Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Imiryango ya bantahonikora 300 igiye gusubizwa ku gatumba iyo yavuye

imiaUbushikiranganji bw’agateka ka zina muntu, imibano n’iterambere ridakumira  bwaratunganije igikorwa co gusubiza ku gatumba  imiryango ya bantahonikora igizwe na bamwe mu bavyeyi, baba abagabo canke abagore bari babayeho nabi mu gisagara ca Bujumbura. Abo nabo harimwo abahora abasegerereza, abari baje bahunga intambara n’abandi. Ku wa 4 Nyakanga 2019, ubwo bushikiranganji bukaba bwari buramutse bubatekerera impanuro zitandukanye z’uko bazokwigenza bashitse iyo baje bava, kuko iyo umuntu amaze iminsi aba hirya y’umuryango , hageze ko asubira mu kibano hariho ibisabwa kugira ngo bakorane n’abandi banyagihugu gutyo ubuzima bushobore gukunda.Ivyo bikaba vyamenyeshejwe n’umunyamabanga ntayegayezwa muri ubwo bushikiranaganji Félix Ngendabanyikwa. Ubushikiranganji bw’agateka ka zina muntu, imibano n’iterambere ridakumira  bwaratunganije igikorwa co gusubiza ku gatumba  imiryango ya bantahonikora igizwe na bamwe mu bavyeyi, baba abagabo canke abagore bari babayeho nabi mu gisagara ca Bujumbura. Abo nabo harimwo abahora abasegerereza, abari baje bahunga intambara n’abandi. Ku wa 4 Nyakanga 2019, ubwo bushikiranganji bukaba bwari buramutse bubatekerera impanuro zitandukanye z’uko bazokwigenza bashitse iyo baje bava, kuko iyo umuntu amaze iminsi aba hirya y’umuryango , hageze ko asubira mu kibano hariho ibisabwa kugira ngo bakorane n’abandi banyagihugu gutyo ubuzima bushobore gukunda.Ivyo bikaba vyamenyeshejwe n’umunyamabanga ntayegayezwa muri ubwo bushikiranaganji Félix Ngendabanyikwa. Ikindi abo bagiye gusubizwa ku mitumba basabwa ni uko bogerageza gushika bakora, ntibishinge kurera amaboko kuko muri bo harimwo bamwe bahora batembereza twa tuntu badandaza bikoreye ku mutwe. Félix Ngendabanyikwa akavuga ko niyo bagiye bobandanya bakora ico cose cotuma ubuzima bwabo bubandanya ata kwiyumvira ngo ninakora iki abandi barantwenga.  Félix Ngendabanyikwa yamenyesheje ko mu ntambuko ya mbere bakoreye ku ngo zishika amajana atatu, aho ku wa 5 Nyakanga 2019,hari hategekenijwe ko abashika 100 batahanwa mu miryango yabo. Ubushikiranganji rero ngo bwaritunganije ku buryo abazotaha hariho imiduga izobashikana hafi yaho baba kandi bakabatekerera utuntu tuzoshobora kubafasha kugira mu minsi ya mbere ntihagire uwushika aja gusega mu kibano mugabo ashike yitunganije gutyo bimufashe gushikira mu mashirahamwe atandukanye ndetse ashobore no kurima agatongo aba afise. Ku kibazo kijanye n’abana babo, Félix Ngendabanyikwa yamenyesheje ko bamaze kuvugana n’abajejwe indero mu burere butandukanye kugira abana baduganye n’abo bavyeyi bazoshike baronka ibibanza mu mashure. N’ibijanye n’amagara y’abantu navyo nyene barabitunganije, barabaronsa ya makarata yo kwivurizako. Kuba hari amakenga yuko abo bantu bazohava bagaruka mu gisagara, yamenyesheje ko ata makenga bafise kuko nk’uko bafise intonde zabo, ngo bazoza barabasanga mu mihana iwabo baze barabasahiriza mu buzima bwabo butandukanye. 

