Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Abarundi basabwa kwitaho kurusha ibigo ndangakaranga kugira ingenzi zishobore kubihurumbira

der Abarundi bategerezwa kwitaho kurusha ibigo ndangakaranga mu ntumbero yo kwerekana ishusho ryiza ry’igihugu. Ivyo vyashikirijwe n’umunyamabanga ntayegayezwa mu bushikiranganji bw’urwaruka, inkino n’imico kama Godefride Hakizimana mu nama ubwo bushikiranganji bwari bwatunganije yo gukarihiriza ubwenge abajejwe gutunganya ibigo ndangakaranga vy’Uburundi kugira bashobore gukingira ibishobora gutitura ivyo bigo. Hari kw’igenekerezo rya 30 Rusama 2017. Nk’uko yabandanije abimenyesha mw’ijambo ryiwe, ngo Reta yarashize inguvu mu migambi yo mu gisata c’imico n’akaranga. Ngo naho biri uko irashira imbere ibigo ndangakaranga narirya bishobora gutuma ingenzi zihurumbira Uburundi gutyo bigatanga n’akazi ku rwaruka. Ariko ngo birababaje kubera hariho ibigo bimwe bimwe bigeramiwe n’ihindagurika ry’ibihe, ibiza hamwe n’ibikorwa vy’abantu bifatiye ku mibano n’ubutunzi. Yabandanije amenyesha ko bategerezwa kugaba kugira ngo ibigo vyose biri ku rutonde ntibiherengetere canke ngo bite akanovera. Abarundi rero ngo bategerezwa kwitaho kurusha ibigo ndangakaranga vyerekana kahise k’Uburundi, ivyerekana iratiro, inyubakwa za kera, mu ntumbero yo kwerekana ishusho nziza y’igihugu. Ngo iterambere rirama ntirishobora kwirengagiza ivyo bigo kuko bituma abavukagihugu n’abanyamahanga babigendera. Ernest Nahimana nawe ajejwe ibibanza ndangakaranga yamenyesheje ko iyo nama yari yateguwe kugira ngo bige ibibazo bigeramiye ibibanza ndangakaranga bishobora gushika umwanya uwo ariwe wose. Ibibanza ndangakaranga vyo mu Burundi ndetse n’ivyo muri Afrika ngo usanga bigeramirwa n’abantu baza kurima mu matongo, abaza guhiga, abicira ibiti hamwe n’iyijanye n’umuriro. Ngo nico gituma muri iyo nama hari hatumiwe abajejwe ibibanza ndangakaranga n’ibibanza kama kugira ngo baganire umwe wese avuge ingorane bafise bongere bafashanye mu gushiraho umuti wo kugabanya izo ngorane nuwo kuziheza burundo.

Evelyne Niyonzima

 

