Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Igihugu c’Ubuswisi ngo kigiye gushigikira Inama Nkenguzamateka y’Uburundi

xcvnhKw’igenekerezo rya 13 Ndamukiza Umukuru w’Inama Nkengezamateka, Réverien Ndikuriyo yarahaye umubonano abahanuzi mu buserukizi bw’igihugu c’Ubuswisi bufise icicaro i Naïrobi umurwa mukuru w’igihugu ca Kenya. Muri uwo mubonano bavuganye ahanini ibikorwa Umukuru w’Inama Nkenguzamateka akora kandi bakaba babishima. Ivyo vyashikirijwe n’umuvugizi w’umukuru w’inama Nkenguzamateka Stella Budiriganya. Nk’uko umupfasoni Stella Budiriganya yabimenyesheje inyuma y’umubonano, ngo abo bahanuzi barakurikirana ibikorwa Umukuru w’Inama Nkenguzamateka akora iminsi yose. Yaravuze kandi ko bamukeza ku bikorawa vyiza arangura akongera akama hafi y’abanyagihugu. Yaramenyesheje kandi ko abo bahanuzi bavuze ko bazofata mu mugongo mu gusaba ko igihugu cabo gishigikira Inama Nkengezamateka y’Uburundi kubera ibikorwa vyiza bakora, ngo bongera babwire ico bobafasha kugira ibikorwa vyabo bibe vyiza gusumba. Yarongeye aramenyesha ko umukuru w’Inama Nkenguzamateka yabakeje ku mabanga bashinzwe,yongera abemerera ko azokwama hafi y’abanyagihugu kuko iyo akoze neza n’abanyagihugu baboneraho gukora neza .Ngo yarabakengurukiye yongera ababwira ko agiye gushiraho abahinga bokwigira hamwe ingene abaserukira igihugu c’Ubuswisi mu Burundi bofasha Inama Nkenguzamateka.

Thérèse Niyonkuru

            

                                                        

 

Umugambwe UPRONA wihaye intumbero yo kunywanisha abadasigana no kuzamura ubutunzi bwawo