Umugambi wo gukura abana n’abakuze basegerereza mu mabarabara uriko uratera imbere
Twobamenyesha ko ku wa 3 Nyakanga 2019, mu kiganiro  uwo munyamabanga ntayegayezwa mu bushikiranganji bw’agateka ka zina muntu, imibano n’iterambere ridakumira, yari yahaye ikigino ikinyamakuru UBUMWE, aho yamenyesheje ko umugambi wo gukura abana n’abakuze basegerereza hirya no hino mu gihugu uriko urangurwa mu bwitonzi ntangere kandi umaze gushika ku bitari bike.Félix Ngendabanyikwa akaba rero yamenyesheje ko Reta imaze kubona ko hari amashirahamwe amwe amwe aharanira agateka ka zina muntu yihaye intumbero yo gufasha abasegerereza ku mabarabara mu kubaronkereza aho nyene imfashanyo, yaciye ifata ingingo ko ivyo vyohagarara ahubwo ko bosubizwa mu mihana baje bavamwo kugira ngo habe ariho bafashirizwa. Ngo ni muri iyo ntumbero haciye hategurwa ibigo bizokwakira ubwa mbere abana basegerereza harimwo ikigo co kw’i Jabe CERS muri zone Bwiza, komine Mukaza. Abana rero batowe ngo bashirwa muri ivyo bigo. Ngo ni muri ivyo bigo haca haronderwa iyo umwana wese yaje ava. Ku vyerekeye abana basegerereza, Félix Ngendabanyikwa yamenyesheje ko icegeranyo ca vuba cane cerekana ko hegeranijwe abana bashika 487 muri bo hakaba hariho abariko bashikanwa iyo baje bava. Ngo nko mu gisagara ca Bujumbura abana baboneka basegerereza mu mabarabara bava muri zone Buterere. Aho naho ngo Reta yafashe ingingo yo gutanguza ishure rishasha muri iyo zone kugira ngo abo bana bashobore gushirwa mu mashure. Ivyo ngo biriko bitegurwa uko mu gihe hari abana bashika 7 mu basubijwe iwabo ruguru baciye bashobora kubandanya amashure mbere bakaba babaye aba mbere aho biga kandi baranaronkejwe udushimwe bari kumwe n’abavyeyi babo. Eka mbere ngo hari n’abakenyezi bashika 30 bisabiye gusubizwa ruguru iyo baje bava maze Reta irabibafashamwo. Ngo hakaba haherutse kuboneka abakenyezi n’abagabo bashika 300 bariko barasaba gusubizwa ruguru kugira ngo barondere ubuzima bari mu matongo yabo.
Gloriose Nshimirimana na Nathan Ntahondi

 

Abarongoye inzego n’amashirahamwe vya Reta basabwa gutsimbataza intwaro ibereye mu bisata bajejwe

