Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Mu kwezi kwa Myandagaro ngo Ishure ry’imyuga ryo mu Kigobe rizoba ryaronse abigisha babinonosoye

bnghInama Nkenguzamateka ihagarikiwe n’Icegera ca mbere c’Umukuru w’Inama Nkenguzamateka Spes Caritas Njebarikanuye yaratumiye umushikiranganji w’akazi n’abakozi Félix Mpozeriniga kugira asigurire abakenguzamateka ibijanye n’ingene amashure y’imyuga atunganijwe n’ingene akora, bakaba bashimikiye ahanini kw’ishure ry’imyuga riri mu Kigobe muri komine Ntahangwa. Hari kw’igenekerezo rya 28 Ruheshi 2017. Imbere yuko umushikiranganji abisigura, uwurongoye umurwi wamaho uraba ibibazo vy’imibano, inkino n’imicokama mu Nama Nkenguzamateka, yatanguye amenyesha ibijanye n’urugendo uwo murwi wagize mu kigo c’imyuga co mu kigobe. Muvyo yamenyesheje ngo basanze hariho ibibazo bijanye n’ubukene bw’abigisha babishoboye kandi banonosoye ivy’imyuga hamwe n’ubukene bw’uburyo. Abakenguzamateka baciye babaza ico ubushikiranganji buriko burakora kugira iryo shure rironke uburyo ndetse n’abigisha babishoboye. Umushikiranganji akaba yaciye yishura ko basanze mu gihugu cose abarimu bafise mu mashure y’imyuga atabariho bafise ububasha n’ubushobozi bwo kuja kwigisha muri ico kigo. Ubu rero ngo bariko baritunganya kugira abo barimu babizi kandi babishoboye bazobe bashizweho bitarenze mu kwezi Myandagaro. Abakenguzamateka barabajije kandi n’ikibazo kijanye n’urupapuro rw’umutsindo abanyeshure bazoronka kandi ko abazorangiza murico kigo bashobora kwiga mu mashure ya kaminuza. Umushikiranganji akaba yaciye amenyesha ko bazoronka urupapuro rwitwa(Diplôme professionnel spécialisé) nayo ngo ivyo kubandanya amashure ya kaminuza ngo nta tegeko rihari ribemerera kuzobandanya iyo kaminuza. Abakenguzamateka barabajije n’ibindi bibazo bijanye n’ibindi bigo vy’imyuga bidakora kandi bifise ibikoresho bikwiye, baca basaba ko ivyo bigo vyokugururwa ibikoresho birimwo bigakoreshwa ico vyagenewe. Barasavye kandi ko hobaho urwego ruhuza ubushikiranganji n’amakomine kugira ngo amashure y’imyuga ari mu makomine ashobore gutangura ibikorwa yongere akore neza. Twobamenyesha kandi ko imbere yuko umushikiranganji aza kwishura ivyo bibazo, Inama Nkenguzamateka yari ihejeje kwiga integuro y’ibwirizwa y’ingingo z’ibihugu bigize akarere ka Afrika y’ubuseruko zijanye no gukingira ubuzima bw’ibiterwa n’ibitungwa bikazofasha igisata c’uburimyi n’ubworozi kurwiza umwimbu. Umushikiranganji w’uburimyi n’ubworozi Déo Guide Rurema niwe yari yagiye gusigurira abakenguzamateka ibijanye niyo nteguro. Bimwe muvyo yamenyesheje, ngo nuko ibihugu vyo mu karere kagize Afrika y’ubuseruko bigiye hamwe bigafata ingingo zimwe bizotuma uguhanahana imbuto z’ibiterwa n’ibitungwa harimwo no kubikingira ngo vyokoroha. Ikindi twobamenyesha nuko iyo nteguro y’ibwirizwa yemejwe ijana kw’ijana.

Evelyne Niyonzima

Nshimirimana William

(Uwimenyereza)

 

