Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Indwara y’uruhumyi ngo ifise ingaruka mbi nyinshi iyo itavuwe hakiri kare

IMG 20170111 114249Mu Burundi indwara y’uruhumyi yitwa «trachome» abantu benshi ngo bakunda kwita uburire ngo irabaho kandi iyo umuntu ayirwaye agaheza akayivuza hakiri kare ngo irakira. Nayo iyo itavuwe ningoga ngo iraheza igakwega ingaruka mbi nyinshi ku magara y’uwuyirwaye. Ivyo ni ivyashikirijwe n’umuganga asanzwe arongoye umugambi w’igihugu ujejwe indwara zititaweho bihagije n’uruhumyi mu bushikiranganji bw’amagara y’abantu no kurwanya ikiza ruhonyanganda SIDA, Victor Bucumi. Nkuko yabandanije abimenyesha ngo indwara y’uruhumyi canke uburire ntikunda gufata umuntu uwari we wese. Ngo ikunda gukarira abantu babayeho mu buryo budashemeye, babayeho nabi, abantu usanga bugarijwe n’ubukene butagira izina, impfuvyi n’abapfakazi batagira shinge na rugero. Abo nabo kenshi na kenshi ngo usanga ari abantu baba begeranirijwe hamwe nk’akarorero abantu baba mu birwati, mu ma site y’impunzi, n’ahandi. Victor Bucumi yamenyesheje ko iyo ndwara y’uburire ifatira mu jisho gutyo hakaza utuguma tumeze nk’udusebe. Ngo uko hahera iminsi rero ijisho ryafashwe n’iyo ndwara ritariko riravurwa ngo niko ritera risinzikara. Ariko ngo birashoboka ko iyo iyo ndwara igeze kure, ijisho rirwaye baribaga mu gihe umurwayi aronse uburyo bwo kwa muganga. Iyo rimaze gusinzikara rero naho ritabazwe ngo uca usanga rikweze ingaruka mbi umuntu wese atokwipfuza ko bimushikira mu buzima bwiwe. Izo nazo ngo nuko ubwa mbere iyo ijisho rifashwe n’iyo ndwara ritavuwe kare uca usanga ingohe zose zahungurutse. Hanyuma ijisho ngo rigaca riguma ririra rivamwo amasozi umwanya wose. Igikurikira naco ngo nuko ijisho rishobora guhuma. Iyo umuntu ahumye amaso yose naho ngo aba atakaje vyinshi mu buzima bwiwe kuko ata kazi aba agishoboye gukora atakibona. Ngo si ivyo gusa eka ngo nico ukeneye cose n’abandi bakikugirira. Victor Bucumi akaba yamenyesheje ko hari intara zimwe zimwe nka Karusi, Muyinga n’igice ca Ruyigi abo mu bushikiranganji bw’amagara y’abantu bamaze kugendera kandi ngo bagize n’ibipimo baraba abarwaye iyo ndwara. Aho naho ngo bakaba baranatanze n’umuti uvura iyo ndwara ku bantu bose basanze bayirwaye. Ariko ibitigiri vy’abarwayi ngo bikaba bitaramenyekana. Iyo ndwara rero ngo ikaba ivurwa n’umuti witwa zythromax igihe itaragera kure.

Estella Niyongere

 