mlopKuva komite nshasha y’umugambwe w’abadasigana UPRONA itowe ku wa 14 Myandagaro 2016 yiyemeje kugendera abadasigana babasanga mu ntara no mu makomine, ubwa kabiri kukaba kwari ukugerageza kunagura amatungo y’umugambwe no gusubiza hamwe abadasigana. Ivyo vyamenyeshejwe n’umukuru w’umugambwe UPRONA, Abel Gashatsi mu kiganiro yahaye ikinyamakuru UBUMWE ku wa 5 Ndamukiza 2017. Ngo baherutse rero kugendera intara zose uko ari 18 mu ntumbero yo gushira mu ngiro ihangiro rya mbere biyemeje. Muri izo ngendo kandi baboneraho gusubiza hamwe abadasigana, akaba ashima intambwe bagezeko naho bataraheza. Amenyesha ko ico kibazo gisa n’icarangiye mu ntara ya Muramvya kuko n’abari bagiye mu “mizero y’abarundi” bagarutse mu mugambwe UPRONA kandi babashigikira no mu ngendo bagize mu zindi ntara. No ku wa 8 Ndamukiza ngobakaba bategekanya kuzobonana n’abadasigana 40 bo muri komine Mbuye kugira bahanahane ivyiyumviro ku kungene bokomeza umugambwe. Ico gikorwa ngo carabaye no mu ntara ya Kayanza aho ivy’” Amizero y’abarundi” bitakivugwa, carakozwe kandi no mu ntara ya Kirundo muri komine Bwambarangwe naho nyene bikaba vyagenze neza. Yamenyesheje kandi ko biriko birakorwa no mu zindi ntara, bakaba bipfuza ko uwu mwaka uzorangira ico gikorwa caratunganijwe mu ntara zose z’igihugu. Abadasigana ngo bamenyesheje ko ubu bagiye gukorera umugambwe kubera mu matora yo mu 2015 bajuragijwe, mbere ko babona yuko uburongozi bw’umugambwe muri kino gihe bufise ishaka ryo kwegeranya no gusubiza hamwe abanywanyi b’umugambwe na cane cane bitegurire amatora yo mu mwaka w’2020 bari kumwe. Amenyesha kandi ko mu mezi 8 bamaze bakora bamaze kugaruza amatungo y’umugambwe yari yadandajwe n’abo bavuga ko izo ngendo zo mu ntara ari ugusesagura amatungo y’umugambwe. Ngo ni hamwe gusa bavuga ngo uwugutuka ntagutorera. Amenyesha ko basanze umugambwe ufise amadeni menshi, ni ukuvuga ko hari ibihengeri vyinshi kuko nko mu mwaka w’2005 bafashe ideni ry’imiriyoni 50 muri BBCI, baca basanga rigeze ku miriyoni 147 kandi batanze ingwati y’ikibanza c’ishure CFA co kw’i Jabe n’ikirimwo ingoro y’umugambwe c’i Bururi. Ibanki BBCI ica itwandikira amakete ivuga ko bagira bashire umugambwe ku rutonde rw’abakiriya batariha ; baca bitura urwego rw’umugambwe mu ntumbero yo gutorera umuti ico kibazo. Baciye bafata ingingo yo kugurisha