Ishirahamwe PNUD rigiye kubandanya rifashanya n’Uburundi mu bisata bitandukanye

durqIshirahamwe mpuzamakungu rijejwe iterambere PNUD rigiye kubandanya imigambi ryiyemeje kurangura mu Burundi mu bisata vy’amagara y’abantu, uburimyi n’ubworozi, indero, iterambere rirama kandi ridakumira. Iryo shirahamwe risabwa gufasha mu bikorwa vyo gufasha abanyagihugu mu gikorwa co guhingura umusesekara w’umwimbu kugira ushobore kubikika. Ivyo ni bimwe mu vyavugiwe mu mubonano, Umukuru w’igihugu, Petero NKURUNZIZA yahaye uwujejwe gutunganya ibikorwa mu mashirahamwe yegukira ishirahamwe mpuzamakungu ONU akongera agaserukira ishirahamwe PNUD mu Burundi, Garry Conille, ku wa 30 Ruheshi 2017. Nk’uko icegera c’umuvugizi w’Umukuru w’igihugu, Alain Diomède Nzeyimana yabandanije abishikiriza inyuma y’uwo mubonano, ngo Umukuru w’igihugu yamusavye ko iryo shirahamwe PNUD ryofasha mu gikorwa co guhingura umwimbu w’umusesekara, nko ku vyamwa bakabihinguramwo nk’imitobe. Uwo agiye guserukira ishirahamwe PNUD mu Burundi akaba yaravyemeye ko bagiye kubifashanyamwo n’abo vyega bose. Ku bwiwe, Garry Conille yamenyesheje ko ishirahamwe PNUD rigiye kubandanya imigambi ryiyemeje kurangura mu Burundi. Iyo migambi nayo ikaba ari iyo mu bisata vy’amagara y’abantu, uburimyi n’ubworozi, indero n’iterambere rirama kandi ridakumira. Mu gisata c’uburimyi, ngo iterambere ryoza ryisunga gukingira ibidukikije hamwe no gukwiragiza udusoko ntanganguvu duto duto kugira dufashe guhingura umwimbu w’umusesekara. Ivyo ngo bisanzwe bikorwa no bindi bihugu, ndetse ngo ninayo nzira kugira igihugu gishike kw’iterambere vyihuta.

    Déo Misigaro

                                                                                                   

 

Abajejwe gutegura amategeko agenga isoko rusangi rya EAC basabwa kunyarutsa ico gikorwa

loloUmukuru w’igihugu, Petero NKURUNZIZA atera akamo abajejwe iyinjira ry’Uburundi mu muryango w’ibihugu vyo muri Afrika y’ubuseruko EAC gukora ibishoboka gushika ku rugero rumwe amategeko azokwisungwa mu ntumbero yo gushira mu ngiro ibijanye n’isoko rusangi. Ivyo ni ivyashikirijwe n’Umukuru w’igihugu, ku wa 28 Ruheshi 2017, aho yariko arugurura icese ibikorwa vy’inama yo ku rwego rwo hejuru yo kurabira hamwe intambwe Uburundi bugezeko mu bijanye n’iyinjira mu muryango wa EAC inyuma y’imyaka 10 Uburundi bwinjiye muri uwo muryango. Iyo nama yo ku rwego rwo hejuru yatunganijwe ku civugo ngendarwako « Imyaka 10 irangiye Uburundi bwinjiye mu muryango ugize ibihugu vyo muri Afrika y’ubuseruko, inyungu bwaronkeye, ivyaranguwe, uturusho, intambamyi hamwe n’imigambi ya kazoza ». Nk’uko Umukuru w’igihugu, Petero NKURUNZIZA yabandanije abishikiriza, ngo niruhande y’uruja n’uruza rw’abantu hamwe no guhanahana ibidandazwa, abo vyega yabasavye kwihutira ibijanye no gushira ku rugero rumwe amategeko twisunga mu bijanye n’isoko rusangi ryo muri EAC. Ivyo ngo ni mu ntumbero y’uko Uburundi butobera intambamyi ibindi bihugu bigize uwo muryango mw’ishirwa mu ngiro ry’uwo mugambi w’isoko rusangi. Muri iyo ntumbero nyene, ngo nk’abarundi dutegerezwa kandi guteza imbere isoko ry’imitahe, gusanisha amategeko agenga ibijanye n’amakori n’amatagisi hamwe n’ivyo bijanye vyose vyerekeye ikoreshwa neza ry’amafaranga ya Reta. Ivyo ngo nivyo bizofasha kugira dushobore gushika ku rugero rumwe mu bijanye n’ubutunzi hagati y’ibihugu dusangiye akarere. Vyongeye, iyo nayo ngo ni inzira mu ntumbero yo gushira mu ngiro amasezerano agenga ishirwaho n’ikoreshwa ry’ifaranga rimwe muri EAC kubera ngo hazokwisungwa urupapuro rw’inzira rwumvikanyweko na bose. Eka iyo ngo niyo nzira yonyene izotuma tumenya ivyotugirira akamaro ningoga gusumba ibindi hamwe n’uruhara rw’aba n’abandi, kugira Uburundi bugire ikibanza kibereye muri EAC. Bisubiye, ngo umugambi wo gukorera hamwe n’ibindi bihugu, ngo si umugambi w’umunsi umwe, ngo ni ukugenza buke buke intambwe ku yindi. Ibibazo bihari ngo birashobora guhinduka inyishu zizana akarusho, umuti w’ivyo vyose ngo n’uko twoguma dufatanye mu nda, tugakomeza kandi tugakunda ibikorwa.

