Kw’igenekerezo rya 30 Rusama 2020 niho hasozerwa amasengesho mpuzamadini y’iminsi itatu, yatunganijwe n’umugambwe CNDD-FDD mu ntumbero yo gukengurukira Imana  ku ntsinzi uwo mugambwe waronse mu matora y’indongozi nshasha zizorongora Uburundi yabereye ku murwa mukuru wa poritike i Gitega  kuva ku wa 28 Rusama 2020.Umukuru w’igihugu mw’ijambo yashikirije ryo gusozera ayo masengesho akaba yarashimiye Imana batanguranye kuva amasengesho atangura gushika  ahere mu mahoro n’umutekano. Yaciye  kandi akengurukira umugambwe CNDD FDD watunganije ayo masengesho y’umuhezagiro.  Yarongeye ashimira  abenegihugu b’i Gitega ukuntu babakiriye yongera akengurukira abaje kwifatanya n’abo mu masengesho abafashije gusenga,abasengeye igikorane,abaririmvyi  abari mu ntwaro abajejwe umutekano n’abamenyeshamakuru hamwe n’abandi bose bagize ico baterera ngo bigende neza.Prezida Nkurunziza akaba yabatekereye ijambo ryo muri Yosuwa igice ca 22kuva ku karongo ka 1 gushika ku karongo k’8. Yarashimiye kandi abamugamburukiye bongera baramufata mu mugongo muri kino kiringo ahejeje.Ngo nta n’umwe atagize ico afasha nta wahemukiye igihugu mubo bakoranye muri kino kiringo.

Yarakengurukiye Imana kandi ku ndongozi nshasha yaraye igabiye abarundi araheza arangiza asengera aba bahora bakorana gushika ku mukuru w’umutumba.Inyuma yaho yaciye asengera abashasha baraye batowe kugirango Imana izobazigame, ibuzuze inkomezi araheza kandi arasengera igihugu n’umugambwe.Ayo masengesho akaba yatunganijwe kuri iki civugo “Mana y’abisirayeri ,nta Mana ihwanye nawe mw’ijuru canke mw’isi ni wewe Mana ushitsa amasezerano ukagirira imbabazi abasavyi bawe bagendera imbere yawe  bitonze n’imitima yabo yose kandi washikije ivyo wasezeraniye Data umusavyi wawe Dawidi”.Imbere yaho, uwuherutse kwizerwa n’abarundi ngo azobarongore mu myaka indwi iri imbere Evariste Ndayishimiye akaba yabanje kuririmba izaburi y’ugukenguruka. Hanyuma arashikiriza ijambo aho yamenyesheje ko ata majambo menshi avuga atari ayo  gukenguruka,yaciye rero akengurukira Imana yo yabashoboje, arashimira  abantu bose baje kubashigikira muri ico gikorane ahereye ku Mukuru w’igihugu Petero Nkurunziza. Yarakengurukiye kandi abantu basengeye igikorane abakozi b’Imana bafashije gusenga,abaririmbiramana hamwe n’ababafashije gutegura kugirango  igikorane kigende neza.Abagumyabanga basabwa gusengera inzego nshasha
Ku munsi wo gutangura ayo masengesho ku wa 28 Rusama 2020, Prezida Nkurunziza yasavye abagumyabanga yabasavye gusabira indongozi nshasha ngo Imana izikomeze ngo kuko  gutorwa ni kimwe kwimikwa nakwo ni ikindi kintu, rero ngo ni ukubisengera kugirango ikomeze ivyo yaraye ishikije.Umukuru w’Igihugu akaba yamenyesheje ko uwo munsi ari umunsi w’akanyamuneza kuko bari ku musozi udasanzwe, umusozi bamaze kuronkerako ivyiza vyinshi. Hari amasezerano akomeye rero  ngo Imana yasezeraniye abarundi kuva kera. Yaciye amenyesha ko igikorane cabaye muri komine Itaba baharonkeye amasezerano itariki 31 Kigarama 2019 basozera igikorane, aho baronse amasezerano ane . Muri ayo hari aho Imana yavuze ko igiye kuvugana n’abarundi, igiye gushira ku mugaragaro ivyari vyaranyegejwe vyose, ica gatatu gusambura inkomezi zose z’umwansi w’Uburundi iyo ava akagera kw’isi nzima n’uwo mu Burundi arimwo.Yaciye amenyesha ko kubona abarundi bagikoranira hamwe bakaja ku mirimo yabo hari ikiza kivugwa ari ubuntu bw’Imana. Ayo matora rero ni umugisha n’umuhezagiro kandi umuhezagiro uhera ku ndongozi. Imana rero ngo yabasezeraniye  ko igiye kubagira abadasanzwe kw’isi kandi ko Uburundi bubohotse.  Abarongozi bashasha baraye batowe rero  ni abo Imana yaremye ibagira bashasha. Amasengesho kandi ni ikirwanisho gikomeye  cane, uwo bitoreye babanje  kumusengera iminsi itatu bamutoye bamusengera iminsi itatu abarundi ngo ni bitege ko ibintu bizoba neza gusumba uko vyahora. Kera umwami kugira abisire uwundi yaba yapfuye, abandi nabo ngo yava ku butegetsi uwundi yirutse none mu mateka y’Uburundi nibwo bwa mbere bibaye aho Umukuru w’igihugu abisira uwundi akamushigikira mu matora akongera akamufasha gushima. Ubu rero ngo ni ukwakira intsinzi y’Imana. Uwo munsi w’ayo masengesho akaba yamenyesheje ko ari umunsi w’amateka mashasha mu buzima bw’abagumyabanga kuko utandukanye n’ibindi bihe baciyemwo. Yaciye amenyesha ko ayo masengesho ari nkoramutima ku Mana  kandi akorewe ku mugaragaro; ni nkoramutima ku Mana iyo atunganijwe ku musozi w’amasezerano; ni nkoramutima kandi igihe atunganijwe imbere y’igicaniro ; ni amasengesho kandi atunganijwe n’indongozi mu gukenguruka ivyo Imana yakoze; aba nkoramutima indongozi ziciye bugufi Imbere y’Imana; atunganijwe n’indongozi ashimagiza ubukuru bw’ImanaYarangije asaba abagumyabanga gusabira indongozi nshasha ngo Imana izikomeze kuko  gutorwa ni kimwe kwimikwa n’ikindi kintu rero ngo ni ukubisengera kugirango ikomeze ivyo yaraye ishikije.