Umutekano ngo wifashe neza muri rusangi mu gihugu cose

DSC 0060Umutekano ngo wifashe neza muri rusangi mu gihugu cose. Ivyo   Ni ivyavugiwe mu nama Umukuru w’igihugu Petero NKURUNZIZA yagirishije kw’igenekerezo rya 2 Ruheshi 2017, abarongoye abandi mu nzego z’igisirikare, igiporisi, igendereza n’abo mu bushikiranganji butandukanye bwegwa n’ibijanye n’umutekano yabereye muri, komine Muhanga, intara ya Kayanza, navyo bikaba vyashikrijwe n’icegera c’umuvugizi w’Umukuru w’igihugu, Alain Diomède Nzeyimana inyuma y’iyo nama yabaye mu mwiherero. Nk’uko yabandanije abimenyesha ngo naho biri uko hariho ibintu bikenewe kuza birakurikiranwa iminsi yose. Murivyo ngo ni uko mu gihugu hakiriho abantu bafise ibirwanisho batabifitiye uruhusha, ikindi ngo ni uko hakiboneka abanywa ibiyayuramutwe n’inzoga zitemewe n’amategeko hamwe n’uko mu Burundi bwose haba amasanganya y’imiduga n’amapikipiki atuma haba abantu bitaba Imana ku bw’izo mvo. Ikindi yamenyesheje ngo ni uko imbere y’iyo nama buramatari w’intara ya Kayanza yavuze ko muri iyo ntara hasanze harimwo amahoro n’umutekano, abanyagihugu nabo bakaba bari ku kivi mbere n’umwimbu wagenze neza. Ngo Prezida NKURUNZIZA yaratanze inyishu ku bibazo bimwe bimwe vyari vyabajijwe, yongera arabahanura ku bintu vyerekeye amasanganya yo mu mabarabara ahangayikishije abantu ababwira ko bokora ibishoboka vyose ngo kuko iyo amasanganya abaye, hari ibintu vyinshi vyononekara n’abantu bakahasiga ubuzima kandi ngo ntibiheza ngo bitange ishusho nziza ku gihugu. Prezida NKURUNZIZA ngo yaranahanuye abajejwe ubutungane ku bijanye n’abantu baba baciriwe urubanza hanyuma bakarekurwa hamwe n’uko borwanya abantu bafatanywe amafaranga ku mbibe bayatwaye mu bihugu bihana imbibe n’Uburundi, aho naho ngo hakunda gufatwa ababa batwaye ibiceri cane cane bagiye kuyigana mu nyuma hakagaruka ayiganywe. Iyindi mpanuro yabahaye ngo nuko mu kiruhuko c’abanyeshure bazobashira ku kivi kugira babarinde kuja mu buhumbu. Ngo ku zindi ngorane nazo Prezida NKURUNZIZA yabwiye abasirikare n’abaporisi kuzikurikirana, ariko cane cane ngo bagire ingendo yo kwitegurira kazoza. Umukuru w’igihugu Petero NKURUNZIZA ngo yarangije yerekana ko muri ayo mezi 3 aheze batanguye isekeza ryo gutuza ibidandazwa bidaciye mu mategeko hariho akarusho kaboneka. Aho naho ngo yatanze akarorero ko muri komine Kabarore umwimbu w’ubutare wavuye kuri 500kg buja ku matoni 20 ku kwezi, ikawa nayo ngo yari yabonetse mu mwaka uheze ko bagereranije n’iki gihe yirwije n’incuro 4 canke 5. Ngo rero isekeza ryo kwereka abanyagihugu kwitaho ivy’igihugu ni kirumara. Inyuma y’iyo nama Prezida NKURUNZIZA yaciye aja kwifadikanya n’abanyagihugu bo muri iyo komine muri zone Mubogora, ku mutumba Rushubi mu bikorwa rusangi vyo kubaka ishure nshingiro rya Rushubi rigizwe n’ibirasi 6 vy’amashure mato matoharimwo n’ibiro vyabatwara ishure. Yarongeye kandi atanga infashanyo ku miryango ya ba ntahonikora aho umuryango umwe wose waronka ibiro 10 vy’umuceri. Yarongeye kandi akora ivyo bikorwa rusangi muri zone Ruhororo ku mutumba Bucamihigo vyo kwubaka ingoro z’inama yo kw’ishure rya komine Ruhororo.

Evelyne Niyonzima

 