juumaUmuhuza w’abarundi, Edouard Nduwimana aributsa abarongoye inzego  z’igihugu n’amashirahamwe ya Reta gukorera mu muco no gushira imbere na ntaryo inyungu y’umwenegihugu n’iy’iguhugu kiba cabizeye, nk’uko babitegekwa n’ibwirizwa Shingiro n’ayandi mategeko y’igihugu. Bokwirinda kandi ibiturire, gusesagura amatungo ya Reta n’amakosa yose yotuma inzego bajejwe n’igihugu bidatera imbere. Ivyo yabishikirije i Gitega ku wa 6 Nyakanga 2019  mw’ijambo  ryo kwugurura uruganda Urwego rw’umuhuza rwatunganirije abarongozi bakuru mu nzego z’igihugu n’amashirahamwe ya Reta, rufashwe mu mugongo n’Umugambi w’ishirahamwe mpuzamakungu  ujejwe iterambere ‘PNUD’. Umuhuza w’abarundi, Edouard Nduwimana aributsa abarongoye inzego  z’igihugu n’amashirahamwe ya Reta gukorera mu muco no gushira imbere na ntaryo inyungu y’umwenegihugu n’iy’iguhugu kiba cabizeye, nk’uko babitegekwa n’ibwirizwa Shingiro n’ayandi mategeko y’igihugu. Bokwirinda kandi ibiturire, gusesagura amatungo ya Reta n’amakosa yose yotuma inzego bajejwe n’igihugu bidatera imbere. Ivyo yabishikirije i Gitega ku wa 6 Nyakanga 2019  mw’ijambo  ryo kwugurura uruganda Urwego rw’umuhuza rwatunganirije abarongozi bakuru mu nzego z’igihugu n’amashirahamwe ya Reta, rufashwe mu mugongo n’Umugambi w’ishirahamwe mpuzamakungu  ujejwe iterambere ‘PNUD’. Edouard Nduwimana yabandanije amenyesha ko mu vyo urwego rw’umuhuza rujejwe harimwo kwakira ibirego bijanye n’ihungabanywa ry’agateka ka muntu, itungunywa nabi ry’ubutunzi mu nzego z’igihugu n’amashirahazwe ya Reta. Aho  bikenewe urwo rwego rurakora amatohozwa mu ntumbero yo gushira ukuri ahabona, aho rusanze bitagenda neza rugasaba inzego zibijejwe gufata ingingo zibereye mu ntumbero yo kwubahiriza umwenegihugu. Ni muri iyo ntumbero rero urwego rw’umuhuza rwatunganije urwo ruganda kugira ngo rubibutse ko umurongozi wese ahawe amabanga ategerezwa gukora ku neza y’igihugu n’abenegihugu, gutunganya neza ubutunzi bw’aho ajejwe, nk’uko bitegekanywa n’ibwirizwa Shingiro mu ngingo yaryo y’146. Ku bwa Edouard Nduwimana, umurongozi aba afitaniye amasezerano n’abamukurira hamwe n’abenegihugu, ku buryo mu gihe adakoze neza ivyo ategereza canke akigenza nabi mu mabanga ajejwe aheza akabibazwa, bibaye ngombwa akabihanirwa. Ivyo navyo bikaba bitegekanywa n’ibwirizwa inomero ryo ku wa 25 mukakaro 2014 ritunganya ingene abaserukira Reta bahanirwa amakosa bakoze mu gihe bari mu mabanga yabo, mbere n’ivyononekaye bakabirihishwa bo nyene ah’uko birihwa na Reta canke  amashirahamwe barongoye. Umuhuza w’abarundi yarangije yipfuza ko urwo ruganda rufasha abarwitavye guhindura ingendo mu kurushirizaho kurangura neza amabanga bajejwe mu ntumbero yo guteza imbere igihugu n’abenegihugu. Iryo tegeko rikaba ryaje gufasha vyinshi, kuko imbere yaryo, hari abarongozi bahora bakora amakosa, abarenganijwe bitwaye bagatsinda imanza, Reta ikaba ariyo ihahombera mu kuriha ivyononekaye. 

Uruganda ruzozana akarusho mu kwubahiriza amategeko
Icigwa catanzwe cerekeye inkurikizi z’amakosa akorwa n’abarongozi carerekanye ko mu mwaka w’2014, Reta canke amashirahamwe yayo yarishe amande angana n’1.012.504.736 mu mafaranga y’amarundi. Muri 2015 naho ikaba yarishe 508.547.000. Ivyo bica bituma Reta ica itegekanya ku mwaka amafaranga yo kuriha amande, yokoze ibindi bikorwa vy’iterambere. Ariko icibonekeza n’uko amande atanzwe mur’ubwo buryo yateye agabanuka kuva 2016. Hamwe hamwe biracibonekeza, kuko nko muri 2018 urwego rw’umuhuza rwakiriye amadosiye ashika 2680. Amadosiye menshi akaba yerekeye ukudakurikiza imanza zaciwe, amatongo, gukurwa mu kazi bidaciye mu mategeko, amasoko atangwa habayewo utunenge.Mw’ijambo ryiwe uwuserukira vy’imfatakibanza umugambi w’ishirahamwe mpuzamakungu ujejwe iterambere PNUD mu Burundi, umupfasoni Binta Sanneh yashimye itunganywa ry’urwo ruganda. Yamenyesheje ko Urwego rw’umuhuza ari inkingi yo gushigikira inzego z’igihugu n’amashirahamwe ya Reta mu gutunganya neza intwaro n’ivy’ubutunzi. Ku bwiwe ngo urwo ruganda ruzotuma indongozi zubahiriza gusumba amategeko, gutyo amakosa akorwa mu bisata vya Reta  agabanuke,  hatsimbatare intwaro ibereye, igihugu naco gitere imbere.  Ngo  nico gituma ishirahamwe mpuzamakungu ONU ryahisemwo gushigikira urwego rw’umuhuza ribicishije mu mugambi waryo ujejwe iterambere PNUD. Yamenyesheje kandi ko bazobandanya gushigikira urwo rwego na Reta mu migambi yose y’iterembere. Musitanteri wa Komine Gitega hamwe n’uwaserukiye buramatari bipfurije ikaze no kuroranirwa abitavye urwo ruganda. Bashimye kandi ko urwo ruganda rwatunganirijwe mur’iyo ntara, basaba ko no hanyuma bokwama bayizera na rirya irangwamwo amahoro n’umutekano,  abavukantara nabo bakaba bijukiye ibikorwa vy’iterambere ku murindi udasanzwe, mu ntumbero yo kwerekana ko intara yabo yatewe iteka ryo kuba umurwa mukuru wa politique ibikwiriye.   

