Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abarundi bahamagariwe kuguma barikanuye kugira umwansi ntazohave abaca mu ryahumye mu bihe vy’amatora

cinjireIgiporisi c’Uburundi carerekanye abantu babiri bagirizwa kuba bari mu bagize igitero ku bitaro vy’i kibuye mu ntara ya Gitega hamwe n’inkoho zibiri zakoreshejwe. Abo bafashwe bakaba bari mu murwi munini wari umaze gusamburwa mbere bamwe bakaba bamaze gushikanwa mu Mpimba kandi uwo murwi wari umaze kwonona ibitari bike mu kwica no mu kwiba mu gisagara ca Bujumbura. Ivyo bikaba vyamenyeshejwe na Pierre Nkurikiye avugira ubushikiranganji bw’umutekano kw’igenekerezo rya 25 Ruhuhuma 2020 mu ntumbero yo guhumuriza abarundi n’abanyamahanga baba mu Burundi. Igiporisi c’Uburundi carerekanye abantu babiri bagirizwa kuba bari mu bagize igitero ku bitaro vy’i kibuye mu ntara ya Gitega hamwe n’inkoho zibiri zakoreshejwe. Abo bafashwe bakaba bari mu murwi munini wari umaze gusamburwa mbere bamwe bakaba bamaze gushikanwa mu Mpimba kandi uwo murwi wari umaze kwonona ibitari bike mu kwica no mu kwiba mu gisagara ca Bujumbura. Ivyo bikaba vyamenyeshejwe na Pierre Nkurikiye avugira ubushikiranganji bw’umutekano kw’igenekerezo rya 25 Ruhuhuma 2020 mu ntumbero yo guhumuriza abarundi n’abanyamahanga baba mu Burundi .Pierre Nkurikiye yamenyesheje ko uwo murwi wiba ukica ukoresheje ibirwanisho bicira umuriro, urimwo inkozi z’ikibi nyinshi aho igice  kinini cawo  kimaze gufatwa mu bundi bugizi bwa nabi bwagiye burakorwa. Kw’igenekerezo rya 1 Munyonyo 2019 izo nkozi zikibi zarateye mu kabare ko mu gisagara ca Bujumbura aho bita kwa Giriberi aho bishe abantu 3 abandi barakomereka, baratera na grenade igihe bariko barahunga. Ngo hari n’umupfasoni yishwe mu Buyenzi bongera  baramutwara n’amahera atari make Uwo murwi nyene ngo warishe n’abakenyezi 2 n’umwana  bo muri zone  Kanyoshakomine Muha n’uwundi mukenyezi 1 wo mu Kizingwe wone Kanyosha nyene.

Uwo murwi nyene warivye mu ma zone  ya Ngagara na  Kinama. Abaporisi  barashoboye gufata abatari bake kuko hari 9 bamaze gushika mu Mpimba. Bamwe mu bakoze  igitero  giheruka  kubera ku bitaro vy’ikibuye i Gitega aribo Niyonkuru Alfredd na Bikorimana Jean Baptiste ari nawe yatanga imiduga nyene  yo gukora ubwo bubisha barafashwe n’iyo miduga   yarafashwe. Yabandanije amenyesha ko mu bitero bimaze iminsi bikorwa n’abagizi ba nabi mu ntara ya Bujumbura, inkozi z’ikibi 22 zarahasize ubuzima, inkoho 12 zirafatwa n’ibindi bikoresho, abaporisi babiri baricwa abandi barakomereka hamwe n’abari muri uwo murwi bafashwe. Ivyo bitero bikaba vyabereye muri komine Isare mu  ntara ya Bujumbura. Muri izo hakaba harishwe 2 n’ibikoresho birafatwa nk’inkoho 1 n’ibikono vy’amasasu ku misozi ya Nyambuye na Nyarushinge iri muri iyo komine nyene. Muri rusangi rero ngo ivyononekaye muri ivyo bikorwa vyo gutuza ako karwi hariho inkozi z’ikibi 22 zahasize ubuzima harimwo n’umwigisha wo kw’ishure ryisumbuye rya Maranatha ari nawe yari arongoye ako karwi n’abaporisi 2 bariko bagerageza gutuza ako karwi ngo bakingire abanyagihugu. Ibikoresho bariko barakoresha vyafashwe harimwo inkoho 12, grenade 1 n’uturadiyo duto two guhanahana amakuru n’icuma c’inkoho.Yarangije amenyesha ko kuri ubwo bugizi bwa nabi bwose bwakozwe inkozi zikibi z’ikinze agahumbezi kubera muri kino gihe abantu bahanze amaso amatora  twimirije, agahumuriza abarundi n’abanyamahanga ngo batekane bongere babandanye ibikorwa vyabo ariko ngo bagume barikanuye babicishije muri ya nyabune ijejwe umutekano . 