Abanyagihugu bahamagariwe gutunganya neza amazi acafuye ava mu ngo zabo

DSC 0188Abajejwe intwaro basabwa gufasha guhimiriza abanyagihugu bijukire gutunganya amazi acafuye ava mu ngo zabo. Ivyo ngo vyotuma n’ikiyaga Tanganyika gisanzwe gitanga ibice 90% vy’amazi akoreshwa mu gisagara ca Bujumbura gikingirwa. Ihangiro ishirahamwe mpuzamakungu ONU ryihaye ni uko mu mwaka w’2030 amazi acafuye kw’isi yoba yagabanutse ku rugero rw’ibice 50%. Ivyo ni bimwe mu vyashikirijwe n’abatanze ibiganiro, ku wa 22 Ntwarante 2017, aho ubuyobozi bukuru bujejwe gutunganya amazi n’isuku bwari bwatunganije ikiganiro ku bamenyeshamakuru mu ntumbero yo guhimbaza umunsi mpuzamakungu wahariwe amazi. Nk’uko umuyobozi ajejwe gutunganya amazi, Jérémie Nkinahatemba yabimenyesheje ariko aca ku mayange uko uwo munsi wavutse ngo umunsi mpuzamakungu wahariwe amazi kw’isi watanguye guhimbazwa ku wa 22 Ntwarante 1992, biturutse ku ngingo ya 47 y’ishirahamwe mpuzamakungu ONU. Muri ya migambi y’ikimpumbi y’ishirahamwe mpuzamakungu ONU, ngo n’uko gushika mu mwaka w’2030, amazi acafuye yoba yagabanutse ku rugero rw’ibice 50% kw’isi yose. Ariko rero nk’uko Jérémie Nkinahatemba yabimenyesheje, ngo hafi imiriyaridi zibiri z’abantu kw’isi barashobora gufatwa n’indwara za choléra n’izindi ndwara ziritutse ku kunywa amazi mabi. Eka ngo ibice 80% vy’amazi acafuye ngo aturuka ku bikorwa vy’abantu, ayo mazi ngo akarangurura mu nzuzi n’ibiyaga atayunguruwe. Kw’isi yose abantu hafi ibihumbi 900 barashobora guhitanwa n’indwara ziturutse ku mazi mabi acafuye uko umwaka utashe. Nk’uko icivugo mu Burundi kibivuga « Dutunganye neza amazi acafuye mu ntumbero yo gukingira ibidukikije », abajejwe intwaro basabwa gufasha guhimiriza abanyagihugu kwijukira gutunganya neza amazi acafuye ava mu miryango yabo. Mu Burundi, ngo uko igisagara ca Bujumbura cagiye caguka, vyatumye imicafu yiyongera, gutyo kubera idatunganije neza, myishi muri iyo igaherera mu kiyaga Tanganyika iturutse mu nzuzi zica mu gisagara. Nk’uko umuyobozi ajejwe isuku n’amazi no kugenzura ko amazi ari meza, Jeanne Francine Nkunzimana yamenyesheje ko n’aho hari ikibanza co gutyorora amazi acafuye kugira arungikwe mu nyanja ku Buterere, ngo kicubakwa mu mwaka w’1994, ngo cari gutyorora amazi 40 000 m3 ku munsi. Ubu ngo muri kino gihe, ico kibanza gityorora hagati ya 10 000 m3 na 12 000 m3 ku munsi.