Denise NKURUNZIZA yarahaye imfashanyo umuryango wibarukiye rimwe abana bane

4578Umupfasoni w’Umukuru w’igihugu, Denise NKURUNZIZA yarahaye imfashanyo umuryango w’umusirikare Gilbert Bavuga wibarukiye rimwe abana bane haraheze imyaka itatu, abo bana bakaba bagizwe n’abigeme 3 hamwe n’umuhungu 1. Iyo mfashanyo yayibahaye ku wa 30 Rusama 2017 ku cicaro c’ishirahamwe «Buntu» kiri mu Kabondo. Umupfasoni w’Umukuru w’igihugu yamenyesheje ko anezerejwe no kubona abo bana bakuze kuko ari igitangaro kubona uwo muryango waravyaye abana 4 kandi bakaba barakuze, ivyo ngo ntibikunda gushika. Yamenyesheje ko yatanguye kubafasha bakivuka mu bitaro vyabasirikare, uwo munsi nawo akaba yakiriye umuryango w’uwo musirikare Gilbert Bavuga mu ntumbero yo kuraba uko abo bana basigaye bangana. Ngo cabaye rero igitangaza mu gihugu c’Uburundi kuko atari benshi bibaruka abana bane. Abarundi rero ngo bobishimira Imana kuri ivyo bintu bidasanzwe na cane cane ko abo bana bafise amagara meza. Yarongeye amenyesha ko kwari ugutera intege abo bavyeyi kuko abana bageze kurya ibiharage n’umuceri hamwe n’amata y’abakuze kuko ubwa mbere banywa amata y’inzoya atari yoroshe no kuronka. Umupfasoni w’Umukuru w’igihugu Denise NKURUNZIZA rero yabahaye ibiro 50 vy’umuceri, ibiro 50 vy’ibiharage, ikarato 5 z’amata bita «natura», amaritiro 5 y’amavuta y’amamesa, amaritiro atanu y’amakoto, ibitenge 2 vy’umupfasoni w’uwo musirikare, ibirengeti 4, amasafuriya 7, ibido 2 n’amasuka 3. Umupfasoni w’Umukuru w’igihugu yarasengeye abo bana ngo baze bamenye ubwenge, bagire ubumenyi gutyo bazogirire akamaro igihugu n’umuryango. Umuryango w’uwo musirikare uba ku musozi Nyakigano, zone Nyagasasa, komine Mugamba, intara ya Bururi. Bari bafise imvyaro zine bafise abahungu 3 n’umukobwa umwe, bose hamwe bakaba babaye abana 8. Uwo musirikare w’ipete ya kaporari akora mu biro bikuru vy’intwaramiheto. Uwo musirikare Gilbert Bavuga yarashimiye umupfasoni w’Umukuru w’igihugu yabafashe mu mugongo kuva abo bana bakivuka mu kubaha amata ameze nk’amaberebere yatumwa hanze. Ayo mata ngo yarabarokoye gushika aho banywa ayasanzwe adandazwa mu Burundi. Yamenyesheje ko abo bana ari rwiwe aravye iyo bavuye kuko iyo bataronka ayo mata batari kurokoka. Yarongeye arashima imfungurwa yamuhaye narirya abo bana bageze gufungura ibiharage n’umuceri. Yamumeneysheje ko abo bana ari rwiwe, abo igihugu, aca asaba ko yobandanya abafata mu mugongo. Yasavye n’abandi bazoba bamwumva gufasha uwo muryango. Umupfasoni w’uwo musirikare Ancilla Nahimana arashimira Imana yamuhaye abo bana bakavuka bakomeye, aca ashimira n’umpfasoni w’umukuru w’igihugu Denise NKURUNZIZA yabafashije kugira baronke amata bakivuka. Yarongeye amenyesha ko atipfuza gusubira kuvyara abanadi bana, asaba Imana ko yomukomereza abo afise

Epitace Nduwayo

 

Ibihugu vy’Uburundi n’Uburusiya birabandanya gutsimbataza imigenderanire ihasanzwe

