusa yabimenyesheje, ngo mu kigo ajejwe, mu makuru bandika harimwo ibijanye n’inkino, imico kama n’indero, ivyo navyo bikazobafasha kuko ari navyo bifasha urwaruka. Yarongeye amenyesha ko hambavu yaho ivyo binyamakuru vyahora bishikira n’ico kigo kigiye kubironka atamafaranga batanze ariko ko nk’igihe ibintu vyogenda neza muri ico kigo (Cebulac) bokwibuka bakabafasha nabo mu buryo ubwo ari bwo bwose. Ikindi catumye bagiriranira ayo masezerano ngo ni uko mu bihe biheze abantu bagiye bararonka amakuru atariyo ari naco gituma bashatse amakuru asanzwe yandikwa n’ico kinyamakuru ashikira abantu biciye mu bushikiranganji gutyo babone amakuru atuma biteza imbere, urwaruka narwo rugakunda imico kama. Icatumye ubwo bucuti rero ngo ni ukugira ayo makuru aronke abantu benshi bashoboka. Louis Kamwenubusa yaranamenyesheje ko bibabaje ku kuntu usanga ibinyamakuru bisanzwe bitangwa mu makomine ariko ugasanga vyuzuyeko ibitangurirwa n’iyindi micafu bivuye ku kuntu bidasomwa, aca asaba ko ivyo binyamakuru vyoja ahantu hari abipfuza kubisoma bakeneye amakuru. Yarongeye asaba guhimiriza abo barongoye na cane cane aho bizoshikira ko abantu basoma ivyo binyamakuru bobifata neza kuko ari amakuru yerekana iterambere, imico kama, inkino, hamwe n’ibivuga ubuzima bw’igihugu, ivyo navyo ngo bigafasha urwaruka kubona ico rwokora. Ngo hambavu y’ivyo binyamakuru Ubumwe na Renouveau barafise n’ahantu hari ibitabu vyanditse amakuru yabaye kuva kera hamwe n’ayariko araba ubu, aca yongera asaba umushikiranganji ko yorungika abayobozi bakaza bakicarana bakaraba ico bofashanya kugira batezanye imbere bongere bafashe n’abandi bantu kwiteza imbere, amakuru agashika hanini kandi atari ibihuha. Umuyobozi w’ikigo Cebulac nawe Jean Bosco Nzigamiye nawe yarashimiye abo bayobozi b’ivyo binyamakuru, yongera avuga ko ico kigo cahora gikoresha amafaranga angana n’imiriyoni 11 kugirango bashobore gutanga ivyo binyamakuru, ivyo rero ngo bikazotuma bibaremurira mu buryo bwahora bukoreshwa n’ico kigo. Yaranamenyesheje ko bagiye gukoresha ubuhinga bugezweho mu bijanye no gutanga inkuru. Twobamenyesha kandi ko kw’igenekerezo rya 1 Ndamukiza 2017 komine Gitega yatanze inyubakwa kugira ngo ikigo ca clac gishobore gukora muri iyo komine. Bakaba baciye bagirako baha imfunguruzo z’iyo nyubakwa umushikiranganji w’inkino n’imico kama baca bongera bahakorera ibikorwa rusangi kugira bahasukure.

Evelyne Niyonzima

 

Mu ntara ya Ngozi : Abadandaza basabwa kwirinda kumarira umwimbu w’Uburundi mu bihugu vyo mu karere