Abagumyabanga basabwa kunezerererwa umunsi bitoreye wo gukengurukira Imana uko ukwezi guheze
Jenerari Major Evariste Ndayishimiye aheruka gutorwa ngo azobe Umukuru w’igihugu  akaba yarashikirije ijambo ryo gushima no kwugurura ayo masengesho aho yamenyesheje ko ugusengera  hamwe  vyubaka abarundi kandi ko ukwemera kwatumye Imana igira ikibanza ca mbere mu Burundi. Uyo munsi ngo washitse abarundi bahejeje gusimba akanga ukaba rero ari  umunsi udasanzwe wo muri kuno kwezi ku vyiza ikorera Uburundi ,yongera asaba Imana ko yobuhirira mu kwezi gukurikira.  Abagumyabanga ngo nibo bitoreye umunsi wo gukengurukira Imana uko ukwezi guheze ku vyiza ikorera Uburundi.  Yaciye abatumirira kunezerwa kuko ari  umunsi w’agahimbare.   Uku kwezi rero ngo bateguye kumarana iminsi itatu mu bumwe bw’umuryango w’abemera Imana mu madini atandukanye. Ico rero ngo ni imbonekarimwe mu gihugu c’Uburundi kandi kimaze kwerekana akamaro mu bumwe no mu mibano. Imana rero ngo yaraye ibikoze kandi amasengesho yabereye i Gitega yarumviwe. Ukwemera ngo niko kwatumye Imana igira ikibanza ca mbere mu Burundi. Ukwo kwemera nikwo gutuma bashingira intahe Imana uko bukeye uko bwije ,yaciye amenyesha ko ugusenga kwabo kwababereye kirumara kuko kwajanye no kwemera kwizigira  hamwe n’urukundo. Ikindi ngo ni uko yazibiye ikiza ca korona batunganya amatora  kandi bayajamwo ata mutima usimba. Ugusengera hamwe kurabubaka kandi ukwemera ngo niko kwatumye na Nowa yubaha Imana.   Yarongeye amenyesha ko muri Matayo igice ca 18, akarongo k’19 handitse ko Yezu avuga ngo “ni ukuri ndabibabwiye abantu babiri bashize hamwe bagasaba ico basavye cose Data wo mw’ijuru azokibakorera”.Urukundo nirwo rwabahamagaye ngo basengere hamwe ari amadini atandukanye mu gusabira abarundi bose n’Uburundi.