Longin NIYONKURU

 

Igiterwa ca «stévia» kirimwe mu gihugu, coshobora kwinjiza amahera y’agaciro

Igiterwa ca « stévia » ngo gifise akamaro kanini cane ufatiye ku mafaranga y’agaciro gishobora kwinjiriza igihugu ndetse kikanashobora gukura mu bukene abanyagihugu. Ico giterwa gihinguwe, gitanga isukari nziza idatera indwara y’igisukari . Inyuma y’ubushakashatsi bwakozwe n’ikigo kijejwe ubushakashatsi mu burimyi n’ubworozi ISABU, haremejwe ubwoko bubiri ko bushobora kurimwa mu Burundi. Ivyo ni ivyashikirijwe na Cyrille Mbonihankuye yakoze ubushakashatsi mu kigo ku giterwa ca « stévia », ibiterwa vy’ivyamwa n’imboga, hari mu kiganiro yahaye ikinyamakuru UBUMWE, ku wa 27 Myandagaro 2019. Nk’uko uwo yakoze ubushakashatsi ku giterwa « stévia », Cyrille Mbonihankuye yabandanije abishikiriza, ngo afatiye kuri ubwo bushakashatsi, ico giterwa gishobora kurimwa mu ntara zose z’Uburundi. Ariko ngo bivanye n’intara, aho coba cane  gusumvya ahandi, ngo ni mu ntara kama ya Kirimiro,  Aho giterwa ca « stévia » gikuze, kikazana imbuto, zikoroye ngo ziraheza zikamera. Mu ntara kama y’Imbo, ico giterwa kirakura, kizanye imbuto, ntiziheza ngo zikorore. Uwo mushakashatsi afatiye ku vyo yatoye, ngo intara ya Kirimiro .ishobora kuba isa n’iyo ico giterwa camuka, aho naho ni muri Amerika y’Epfo (Amérique Latine). Akamaro k’ico giterwa, ku bijanye n’uko kirimwa, ngo ni igiterwa kimara umwanya munini aho giteragiwe, ico yise « culture pérenne » , ico giterwa kigashobora kumara imyaka irenga 7. Kw’isi yuma ningoga, ngo bisaba ko gisasirwa kugira isi igumane akabombera. Ku mwaka, ngo umurimyi waco agashobora gusoroma amababi yaco incuro zitatu canke zine, bivanye n’ukuntu imvura yaguye. Igiterwa ca « stévia » uko giteragirwa, ngo urashobora  gutera imbuto canke kigaterwa kurya kw’ibikotikoti vy’imyumbati, ndetse kikanashobora guterwa hakoreshejwe  imivyaro mito mito ivuye muri « laboratoire », ico yise « vitro plant ». Akandi kamaro gakomeye, ni uko ico giterwa kimeze nk’umuti, amababi avuye kuri ico giterwa n’iyo avamwo isukari n’umuti ikongera ikaba imfungurwa.