 Josélyne Ndayegamiye

 

Ikarema ni igihe co gusenga, kwisonzesha no gufasha abatishoboye

patiriiiUmunsi wa gatatu w’iminyota ni umunsi winjiza abakristu mu gihe gikomeye c’ikarema. Ico gihe kikazotangura kw’igenekerezo rya 26 Ruhuma 2020 nk’uko vyashikirijwe na patiri Dieudonné Niyibizi ajejewe kumenyesha amakuru kuri Cathédrale Regina Mundi mu kiganiro yahaye ikinyamakuru UBUMWE ku wa 20 Ruhuhuma 2020. Patiri Dieudonné Niyibizi yamenyesheje rero ko  ikarema isigura ikiringo c’iminsi 40 aho abakristu bafata urugendo bitegurira umunsi mukuru wa Pasika, bakazirikana kandi  ikiringo gihambaye c’ubuzima  bwabo nkabemera Imana, urupfu n’izuka rya Yezu Kristu. Yaravuze ko bigana ya minsi 40 Yezu yamara mu bugaragwa canke ya myaka abanyisrayeri bamara bariko barajabuka bagenda berekeza igihugu c’isezerano ca Kanani. Ngo ni igihe ciza kiroranye gifasha abakristu mu guheba ibicumuro. Yaravuze kandi ko kuva ku munsi wa gatatu w’iminyota  gushika kw’ipasika abakristu baja mu rugendo bakumva yuko bariko baritegura bikomeye, aho bigenza buhoro bakongera bakazirikana, bakakira mu buzima bwabo ikinyegezwa co gupfa no kuzuka kwa Yezu Kristu. Yarongeye aramenyesha ko ikarema igizwe n’ibintu bitatu arivyo : gusenga gusumvya uko wahora, kwisonzesha , hamwe no gufasha abatishoboye. Ngo kwisigisha iminyota vyerekana ko umuntu aba yicishije bugufi akagaya ivyo yakoze. Bisigura kandi ko umuntu yisize iminyota aba yizigira ikigongwe c’Imana. Ekereziya Gatorika ubu ntigishira imbere kubwira umuntu ngo uzosubira mw’ivu ahubwo ko yotahura ko hageze ko yokwisubirako akigarura agahinduka akemera inkuri nziza. Umukristu w’ukuri rero muri ico gihe yokwisubirako agahinduka akavavanura n’ibikorwa bibi, ni ukuvuga agaheba ibicumuro.

Thérèse Niyonkuru

 

Ikiyaga Tanganyika gitegerezwa kwama gikingirwa kuko gifitiye akamaro kanini abanyagihugu