ikibanza c’umugambwe co mu Kamenge. Bica bibafasha kuriha iryo deni ryo muri BBCI gutyo impapuro ndangatongo zo kw’ i Jabe n’iz‘ingoro y’umugambwe y’i Bururi zica ziragaruka. Ngo baragarukanye kandi ikibanza co muri zone Cibitoke abahora barongoye umugambwe bari bagurishije na Diyoseze ya Bujumbura aho bakaba bari bahagurishije imiriyoni 60 ariko ubu hakaba hari hageze ku miriyoni 115. Barumvikanye rero na Musenyeri arongoye Diyoseze ya Bujumbura bamuriha amahera nawe abasubiza impapuro ndangatongo. Yamenyesheje ko barishe n’ayandi madeni menshi yari yagiye arafatwa. Uburongozi bw’umugambwe kandi bwaciye bufata ingingo yo kwiyubakira ingoro y’inama izokwakira abantu barenga 1500, mu mezi abiri ikaba izoba yuzuye. Ngo barubakiye kandi imva y’uwahoze arongoye umugambwe w’abadasigana UPRONA, umuhisi Nicolas Mayugi. Baraziganije kandi n’amahera yo kwitegurira amatora yo mu mwaka w’2020. Abavuga ivyo rero ngo ni abahora bibaza ko umugambwe UPRONA uri ku Mugumya gusa, bibuka kwegera abanywanyi b’umugambwe hageze amatora gusa. Abanyamugabwe baduga muri izo nama nabo ngo bikora ku buryo bwabo kandi ngo kera abanywanyi ntibatanga intererano ariko ubu uwo wese afise ico umugambwe wamuhaye atanga ic’icumi c’umushahara wiwe. Abipfuza gukorera umugambwe ngo ni baze barangurire imigambi hamwe bareke kwidogera mu bimenyeshamakuru bavuga ivyo batazi. Ivyo uburongozi bw’umugambwe bukora ngo bubikorera ku mugaragaro kugira umugambwe wisubize umutamana. Abel Gashatsi amenyesha ko ikibazo co gusubiza hamwe abadasigana atari ikibazo coroshe ariko ngo arabonana n’abo bose bahoze mu mugambwe ubu bagiye ahandi na cane cane mu runani rw’”amizero y’ abarundi”. Iyo bariko baraganira ngo nta n’umwe atemera ko basubiza hamwe ariko boba batinya abo basize inyuma, naho biri uko ngo ntibazohengeshanya kubarondera. Amenyesha ko hari n’abavuga icese ko no mu matora yo mu mwaka w’2020 bazoba bari kumwe na Agathon Rwasa , abo babona ko urukiza rwabo ari ukwiheka kuri Rwasa ngo bogomba bakigumira iyo bari. Amenyesha kandi ko ata ntambamyi bafise mu burongozi bw’umugambwe kiretse iz’uburyo bwo kwitegurira amatora yo mu mwaka w’2020. Inzego zose z’umugambwe ngo zikorana neza kuko mu bihe biheze abatowe ngo barongore umugambwe batamara n’indwi zibiri induru zitaraduka kubera kudakorera ku mugaragaro.