Isukari ivuye mu giterwa « stévia » irafasha kurwanya indwara zifata umutima

Kunywa  isukari ivuye mu giterwa ca « stévia », ngo birafasha kurwanya indwara zifata umutima, ivuduka ry’umurindi w’amaraso « hypertension », « infection », n’izindi. Isukari y’igiterwa ca « stévia » irafasha kugabanya vya biro vy’umurengera « obésité ». Mu bifungurwa, ngo ni isukari ija mu cayi, mu mitobe, n’ibindi binyobwa. Ku bijanye n’igiciro c’igiterwa ca « stévia », ngo ikiro c’amababi yumye, ni amafaranga 3 y’amanyaburaya, ni ukuvuga ibihumbi 10 birenga mu mafaranga y’amarundi. Iyo sukari uyigereranije n’iyiva mu bikaju, ngo iragurishwa cane ku rugero rw’ibice 25% gusumvya iyo sukari iva mu bikaju. Ku murimyi, ngo igiterwa ca « stévia » comugirira akamaro kanini  kubera cinjiza amafaranga menshi. Mu Burundi, ngo igiterwa ca « stévia » kiramaze igihe, aho catanguye kuvugwa mu mwaka w’2013 ushira uw’2014. Inyuma yaho, ikigo ISABU carakoze ubushakashatsi aho hemejwe ko mu Burundi hashobora kurimwa ubwoko bubiri bwa « stévia ». Ico kigo ngo kikaba caragiriraniye amasezerano n’ishirahamwe « stévia Burundi », ubu ngo bakaba bariko baragerageza ubundi bwoko bubiri, na bwo nibwemezwa bukazoca buba ubwoko 4 bwemewe kurimwa mu Burundi, ariko ngo n’ubundi buzoza. Haruhande y’intara kama ya Kirimiro, ngo intara kama ya Mugamba na Mirwa naho nyene umwimbu ngo uba mwiza cane, vyumvikana ko ahantu haboneka umwimbu mwiza haba hakanye, hagwa n’imvura nyishi.  Ngo aho izindi ntara bimbura kane mu mwaka, mu kiyaya c’Imbo ngo cimbuka gatatu ku mwaka.

Ikigo ISABU kirategekanya kugwiza igiterwa ca « stévia »

Mu ntumbero yo kugwiza imbuto z’igiterwa ca « stévia », ngo mu kigo ISABU barategekanya kurima mu Gatasi imirima ishobora kuzovamwo imbuto. Iyo mirima bagategekanya kuyirima mu Kumoso, i Mutaho, mu ntara ya Gitega hamwe no mu Vyegwa, mu ntara ya Ngozi. Ico giterwa kimaze kurimwa cane, ngo ishirahamwe « stévia Burundi » rirategekanya gushinga ihinguriro ry’isukari ivuye mu giterwa ca « stévia ». Igiterwa ca « stévia » ngo kivamwo isukari iri mu bwoko bwinshi, ariko ngo iya mbere ni iyitwa « stévioside ».  Muri kazoza ka hafi, ngo barategekanya gukora icigwa kugira basuzume muri bwa bwoko 4 bwa « stévia » barabe ubutanga isukari nyishi (amababi) kugira bube aribwo bukwiragizwa mu barimyi. Mu gihe igiterwa « stévia» kitaramenyekana mu Burundi, ngo ubwo bwoko butanga umwimbu mwishi bumaze kumenyekana, ngo hazotegurwa agatabu kerekana ingene ico giterwa kimeze kuva mu matuta gushika gisoromwe n’akamaro kaco. Ako gatabu kazoheza gahabwe abarongoye uburimyi n’ubworozi mu ntara zitandukanye ndetse n’imirima yo kugwiza imbuto ikwiragizwe mu ntara zitandukanye gushika ku rwego rw’amakomine kugira abarimyi baronke imbuto bitagoranye. Ibindi biranga ico giterwa, ni uko ari igiterwa aho giteragiwe uhasanga inzuki nyishi, gutyo bigashobora gutuma ubworozi bw’inzuki aho giteragiwe bukomezwa. Ikindi ngo ni igiterwa kirinda indwara ndetse kikanafasha kugwiza ibiterwa vy’ibinyantete kubera izo nzuki intete ziboneka ari uko zibifashijemwo. Tubamenyeshe ko ico giterwa ca « stévia » kirimwa mu gihugu c’Ubushinwa kuva kera, igihugu ca Maroc, mu karere naho kikaba kirimwa mu gihugu ca Kenya.