DSC 0438 AIkiyaga Tanganyika ngo ni isoko ridasanzwe kw’isi yose rifise amazi meza kandi ririmwo ubwoko bwinshi bw’ibinyabuzima. Arico gituma mu nama iherutse kuba y’ibihugu bisangiye ikiyaga Tanganyika, ivyo bihugu vyose vyumvikanye ko  bigira umugambi wo gukingira ico kiyaga haba ku nkengera zaco, haba gukingira isura ry’ikiyaga hamwe no gukingira ahantu ifi zigenda zita amagi n’ibindi kugirango haboneke umwimbu mwinshi w’ico kiyaga. Ivyo ni ivyashikirijwe n’umushikiranganji w’uburimyi, ubworozi n’ibidukikije, Déo Guide Rurema mu kiganiro yahaye abamenyeshamakuru ku wa 19 Ruhuhuma 2020, i Bujumbura.Nkuko yabandanije abimenyesha ngo ikiyaga Tanganyika gifise ubutunzi kama cisangije. Ngo gifise amazi meza gusumba ayandi y’ibindi biyaga vyo kw’isi yose kuko ngo nta bindi biyaga umuntu ashobora kunywa amazi yavyo ata bindi bintu babanje kuyakorera. Ikiyaga Tanganyika kirimwo kandi ubwoko bwinshi  bw’amafi  mbere udashobora gutora mu bindi biyaga , indagara, n’ibindi bifitiye akamaro kanini abanyagihugu.

Ku bw’ivyo, ngo  mu nama iherutse kubera mu gihugu ca Etiyopiya yahuza ibihugu bisangiye ikiyaga Tanganyika arivyo Uburundi, Tanzaniya, Republika iharanira demokarasi ya Kongo hamwe na Zambiya, yo kurabira hamwe uwurongora ikigo gisanzwe kiri mu gihugu c’Uburundi gihuza ivyo bihugu uko ari bine bisangiye ico kiyaga  Tanganyika, ngo bavuganye ko bose bashaka umwimbu mwinshi w’ikiyaga. Kugirango ivyo navyo bibe bakaba baciye bumvikana ko umwe wese mu gihugu arimwo, bose bagira umugambi wo gukingira ku nkengera z’ikiyaga, gukingira isura ry’ico kiyaga, gukingira ahantu amafi atera amagi, kuraba ibihe vyo kuroba n’ivyo kutaroba, kubuza kuroba udufi dutoduto hamwe no kurwanya ibikoresho vya magendo canke biza kwononera umwimbu w’ikiyaga, n’ibindi. Ku ruhande rw’Uburundi rero Umushikiranganji Déo Guide Rurema akaba yamenyesheje ko hari hasanzwe umugambi wo gukingira ico kiyaga Tanganyika biciye mu gushiraho imikobeko ku munsi wa kane ugenewe gukingira ibidukikije n’ibindi.  Ivyo bihugu rero uko ari bine ngo bikaba bigiye gushira inguvu hamwe kuko basanze ata migambi ikomakomeye ihari ifitiwe amahera, arico gituma ngo bagiye kuja inama n’ingingo kugirango bashobore kuja kurondera abo bafashanya mw’iterambere kugirango bazane imigambi ikorerwa mu gihugu kimwe kimwe cose kandi igirira akamaro igihugu kimwe cose  n’abanyagihugu.  

Estella Niyongere

 

Abakenyezi bahamagariwe kwitabira amatora

yolandeIbibazo vyega umukenyezi nta wundi akwiye kubimuvugira ubwa mbere atari we avyivugiye. Niwe ashobora kumenya neza ico abuze kugirango ashobore kugira ico aterereye mw’iterambere ry’igihugu. Kuba rero atokwitoza kugira ashobore kuja mu nzego zifata ingingo mu gihugu bifise ingaruka nyinshi.  Ivyo vyashikirijwe na Diane Ndonse arongoye ishirahamwe ry’abamenyeshamakuru b’abakenyezi AFJO, mu kiganiro yahaye ikinyamakuru UBUMWE ku wa 13 Ruhuhuma 2020. Ikindi amenyesha n’uko abakenyezi ari benshi mu gihugu ugereranije n’iyindi mirwi y’abantu kuko bari ku bice birenga 50% vyumvikana ko bafise ico bashobora kuvuga na cane cane ku bibazo bibaraba.Nk’uko yabandanije abimenyesha, ngo hari ibibazo bishobora gukora k’umukenyezi kuruta umugabo muri rusangi bishobora kuba biri mu gihugu. Atanga akarorero ko mu nama z’abatavuga rumwe, bimaze kugaragara ko abakenyezi bafise ico baterera cane cane mu gukinga indyane no gukinga indwano zishobora kwaduka. Nico gituma rero abakenyezi bitoje kumbure hari aho indyane mu gihugu zogabanuka.  Ikindi naco ngo n’uko n’Ibwirizwa Shingiro rivuga ko iterambere ry’igihugu rifatiye kw’iterambere ry’imiryango. Vyumvikana ko umukenyezi akwiriye kuja no mu bindi bisata vy’ubuzima bw’igihugu mu bijanye no gutora inyishu y’icotuma igihugu gitera imbere ariko ntagarukire kuri uwo muryango gusa.