DBDiBYvXoAAkFyMUburundi bwaritavye inama mpuzamakungu ihariwe ibibazo vy’ ubutunzi yama iba uko umwaka utashe mu gihugu c’Uburusiya yabereye mu gisagara ca Saint Petersburg. Uburundi rero bwaserukiwe n’Icegera ca kabiri c’Umukuru w’igihugu Joseph Butore akaba ku wa 29 Rusama 2017 ariho yafata indege imurerura mu rugendo rwamushikanye muri ico gihugu. Umuvugizi mu biro vy’icegera ca kabiri c’Umukuru w’igihugu, Isidore Ntirampeba yamenyesheje abamenyeshamakuru bari ku kibuga c’indege uwo munsi ko bubaye ubugira kabiri Uburundi bwitaba iyo nama, ubwa mbere hakaba hari mu mwaka uheze w’2016. Yamenyesheje kandi ko iryo koraniro riberamwo inama nyinshi aho ata gisata na kimwe c’ubutunzi gisigara inyuma. Kuva Uburundi bwitavye inama yo mu mwaka w’2016, ngo imigenderanire mu vy’ubutunzi hagati y’ibihugu vy’Uburundi n’Uburusiya yarateye intambwe ikomeye. Ivyo ngo bikaba bigaragarira ku ngendo zatunganijwe n’intumwa hagati z’ivyo bihugu vyompi zashitse ku bintu biboneka. Isidore Ntirabeba yamenyesheje ko Uburundi bwaronse ikibanza co kwerekana no kurata ikawa n’icayi vy’Uburundi cuguruwe i Moscou ku murwa mukuru w’Uburusiya. Ishirahamwe Regideso naryo ryaratanguye kugura amatara yo kubonesha ku mabarabara yakorewe mu gihugu c’Uburusiya. Ngo hari n’ishirahmwe ryo mu Burusiya ryitwa TLLINO rigiye guhingura amatara mu Burundi, ishirahamwe BIMEX riherutse gushingwa, ahanini rikazofasha mu gikorwa co gushora icayi n’ikawa vy’Uburundi mu bindi bihugu. Yarongeye amenyesha ko Ibanki nkuru y’igihugu BRB ikorana n’Ibanki y’Uburusiya yitwa Gazprom Bank. Muri iyo nama rero ngo kazoba ari akaryo keza ku cegera ca kabiri c’Umukuru w’igihugu n’izindi ndongozi bagiranye urugendo ko gushikiriza no gutsimbataza ibiriko birakorwa. Aho yamenyesheje ko amabanki y’ubudandaji yo mu Burundi azoshobora kwunga ubucuti n’ibanki Gazprom Bank mu ntumbero yo kworohereza abadandaza kurusha. Ngo haritezwe kandi kuzoshira umukono ku masezerano yo gufashanya mu vy’ubutunzi hagati y’Uburundi na Mordava, imwe mu mareta 22 agize urunani rw’amareta y’Uburusiya. Yarongeye amenyesha ko hategekanijwe n’iyindi mibonano atari mike bizeye ko izogirira akamaro Uburundi.

Epitace Nduwayo

 

 

Imyaka 46 irarangiye ikinyamakuru UBUMWE gitanguye gukora

DSC 0831Igenekerezo rya 1 Ruheshi 2017 niho ikinyamakuru canyu UBUMWE cari kirumije imyaka 46 gitanguye gukora, hari ku wa 1 Ruheshi 1971. Mu ntumbero yo kwiginana n’abanywanyi hamwe n’abasomyi baco, umuyobozi n’abakozi b’ikinyamakuru UBUMWE bashimye gushikiriza ivyerekeye kahise kaco na cane cane ibihe vyoroshe n’ibigoye caciyemwo, bishingiye ku ntahe zashinzwe n’umwe babagitanguje n’umwe mu bigeze kukirongora, uwahoze arongoye urwego nshingwantwaro rw’iyandikiro ry’ibinyamakuru vya Reta (PPB ), umwe mu bakozi baco yaboneye izuba abandi , umwe mu basomyi b’iki kinyamakuru, uwurongoye urwego rujejwe kugenzura ibinyamakuru bikorera mu Burundi.

 