Ugutunganya inama z’umuryango wa EAC ngo bifise akamaro kanini ku gihugu

Inama nk’iyo yo ku rwego rwo hejuru yahuje indongozi zitandukanye, ngo ni akaryo keza ko kwirimbura, dutahure imigambi ya kazoza, aho turi, iyo tuja n’ibikenewe kugira dushike kw’ihangiro Uburundi bwihaye. Muri kazoza, ngo bashingiye ku bushobozi bw’Uburundi bushingiye ku ndimi, ubwiza bw’imisozi, inzuzi, ibiyaga n’amashamba ngo ntankeka ko inama nyinshi zoza ziratunganirizwa mu Burundi. Ivyo navyo ngo bizotuma abarundi babona akamaro n’uturusho two kwinjira muri EAC. Kuri abo bose bitaba izo nama, ngo biratuma bibonera ndetse bakaniyumvira ibikorwa mu Burundi, gutyo bigatuma bamenya inkuru y’imvaho. Bisubiye, ngo gutunganya mwene izo nama biratuma abanyamitahe n’ingenzi baza mu Burundi, ivyo bigafasha mw’iterambere kubera ko bishobora gutuma abanyamitahe bahurumbira ibisata vy’uburimyi, ubworozi, amasoko ntanganguvu, ubutare n’agataka, indero n’ubushakashatsi. Ndetse ngo biranatuma haba ugukorana n’abandi bahinga bo mu bindi bihugu duhana imbibe, gutyo hakaba ivyo guhanahana ubumenyi, na kare ngo ubwenge burarahurwa kandi ngo nyamwigendako ntarimira impeshi. N’aho dukeneye umuryango wa Afrika y’ubuseruko, ngo abarundi bazokwamize ku muzirikanyi ko Uburundi ari amavukiro yacu, aho twataye uruzogi, tubukunde gusumba ibindi bihugu kandi tunabukundishe n’abandi. Umushikiranganji ajejwe iyinjira ry’Uburundi muri EAC, Isabelle Ndahayo yaragarutse ku magenekerezo makuru makuru yaranze ivy’iyinjira ry’Uburundi muri EAC. Uburundi bwateye igikumu ku masezerano yo kwinjira muri EAC, ku wa 18 Ruheshi 2007, bwinjira icese ku wa mbere Mukakaro 2007. Amasezerano ashiraho isoko rusangi yateweko umukono ku wa 20 Munyonyo 2009, ayo masezerano yagiye mu ngiro ku wa mbere Mukakaro 2010. Amasezerano yo gukoresha ifaranga rimwe nayo yateweko umukono ku wa 30 Munyonyo 2013, akazoja mu ngiro mu mwaka w’2024. Mu mwaka w’2021, abahinga bakazogendera igihugu kimwe cose mu ntumbero yo kuraba aho bagejeje imyiteguro yo gukoresha iryo faranga rimwe. Tubamenyeshe ko inyuma yo kwugurura icese ibikorwa vy’iyo nama, Umukuru w’igihugu yarifatanije n’abari ngaho mu gukurikirana ivyigwa 2 kimwe cari kijanye n’intambwe nyamukuru Uburundi bwaciyeko mu kwinjira muri EAC, ikindi cari ico kurabira hamwe inyungu n’imigambi vyaturutse kw’iyinjira ry’Uburundi muri EAC.

  Déo Misigaro

 

Inama Nshingamateka z’ibihugu vy’Uburundi na Kongo (RDC) ngo zirabandanya gutsimbataza imiganderanire ihasanzwe

kohKw’igenekerezo rya 30 Ruheshi 2017, niho Icegera ca kabiri c’umukuru w’ Inama Nshingamateka y’igihugu ca Repuburika iharanira demokarasi rusangi ya Kongo (RDC), Umushingamateka Rémy MASAMBA ma KIESE yashika ku kibuga c’indege ca Bujumbura mu rugendo rw’akazi yagize mu Burundi.Uwo mushitsi w’iteka yakiriwe n’icegera ca kabiri c’umukuru w’ Inama Nshingamateka y’Uburundi, umupfasoni Jocky Chantal Nkurunziza. Uwo mutegetsi yamenyesheje ko yaje aserukira umukuru w’ Inama Nshingamateka y ‘igihugu ca Repuburika demokarasi ya Kongo   mu ntumbero yo gukomeza ubucuti busanzwe hagati y’izo nzego zompi. Akaba kandi yategekanya kubonana n’abarongoye Inama Nshingamateka na Nkenguzamateka z’Uburundi mu ntumbero yo kubashikiriza ubutumwa yarungikanywe na mugenzi wabo arongoye Inama Nshingamateka y’ico gihugu.