Epitace Nduwayo  

    

 

Ngo kuva ikigo OBM gishingwa, haramaze kuboneka akarusho mu bijanye n’ugucungera ubutare

IMG5Abantu bose bashaka gukorera mugisata c’ubutare n’agataka bategerezwa kuja mu makoperative. Ivyo vyavuzwe n’umuyobozi mukuru w’ikigo kijejwe gukurikirana ibikorwa vy’ubutare n’agataka OBM, Jean Claude Nduwayo mu kiganiro yahaye ikinyamakuru UBUMWE. Yabandanije amenyesha ko iyo ikoperative ikeneye kwimba ubutare yandikira ikete umushikiranganji ajejwe ubutare n’agataka n’amasoko ntanganguvu. Iyo ikoperative yemerewe gucukura ubutare naho niho ikigo OBM gica gikurikirana ibikorwa vy’ikoperative yemerewe gucukura ubutare gushika iburonke, ibushore ,mu bibanza bizwi bita amakontware. Ngo amakontware niyo yemerewe gushora ubutare hanze gusa. Ngo imbere y’uko ubutare buva aho bwimbiwe, OBM niyo ishirako ikimenyetso cerekana ko ubutare   buzwi, igashirako n’aho buvuye. Ngo hageze ko bushorwa hanze, OBM irasubira gushirako ikimenyetso kugira bazomenye ko bwavuye mu Burundi, hakamenyekana na kontware bwavuyeko. Nduwayo yamenyesheje ko ikigo OBM gikurikirana ko amahera ubutare bugurishijweko hanze agaruka mu Burundi. Ku bijanye n’agataka, yabandanije amenyesha ko umuntu ashobora gufyatura amatafari canke gukura amabuye makeyi mw’itongo ryiwe ataco atanga. Ariko rero amenyesha ko amakoperative kugira atangure gukorera muvy’ubutare n’agataka arariha amahera asabwa bivanye n’ubwoko bw’agataka canke bw’ubutare aba ashaka gucukura. Nduwayo yamenyesheje ko amashirahamwe manini manini yubaka amabarabara asaba impusha kandi arinda kugira ivyigwa bijanye n’ukuraba ukungene isi imeze n’ibizohakorerwa hanyuma bakiyemeza ko aho hantu azohasubiza uko yahasanze, ko azohatera ibiti kugira ntihahave haba inkukura canke ihindagurika ry’ibihe. Nduwayo yamenyesheje ko kugira ubutare bucungerwe neza, bureke gushorwa hanze mu kinyegero, ikigo OBM kirakorana n’abajejwe intwaro, umutekano n’ubutungane n’abanyagihugu. Ngo kuva ikigo OBM gitanguye gukora muri Gitugutu 2016, hariho akarusho mu bijanye n’icungerwa ry’icukurwa n’ishorwa ry’ubutare n’agataka. Ngo ubwa mbere ubuyobozi bukuru bwo mu bushikiranganji bujejwe ubutare n’agataka n’amasoko ntanganguvu bwari busanzwe bukurikirana ubutare n’agataka ntibwari bufise ubwigenge ugasanga bica bibugora gukurikirana ibibera mu gihugu cose , uko bashatse kugira ingendo ntibazigira, ariko kuva ikigo OBM gitanguye gukora muri Gitugutu 2016, hariho akarusho mu bijanye n’icungerwa ry’icukurwa n’ishorwa ry’ubutare n’agataka. Nduwayo yamenyesheje ko biboneka neza ko ibiharuro vy’umwimbu bimaze kwiyongera haba mu butare canke mu makoperative amaze gushingwa. Yabandanije amenyesha ko yizera ko ku mpera z’umwaka hazoba habonetse ibiharuro vy’umwimbu bishimishije. Ngo mu nteguro, ikigo OBM kizoshinga ibisata mu burere no mu ntara ariko mu ntango hazobanza gushingwa uburere 5 : akarere ku mu buraruko, mu burengero, mu bumanuko, mu buseruko n’ako hagati mu gihugu. Ngo ivyo bizotuma abakozi ba OBM bashobora kuguma bakurikirana ibiriko biraba ku rubuga. Ngo bizokworoha abakozi ba OBM bariko bararaba ibiriko birabera aho bari kandi n’abanyagihugu bazokworoherwa kubera batazoguma bamanuka iyo bakeneye ikintu muri OBM.