Imiryango mike niyo ikoresha ikibanza co kuyungurura amazi acafuye

N’aho ico kibanza kihari, ngo imiryango mike niyo irungika amazi acafuye muri ico kibanza, vyumvikana ko hari iyindi miryango itari mike amazi acafuye anyengetera mu kuzimu uko nyene. Haruhande y’ayo mazi yo mu miryango, ngo n’amazi y’inkukura ava ku misozi ihanamiye igisagara ca Bujumbura kubera ko adatunganije neza yisuka mu kiyaga Tanganyika. Eka n’umuyobozi ajejwe gukurikirana   ikiyaga Tanganyika, Jean Marie Nibirantije yamenyesheje ko hari umugambi wo gukingira ico kiyaga uzorangurirwa mu bihugu bine bisangiye ico kiyaga, ushigikiwe n’ishirahamwe ry’ubumwe bwa Buraya. Biciye muri uwo mugambi nyene, ngo bimirije kuronsa ishirahamwe rijejwe gutunganya isuku mu gisagara SETEMU ivyuma bizofasha kuduza amazi acafuye kugira ashikanwe mu kibanza co kuyayungurura co ku Buterere. Ariko rero, ngo ufatiye ku kuntu igisagara cagiye kiraguka, ngo ico kibanza co ku Buterere gikwiye kwagurwa, kicubakwa ngo cari guhingura amazi acafuye ku rugero rw’ibice 38%. Aho cubakwa mu mwaka w’1994, ngo amakaritiye ya Kanyosha, Kinindo na Musaga ntiyari kuri uwo muhora, nico gituma ico kibanza gikwiye kwagurwa. Tubamenyeshe ko uwo munsi mpuzamakungu wahariwe amazi wahimbajwe mu Burundi ku wa 25 Ntwarante 2017, mu Minago, mu ntara ya Rumonge. ngo kakaba kari akaryo ko kubamenyesha ko bagiye kuronswa amazi meza kubera hari isoko amahoro riherutse gutorwa, ndetse n’ibikorwa vyo kujana amazi mu gisagara ca Rumonge bigiye gutangura kubera ko ishirahamwe Regideso rigiye gutanga isoko. Aho mu ntara ya Rumonge, ngo no ku Mugomere hazokwimbwa ikinogo ahazova naho nyene amazi azofasha mu gisagara ca Rumonge. Ibikorwa vy’uwo munsi vyasozerewe mu kugendera ihoteli « Club du lac Tanganyika », aho amazi acafuye akoreshwa muri iyo hoteli ayungururwa agafasha mu bikorwa vyo kuvomera amashurwe.

Déo Misigaro

 

 

Zone Buterere : Reta yaragarukiye ku banyagihugu batewe n’umwuzurira

DSC 0296Inyuma y’aho umwuzurira uvuye ku mvura y’isegenya yaguye mw’ijoro ry’uwa 17 rishira uwa 18 Ntwarante 2017, ikabomora inzu muri zone Buterere, komine Ntahangwa mu gisagara ca Bujumbura, ku wa 21 Ntwarante 2017, Icegera ca mbere c’Umukuru w’igihugu, Gaston Sindimwo yaserukiye Reta yarishikiye muri iyo zone agiye kugarukira ku bashikiwe n’ivyo vyago. Akaba yari yaherekejwe n’umushikiranganji wo gushigikirana, agateka ka zina muntu n’iterambere ridakumira, Martin Nivyabandi n’abandi banyacubahiro, abazaniye n’imfashanyo yari igizwe n’itoni 3 z’umuceri zahawe imiryango 259. Mw’ijambo ryiwe, Gaston Sindimwo yaramenyesheje   abanyagihugu bo ku Buterere ko yaje kubagarukirako kuko mu magorwa bisaba gufashanya, akaba yaciye abasaba ko bokwama bikingira mu gusibura imiserege iruhande y’aho baba mbere abasaba ko bokwimuka bakava mu kibanza begeranirijwemwo, bakabafashiriza aho bahora baba mu ntumbero yo kurwanya indwara zishobora kwaduka. Ico kibanza begeranirijwemwo kikaba ari kw’ishure nshingiro “Bumwe” ryo ku Buterere. Icegera ca mbere c’Umukuru w’igihugu akaba rero yabamenyesheje kandi ko bazosaba amahema kugira uwo inzu yabomotse abe arakika umusaya mw’ ihema yongera asaba ko boba barakura amazi aho yateze mu nzu bibaye ngombwa bakarungika ababafasha. Yaciye kandi ashimira abo bose bababaye hafi igihe ivyo vyago vyababako nk’ishirahamwe ritabara imbabare « croix rouge » n’igiporisi gitabara igihe c’impanuka « protection civile ».