Prezida Petero Nkurunziza ahamagariye abagumyabanga kuzitirira Igihugu cUburundi mu kwama bagavye
Ku musi ugira kabiri igenekerezo rya 29 Rusama 2020 w’amasengesho yogukengurukira Imana, Umukuru w’igihugu Petero Nkurunziza yaratanze inyigisho ku bakozi ba Reta mu ntumbero y’ukubamenyesha ko amasengesho ari ikirwanisho  ntatsindwa.Umukuru w’igihugu akaba yabanje kubibutsa icivugo amasengeshoy’uwo munsi kiri mu gice ca kabiri c’ingoma ikigabane ca kuva ku karongo ka 12 gushika ku 17.   Ayo “matora ngo yayasengeye imyaka ibiri none arakengurukira Imana ku nyishu nziza yaronse.Nkuko yabandanije abimenyesha, ngo umuhezagiro w’amasengesho uri kwinshi hari ayo gushima, gusaba, gutabaza, gushikiriza ivyifuzo ,gusengera imitwaro canke gusaba umuhezagiro ariko bobo bakaba ayo bajemwo yerekeye umuhezagiro. Imana rero  ngo yaraye ihezagiye  abagumyabanga,abana n’abuzukuru hamwe n’abarundi bose. Ikindi yamenyesheje ni uko ukwezi kugiye gutangura kwa Ruheshi ari ukwezi kw’uguhezagira n’ukwubaka bagavye. Umuhezagiro wubaka bishasha  bigasaba kwubaka bagavye kuko utera ishavu shetani ariko ngo ntihindura umugambi w’Imana. Mu muhezagiro harimwo umugisha kugirirwa neza no kurabwa y’Imana hamwe no  kwironkera amahoro yImana.  Yaciye amenyesha ko hageze igihe c’ukuzitirira igihugu c’Uburundi ,hari abansi mugabo ngo ntibashobora kuzibira integuro yImana. Nta handi bizoca atari uguhaguruka bagakora. Yaciye atanga akarorero k’incungu ziguze Uburundi zitakiriho aca amenyesha ko ataco batanze ariko ari ubuntu bw’Imana. Mu muhezagiro ngo harimwo umugisha kandi ngo ntiwizana,inyigisho yiwe yari ishimikiye kw’ijambo ry’ Imana ryo mu gitabu ca 2 co ku Ngoma igice ca 30  kuva ku karongo ka 26 gushika ku ka 27 hamwe no muri Nehemiya igice ca 4, akarongo ka 4 gushika ku ka 15.Yaciye kandi amenyesha ko bokwubaka bagavye  kandi  ko umuntu ahagurutse kwubaka aba yemeye ko ingaruka zose azihangara.  Imana ihindura imigambi yose y’umwansi w’Uburundi.Yarongeye amenyesha ko iki kiringo agiye gusozera ari co kiringo caranzwe n’umutekano, umunezero hamwe n’ugukunda Igihugu.  Ikindi yongeye kumenyesha ni uko amatora yabaye abantu bariko barahunguka, ngo ni amatora kandi yabaye hari umutekano guhera mu ntango ; yabaye kandi isi yose iri mu gatengo ariko abarundi bidegemvya; atunganijwe Umukuru w’igihugu bareze bakamukuza bakamuhezagira nawe akabahezagira.Umuhezagiro Imana yabahaye niwo bahagazemwo rero ngo barafise impamvu y’ukuza ku musozi w’amasezerano.  Ivyo bagezemwo rero ntivyari bwabe ni ubuntu bw’Imana bagiriwe. Imana ko yabahezagiye rero ngo ni uko bohaguruka bagahezagirana bagahezagira n’ibintu vyose Imana yabahaye.  Yarangije asabira imigisha indongozi nshasha zigiye kurongora igihugu abagumyabanga bose hamwe n’abarundi bose.
         