Intambamyi zibuza abakenyezi kwitabira amatora ni nyinshi
Diane Ndonse amenyesha ko intambamyi zibuza abakenyezi kwitabira amatora zihari kandi ko ari nyinshi. Hari iziva ku mategeko yo mu gihugu n’ubwo hariho ayamufasha gutera imbere. Aravuga ko abakenyezi baserukirwa ku bice 30% ariko ko bitubahirijwe hose. Ngo icigwa cakozwe n’ishirahamwe ry’abakenyezi bahungutse AFRABU mu mwaka w’2018, kirerekana ko mu nzego zifata ingingo abakenyezi bari ku bice 18% gusa bategerezwa kuba mu bisata vyose bari ku bice 30%. Ni ukuvuga ko ivyo bice vyubahirijwe mu Nama Nshingamateka no mu bashikiranganji gusa kandi mu nzego zose zifata ingingo bari bakwiye gushikana ibice 30%. Reta rero ngo ikwiye kuraba ko amategeko ahari ashirwa mu ngiro koko. Hari kandi n’izindi ntambamyi ziva mu kibano, n’iziva ku mukenyezi we nyene. Mu Burundi uko umukenyezi afashwe mu kibano, umengo hariho ibintu batari ivyiwe. Baracafise wa mugenzo w’uko umukenyezi ari umuzezwanzu ukamengo ajejwe iyo nzu gusa, ibirengana urugo abamwo ukamengo ntabibazwa ahubwo bibazwa umugabo. Ako rero ngo ni akagihaze kuko kari mu mico y’Abarundi ariko gakwiriye gukosorwa. Abakenyezi kandi basanzwe bafise ibikorwa vyinshi baba bakwiriye gufashanya n’abashingantahe babo. Mu gihe rero umushingantahe adafasha umukenyezi birumvikana ko bimubuza vyinshi. Ni navyo bibabuza no mu migambwe barimwo bataja ku ntonde ubwa mbere. Ivyo navyo bishobora kuva kandi no kukubakengera, ko umukenyezi atari we yotwara idarapo mu mugambwe. Hari kandi n’uko umukenyezi atagira uruhara runini mu mugambwe, haba mu kwitabira inama bivanye no kubura umwanya. Kubura uburyo kandi biramutuma ataboneka nk’umuntu afise igihagararo gikomeye mu mugambwe ariko bakibagira ko abibuzwa n’ibikorwa yama ariko arakora mu muryango. 