Christine Manirambona

 

 

Indwara y’igituntu ngo yandukira biciye mu mpwemu z’uwukirwaye ataraja ku miti

DSC02608Indwara y’igituntu ngo yandukira biciye mu mpwemu z’uwukirwaye ataraja ku miti, igafata umuntu atagize ibakwe ryo kuja kwa muganaga kugira bamusuzume bongere bamuhe imiti. Naho biri uko ngo iyo ndwara iravurwa igakira. Ivyo vyamenyeshejwe na muganga Thaddée Ndikumana arongoye umugambi wo kurwanya igituntu n’imibembe ku wa 23 Ntwarante 2017 mu gihe bari batunganije inama ku bamenyeshamakuru. Umuntu arwaye igituntu atarafata imiti ngo araheza akanduza abandi, iyo amaze indwi zibiri ari ku miti ngo ntaba acanduje abandi. Ngo abantu bakarirwa n’indwara y’igituntu ni abagendana umugera wa SIDA, abanyororo, impunzi, abana bakiri bato, abageze mu zabukuru na bagatuku na cane cane abanywa inzoga zitemewe n’amategeko kubera baba bafise abasoda b’umubiri bake bitumwe no kubaho nabi. Yamenyesheje ko ata sano iyo ndwara ifitaniye na marariya, ariko ngo iyo abantu bamerewe nabi canke bashonje, baraheza bagafatwa n’indwara nyinshi. Reta rero ngo yararondeye uburyo kugira abantu bipimishe batarishe amahera bongere bavurwe ku buntu. Yamenyesheje ko hariho amavuriro 171 asuzuma igituntu kandi agatanga n’imiti ku bo basanze barwaye. Ubu naho ngo Reta ifadikanije n’abayifasha igiye gushiraho uburyo kugira amavuriro yose yaba aya Reta yaba ay’ abigenga ashobore kwakira abayituye bose ku buryo bafata igikororwa bakakirungika ku mavuriro afise ivyuma vyo gupima kandi akaba ariyo abazanira n’inyishu. Ubushikiranganji bw’amagara y’abantu rero ngo bwihaye intumbero yo gusuzuma abantu barwaye igituntu bave ku 7.547 bashike ku 9.643. Mu mwaka uheze w’2016 abantu bashoboye gupima bagashira ku miti ngo bari 7.662. Yarongeye amenyesha ko ku wa 24 Ntwarante 2017 ariho mu Burundi bahimbaje umunsi mpuzamakungu wahariwe kurwanya igituntu, ukaba wama uhimbazwa kuri iyo tariki uko umwaka utashe; mu Burundi uwo munsi mukuru ukaba wahimbarijwe mu karere k’ubuvuzi ko mu Kabezi. Icivugo c’uwo munsi ngo akaba ari “Twese tuje hamwe dutuze indwara y’igituntu”.

Epitace Nduwayo

 

Iterambere ry’intara yose rishingiye kw’ihangiro abanyagihugu bihaye bari kumwe n’ababarongoye

CAM00077Muri rwa rukurikirane rwo kubashikiriza ingene imigabo n’imigambi yo guteza imbere intara zigize Uburundi igenda irashirwa mu ngiro hisunzwe ihangiro abanyagihugu n’ababarongoye bihaye nk’uko bazoba vyashikirijwe n’abashikiranganji Reta yashinze kuzihozako ijisho, mu nomero iheruka 1894 yo ku wa 13 Ntwarante 2017 twabiganiye ibiriko birarangurwa mu ntara za Bujumbura na Bururi. Muri iyi nomero turamutse tubashikiriza intambwe iterambere rigezeko mu ntara za Cibitoke na Mwaro.