Abarundi bato bato bakeneye kumenyeshwa amakuru mu rurimi bumwa kandi bakunda

Uwiyumviriye ishirwaho ry’ikinyamakuru UBUMWE, akaba yarabaye n’umuyobozi mukuru w’ico gisata mu kiringo c’imyaka ibiri n’igice, Cyprien Mbonimpa amenyesha ko ikinyamakuru UBUMWE cashizweho mu ntumbero nyamukuru yo kwigisha canke gukangurira ivyiyumviro n’imigambi abarundi mu rurimi batahura. Cyprien Mbonimpa, amenyesha kandi ko ikinyamakuru UBUMWE kikivuka cari gifise intumbero yo kwitwararika abanyagihugu bo mu gihugu hagati mu gihe ikinyamakuru Le Renouveau cari kigenewe incambwenge. Aributsa ingene catanguye,ngo cari gifise ishusho y’akanyamakuru gatoyi bita mu rurimi rw’igifaransa “Bulletin de l’ ABP” kandikwa mu ndimi zibiri Ikirundi n’Igifaransa. Ngo muri Nyakanga 1978 niho hatunganywa inama nkuru y’abafasha Uburundi. Uwo Mbonimpa aca yiyumvira ko ari ngombwa ko bakurikirana ku munsi ku munsi ivyahavugiwe. Akaba rero yaciye aja kubisaba uwari umushikiranganji wa mbere w’ico gihe, umuhisi Edouard Nzambimana nawe arabimwemererera. Umwe wese mu bafasha Uburundi bari bitavye iyo nama akaba yarashobora kubona mu gitondo ivyo yaraye ashikirije. Ivyo rero ngo vyatumye Uburundi n’ikinyamakuru bironka ishusho nziza ku basanwe bafasha Uburundi. Cyprien Mbonimpa ngo yaciye asabira abamenyeshamakuru akarusho kangana n’ibice 50 kwijana kugira bashobore gukorana umwete n’ishaka. Ako karusho ngo bagaha uwakoze amategeko akurikijwe. Uwudakoze uko bitegerejwe ntiyakaronka. Aremeza ko vyatumye abakozi bo mw’iyandikiro ry’ibinyamakuru vya Reta batera intambwe nini. Ngo abiyumviriye ikinyamakuru UBUMWE basanze ari ngombwa ko abarundi bamenyeshwa amakuru mu rurimi bumva bakunda , ivyo vyaca bituma bibashika ku mutima. Ku bw’ivyo birakwiye ko coba iyogi ry’iterambere rya bene Burundi. Kugira ngo bishoboke atera akamo abakirongoye n’abamenyeshamakuru ko gukora uko bashoboye kwose kugirango iikinyamakuru UBUMWE kimenyeshe ivyiyumviro vy’intwaro abanyagihugu, congere gishikirize abatwara imyitwarariko y’abatwarwa,ngo coshira cane cane inguvu mu makuru yerekeye uburimyi,kikwitwararika kumenyekanisha abashoboye kurima no kworora kijambere, kumenyekanisha aho abanyagihugu bogurira imbuto zirobanuye, ahadandarizwa iki canke kiriya kugira bamenye aho basumira naho bashorera. Atanga akarorero ku matara akoresha imishwarara y’izuba usanga abarundi benshi batazi aho agurirwa kandi akenewe cane muri ubu bukene bw’umuyagankuba. Ikindi ngo comenyekanisha uburyo bwo guhingura, kubika no kudandaza ivyimburwa.Ku bwiwe ngo ubuhinga bwa none butegerezwa gufasha ico kinyamakuru gushika kuvyo ciyemeje n’igisata c’indero kidasigaye inyuma.Mbonimpa avuga yuko ico kinyamakuru cokwiragizwa mu mashure matomato, mu yisumbuye na kaminuza.Ibijanye n’ubuhinga bigishwa bikaja birandikwa mu kinyamakuru ;gutyo bikaba vyofasha ko basoma ikinyamakuru UBUMWE ntibacibagire. Atanga akarorero ku mashure nshingiro,aho abadashoboye kubandanya boca baja barabibonera mu kinyamakuru bakiyibutsa ubuhinga bize mu mirimo yabo ya minsi yose. Yaratanze n’inzira yofasha kugira gishike ku co abakijwejwe bifuza mu kugikwiragizwa mu gihugu cose biciye mu ma sengero no mu misigiti ariko bakabaha agashirukabute, ngo bokigurisha mu mashure yose mu ma komine no ku mitumba. Reta ngo yogifasha ikagitera intege gutyo gishike kuvyo ciyemeje. Amashirahamwe yigenga nayo ngo yogiranira amasezerano n’ikinyamakuru UBUMWE ashingiye ku gutezanya imbere. Ikinyamakuru UBUMWE ngo carateye intambwe iboneka mu kwitwararika ubuzima bw’abanyagihugu Umukuru w’inama nkuru ijejwe gukurikirana ingene ibimenyeshamakuru bikora(CNC), Ramadhan Karenga arakeza ikinyamakuru UBUMWE aravye intambwe giteyeko, agashima uburyo citwararika ingorane z’abanyagihugu akanahamagarira abacandika kureka kuguma kimenyesha amakuru yerekeye inzego n’aya poritike cane, ahubwo ngo gikomeze kumenyekanisha amakuru ateza imbere abanyagihugu aza abereka ico bokora n’igihe bogikora. Ku bw’uwurongoye urwego CNC Ramadhan Karenga, ikinyamakuru UBUMWE ngo carateye intambwe iboneka mu gushikiriza amakuru afatiye ku buzima bw’abanyagihugu. Naho biri uko, agisaba kutera intambwe mu kumenya abo candikira. Agisaba kutibanda ku nkuru za poritike n’inzego ahubwo kirabe ivya nkenewa vyotuma abarundi batera imbere hisunzwe imirimo yabo ya minsi yose. Uwukeneye kwiyunguruza n’ikinga mbe arisanga he ? Uwushaka kuja mu ntara iyi canke iriya ategerera umuduga he ? Uwukeneye imboga, ivyamwa, ibitoke, ibiraya, ibiharage, igodora, intebe n’ibindi abigurira he ? Abamenyeshamakuru ngo bogira urunani na bagenzi babo bo mu bindi binyamakuru kugira bamenye ibigezweho.Bishobotse ngo bonarondera uduterefone baha abanyamyuga n’abarimyi ngo baganire biboroheye. Karenga asaba abamenyeshamakuru ko bomenya ubuzima bwose bw’igihugu bukandikwa nk’umunyamahanga aje mu Burundi bikamufasha. Nk’akarorero ibarabara ricitse vyomenyekana kare kugira abari kuricamwo banyure ahandi. Borondera inkuru z’abarovyi bakamenya ko ifi zikenye canke zirwiriye baravye ko ukwezi kwaka bugaca canke ata kuhari kugira bavyitegurire. Bakamenya ko kw’isoko yo mu Rutumo zizimbutse kurusha i bujumbura canke mu Mvugo ariho zirwiriye gutyo umuguzi n’umugurisha bagategekanya. Amavoka aragwiriye Gitega, inanasi I Makamba. Ikindi Umukuru w’urwego CNC akaba yanajejwe amabanga atari make muri uwo mwuga, yashimikiyeko ni uko ico kinyamakuru gikwiye kurondera uburyo bwo kwiteza imbere mu gutunganya ama tombola nka kurya kwa tumarane irungu, ibanje no kurondera uburyo bwo kubitunganaya. Ubwo buryo bobukura mubo basanzwe bafashanya, twogikwiragiza no mu biro vy’abaserukira ibihugu vyabo mu Burundi. Ikinyamakuru UBUMWE gihamagariwe kandi kuvyura umuco w’abasomyi mu barundi. Ngo abajejwe ikinyamakuru UBUMWE botunganya icigwa co kuraba abasomyi bafise n’ivyo bandika (analyse des contenus et étude d’audience).