Ishirahamwe AFJO rirahimiriza abakenyezi kwitabira amatora
Ku ruhande rw’ishirahamwe  ry’abamenyeshamakuru b’abakenyezi AFJO, Diane amenyesha ko bahimiriza abakenyezi babicishije mu biganiro, bakabategura kugira bazokwitabire amatora, bakamenya kandi ko bafise uburenganzira bwo gutora no kwitoza. Hari n’ukubahimiriza kugirango uko gukumirwa mu migambwe ; kutumva ko babaha igihagararo, bo nyene bakwiriye gushiramwo inguvu bakabona ko imigambwe idakwiriye kubaho itabafise, ko bari kirumara kuko karahara mu ruganda ntibacura. Ku kibazo kijanye na ryari umukenyezi yotangura kwitabira amatora, amenyesha ko yoyitabira uko amategeko abitegekanya. Ni ukuvuga ko umwigeme akwije imyaka yo gutora yokwitabira ivyo bikorwa kuko amategeko aba abimurekurira. Kumbure mu mico y’Abarundi, uretse mw’ishure ntibigishwa ibijanye n’ubuzima bw’igihugu. Rero ngo  bakwiye kuvyigishwa bakwumva ko bakwiye kuvyitaho mu gihe imyaka ibibarekurira ko babibamwo. Ikindi naco n’uko amashirahamwe ataho yegamiye mu vya poritike akwiye kwigisha cane abakenyezi kuko iyo bavuze ko abakenyezi bakwiye kwitoza n’ugutora hari igihe batamenya ibisabwa, ntibamenye ryari bokwitoza. Ati kumbure mu migambwe bashobora kuba batabisigurirwa uko bikwiye. 
Ibimenyeshamakuru bisabwa guha ijambo abakenyezi na cane cane mu bihe vy’amatora
Diane Ndonse asaba ibimenyeshamakuru guha ijambo abakenyezi na cane cane muri ibi bihe igihugu cegereje amatora, kugira nabo bashobore  kuvuga inzitizi zibabuza kwitoza canke izo bahura nabo mu migambwe. Arashimira umurwi ujejwe w’igihugu wigenga  gutegura amatora CENI, wasavye ko imigambwe mu bantu batatu izotanga hategerezwa kujamwo umukenyezi. Ati ariko  ingorane n’uko mu mugambwe akomokamwo ashobora kudashikirwa.Icegera c’uwurongoye ikigo gitohoza ku bijanye no kumenyesha amakuru n’ibimenyeshamakuru CRCOM Yolande Nintunze, nawe nyene yarashoboye kugira ico ashikirije. Amenyesha ko iyo umukenyezi adatoye canke ngo yitoze hari vyinshi vyononekara mu gihugu. Kenshi ngo biravugwa yuko iyo wigishije umugabo uba wigishije umuntu umwe, ariko wigishije umukenyezi uba wigishije igihugu cose. Mu gihe rero umukenyezi ataronse uburenganzira bwo gutora no kwitoza, ntaheza ngo aronke aho ashikiririza ivyiyumviro vyubaka igihugu. Intererano yiwe mu gushigikira amahoro n’iterambere ntiba igishoboye gushikira abafata ingingo. Kira noneho biramaze kwibonekeza yuko abakenyezi bajejwe amabanga bayarangurana ubwira bagashimisha abo barongoye. Ivyo vyaribonekeje aho amakomine arongowe n’abakenyezi ari yo yabaye menshi mu kuronswa agashimwe k’Umukuru w’igihugu. Eka mbere no muri kahise vyaribonekeje ko abakenyezi bashoboye gutwara mu buryo bushimishije haba ngaha mu gihugu c’Uburundi, eka mbere no mu bindi bice vy’isi. Mu gihugu c’Uburundi, atanga akarorero k’umugabekazi Ririkumutima yarongoye igihugu mu gihe abami Mutaga na Bangiricenge bari  batarashikana imyaka yo kurongora igihugu kandi akaba yabikoze ku buryo bubereye. Margaret Thacher yarabaye rurangiranwa mu gihugu c’Ubwongereza. Intambamyi zibuza umukenyezi kwitabira amatora nazo ngo ni nyinshi cane. Nkuru muri zo, ni imico n’imigenzo y’ikirundi ishigikira ko umukenyezi atoseruka ahabona abagabo bahari. Iyindi ni ubukene buhanze abakenyezi butuma bataronka ingwati kugira baje mu matora.Yolande Nintunze akaba yarangije amenyesha ko umukenyezi akwiye kwigishwa ivy’igihugu kuva akiri umwana muto, akamenya yuko igihugu ari iciwe agikeneye ; kimukeneye ; akagikorera n’umutima wiwe wose ari naho rero iyo akwije imyaka yo gutora aheza akamenya yuko ategerezwa kurangura umugirwa wo gutora indongozi z’igihugu ciwe akanatanga umwanya wiwe n’inguvu ziwe mu kwemera kwitoza.                                                         
Gloriose Nshimirimana