Intara ya cibitoke iruhande y’ihinguriro buceco ifise yiyemeje, kwubaka ikibuga c’inkino ca kijambere, amashure n’amavuriro

Umushikiranganji ajejwe agateka ka muntu no gushigikirana, Martin Nivyabandi akurikirana ivy’ iterambere mu ntara ya Cibitoke amenyesha ko iyo Intara ifise imigambi y’iterambere iriko irarangura kandi ko igeze ku reguro rushimishije. Ivyo yabishikirije mu kiganiro yahaye ikinyamakuru UBUMWE ku wa 17 Ntwarante 2017 i Bujumbura. Muri ico kiganiro yashikirije ko intara kugira ngo yiteze imbere ikorera ku bintu bikuru bikuru bibiri. Ngo hari ugutegura imigambi y’iterambere Reta iriko irabifashamwo cane. Ngo hari kandi no gutegura imigambi y’iterambere ahanini igashirwa mu ngiro n’abenegihugu ubwabo. Mu ntara rero ya Cibitoke nk’uko Martin Nivyabandi yabimenyesheje ngo imigambi iriko irangurwa hakurikijwe iyo mice irangurwamwo. Ngo amakomine agize intara ya Cibitoke aritanga cane kuko bariko barubaka amashure, amavuriro n’ibindi. Aha Reta rero ngo iriko iraterera nko kwubaka ibarabara riva ku Ruhwa rigashika i Bujumbura. Ngo iyo ntara irafise ihinguriro ry’isima BUCECO. Ngo hariho kaminuza iriko irubakwa n’umunyagihugu. Ngo abanyagihugu bariko bariyagurira ibitaro bikomeye cane. Ngo abo benegihugu bamaze kwegeranya amafaranga angana 14.000.000. Reta rero ngo izoheza, ibinganire. Ngo muri komine Buganda bariko barubaka ikibuga c’inkino giteye imbere cane. Ngo muri Rugombo bariko bubaka ibitaro vyiza cane eka mbere ngo no muri komine Mabayi bariko bubaka amavuriro matomato meza cane. Nk’uko Martin Nivyabandi yabishikirije ngo barubatse amazi ya rusengo. Ikindi yagarutseko ni uburimyi n’ubworozi. Ngo muri iyo ntara bararima cane igiterwa c’itomati. Ngo muri iyo ntara abantu barakorera cane mu mashiramwe. Eka mbere yaranashimiye abarongoye abandi ingene baja imbere abenegihugu kugira ngo bateze imbere igitoke. Eka mbere ngo abanyacibitoke barishikiye i Ngozi n’i Muyinga kugira ngo barabe inge uburimyi bukorwa no gutunganya amasoko. Ikindi Martin Nivyabandi yashimiye abanyacibitoke ngo baraterereye cane mu gufasha abafise inzara. Ngo baregeranije kandi amafaranga yo kugura imbuto zishika amatoni ibihumbi bitanu. Yarashimye cane kandi ivy ‘indero kuko ngo iyo ntara yabaye iya mbere mu kibazo ca Reta c’ishure nshingiro. Martin Nivyabandi yaragarutse ku bibazo bijanye n’amabarabara. Ngo muri iyo ntara hari amabarabara ameze nabi cane. Eka mbere ngo hari n’umugenzo wo guharika ivyo vyose ngo bituma imibano itamera neza. Ikindi na co ngo ni intara iri hafi y’uruja n’uruza ari ko umutekano bashishikara kuwuhagararira. Nk’uko umushikiranganji Martin Nivyabandi yabishikirije mu kurangiza ico kiganiro ngo abanyacibitoke ni bakorere hamwe kuko baca bigira inguvu zisumba ibibazo boba bafise. Yahamagariye abanyacibitoke kuja imbere y’imigambi yose maze basabe imfashanyo ya Reta hari ico berekana bakoze.

Intara ya Mwaro irangwa n’ibikorwa vy’inyubakwa rusangi zitandukanye n’ibarabara rya kaburimbo