Déo Misigaro

 

Umuco wo gusoma ibitabu n’ibinyamakuru uriko uratera imbere mu gihugu c’Uburundi

Gusoma ibitabu  ni umuco utari muri kahise k’abarundi kuko bari bafise umuco wo kuvuga imigani n’ibitito. Ariko muri kino gihe abarundi na cane cane abanyeshure bariko barijukira ugusoma ibitabu  babifashijwemwo n’ikigo kijejwe guteza imbere gusoma n’imico kama “CEBULAC”. Ivyo ni ivyashikirijwe n’umuyobozi w’ico kigo, Alain Patrick Muheto mu kiganiro yahaye ikinyamakuru UBUMWE ku wa 16 Myandagaro 2019. Nk’uko yabandanije abimenyesha ngo abarundi bakwiye kumenya neza akamaro ko gusoma ibitabu n’ibinyamakuru bagaheza bakavyijukira bose ata n’umwe asigaye inyuma. Gusoma ibitabu n’ibinyamakuru ngo bituma umusomyi wavyo amenya ibiriko birakorerwa aho ari, mu gihugu ndetse no mu makungu. Ikindi naco ngo bifasha guteza imbere ubumenyi bw’uwusoma. Mu bitabo ngo usangamwo ibintu vyubaka bigafasha  uwusoma gutahura ibintu vyinshi bimufasha mu buzima bwa minsi yose, n’ibindi. Alain Patrick Muheto yamenyesheje  ko kera abarundi batakunda gusoma ibitabu n’ibinyamakuru kubera bari bafise umuco wo gutita ibitito no guca imigani gusumba gusoma. Ikindi naco cibonekeza ico gihe ni uko ata bitabo vyinshi n’ibinyamakuru vyari bihari gutyo bigatuma n’uwuvyipfuza adaca abironka hafi yiwe. Ariko ubu ngo Reta yarashizeho umugambi wo guteza imbere gusoma ibicishije mu bushikiranganji bw’inkino n’imico kama mu kigo kijejwe guteza imbere gusoma n’imico kama. Ico kigo rero kikaba nngo gifashanya n’amakomine  aheza akwubaka inyubakwa gutyo ico kigo kikazana ibitabu n’ibindi bikoresho bikenerwa mu mazu yo gusomeramwo ibitabu benshi bita “bibliotèque”. Alain Patrick yamenyesheje ko hariho  ibigo bishika 42 bikwiragiye mu makomine amwe amwe yo mu gihugu, muri ivyo 32 ngo nivyo biriko birakora, ibisigaye navyo amakomine akaba akiriko aritunganya kugira bikoreshwe  nk’ibindis. Ariko ngo umugambi uhari ni uwo gushikana bene ivyo bigo mu makomine yose agize igihugu c’Uburundi. Ikindi yamenyesheje ni uko ibikorwa vyose vy’ivyo bigo ngo bikorwa ku buntu, ni ukuvuga ko baba abipfuza gusoma ibitabu baja barabitahana canke baba abasomera ngaho nyene bose nta mahera basabwa. Iyo ivyo bigo vyegereye ishure ngo usanga abanyeshure baherera gusoma nka bose kandi mbere ngo bigatuma n’ubumenyi buca bwongerekana. Ngo baravye rero muri ivyo bigo bikora, basanga ibitigiri vy’abasoma ibitabu bitera vyiyongera uko iminsi igenda kuko ubu ikigo citwa ko gifise abasomyi bake gifise abashika 600 muri ivyo 32. Alain Patrick yaheraheje atera akamo Abarundi bose ngo babone akamaro ko gusoma gutyo baheze babikunde. Abajejwe intwaro nabo ngo bafashe guhimiriza amakomine atarashira mu ngiro umugambi wo kwubaka ivyo bigo vyo gusomeramwo kugirango avyubake gutyo abanyagihugu baho batangure kwinovora akamaro ko gusoma ibitabu n’ibinyamakuru.

Estella Niyongere

 

 

COGERCO : Umwimbu w’ipampa w’umwaka w’2019 ntiwagenze neza ugereranije n’iyindi myaka