 

Integuro y’ibwirizwa rigenga uturusho tw’Umukuru w’igihugu, icegera ciwe n’umushikiranganji wa mbere yaremejwe

DSC 1191Ku wa 20 Ruhuhuma 2020, Inama Nshingamateka yarize yongera iremeza integuro y’ibwirizwa rigenga impembo n’uturusho tw’Umukuru w’igihugu, icegera ciwe, umushikiranganji wa mbere hamwe n’abandi bashikiranganji bagize Reta baronswa igihe bakiri mu mabanga n’igihe bayavuyemw.Iyo nteguro ikaba yatowe ku majwi 100 kw’100, ni ukuvuga abashingamateka 84 bari bahari hamwe na 16 bari batumye.Iyo nteguro yatunganijwe ngo mu ntumbero yo kwisunga ibwirizwa Shingiro rishasha kubera ko hari inzego nshasha zitari muryahora. Izo ni zimwe mu nsiguro zatanzwe n’umushikiranganji w’ubutungane, Aimée Laurentine Kanyana yari yaserukiye Reta muri ivyo bikorwa kugira atange imvo n’imvano yatumye Reta irungika iyo nteguro y’ibwirizwa aho muri urwo rwego, ibikorwa vyari birongowe na Pascal Nyabenda, aramutswa urwego rw’Inama Nshingamateka.Nk’uko umushikiranganji, Aimée Laurentine Kanyana yabandanije abishikiriza, ngo iyo nteguro y’ibwirizwa rigenga impembo n’uturusho Umukuru w’igihugu, icegera ciwe, umushikiranganji wa mbere n’abashikiranganji baronswa, ije gushira mu ngiro Ibwirizwa Shingiro rishasha kuko hari inzego nshasha zitahora mu rya kera.

Izo nzego nshasha rero ngo vyari bikenewe y’uko abazoba bazirongoye, bagenerwa ingene bazoshobora kuronswa utwo dushirukabute. Nk’abandi barundi bose bakora imirimo itandukanye ya Reta, abo bazoba barongoye izo nzego ngo hariho utwo Reta yabageneye bivanye n’imirimo bajejwe kugira babesheho imiryango yabo.Ahanini rero ngo ntacahindutse ku rwego rw’Umukuru w’igihugu, ibintu nyamukuru vyahindutse ngo ni ahari Icegera ca mbere c’Umukuru w’igihugu hagiye icegera c’Umukuru w’igihugu kimwe, ahari icegera ca kabiri c’Umukuru w’igihugu haja umushikiranganji wa mbere, ku bashikiranganji bagize Reta ngo ntacahindutse atari ukwandika neza ingingo z’iyo nteguro y’ibwirizwa.Mu bibazo vyashirijwe n’abashingamateka, barashatse kumenya uturusho Umukuru w’igihugu atekererwa igihe arangije ikiringo ciwe, uko tungana, kuri ico kibazo, Aimée Laurentine Kanyana yamenyesheje ko utwo turusho tuzogenwa n’itegeko ry’Umukuru w’igihugu afatiye ku bihe igihugu kirimwo muvy’ubutunzi. Ku bijanye n’uko ata yandi mabanga uwugenywe mu mabanga yo kurongora igihugu yokora ndetse no ku bashikiranganji, aho bashaka kumenya ko iyo urimye ugashora umusesekara urwo ruba ari urudandazwa, aho umushikiranganji w’ubutungane yamenyesheje ko ari vyiza ku bagize Reta kwitaho uburimyi kugira batange akarorero keza ku barundi. Umusesekara ngo urashobora kugurishwa n’umufasha canke uwundi muntu wese ahagarariye uwo munyacubahiro muri ivyo bikorwa.Izo nteguro z’amabwirizwa ngo n’aho zitegurwa, ngo ni ngombwa ko hagira abazihagararira, zigakurikiranwa mw’ishirwa mu ngiro ryazo kandi ngo abashinzwe amabanga, bagafatwa neza kugira ntibazoze gusaba uwo bimye. Ku bijanye n’uko ayo mabanga yo kurongora igihugu hamwe no ku bagize Reta atajana n’urudandazwa, ngo uwo wese yipfuza kugira urudandazwa arabisabira uruhusha akaronswa inomero ndangamudandaza, aho ngo araheza akamenyekana, adasavye urwo ruhusha, aba aciye kubiri n’amategeko, ivyo navyo birahanwa. Ku kibazo co kumenya igihe abo banyacubahiro bataronswa utwo turusho, ngo ni igihe baba bahemukiye igihugu, ukerekana umutima wo kudakunda igihugu, abasaba ubuhungiro hanze, abatukisha izina ry’igihugu, abo mu turusho baba bafise nko kuronswa igitabu c’inzira c’iteka, ngo boheza bakacakwa bisabwe n’umushikiranganji w’ubutungane. 