Umushikiranganji w’intwaro ibereye no guteza imbere imigambi ya Reta, Serges Ndayiragije ari nawe Reta yashinze guhoza ijisho kw’iterambere ry’ intara ya Mwaro amenyesha ko imigambi y’iterambere   iriko ararangurwa ku rugero rushimishije, agatanga akarorero k’ibarabara rya kaburimbo ririko ryubakwa ku buryo butangwa n’ibanki ya Afrika ijejwe iterambere (BAD). Ivyo yabishikirije ikinyamakuru UBUMWE ku wa 23 Ntwarante 2017 i Bujumbura. Umushikiranganji Serges Ndayiragije yamenyesheje ko hari ibintu bikuru bikuru biriko birangurwa muri iyo ntara nk’iyubakwa ry’amashure y’imyuga, ibiro vy’amazone, eka mbere ngo hariko haranasanurwa amashure yagurutse kubera imvura. Ngo hari n’umugambi ukomeye cane muri iyo ntara ya Mwaro wo kwubaka ibarabara rinini rya kaburimbo rizova i Nyagasaga rigahura n’ibarabara rija i Gitega rivuye i Bujumbura. Ngo igice kitari gito kiramaze gukorwa. Ngo igice ca mbere cakoresheje amafaranga ya BAD kandi yaratanzwe.Yaribukije ko ibarabara rya kera ryaja i Mwaro ryari ribi cane.

Ku bijanye n’inyubakwa, umushikiranganji Serges Ndayiragije yamenyesheje ko mu makomine yose agize intara ya Mwaro hariko harategurwa inyubakwa zitandukanye. Yatanze akarorero ko muri Komine Bisoro ahariko harubakwa ishure shingiro, ikigo c’imyuga c’i Rushanga, hariko harubakwa amasomero cumi na bibiri y’ishure nshingiro muri iyo komine nyene. Ngo hariko harubakwa ibiro vya zone Kanka n’ahazokorera umukozi wa Reta ajejwe inzandiko ndangamuntu (officier d’Etat Civil). Umushikiranganji Serges Ndayiragije yaragarutse ku ntambamyi zituma iyo migambi itanyaruka guhera. Ngo vyose bikorwa n’uburyo. Aha rero ngo amabati n’isima hari aho bikena ariko rero ngo Reta iriko yita ku rutare kugira ngo ibikenewe biboneke. Yasavye kandi imvukira guterera cane mw’iterambere ry’intara yabo. Ibindi bibuze ngo ni imyango. n’amadirisha. Akaba yaciye atera akamo abanyamwaro n’abasanzwe bakunda Uburundi ko guterera cane mu bikorwa vy’iterambere vy’iyo ntara biteye ku rugero rushimishije. Serges Ndayiragije yaranagarutse ku mibano myiza iranga abenegihugu bo mu ntara ya Mwaro. Ngo abenegihugu babanye neza, ata wandya wangura. Ariko rero yarahanuye abanyamwaro kwijukira imigambi y’iterambere kugira ngo baze baronke ico bafungura n’amafaranga y’ishure barihira abana babo. Yaraciriye umugani abanyamwaro ati:”Mu nda harara inzara hakavyuka inzigo”. Ngo abanyamwaro rero ni baje kukivi kugira ngo barwanye inzara. Eka n’ikibazo c’umutekano, umushikiranganji w’intwaro ibereye no guteza imbere imigambi ya Reta, Serges Ndayiragije yarakigarutseko. Ngo muri iyo ntara umutekano wifashe neza muri rusangi. Ariko kandi yahamagariye abanyamwaro kuwuteramira kuko ikibazo c’umutkano ari nkoramutima mu migambi y’iterambere. Yanasavye abajejwe umutekano muri iyo ntara gukomera ku muheto mbere aca asaba abegwa n’umutekano bose gukomeza ya nyabune kugira ngo amahoro n’umutekano bishishikare gutsimbatara muri iyo ntara.