Mu Burundi, isizeni y’ipampa yama iba uko umwaka utashe. Ni muri iyo ntumbero ikinyamakuru UBUMWE cegereye umuyobozi mukuru w’ikigo kijejwe kurima ipampa no kurihingura COGERCO, Gustave Majambere  kugira amenyeshe ukugene umwimbu w’ipampa w’umwaka w’2019 wagenze. Majambere yamenyesheje ko ipampa ryarimwe ku mahegitare 2800 kandi ko umwimbu utagenze  neza ugereranije n’iyindi myaka. Ngo ivyo vyabaye kubera habaye ihindagurika ry’ibihe, mu bice bimwe bimwe nk’i Gihanga (intara ya Bubanza) hateye umwuzurira, indimiro z’ipampa ziratwarwa, ahandi naho mu bice vyo mu Rugombo n’i Buganda (intara ya Cibitoke), mu gihe c’uguteragira, uruzuba rwarateye imbuto zimwe zimwe ntizameze.Ngo kubera ubutunzi bw’ikigo  COGERCO bwagiye buragabanuka vyatumye kidashobora kuronsa abarimyi bose  ifumbire. Naho biri uko ngo barakoze uko bashoboye kugira imiti yo gupompa ipampa ntibure ku barimyi bose. Ku bijanye n’ifumbire, ngo barahimiriza abarimyi kwigurira ifumbire canke  bagakoresha nyabarega kugira baronke ifumbire y’ikirundi ikwiye, bashobore gutabira indimiro. Ngo uyu mwaka ibikorwa vyo guhingura ipampa ntivyakozwe ku mwanya kuko vyari bikenewe ko basubiriza ibikoresho vyari bishaje. Ivyo vyuma vyo kubisubiriza bikaba vyaratevye gushika mu Burundi kubera vyava mu bihugu vya Buraya. Umuyobozi mukuru wa COGERCO, Majambere yamenyesheje ko uyu mwaka, umurimyi  azoronka amafaranga 600 ku kiro c’ipampa. Ipampa ryose rikaba rizoshorwa mw’ihinguriro rikora impuzu AFRITEXTILE nayo imbuto z’ipampa zikazoshorwa  mw’ishirahamwe rihingura amavuta n’ibifungurwa vy’ibitungwa arizo turuto RAFINA. Ku bijanye n’ihindagurika ry’ibihe, Gustave Majambere yamenyesheje ko mu mugambi w’igihugu wo guteza imbere igiterwa c’ipampa hategekanijwe gutanguzwa ubuhinga bwo kuvomera imirima  ku buryo n’abarimyi bazoshobora guteragiramwo ibindi biterwa mu gihe ipampa ryasoromwe. Yabandanije amenyesha ko bagendeye uturere tumwe tumwe kugira barabe aho kuvomera bishoboka kuko atari hose usanga bishoboka. Mu ntumbero yo gukorera neza ipampa, hategekanijwe guca imikobeko,  guca imigungiro no guteragira ibiti bibana n’indimo kugira ntihagire indimo zizosubira gutwarwa. Majambere yamenyesheje ko mu gisata c’ipampa hari ubwoko bw’indimiro bubiri , hari ipampa ririmwa mu matongo ya Reta n’irindi ririmwa mu matongo y’abanyagihugu. Yavuze ko mu ntumbero yo kuringaniza neza indimiro z’ipampa no kurwiza umwimbu w’ibindi biterwa mbumbarugo, bategekanya kwereka abarimyi  urugero bateramwo ibindi biterwa nk’isoya, inkore, ibiharage mu ndimiro z’ipampa. Ngo mu matongo ya Reta,  barimamwo ipampa gusa ariko rimaze kwera, barashobora kwemera ko bateramwo ibindi biterwa bideteba kwimbuka nk’imboga kugira babandanye bisahiriza mu kurwiza ibiterwa mbumbarugo. Muri uwo mugambi wo guteza imbere igiterwa c’ipampa, ngo hategekanijwe kuduza igitigiri c’amahegitari azorimwamwo ipampa. Ngo mu myaka yahera imirima yarimwamwo ipampa yashika ku mahegitari 9000, ubwo buringanire bukaba bwagiye buragabanuka kubera hagiye harakorerwamwo ibindi bikorwa. Majambere yamenyesheje ko  bagendeye uturere tw’i Bubanza, Cibitoke, Makamba, Rutana, Ruyigi kugira barondere ahantu bashobora kwagurira indimiro z’ipampa, hakaba habonetse amahegitari 4000. Majambere agasaba Reta ko yofasha kugira ubwo buringanire bwabonetse bushobore  kurimwamwo ipampa. Yabandanije  asaba kandi  Reta ko mu matongo y’i Gifurwe, Kivoga, Nyakagunda  aheruka gusubira mu minywe y’ikigo COGERCO, igice cayo  corimwamwo ipampa. 