Christine Manirambona

Si agaseseshwa rumuri, ikiza ca coronavirus kirageramiye ibihugu vyose kw’isi n’uburundi burimwo. Reta y’Uburundi ibicishije ku bushikiranganji bw’amagara y’abantu no kugwanya Sida bwarafashe ingingo  zo kwikingira ico kiza kugira abarundi ntibazire kutamenya. Hakaba n’amashirahamwe yiyemeje gutanga intererano kugira abanyagihugu bikikingire kandi bakingire  n’abandi. Urwaruka ruhamagarirwa kwikingira ikiza ca Coronavirus, bakamenya ingene ifata n’uko bakingira n’abandi. Ivyo vyamenyeshejwe na  Annick Dusenge ajejwe ni muri iyo ntumbero ishirahamwe ry’abakenyezi biyemeje guharanira  imibereho myiza n’iterambere ry’umukenyezi mu Burundi COCAFEM ryatunganije  inyigisho  ku rwaruka rw’imboneza  ku bijanye no kwikingira ico kiza kw’igenekerezo rya 26 Rusama 2020.Uwujejwe ivy’inyigisho muri ivyo shirahamwe akaba  yamenyesheje ko babasigurira urwo ruganda ku rwaruka rw’imboneza kugira babamenyeshe ko ikiza ca Coronavirus kiriho mu gihugu c’Uburundi, ko candukira, cica kandi  gifata umuntu uwo ariwe wese. Muri make rero ngo bashaka kubafasha kuva muvyiyumviro bitari vyo bakura hirya no hino bakamenya  ukuri kuri iyo ndwara.Barabigishije  rero ingene  yandukira, ibimenyetso biyiranga, n’uko boyikingira mu mibereho yabo ya minsi yose.  Baboneyeho n’akaryo  ko kubasaba ko mu gihe babonye umuntu afise ibimenyetso vy’iyo ndwara kubatabariza  kwa muganga bidatevye.Nk’uko Annick yabimenyesheje ngo bahisemwo kwigisha urwaruka rw’imboneza kugira narwo ruce ruja kuvyigisha mu kibano cane cane urwaruka rufata iyo ndwara uko itari.Mu kurangiza yibukije abari bitavye urwo ruganda bose gukurikiza amabwirizwa y’isuku nk’uko ubushikiranganji bw’amagara y’abantu bubibategereza.  

Josélyne Ndayegamiye

Ishirahamwe ry’abakenyezi biyemeje guharanira imibereho myiza n’iterambere ry’umukenyezi  mu Burundi COCAFEM risaba Reta kwongereza inguvu mu kuronsa  abakenyezi n’abigeme amakuru akwiye ku bijanye n’irondoka rijanye n’amagara meza n’ingene bokwikingira ikiza ca coronavirus. Ivyo ni vyamenyeshejwe na Espérance Ntirampeba arongoye iryo shirahamwe mw’ijambo yashikirije kw’igenekerezo rya 28 Rusama 2020 igihe bariko barahimbaza umunsi mpuzamakungu wahariwe amagara meza y’umukenyezi.Yamenyesheje ko uwo munsi mukuru uhimbazwa uko umwaka utashe kw’igenekerezo rya 28 Rusama, ukaba washinzwe n’ishirahamwe mpuzamakungu ONU mu mwaka w’1987.