Amakomine ahabwa ikinyamakuru yoterera kugira kibandanye kibashikira

Umuyobozi w’ikinyamakuru UBUMWE, Donatien Sabiyumva amenyesha ko ikinyamakuru UBUMWE gitangwa mu makomine yose y’igihugu kandi gushika ubu ayo makomine akironka ataco atanze nk’ikiguzi. Amenyesha ko hamwe ayo makomine yotangura guterera mu kugura ico kinyamakuru vyobafasha cane mu gutuma ndetse baronka n’amakuru atandandukanye.Kukaba nkako, ubwo buryo bwoheza bugafasha abamenyeshamakuru gushika muri ayo makomine bakabashikiriza iryo bagona. Arashima intambwe ikinyamakuru kigezeko haba mu kuronswa ibikoresho n’abamenyeshamakuru naho atawovuga ko bikwiye. Ivyo akabimenyesha agereranije n’urugero vyari bishitseko mu myaka iheze. Ikindi umuyobozi ashima ni urugero rwo gutanga amakuru bagezeko aho ikinyamakuru gisigaye gikoresha ubuhinga ngurukanabumenyi. Ivyo ngo bakabishimira ubuyobozi bukuru bw’iyandikiro ry’ibinyamakuru vya Reta (DGPPB).   Ngo iyo abamenyeshamakuru bakwiye haraboneka inkuru zitandukanye zo mu bisata vyose. Sabiyumva yamenyesheje ko hari ingorane ko ikinyamakuru UBUMWE gitangwa ku buntu mu makomine yose no mu ntara, ngo ikomine yose ironka ibinyamakuru 15 nayo ku mirwa mikuru y’intara bahasiga ibinyamakuru 30. Ngo hari kandi imigambi yo gukorana n’amashirahamwe afise imigambi arangurira mu makomine mu kumenyesha ivyo akora nayo agatanga uburyo bwo gufasha ibimenyeshamakuru. Sabiyumva yasavye Reta ko yobandanya ishigikira ikinyamakuru UBUMWE mu kubandanya ikironsa uburyo kuko gushika ubu agafashanyo k’imiriyoni 50 ku mwaka yahora itanga kahagaze ; canke ikaronsa uburyo bwo gushiraho aho bacapira ibinyamakuru kuko gushika ubu ikinyamakuru UBUMWE gicapwa n’abikorera ivyabo (imprimerie). Mu migambi ya kazoza,umuyobozi Sabiyumva amenyesha ko bifuza gukorana gusumba n’abajejwe intwaro kugira batangure gushira mu migambi kuriha ico kinyamakuru basanzwe baronka kugera ubu.Vyongeye uko bakironka nabo bijukire kumenyesha ivyo batangura gutyo barwize amakuru atangwa n’abanyagihugu bitume ico kinyamakuru gihurumbirwa.