Nathan Ntahondi

 

Umugambwe CNDD-FDD n’umugambwe PCC uramutswa ubutegetsi mu gihugu c’Ubushinwa irabandanya gutsimbataza imigenderanire ihasanzwe

C7m7D3pW0AI 7UpUmugambwe CNDD-FDD n’uwo bicuditse PCC uramutswa ubutegetsi mu gihugu c’Ubushinwa irabandanya gutsimbataza imigenderanire ihasanzwe.Ni muri iyo ntumbero intumwa z’umugambwe wa gikominista uri ku butegetsi mu gihugu c’Ubushinwa PCC zirongowe na Ding Kaijie zagize urugendo rw’akazi mu Burundi, kakaba bakaye akaryo ko kwungurana ubumenyi n’indongozi z’umugambwe CNDD-FDD zishima gukurikiza akarorero keza k’imigabo n’imigambi y’uwo mugambwe PCC wiyemeje kugendera mu guteza imbere ibisata bitandukanye vy’ubuzima bw’igihugu. Izo ntumwa zo ku rwego rwo hejuru rw’umugambwe PCC zashitse ku kibuga c’indege ca Bujumbura ku mugoroba w’igenekerezo rya 22 Ntwarante 2017, aho zakiriwe n’umunyamabanga mukuru w’umugambwe CNDD-FDD, Evariste Ndayishimiye ari kumwe n’abari mu burongozi bukuru bw’uwo mugambwe, eka mbere hari n’abagumyabanga, abakenyererarugamba n’imbonerakure, barimwo ndetse n’abari mu mirwi ndangakaranga y’abatimbo n’abavyinyi bari baje kuryosha ibirori vyo kwakira abo bashitsi b’iteka.   Umunyamabanga mukuru w’umugambwe CNDD-FDD, Evariste Ndayishimiye akaba yarakiriye ku wa 23 Ntwarante 2017 mu ngoro y’umugambwe ku rwego rw’igihugu iri muri zone Ngagara komine Ntahangwa, intumwa z’umugambwe wa gikominista uri ku butegetsi mu gihugu c’Ubushinwa PCC zirongowe na Ding Kaijie. Inyuma y’uwo mubonano, umugambwe CNDD- FDD ufatanije n’umugambwe PCC, waratunganije inyigisho zijanye n’intwaro ibereye n’iterambere mu vy’ubutunzi ku bakozi bakuru bakuru ba Reta bahurikiye mu mugambwe CNDD FDD. Ndayishimiye yamenyesheje ko umugambwe CNDD-FDD wihaye intumbero yo kurwanya ubukene mu kuronsa abanyagihugu ivyankenerwa uhereye ku bifungurwa kubera uwushonje atumva. Yabandanije amenyesha ko muri urwo rugamba, CNDD-FDD ifise intumbero yo gukurikiza akarorero k’ubushinwa mu guteza imbere uburimyi. Ngo ivyo bigenze neza, hazoba hageze ko abanyagihugu baja mu makoperative kugira bashobore gushiraho amashirahamwe ahingura ibidandazwa hanyuma haboneke iterambere. Ndayishimiye yamenyesheje ko Uburundi bufise ayandi matungo yotuma butera imbere nk’ubutare n’ibijanye n’igisata c’ingenzi. Yabandanije amenyesha ko ivyo bikenera uburyo bunini kugira umuntu abishikeko akaba arico gituma CNDD-FDD yihaye intumbero yo guhera ku bikenewe bivuye ku barundi nyene, aho twovuga ubwenge, inguvu z’umubiri n’ishaka. Ngo ivyigwa vy’ifatiro vyateguwe n’abahinga b’abashinwa kugira vyigishwe abakozi bakuru bakuru b’umugambwe CNDD-FDD bije hageze kandi umugambwe wihaye intumbero yo kwama wigisha abakozi bakuru bakuru kugira bashike kw’iterambere. Uwuserukira igihugu c’Ubushinwa mu Burundi, Zhuo Ruisheng yamenyesheje ko umugambwe PCC ufise intumbero yo guhanahana ivyiyumviro n’abarundi ku bijanye n’intwaro ibereye n’iterambere mu vy’ubutunzi. Yahamagariye abakozi bakuru bakuru bariko barakurikirana ivyo vyigwa kudatinya kubaza abahinga aho badatomokewe.

Aline Kanyana

 
Ouvrir