 Nshimirimana Gloriose

  Nkurunziza Moise

(Bimenyereza)

 

Ubushikiranganji bujejwe imigenderanire n’ayandi makungu bwarateje imbere imigenderanire n’amakungu

nyamUmushikiranganji ajejwe imigenderanire n’ayandi makungu, Alain Aimé Nyamitwe yaratanze icegeranyo ku wa 27 Ruheshi 2017 ry’ibikorwa vyaranguwe mu mezi atandatu y’umwaka w’ 2017. Nyamitwe yamenyesheje ko ubushikiranganji arongoye bwakoze uko bushoboye kugira imigenderanire y’Uburundi n’amakungu itere imbere. Yabandanije amenyesha ko hakozwe ingendo nyinshi mu mahanga nk’uko hari intumwa mvamakungu zagendeye Uburundi. Ngo umushikiranganji w’imigenderanire n’ayandi makungu mu Burundi yaragendeye igihugu c’Ububirigi kugira icuka kibi cari hagati y’ivyo bihugu gishobore guhera. Ku bwa Nyamitwe, ngo imigenderanire y’Uburundi n’Ububirigi iriko iranaguka n’ikimenyamenya, imiryango y’abakorera mu buserukizi bw’Ububirigi yagarutse kuba mu Burundi mu gihe yari yasabwe gusubira iwabo kubera ikibazo c’umutekano. Ngo Urugendo Nyamitwe yagize mu Bushinwa bwatumye ico gihugu cemerera Uburundi imfashanyo yo kwubaka igice ca 2 c’inyubakwa nshasha izokoreramwo Umukuru w’igihugu. Ngo igihugu c’Ubushinwa caremeye gutanga ibibanza abanyeshure b’abarundi bazoja kwigamwo muri za kaminuza z’ico gihugu. Ngo n’abakozi bo mu bushikiranganji bw’imigenderanire n’ayandi makungu bazoja gukarisha ubwenge mu gihugu c’Ubushinwa muri kaminuza yigisha ivy’imigenderanire. Nyamitwe yamenyesheje ko yagendeye igihugu ca Turikiya bakaba baboneyeho akaryo hamwe n’abategetsi b’ico gihugu ko gushirako umukono ku masezerano yo gufashanya ku vyerekeye imico kama, uburimyi n’ubworozi. Ngo barumvikanye ko atampusha z’uruja n’uruza mu bihugu kubanyatirikiya no mu barundi bagiye mu ngendo z’akazi. Mwomenya ko igihugu ca Turikiya gifise umugambi wo kwugurura ubuserukizi mu Burundi.

Aline Kanyana

 

Prezida NKURUNZIZA ahamagarira abarundi bose gutanga intererano izofasha mw’itunganywa ry’amatora yo mu 2020

DDkBfGrWAAIT9JPUmukuru w’igihugu Petero NKURUNZIZA arararikira abarundi bose gutanga intererano izofasha mw’itunganywa ry’amatora yo 2020 kugira azoshike igihugu caramaze kwisuganya,akongera akabasaba guterera hakiri kare kuri konte inomero 1110/267 yuguruwe mw’Ibanki nkuru y’igihugu.Amabanki yandi atandukanye n’amashirahamwe yo kuziganya no kuguranana agasabwa gukorana n’Ibanki nkuru y’igihugu mu kworohereza abipfuza guterera. Ako kamo akaba yagateye kw’igenekerezo rya 30 Ruheshi 2017, mw’ijambo yashikirije abarundi n’amakungu buca, ku wa 1 Mukakaro 2017, abarundi bahimbaza imyaka 55 irangiye bashikiriye intahe y’ukwikukira. Nimuryisomere ido n’ido.

Barundi, Barundikazi, Ncuti z’Uburundi;

Tubanje kubaramutsa mwese aho muri hose! Nk’uko mubizi, aho bukera, abenegihugu bose, abato n’abakuze baba mu Burundi no mu mahanga, tuzohimbaza mu kanyamuneza kadasanzwe imyaka 55 irangiye Uburundi buhabuje Intahe y’Ukwikukira. Vyongeye ni akaryo ko gushimira Imana Mushoboravyose idushikanye kuri uyu munsi mukuru uhambaye turi mu mahoro n’umutekano. Hari ku wa mbere Mukakaro 1962. Iryo genekerezo rizokwama ari intibagiranwa mu Burundi, kuko ritwibutsa umutima n’ishaka bidasanzwe vyo gukunda igihugu vyaranze abatuboneye izuba. Imana Mushoboravyose yabagiye imbere ikabashikana kuri iyo ntsinzi nihabwe icubahiro, natwe igume ituja imbere kugira turangure neza ibikorwa bitsimbataza iyo ntahe y’ukwikukira. Uyu munsi ni umunsi mwiza, umunsi mukuru w'intsinzi n’akanyamuneza bidasanzwe ku Barundi bose. Muwuhimbaze mu bumwe kandi muteramiye umutekano nk’uko abawudushikanyeko babigize. Mwibuke kandi kuzirikana amakuba imboneza zacu zaciyemwo kugira zihabuze Intahe y’Ukwikukira, kandi mwiyumvira ingene twoyitsimbataza kurusha, narirya abipfuza kudusubiza mu buja n’ubukoroni batigeze bahengeshanya kutuburabuza n’ubu bakiriko. Ni co gituma icivugo c’uwu munsi ari: «Ubumwe no guteramira umutekano w’Igihugu ni yo nzira irashe yo gutsimbataza Intahe y’Ukwikukira».