Aline Kanyana

 

Mu Nama Nkenguzamateka : Integuro z’amabwirizwa agenga isubirwamwo ry’amatagisi atozwa ku bifungurwa biva hanze ya EAC yaremejwe

xscssAbakenguzamateka baremeje integuro y’ibwirizwa risubiramwo amabwirizwa agenga itozwa ry’amatagisi ku bidandanzwa biva hanze y’akarere k’ibihugu bigize ishirahamwe rya Afrika y’ubuseruko, irishiraho amatagisi nyongeragaciro n’irigenga amatagisi y’ibidandazwa vyinjira mu Burundi. Ivyo vyabaye mu nama ya bose y’abakenguzamateka yatunganijwe ku wa 5 Ndamukiza 2017. Umukuru w’Inama Nkenguzamateka Révérien Ndikuriyo ni we yari arongoye ibikorwa vy’iyo nama ya bose. Amaze guha ikaze abakenguzamateka n’umushikiranganji w’ikigega ca Reta, Domitien Ndihokubwayo yaciye amusaba gushikiriza imvo n’imvano y’isubirwamwo ry’ayo mabwirizwa. Umushikiranganji w’ikigega ca Reta Domitien Ndihokubwayo yamenyesheje ko haciye igihe ibirere bihindagurika maze umwimbu mu gihugu ugashishikara uba muke. Ivyo rero ngo vyatumye Reta ifata ingingo yo kworohereza abenegihugu kugira ngo basume mu buryo butavuna kuko ibiciro vy’ibifungurwa bimwe bimwe ku masoko vyaciye biduga ibiciro kandi amikoro y’abenegihugu ari mato cane. Ngo rero Reta yafashe ingingo yo gukuraho amatagisi atozwa ku bifungurwa bimwe bimwe bivuye hanze kugira ngo biboneke mu gihugu maze abenegihugu babironke bitazimvye cane. Ivyo ariko ngo ntibizomara igihe kinini mu ntumbero yo kubuza ko hari aboca bikika mu kiza akaba ari bo bunguka maze umwenegihugu ntihagire ico bimwungura. Ngo Reta izogenda ikurikiranira hafi ico iyo ngingo iriko irazanira umwenegihugu. Umukuru w’Inama Nkenguzamateka, Révérien Ndikuriyo yaciye aha ijambo umukuru w’umurwi w’Inama Nkenguzamateka wamaho ujejwe gukurikirana ibibazo vy’ubutunzi, ibidukikigje n’uburyo Reta ikoresha, Immaculée Ndabaneze kugira ngo ashikirize ico umurwi arongoye washitseko mu vyigwa wagize kugira ngo iryo bwirizwa risubirwemwo. Muri ico cegeranyo nk’uko Immaculée Ndabaneze yabishikirije ngo uwo murwi wakoranye n’umushikiranganji aho washoboye kumubaza amafaranga yoba yarinjiye mu kigega ca Reta mu myaka itatu iheze hakurikijwe itegeko inomero 1/22 ryo ku wa 26 Rusama 2006. Aha ngo umushikiranganji yaciye atanga uturonde rw’ingene ayo mafaranga yabonetse hisunzwe urutonde rw’ibifungurwa rwafatiweko. Ikindi barondeye kumenya ni agahombo gashobora kuzoca kaboneka mu gihe ayo matagisi akuweho mu mwaka w’2017. Aha umushikiranganji yishuye ko hazoba agahombo kangana ibice 8 kw’ijana vy’amafaranga ategekanijwe kwinjira mu kigega ca Reta. Ngo ico kinogo kizokuzuzwa n’izindi ngingo zerekeye itozwa ry’amatagisi n’amakori zizogenda zirafatwa. Abakenguzamateka uko bari bitavye ibikorwa vy’uwo munsi bagiye bemeza ibwirizwa rimwe rimwe inyuma y’uko umurwi wamaho ujejwe ibibazo vy’ubutunzi, ibidukikije wagenda ushikiriza icegeranyo cawo kw’ibwirizwa rimwe rimwe ryose. Integuro y’ibwirizwa risubiramwo ibwirizwa rigenga amatagisi atangwa ku bidandanzwa bivuye hanze y’akarere karimwo ibihugu biri mw’ishirahamwe rya Afrika y’Ubuseruko ryemejwe n’abakenguzamateka 36 ; iyigenga isubirwamwo ry’ibwirizwa rigenga amatagisi nyongera gaciro n’amatagisi y’ibidandazwa vyinjira mu gihugu yatowe n’abashingamateka 38. Inyuma y’ivyo bikorwa abaserukira imirwi ibiri y’abakenguzamateka bagize ingendo kwirabira ibiriko birarangurwa mu gisata FONIC n’ishure ry’imyuga ryubatswe n’abashinwa mu Kigobe barashikirije ivyegeranyo vy’izo ngendo ahanini biboneka ko abakenguzamateka bashimye kuzotumako abashikiranganji bakurikirana ivyo bisata kugira ngo bishure ku bibazo vyabo mu ntumbero yo gutanga ivyiyumviro vyokwisungwa mu kurangura imirimo muri ivyo bisata.

Nathan Ntahondi

 

 

Imyaka 23 iraheze Prezida Cyprien Ntaryamira yitavye Imana mw’isanganya ry’indege mu Rwanda : Abarundi basabwa kugiriranira amasezerano n’Imana kugira ngo babone ibihe vyiza