Imvo nyamukuru yatumye uwo munsi mukuru ushirwaho kwari ukugira umukenyezi aronswe uburyo bwo gutandukanya imvyaro kuko ahanini arivyo bisinzikaza amagara yiwe. Vyongeye, umukenyezi yama ariko aravyara  ngo nta n’umugambi umuteza imbere ashobora kugira  bigatuma yama atagira amikoro ku buryo n’iyo arwaye adashobora kwivuza.Nk’uko Espérance Ntirampeba yabimenyesheje ngo uwo munsi mukuru wamuhaye akaryo keza ko gusaba Reta y’Uburundi kuronsa abakenyezi n’abigeme ubufasha bw’akanovera mu buvuzi kugira ntihagire umukenyezi asubira kwitaba Imana kubera atitaweho, kuronsa urwaruka rw’abigeme inyigisho z’irondoka rijanye n’amagara meza, gushiraho imigambi ituma abakenyezi baronswa ubuvuzi bitagoranye, gufata nka nkama ikibazo co kurwanya ihohoterwa ry’abakenyezi kw’isi yose no gufata mu mugongo abakenyezi bagendana umugera wa Sida. Mu gihugu cacu ngo impinga iracari ndende kuko haracibonekeza ikubagurwa rikorerwa abakenyezi n’abigeme bakoroye imbanyi mu kibano canke ntaronswe ubuvuzi bukwiye mbere bigashika akanapfungwa.Vyongeye rero, umukenyezi n’umwigeme kubwo amikoro make bafise,  baraheba amashure kubera kutaronka ivyo bakoresha mu gihe bari mu butinyanka, mbere bakanandura na za ndwara zifatira mu bihimba vy’irondoka bivuye kw’isuku rike agasaba Reta kubibafashamwo, ntihagire umwigeme asubira guheba ishure canke kwikumira kubera kubura ivyo bikoresho.                 

 Josélyne Ndayegamiye

Umusi mukuru wa Pentekoti  uzohimbazwa ku wa 31 Rusama 2020 wama uhimbazwa inyuma y’umusi mukuru w’iyurira mwijuru rya Yezu Kristu. Ivyo vyamenyeshejwe na Patiri Jean Baptiste Nijimbere mu kiganiro yahaye ikinyamakuru UBUMWE ku wa 11 Rusama 2020.Nk’uko Patiri nijimbere yabimenyesheje ijambo pentekoti ngo mu rurimi rw’ikigereki ni ukuvuga igitigiri 50 muri yo rero harimwo ya minsi mirongo ine Yezu yamaze yiyereka abatumwa biwe araheza arurira mw’ijuru bagaheza bakongerako imisi cumi itegura umuzo wa Mutima mweranda ari  wo munsi mukuru wa Pentekoti.Ikindi yamenyesheje ni uko kuva kera Pentekoti yari isanzwe iriho ariko insiguro yayo niyo muri kino gihe itandukanye.

Ico gihe rero ngo hariho umunsi mukuru mw’idini ry’abayuda  bita Pentekoti bagaheza bagahimbaza aho Imana yabaha isezerano ku musozi wa Sinayi. Ico gihe ngo bari bavuye mu buja bahoramwo mu gihugu ca  misiri Imana ibarokoye. Rero ngo ico gihe Pentekoti yasigura iminsi 50 habaye pasika y’abayahudi Imana yabakuye mu buja igatuma baronka iryo bwirizwa ry’imisi 50. Yaciye amenyesha ko kuri uyo munsi ariho Mutima mweranda yaza ameze nk’umuyaga w’igihuhusi,  nk’imbeya z’umuriro ziricagagura zija kuri umwe umwe wese.  Abantu bari baje muri ya Pentekoti basanzwe bamenyereye guhimbaza mu Buyuda bavuye hirya no hino ngo bumva ivyiza vy’Imana mu rurimi rwabo. Uwo munsi mukuru  urahimbazwa n’abarundi mu rurimi rwabo nkuko n’ahandi bawuhimbaza mu rurimi rwabo ariko bose bakumva ivyiza vy’Imana. Yaciye amenyesha ko uwo munsi mukuru imbere yuko uba hatangura kuba igisabisho c’iminsi icenda kigizwe n’inyigisho z’ijambo ry’Imana n’ibisabisho bitandukanye mu ntumbero y’ukumwitegurira bikwiye. Muncamake rero ijambo Pentekoti ryari risanzwe rihari rigasigurwa ukundi  hanyuma haca haza Kristu abigira bishasha.  Kuva Ekereziya itanguye  ngo igihe ca Mutima mweranda cari gitanguye, umukristu rero ngo akeneye  kumenya igihe agezemwo nico umuzo wa Mutima mweranda usigura agaheza akayaga iyo nkuru nziza yukubona ivyiza vy’Imana. Umukristu kandi ngo igihe aba ataroronka Mutima mweranda aba ameze nk’imodoka itagira igitoro. Abatagira Mutima mweranda ubukristu bwabo ngo burabarambira igisabisho kikabarambira canke amabwirizwa ariko umuntu amaze kumuronka ubukristu nibwo buheza bukamutwara.

Christine Manirambona