Barundi, Barundikazi, Ncuti z’Uburundi;

Ba kavamahanga bataraza, Uburundi cari Igihugu cifashe, citunganije, kirongowe n’Umwami n’Abagabo. Abarundi bari bafise ijambo mu gihugu cabo, bafatanye mu nda, bateramira amahoro n'umutekano, basangira akabisi n’agahiye. Eka cari Igihugu kiramutswa Iteka n’Itekane kandi ciyubashe kikiyubahiriza. Abanyamahanga bamaze gushika mu Burundi, ibintu vyaciye biyangara. Baba abadagi batanguye kuza, baba ababirigi babasubiriye, bahurira ku bintu bimwe: Gufata Abarundi nk’ibijuju babaka ubutegetsi muri vyose; kubafata nk’abanyamahanga mu gihugu cabo, ingingo n’amategeko bitosekaza agateka ka zina muntu; kubasahura ubutunzi bw’igihugu cabo, kubasinzikariza ubuzima n’ayandi mabi, na cane cane gusambura imiryango, ingo, imico kama n’akaranga vy’Abarundi. Kugira Abarundi bikure ku gakanu intwaro ya ba kavamahanga, barwanye urugamba rurerure, urugamba rwahitanye na bamwe mu baruremesha. Rwari urugamba rusaba umutima wo kwitanga batiziganya, umutima wo kudatinya urukamvye, umutima wo gukunda Igihugu no kucigura.

Barundi, Barundikazi, Ncuti z’Uburundi;

Naho ba kavamahanga badukoreye akabi kabishe, na cane cane kubiba umugera mubi w’amacakubiri ashingiye ku bwoko, hari ivyiza bakoze ataworeka gushima. Bimwe muri ivyo ni nko kwigisha Abarundi gusoma, kwandika no guharura; kwubaka amashure n'amavuriro; kuzana ibiterwa njabukamazi nk'ikawa, icayi, ipampa n'ibindi. Ku ruhande rwacu, tworaba naho nyene uruhara twagize mu mabi yagiye arakorerwa Abarundi ku ntwaro ya ba kavamahanga, mu gihe c'urugamba rwo kurondera intahe y'ukwikukira, mu ntwaro zagiye zirakurikirana inyuma yayo no mu rugamba rwa demokarasi gushika uno munsi turiko turahimbaza imyaka 55 tumaze duhabuje Intahe y’ukwikukira. Muri ivyo biringo vyose, ubumwe n’umutekano vyagiye birahungabana, Kubera ba "mpemuke ndamuke", barondera inyungu zabo gusa. Mu gihe c'intwaro y'Abadagi, ku Mwami Mwezi Gisabo, ba mpemukendamuke baribonekeje, bashigikira Abadagi mu gucinyiza Uburundi n’Abarundi aho gushigikira umwami. Aha twovuga nka Kirima na Maconco kandi hari Abarundi benshi cane bishwe banahambwa mu binogo rusangi ku mutumba wa Ndago mu ntara ya Muramvya. Mu rugamba rwo guhabuza Intahe y’Ukwikukira, ba mpemukendamuke bararwanije Umugambi mwiza w’Umuganwa Ludoviko Rwagasore yashaka ko Uburundi bwikukira vuba na bwango, bashigikira Ababirigi bashaka ko bwosubizwa Intahe y’ukwikukira inyuma y’imyaka 30, bisigura ko Uburundi bwari gushikira iyo ntahe hagati y’umwaka w’ 1990 n’uw’2000. Ng’ico icatumye imyaka yo hagati y’1961 n’2000 yabaye imyaka y’ivyago ku Barundi. Mu gihe Abarundi isinzi bariko barasemerera basaba ishingwa ry’intwaro rusangi ishingiye ku migambwe myinshi, hari abandi bavuga ko hataragera, bashigikira intwaro z'igikenye. Ivyo benshi murabizi kuko ni ivya vuba. Inyifato nk’iyo nta kindi iba itumbereye atari uguhungabanya no gutitura Intahe y’Ukwikukira. Uburundi bumaze kwinjira mu ntwaro rusangi turimwo, haribonekeje Abarundi batanejerejwe n’iyo ntwaro, baraheza bitwaza amacakubiri ashingiye ku moko kugira babone inzira yo guhungabanya ubumwe n’umutekano, baryanisha Abarundi mu ntumbero yo gusenyura inzego zitorewe n'abenegihugu, hejuru y’inyungu za ba mpemukendamuke. N’aho nyene kwari ugutitura intahe y’ukwikukira ku nyungu y’abatipfuza ko Uburundi bwosubizwa iyo ntahe. Kugeza uno munsi hariho Abarundi batarazirikana neza Igihugu cabo, bataramenya iyo twavuye, aho duteye n’iyo tugana, maze bakifatanya n’abansi b’Intahe y’Ukwikukira mu kurwanya ukwikukira kw’igihugu cabo, bohejwe n’abakoroni ba kera. Bari bakwiye kuzirikana wa mwibutsa wa ba sokuru ngo: «Uja mu kibira utazi ugaca inkoni utazi». Nka kurya vyari bimeze ku ntwaro za ba kavamahanga aho abenegihugu batari bafise uburenganzira bwo kwitunganiriza ivyabo mu vy’intwaro, ubutunzi n’imibano, n’ubu hariho abagifise ako gatima ko kutareka Abarundi ngo bishire bizane. Ivyo bigaragarira mw’igandagurwa ry’indongozi z’igihugu nka Rwagasore, Ngendandumwe, Ndadaye, Ntaryamira n’abandi. Dusavye abanyamahanga kwikubita agashi, bavavanure n’iyo ngendo igayitse, ingendo bunyamaswa kandi iteye kubiri n’amategeko mpuzamakungu. Aha mbere Abarundi bomenya ko hari abanyamahanga bamwe bamwe binyegeza inyuma y’Abarundi bari ku rushi mu kudindiza igikorwa c’iteka co kumenya ukuri no kurekuriranira. Mwene abo banyamahanga, bamenye neza ko bafitiye ideni Abarundi kubera ubutunzi babasahuye, kubera imfura babahekuye, impfuvyi n’abapfakazi, amarira n’amaganya basize mu miryango y’Abarundi. Aho kubandanya bongera ikibi mu kindi, aho kubandanya basongera isibe, vyobabera vyiza basavye imbabazi Abarundi bakagirako bakabaha n’indishi y’akababaro. Ng’iyo inzira irashe yonagura imigendaranire ubutagisubira inyuma. Abarundi benewacu nabo tubasavye kwirinda gusubira kugwa mu mitego y’abo ba sesankuyoze, birinde gukorwa n’igiti mu jisho kabiri, bigire Inama y’intango nshasha. Bame bazirikana iminsi yose na hose ko atawahemukiye igihugu n’abenegihugu ngo yererwe, bame bazirikana wa mwibutsa wa basokuru ngo:«Uheza guhemuka ibigori bikera». Naho biri ukwo, Uburundi ntibwigeze bugwa mw’isanganya. Ineza yamye kandi izokwama itsinda inabi, ukuri nakwo kwama guca mu ziko ntigushe. Uburundi bwarapfunywe ariko ntibwapfuye, bwarahabishijwe ariko ntibwahababutse. Ni co gituma dusubiriye gutera akamo abahemukiye igihugu ngo bave i buzimu baje i buntu, bategere ko ata gihugu kizoza kibasumbira Uburundi Imana yaduhaye, kandi ko amaherezo y’inzira ari mu nzu. Tuboneyeho gushimira Abarundi benshi bamaze gutahuka, twongera duhamagarira benewacu bari mu bindi bihugu bavyipfuza ngo batahuke, maze mu mwaka uza nk’aya mango, tuze duhimbaze umunsi mukuru w’ukwikukira twese turi mu gihugu cacu.