xwcsKw’igenekerezo rya 6 Ndamukiza 2017, mu mihingo yose y’igihugu haratunganijwe ibirori vyo kwibuka umuhisi Prezida Cyprien Ntaryamira yitavye Inama mw’isanganya ry’indege mu gihugu c’Urwanda, hari ku wa 6 Ndamukiza 1994. Ibirori nyamukuru bikaba vyabereye mu gisagara ca Bujumbura, aho vyari vyatewe iteka n’Umukuru w’igihugu Petero NKURUNZIZA ari kumwe n’umutambukanyi wiwe. N’abandi banyacubahiro benshi bakaba bari bitavye ivyo birori. Ivyo birori rero vyatanguriye ku nkuka y’imisa yaherejwe n’Umwungere wa Diyoseze nkuru ya Bujumbura,Musenyeri Evariste Ngoyagoye muri Cathédral Regina Mundi,aho yasavye abarundi kugiriranira amasezerano n’Imana kugira ngo babone ibihe vyiza. Musenyeri Evariste Ngoyagoye yamenyesheje ko kubona abarundi bama bibuka uko umwaka utashe incungu z’igihugu n’abarundi benshi bagiye bahitanwa n’ubuwicanyi ari uko hariho ivyizigiro ko abapfuye bazozuka. Ngo ni ico gituma abarundi bakwiye kugiriranira isezerano n’Imana kugira ngo baze babone ibihe vyiza. Yagarutse ku vyabaye ku bantu ba kera bavugwa muri Bibiriya bagiriraniye amasezerano n’Imana. Ngo Imana yaragiriraniye isezerano na Ibrahimu maze uwo nawe yabaye rurangiranwa kw’isi. Ngo Yezu yabwiye abigishwa biwe yuko uwuzogumya amajambo yiwe atazokwigera apfa. Ngo abavyumvise ntivyabatanganje gusa ahubwo ngo baranavyanse. Ngo bamubwiye ko ivyo avuze atari vyo ahubwo bamwise ko ari ishetani. Nk’uko Musenyeri Evariste Ngoyagoye yashishikaye abisigura ngo iyo umuntu batanguye kumwita ishetani ngo ibintu biba bigeze kure. Ngo haba hasigaye ko bamutera amabuye. Abarundi rero ngo iyo bataba bemera ko abapfuye bazozuka ntibaba bama bibuka ababo bapfuye. Niko gusaba abarundi bose uhereye ku ndogozi z’igihugu n’abarundi bose kwama barondera kugiranira amasezerano n’Imana kugira ngo babone amahoro mu mitima yabo. Ngo mu gihe c’i Karema co gutegura umunsi wa Pasika ngo bikenewe ko haba ugutegura imitima mu gutanga imbabazi, ukwicisha bugufi no kwirega. Ibirori vy’uwo munsi vyabandinirije ku ntatemwa y’umuhisi Cyprien Ntaryamira iri mu ngoro yitiriwe uwa mbere Munyonyo. Aho naho niho hashikiririjwe ivyaranze ubuzima bw’ umuhisi Ntaryamira Cyprien. Haciye hakurikira ugushira ingori z’amashurwe ku ntatemwa yiwe eka mbere n’izabashikiranganji, Simbizi Cyriaque na Ciza Bernard baguye hamwe muri iryo sanganya ry’indege. Prezida NKURUNZIZA yari kumwe n’umutambukanyi wiwe akaba ariwe yatanguye gushira urugori rw’amashurwe kuri iyo ntatemwa. Haciye hakurikira abaserukiye abaserukira ibihugu vyabo mu Burundi, umuryango w’umuhisi Cyprien Ntaryamira, abakuru b’imigambwe uhereye ku baseruye umugambwe CNDD-FDD, Uprona n’iyindi. Ivyo birori vyasozerewe no gutega yompi ijambo ryashikirijwe na Cyprien Ntaryamira igihe yashikira ubutegetsi. Iryo na ryo ryari ryerekeye kugarukana amahoro mu gihugu. Ico gihe yasaba abarundi kwubahana. Ku bwa Cyprien Ntaryamira ngo abahutu, abatutsi n’abatwa bose ni abana b’igihugu bategerezwa gukingirwa kumwe ata kuvangura. Yari yiyemeje kugarukana ubwitonzi mu nzego zose z’igihugu.

Nathan Ntahondi

 

Mu ntara ya Ngozi : Abarundi basabwa kwisuzuma ingeso zabo baheze basubire ku Mana