 

Amakuru yerekeye ubuzima bw’abanyagihugu atuma bahurumbira ikinyamakuru

Juvénal Baranshamaje, ni umwe mu bahoze barongoye ikinyamakuru UBUMWE hagati y’umwaka w’1980 n’umwaka w’1994, akaba amenyesha ko mu gihe yari agishinzwe ayo mabanga, ikinyamakuru UBUMWE casomwa ku bwinshi aho bagurisha ibinyamakuru birenga 12. 000 ku ndwi ni ukuvuga uko gisohotse. Yabandanije amenyesha ko kugira UBUMWE bwijukirwe gusomwa, yagiye gusaba umushikiranganji yari ajejwe ibimenyeshamakuru ko bohindura amakuru bashira mu kinyamakuru mu gushiramwo amakuru y’ubuzima bw’abanyagihugu. Ngo ico gihe baciye barwiza amakuru avuga ubuzima bw’ abanyagihugu mu bisata bitandukanye. Urundi ruhande rw’amakuru rwashimikiweko ni amakuru yo gutwenza. Ngo hari ibisata bita «cishamwo utwenge», «uko bukenye uko bwije» na «Ngenzirabona». Kugira ikinyamakuru UBUMWE kigurwe, cakorana n’abanyagihugu bo mu makomine yose bagatanga amakuru y’aho baherereye bakoresheje agasandugu ka posita. Ngo abanyagihugu bakorana cane n’ikinyamakuru barabashimira mu kubaha ibinyamakuru bakaja kwigurishiriza aho babaye. Ngo amashirahamwe atandukanye ashaka ko ikinyamakuru kimenyekanisha ivyo ariko arakora, yaratanga uburyo bwo gufasha ikinyamakuru.

Abasomyi bahurumbira ibinyamakuru bibashikiriza amakuru atohoje, bikabaha n’ijambo

 

Jean Marie Vianney Ndimubandi ni umusomyi w’ikinyamakuru UBUMWE. We rero ngo yahisemwo guhurumbira ikinyamakuru UBUMWE kubera ko iyo aronse umwanya ariho aheza akacakira akagisoma.Ngo nayo amakuru agisangamwo si ya makuru y’ibihuha, ngo ni amakuru aba yaratohojwe. Ikindi naco ngo amakuru yo kw’iradiyo ajana n’ibihe kuko afise isaha avugirwako, mu gihe ayanditse mu kinyamakuru umuntu ashobora kuyasoma aho aronkeye umwanya atarinze gusiganwa nayo. Vyongeye, ngo iyo umuntu abonye agafoto kiwe mu kinyamakuru araheza agahimbarwa. Ati «nico gituma dushima ibinyamakuru biduha amakuru atohoje neza bikabuha n’ijambo».

Ibikorwa vy’abandika ikinyamakuru UBUMWE birashimwa n’incabwenge

Umwigisha amaze imyaka 40 atanga ivyigwa muri kaminuza akaba yararongoye n’urwego shingwantwaro rw’iyandikiro ry’ibinyamakuru vya Reta, Paul Ngarambe, arakeza cane abandika ikinyamakuru UBUMWE ku kungene bashikiriza amakuru.