Barundi, Barundikazi, Ncuti z'Uburundi;

Igihugu cacu kigizwe ahanini n'urwaruka, kandi ejo ni rwo ruzobazwa ivy'igihugu. Ni co gituma, tugiye kubiba mu rwaruka rwacu imbuto y’ubumwe n’iy'urukundo rw'igihugu; iyo gukunda ibikorwa no kwama ruteramira umutekano mu nsiguro yawo yose, nkuko biri mu mugambi w’igihugu ujanye n’umutekano, kuko ari vyo bitsimbataza intahe y'ukwikukira. Inyigisho zo gukunda no gukundisha Igihugu zashizwe ku rutonde rw'ivyigwa mu mashure yose, nta rindi hangiro zifishe atari kudufasha gushika kuri uwo mugambi. Ku kaba nkako, Intahe yo Kwikukira irateramirwa kandi ikavomerwa ijoro n’umurango. Abakurambere barayamaze bati : « Indero iva hasi », ahandi n’aho ngo « Igiti kigororwa kikiri gito ». Dutegerezwa gutegura neza urwaruka, kugira rugendere ibanga, ubugabo, ubushingantahe, ubuntu n’urupfasoni; rwitegurire kuba intwari zibushitse, runezerezwe no kwitwa « Umurundi » aho ruri hose kandi rubigendere. Nakare: "Imbuto itewe ni yo imera”, vyongeye gutsimbataza intahe y’ukwikukira si ivyo gukinisha no kwanjanjwako.