qmqmqmAbadandaza basabwa gukora ibishoboka vyose kugira umwimbu w’ibiterwa mbumbarugo bigiye kwimburwa hamwe n’ikawa ntuherere mu bihugu vyo mu karere. Eka ngo bokwirinda no gukora urudandazwa rudaciye mu mategeko kubera ababikora vyerekana ko badafise umutima wo gukunda igihugu. Ivyo ni bimwe mu vyavugiwe mu nama Umukuru w’igihugu, Petero NKURUNZIZA yagirishije abakozi bakuru bakuru bo mu bigisata vy’ubutungane, ubutunzi, intwaro ibereye, abo mu nzego z’umutekano hamwe n’abadandaza bo mu ntara zitanu ziri ku mipaka y’ibihugu bisangiye imbibe n’Uburundi, arizo Kayanza, Ngozi, Kirundo, Muyinga na Cankuzo aho bavuganye ibijanye n’urudandazwa rw’ikawa hamwe n’ubutare, hari ku wa 3 Ndamukiza 2017, muri komine Marangara, intara ya Ngozi. Nk’uko icegera c’umuvugizi w’Umukuru w’igihugu, Alain Diomède Nzeyimana yabandanije abishikiriza, ngo muri iyo nama barabiye hamwe muri rusangi ubuzima bw’igihugu. Mu gihe abadandaza b’abarundi bitaho cane inyungu zabo, Umukuru w’igihugu yaragarutse kuri bimwe vyo kugarukira akaranga n’imico kama vy’abarundi, ico yise « moralisation de la société ». Ivyo rero ngo birashobora gufasha kubera ko abadandaza b’abarundi bitwara nk’abadakunda igihugu. Bisubiye, ngo bibonekera ku rudandazwa rudaciye mu mategeko bakora, aho usanga bashira imbere inyungu zabo. Urwo rudandazwa rudaciye mu mategeko ngo ni ubusuma mu bundi, eka ngo baba berekanye ko ata mutima wo gukunda igihugu bafise. Mu gihe hagiye gutangura igikorwa co kwamura ikawa ndetse n’ibiterwa mbumbarugo bigiye kwera, abo badandaza basabwa kwirinda guhereza umwimbu w’Uburundi mu bihugu duhana imbibe. Ku ntureka igihugu caciyemwo mu mwaka w’2015, ngo igihugu c’Ububirigi caragize uruhara muri ivyo bikorwa kubera ko Uburundi bwari bugiye gucukura ubutare. Ivyo bavuga vy’ibiringo, ngo cari icitwazo kubera ko no mu bihugu dusangiye imbibe ivyo vy’ibiringo ntibivugwa. Ku bijanye n’itegeko rigenga igisata c’ubutare, iryo tegeko ngo rimeze neza ku buryo igihe bazotangura gucukura ubutare «Nickel» i Musongati, ngo hazoba harimwo n’amafaranga yo kwubaka amashure, amavuriro hamwe n’amabarabara atandukanye harimwo n’ayindarayi. Iryo tegeko ngo ryararwanijwe gushika ndetse ngo Uburundi bukaba bwaritwaye kandi buratsinda, ubu ngo burindiriye indishi y’akababaro. Mu gisata c’ubutungane, ngo amategeko y’Uburundi aratomoye, hadakoreshejwe igitabu c’amategeko mpanavyaha ngo hashobora gukoreshwa amategeko duhuriyeko yo mu karere ka Afrika y’ubuseruko. Vyongeye, ngo nivyakenerwa amategeko azohinyanyumwo kugira ivyo kumarira umwimbu w’Uburundi mu bihugu duhana imbibe bihagarikwe. Abarongoye ikigo gishasha kijejwe gukurikirana ibijanye n’ubutare OBM bari bayitavye. Umukuru w’igihugu yarabavuniye urugohe ko inzahabu zo mu Burundi zishorerwa mu bihugu duhana imbibe zimaze gushirwako ibiranga ivyo bihugu, ngo bituma ivyo bihugu vyizigirwa n’abarwizatunga, gutyo bigatuma bazana imitahe muri ivyo bihugu nyene. Ivyo rero ngo bisa no kwisamburirako. Nk’abadandaza, Umukuru w’igihugu yabateye akamo ko gukora ibintu bizotuma abarundi n’abarezi babafashije gushika ku ntambwe bagezeko baguma babibuka. Tubamenyeshe ko imbere yo kugirisha iyo nama, yabanje kwugurura icese inyubakwa y’amakoraniro iri ngaho ku murwa mukuru wa komine Marangara.

Déo Misigaro

                                                                                                

 
Ouvrir