Aline Kanyana

 

Abarundi bazokunda igihugu cabo bamaze kumenya abacitangiye muri kahise

Haratunganijwe isabururu bise « Igihugu » ishimikiye ku rugendo rwerekeza ku bibanza-vyibutso vy’igihugu mu ntumbero yo gukaburira Abarundi gukunda igihugu cabo na cane cane bafatiye ku bacitangiye muri kahise, gurtyo babafatireko akarorero. Ku wa 28 Myandagaro 2019, niho haba ibirori vyo gutanguza icese iyo sabukuru ku civugo : «Uburundi mu maraso yanje », vyabereye ku kibanza  c’incungu za Demokarasi, birongowe n’uwayiteguye akaba asanzwe ari umuvugizi w’ubushikiranganji bw’umutekano, Pierre Nkurikiye. Mw’ijambo Pierre Nkurikiye yashikirije ico gihe  akaba yaramenyesheje ko iyo sabukuru izotuma Abarundi birinda ico cose cosubira kubaryanisha. Yaramenyesheje kandi ko amabi atandukanye igihugu cagiye kiracamwo yaturutse ku barundi bamwe bamwe batigeze bakunda igihugu cabo kandi batigeze bigishwa na kahise k’igihugu.Rero ngo muri urwo rugendo bajanye n’urwaruka ruvuye mu gihugu cose babiri babiri ku ntara kandi bo mu bwoko bwose n’ibitsina vyose. Ngo ni ukugira baze babe intumwa nziza za kahise no kwitangira igihugu mu ntara zose. Niko kumenyesha ko bubaye ubwa mbere iyo sabukuru ihimbazwa kandi izokwama iba uko umwaka utashe.

Kuri iyo ncuro ya mbere hanini ngo bazoshimikira ku bitangiye Uburundi mu guhangana n’abari baje kubwigarurira aribo bakoroni. Yarongeye amenyesha ko kumenya kahise k’igihugu bituma umuntu amenya ico azokora muri kazoza. Bisubiye n’amabi yagiye arakorwa yakozwe na bamwe mu barundi n’abansi b’Uburundi batigeze bategera kahise k’igihugu. Pierre Nkurikiye yavuze kandi ko yizeye ko mu gihe Abarundi bazoba bamenye kahise k’igihugu n’ak’abacitangiye bazoheza bakavyura agatima ko kugikunda. Bazoheza babe n’abavandimwe bafatiye kuri kahise ka basokuru ku buryo n’umwansi ateye bamurwaniriza hamwe. Mu gutangura urwo rugendo umuhinga muri kahise yari aherekeje urwo rwaruka rwari rwatumiwe muri iyo sabukuru, Aloys Batungwanayo yabanje kubasigurira ibijanye n’ingoro yahoze ibamwo umwami Mwambutsa Bangiricenge hamwe n’umwami Ndizeye Charles. Yamenyesheje ko Mwambutsa yahabaye Uburundi bumaze kwikukira kuko imbere yaho haba Harroi yaserukira Ububirigi bwari bukoronije Uburundi. Umwami Mwambutsa nawe akaba yaba i Gitega iruhande y’ingoro y’Umukuru w’igihugu y’ubu. Yahabaye kuva mu mwaka w’1962 gushika 1965 igihe batera ikirimba c’umwami bagira bamwice gaca ahunga igihugu. Umwami Ndizeye nawe yahabaye mu kiringo c’amezi atatu imbere yuko intwaro ya cami isenyurwa hanyuma akanagandagurwa. Haciye haba Micombero yabaye umukuru w’igihugu. Mu mwaka w’1993 naho Prezida Ndadaye amaze gutorwa ngo arongore igihugu mu kurindira ko haboneka ingoro yobamwo ariko aca agandagurwa ku munsi yagira aje kuba mu ngoro yabamwo Prezida Buyoya amaze kuyivamwo. Mu nyuma yaciye abasigurira ukugene prezida Ndadaye yagandaguwe hamwe n’abamufasha kurongora igihugu. Urwo rugendo rwarimwo kandi abahinga muri kahise, mu gukunda igihugu n’abandi mu mico kama n’akaranga k’igihugu nka Thérence Mbonabuca na Jean Claude Karerwa Ndenzako. Urwo rugendo rukazobashikana mu bibanza bikuru bikuru muri kahise k’Uburundi n’imico n’akaranga.

Epitace Nduwayo

 
Ouvrir