Barundi, Barundikazi, Ncuti z’Uburundi;

Mu ntumbero yo gukabura umutima wo gukunda igihugu no gutsimbataza intahe y’ukwikukira mu bato n’abakuze, hazoshirwa imbere ibi bikurikira: Kubungabunga ubumwe n’umutekano, kuko ni vyo mushinge wa vyose, ni «karahara mu ruganda ntibacura»; ni navyo umukoroni yasambuye ubwa mbere na mbere kugira ducanemwo, tubure umutekano; Kwumvisha Abarundi ko bikukiye bamenye kandi bamenyere ko aribo bishingira Amateka n’Amategeko y’Igihugu cabo baniyemere, nakare «ntawuterwa iteka atekewe mu vyatsi»; -Kugendera iragi rya Rwagasore, rishingiye ku bumwe, ibikorwa n’amajambere, kuko aho bigeze, n’ubu hari abansi b’Intahe y’Ukwikukira bafovya ayo majambo nkoramutima, mu kuyaha izindi nsiguro zigayitse zirtyoza igihugu n’intahe y’ukwikukira; -Gushigikira ibikorwa vyo kumenya ukuri ku vyabaye no kunywanisha Abarundi, kugira Abarundi twirogore uburozi bw’amacakubiri y'amoko twatamitswe n’abakoroni; -Kubiba imbuto y’ubukerebutsi, ubutwari, ubuhizi, umwete n’ubwira cane cane mu rwaruka rwacu, ni vyo vyaranze ba sokuru n’abadushikanye ku ntahe y’ukwikukira; -Kwerekana mu mvugo no mu ngiro ko dushoboye kubaho tutarinze kuzera inze, dushize imbere ibikorwa, ariko tudateye akagere abagenzi dusanzwe dufashanya, ahubwo tukabarwiza; -Kwama tuja Inama n’ingingo muri vyose no guha ijambo umwenegihugu; -Kumenya ko igihugu gifise ibanga cisangije kandi ko gifise akadasohoka kurya bigenda mu rugo; -Gusonera no kwubahiriza iryo abenegihugu baba bapfunditse baciye mu matora kuko bikomeza ubumwe n’umutekano, kandi bigatsimbataza Intahe y’Ukwikukira, vyongeye ni bo soko n’inkinzo vy’igihugu; -Kwubaha no kwubahiriza amategeko yo mu gihugu n’amategeko mpuzamakungu ajanye no kwubahiriza ubwigenge no kutavogerwa mu ntahe y’ukwikukira; -Kwamirira kure ico cose coza gitumbereye gusubiza Uburundi mu buja, mu gasuzuguro n’agahotoro vyaranze ubukoroni; -Kwiyemera tukumva ko dushoboye gutorera umuti ibibazo vyacu.

Barundi, Barundikazi, Ncuti z’Uburundi;

 

Igihugu cacu Imana yaragihezagiye nk’ibindi bihugu, yaragitatse ubwiza bw’akaroruhore n’ubutunzi bwinshi. Ubwo bwiza n’ubutunzi turamaze kubona ko bihurumbirwa na benshi, bamwe mbere bakagomba kuvyihagira. Duhamagariwe rero kuba maso, tukabicungera, tukabikingira, kandi tugakora ibishoboka vyose kugira ubutunzi bwacu ntibuduce mu myanya y’intoke, ahubwo bugirire akamaro Abarundi bose, abariho ubu n’abazovuka, mbere ibihe vyose. Turasavye kandi amashirahamwe mpuzamakungu akorera mu Burundi n’ayipfuza kuza kuhakorera ngo akore yisunze Amateka n’Amategeko vy’Igihugu cacu. Abarundi twamanye iteka ryo kurya bike tukaryama kare, ntituzokwihanganira abikika inyuma y’imfashanyo ngo badusubize mu buja, basambure Ubumwe bw’Abarundi canke badurumbanye imico n’umutekano vy’igihugu cacu. Dufatiye ku bihe twaciyemwo kuva mu 1961, birakwiye ko twitegurira neza amatora yo mu mwaka w’2020 no muri kazoza mu bijanye n'uburyo hamwe n'ibikoresho tutarinze kwambambira amakungu. Na cane cane ko twamaze kwibonera ko hari ibihugu bimwe bimwe vyipfuza ko Uburundi bworamutswa akaguma n’akajagari ngo bibone kudusahura ubutunzi bwacu vyikinze agahumbezi, gutyo batwamize mu ndyane zitubuza kubona no kwikora ku butunzi Imana yaduhaye, twame mu bukene, gutyo twame tubateze amashi. Turabararitse rero ngo muterere hakiri kare kuri konte inomero 1110/267 yuguruwe mw’Ibanki nkuru y’Igihugu. Dusavye amabanki atandukanye n’amashirahamwe yo kuziganya no kuguranana ngo akorane n’Ibanki nkuru y’Igihugu mu kworohereza abipfuza guterera, kugira amatora yimirije azoshike twaramaze kwisuganya. Umwe wese azoterera uko ashoboye, gutyo twereke amakungu ko Abarundi dushoboye kwitunganiriza amatora azira utunenge tutarinze kuzera inze, nakare akimuhana kaza imvura ihise. Iyo ni imwe mu nzira zo gutsimbataza intahe y’ukwikukira na demokarasi mu gihugu cacu, na kare iyo ntahe y’ukwikukira twayironse iciye mu matora mu 1961. Mwibuke imitego twasimvye mu 2015, aho abari biyemeje kudufasha mu matora baduteze imitego mu kwiyonjorora hasigaye indwi imwe gusa ngo amatora atangure. Muca mutahura neza igituma amatora yamye aburabuzwa cane cane n’abakoroni ba kera n’ubu bataratuva inyuma. Kugira kandi Intahe y'Ukwikukira igume ishinga imizi, abarongoye Abandi basabwe kwama bamenyesha abo barongoye ibibazo biba biri mu gihugu, babasabe no guterera mu kubitorera umuti. Ivyo navyo bijanye n'ubukene, ubushomeri, isesagurwa ry'ubutunzi bw'igihugu, ibiturire, agateka ka zina muntu, imico y’Abarundi n'indero ndundi y'abana bigenda bitituka, ubunebwe, urwenge, n'ibindi. Reta nayo, ifadikanije n'abenegihugu izobandanya gukomeza, ubumwe, amahoro n'umutekano, kuburizamwo imigambi y’abashaka kutunyaga Intahe y’Ukwikukira, abashaka gusenyura inzego zitorewe n'abenegihugu no kunyonyeza ubutunzi bw'igihugu. Reta izobandanya igikorwa co gukomeza inzego z’ubutungane, kworohereza abarwizatunga, kurwiza Abagenzi b’ukuri no gufashanya n’ibindi bihugu, tutibagiye kubandanya wa mugambi mukuru w'ingene twipfuza ko igihugu cacu coba kimeze mu mwaka w'i 2025, tukawugira rwacu, mbere twitegurire twebwe nyene ingene Uburundi bwoba bwifashe gushika mu 2050 guhera ubu.