Déo Misigaro       

 

Harashinzwe ishirahamwe rishasha ry’aba Scouts n’aba Guides bunze ubumwe

IMG 10535Ishirahamwe rishasha ry’aba Scouts n’aba Guides bunze ubumwe bo mu Burundi ryaratunganije ikiganiro ku bamenyeshamakuru ku wa 21 Ruhuhuma 2020. Intumbero y’ico kiganiro ngo kukaba kwari ukumenyesha abanyagihugu bose bamaze kuryumva canke batararyumva iryari ryo kugira rihumurize abo vyahungabanije ryongere ritekanye imitima yahahamutse yumvise ishingwa ry’aba Scouts n’aba Guides bunze ubumwe mu Burundi.Ivyo ni ivyashikirijwe n’umukuru w’ iryo shirahamwe, Kamikazi Fiona mu kiganiro yahaye abamenyeshamakuru, i Bujumbura.Nk’uko yabandanije abimenyesha ngo hari  imvo zatumye aba Scouts n’aba Guides bakuze bagira ico ciyumviro co gushinga iryo shirahamwe. Muri izo harimwo izijanye no kwisunga  intumbero y’amashirahamwe y’aba Scouts n’aba Guides ku rwego rw’isi yose, gukorera hamwe no kugira inzego zimwe ngo ntibasanzaze inguvu kandi basangiye intubero imwe. Ikindi naco ngo bipfuza guha urwaruka inyigisho z’akanovera z’aba Scouts n’aba Guides zishingiye ku karangamutima k’umuhari wabo. Ikindi gihambaye ngo ni uko bipfuza gushiraho ingendo yo kudakumirana  mw’iterambere hagati y’abahungu n’abakobwa, abigeme n’abagabo bagafatwa ku rugero rumwe hamwe no gushiraho ubuhinga bwo gutanga indero bidaciye mu mashure kandi bihuye n’imyaka bagezemwo mu ntumbero yo gufasha urwaruka rwaba Scouts n’aba Guides, mu gukamisha ubwenge, ubumenyi n’inyigisho z’aba Scouts N’aba Guides bakuze.  Fiona Kamikazi yarongeye amenyesha ko iryo shirahamwe ry’aba Scouts n’aba Gudes bunze ubumwe mu Burundi ryiteguriye kugira imigenderanire ishingiye ku mwumvikano n’ukwubahana vy’amashirahamwe 2 yari ahasanzwe ariyo ishirahamwe ry’aba Scouts n’irindi ry’aba Guides. Iryo shirahamwe rishasha rero ngo rije kugira buzuzanye, ritere intege ayo mashirahamwe yari ahari arico gituma ngo atogira impungenge.  Akarangamutima k’iryo shirahamwe rishasha ngo kazobonekera mu bikorwa kandi ngo bizeye ko bose bazobona ko ari bene mugabo umwe. 

Estella Niyongere

 
Ouvrir