DSC 0033ggggAbarundi basabwe kwisuzuma, basarangure ingeso zabo, gutyo bagaruke ku Mana. Eka ngo bakwiye kwihana ivyaha, ubwiyorobetsi, ubusuma, ubusambanyi, n’izindi ngeso mbi zose. Muri ico gihe, ngo ivyo bazosaba bazoheza babironke. Izo ni zimwe mu nyigisho zatanzwe n’umutambukanyi w’Umukuru w’igihugu, Denise NKURUNZIZA, ku wa 2 Ndamukiza 2017, mu misa yo guhimbaza Imana mu rushengero rw’urutare rw’i Buye, imisa yari yitambwe n’Umukuru w’igihugu, Petero NKURUNZIZA.Nk’uko umutambukanyi w’Umukuru w’igihugu, Denise NKURUNZIZA yabandanije abishikiriza afatiye ku vyanditse mu gitabu co gucura intimba, ikigabane ca 3, umurongo wa 40, abarundi yabateye akamo ko kwihana bagaruke ku Mana. Muri ico gihe, ngo inzuzi z’ubugingo zizodudubiza mu barundi. Mu gihe, amezi atatu atangura umwaka yarangiye, ngo ni akaryo keza ko kwisuzuma barabe ivyo batahuye mu nyigisho baronse muri ico kiringo cose. Eka ngo abarundi bakwiye kwiha ikibazo co mu mutima, bakisuzuma, bagasarangura ingeso zabo muri ico kiringo c’amezi atatu aheze. Mu gihe abarundi binjira mu mashengero bacafuye, ngo nivyo bituma ibitangaza bidakoreka. Ariko ngo nibigarura bakihana, bakiyeza, ngo ivyo bakeneye bazobironka. Abarundi rero baterwa akamo ko kwihana kubera ngo atawuzi umunsi n’isaha, ngo nivyiza kwihana bakiri bazima. Eka ngo umuntu yihana agihumeka, na kare ngo umuntu niwe yisabira imbabazi akiri muzima. Muri Zaburi ya 50 naho, ngo ico Imana ivuze iragishitsa. Umuntu wese ari mu bikorwa bitagororotse, ngo Imana irateba ikamugaragaza. Eka ngo twihisha amaso y’abana b’abantu, ariko Imana yoyo ivyo turimwo vyose iba ibibona. Mu migani igice ca 29, ngo ibicumuro vyose birangana imbere y’Imana, nta gitoya nta gikuru. Imana ngo ni umuvyeyi, ntigihaniraho,kuko Yezu yaratanze ikiguzi. Kuri ivyo, ngo kwihana rero ni uwu musi Imana itaratugaragaza kubera ivyaha vyacu. Mw’ibaruwa Paulo yandikiye abakorinto, aravuga neza ko ari twe two kwisuzuma kubera ko ari twebwe nyene tuzi ivyo dukora, ariko ngo Imana yoyo irabizi. Ivyaha ngo nivyo bituma dusoma ijambo ry’Imana ntituritahure. Mu gitabu ca Yoweli igice ca 2 umurongo w’12, haranditswe ko dukwiye kwisonzesha kugira duhebe ivyaha vyanse ko duheba. Imana ngo ni munyakigongwe, uwugiye ayigana iramubabarira, eka ngo ibiganza vyayo vyama vyuguruye. N’umwana w’icangazi yarisuzumye arigaya araheza aragaruka kandi ngo yarakiriwe. Vyongeye kubera imbabazi zayo, ngo twigaruye itwakira uko turi kwose, na none ngo amaherezo y’inzira ni mu nzu. Mu cete canditswe na Yohani igice ca 21, kuva ku murongo w’8 gushika ku w’9, aravuga ko kwatura ivyaha imbere y’Imana uba uriko uravavanura na shetani, kuko ngo uba usa n’uwuyimeneye ibanga. Muri Matayo igice ca 26, umurongo wa 20, haranditse ukuntu Yuda yagurishije umwana w’Imana amadenariyo 30. Yuda amaze kubona uko bariko barafata Yezu, yarageze ahantu ngo aricuza ataco agikiza, aho yahavuye asubiza y’amadenariyo. Icigwa twokuramwo rero ngo ni uko twokwihana, twimenye uko turi ngo ntituzoheza ngo dutsindwe n’urubanza.

Déo Misigaro

        

 
Ouvrir