Barundi, Barundikazi, Ncuti z’Uburundi;

Ibikorwa vyaranguwe, inyubakwa zubatswe mu bikorwa Rusangi, ivyaranguwe n’amashirahamwe n’ivyaranguwe n'abantu ku giti cabo bizinjirwa muri uku kwezi kw'indwi n'inyuma yakwo, kuko bikomeza intahe y'ukwikukira. Ba buramatari na ba musitanteri basabwe gutegura neza ico gikorwa, batibagiye no gutegura umunsi mukuru wahariwe ikomine, aho abavukakomine bahurira hamwe, bagategura ibikorwa bikomeza ubumwe, umutekano n’iterambere iwabo, bigatsimbataza n’intahe y’ukwikukira no gufata iterambere ryacu mu minwe, riduhereyeko rikongera rikadusubirako. Imbere yo gusozera, turasubiye gushimira abo bose bitanga ijoro n’umurango kugira ngo Uburundi burangwemwo iteka n’itekane, duhereye ku bajejwe umutekano, abajejwe ubutungane, abajejwe intwaro n’abenegihugu bose. Iteka n’itekane vy’Igihugu cacu dutegerezwa kubigira umwitwarariko wa minsi yose ata n’umwe yigize sindabibazwa, maze tuzibire burundu ibihengeri vyose abansi b’intahe y’ukwikukira bagiye barameneramwo mu kudusamburira igihugu n’ubumwe bwacu. Turashimiye ibihugu n'amashiramwe mpuzamakungu, na cane cane ivyo dusangiye Umuryango wa Afirika y’Ubuseruko bimaze gutahura neza ikibazo c'Uburundi, kandi bikadushigikira. Turashimiye kandi ibihugu n'amashirahamwe mpuzamakungu bibandanya bifasha mw'irangurwa ry'imigambi y’iterambere, eka n'abo bose badahengeshanya gushigikira Intahe y'Ukwikukira kwacu mu buryo butandukanye. Turibukije Abarundi n’Amakungu iyo ava akagera ko Uburundi ari Igihugu c’Abarundi, gitwarirwa mu Burundi kandi kigatwarwa n’abitorewe n’Abarundi. Nimuze twese Uburundi bwacu tubuture amaboko, umutima n’Ubuzima, kandi twame twambaza Imana yabuduhaye ibudutungire. Abarundi nitureme kandi dutekane. Turagabishije ko abazita mu vy’Uburundi mu kutuburabuza mu bumwe, mu mutekano Imana yaduhaye, mu ntahe y’ukwikukira bagiye guhura n’Imana. Nibateshwe bate, ni bave i buzimu baje i buntu, atari aho naho bazobirwamwo mbere bibahitane. Tukaba dusubiriye kwipfuriza Abarundi mwese umunsi mukuru mwiza w’imyaka 55 tumaze twikukiye, muwuhimbaze muzirikana icivugo c’uno munsi: «Ubumwe no guteramira Umutekano w’Igihugu ni yo nzira irashe yo gutsimbataza Intahe y’Ukwikukira».

Niharambe Uburundi

n'Intahe y'Ukwikukira,

Imana ibahezagire

Uburundi n'Abarundi,

Murakoze.

 

 
Ouvrir