Yameneysheje ko ahora azana abanyeshure yigisha akaranga k’Uburundi, aho ico kinyamakuru candikirwa bakibonera ingene Ikirundi gikoreshwa n’uburyo gikoresha bugezweho. Yasanze batari bakizi kandi aho bakimenyeye ubu baragisoma. Gusa birabagora kuronka udufaranga two kukigura kuko gisa n’uko kizimvye. Arakenguruka bivuye ku mutima uburyo abamenyeshamakuru bandikira abarundi ingene baja hamwe bagahanahana ivyiyumviro, ariko akifuza ko bokwiha intumbero yo kwandika ibijanye n’intara zose z’igihugu, bakiha nk’ikiringo c’umwaka mu nyuma bagafata ikiringo co gushikira amakomine yose mu nyuma imitumba. Ivyo vyotuma abagisoma, bamenya igihugu cabo mbere bakanagikunda kurusha. Ikindi asaba ni uko bokarihiriza ubwenge abamenyeshamakuru kugira babadanye binagura mu bijanye n’ico bifuza gushikako.

Arifuza ko ikinyamakuru UBUMWE cokwandikwa ku buryo bwa none bukaja ku yindi mirongo Facebook, Whatsapp)

Abanditsi barashima intambe ikinyamakuru kigezeko baravye iyo cavuye

Umwanditsi w’ikimenyeshamakuru UBUMWE kuva mu mwaka w’1979, Denise Bavuna yamenyesheje ko ashima intambwe ico kinyamakuru kigezeko kubera aho hambere umumenyeshamakuru avuye kurondera amakuru yarandika inkuru yiwe ku rupapuro agaca ayihereza abanditsi nabo bakayandika bakoresheje imashini itari mu buhinga bwa none, umuntu yagenda arafatanya indome. Ngo ivyo bintu vyatwara umwanya munini kandi kubera ata mashine nyabwonko zari zihari, naho habaho uguhubura amakosa, vyarashika akagumamwo. Ngo ico gihe nta vyuma bifata amasanamu vyari bihari, mu mwanya wa mbere amafoto bayagura mw’itororokanizo ry’amakuru ABP . Ngo Kubera ubuyobozi bukuru bw’ibimenyeshamakuru vya Reta bwabonye ko ukugura amafoto muri ABP uyatwara uburyo bw’ikirenga, vyarabaye ngombwa ko bagurira ivyuma bifotora abamenyeshamakuru bakoresha bonyene kugira baze barifotorera, bakaza baraja kwogesha amafoto. ko bibatwara uburyo bwinshi, haraguzwe ivyuma bifotora vy’ikinyamakuru, umumenyeshamakuru akaza arifotorera munyuma bakaja kwogesha amafoto. Bavuna yamenyesheje ko kubera hari akazi kamara umwanya mureremure, ikinyamakuru nticagira umunsi gisohokerako, vyaravana n’amakuru yabonetse. Yabandanije amenyesha ko abona ko ikinyamakuru kigeze ku ntambwe ishimishije kuko hari imashini nyabwonko n’ivyuma bifata amasanamu bikozwe mu buhinga bwa none, ivyo bituma akazi kanyaruka kandi ikinyamakuru kigasohoka ku gihe. Umumenyeshamakuru ariyandikira inkuru n’imashini, akifotorera akazanira umwanditsi akazikora.

Yolande Nintunze

Jean-Robert Nshorirambo

na Aline Kanyana

 

 

Ingabo z’Uburundi zifatanya n’amakungu mu kugarukana umutekano aho wahungabanye ngo zirabutera iteka

ghtyrUbushikiranganji bwo kwivuna abansi no kwitaho abahoze ku rugamba burashimira abasirikare b’abarundi ku bikorwa vyiza bakora mu kugarukana amahoro n’umutekano ku rwego rw’Ishirahamwe Mpuzamakungu ONU haba mu kwerekana ubutwari , ubukerebutsi hamwe n’ubuhizi. Ivyo vyamenyeshejwe na Gaspard Baratuza umuvugizi w’ubushikiranganji kw’igenekerezo rya 31 Rusama 2017 mu kiganiro yahaye abamenyeshamakuru mu gihe bariko baribuka umunsi mukuru wagenewe abasirikare n’abakozi bose barangurira imirimo yabo mw’ Ishirahamwe ONU. Gaspard Baratuza yamenyesheje ko Ishirahamwe mpuzamakungu ONU mw’ikoraniro ryayo ryo ku wa 11 Kigarama 2002 hafashwe ingingo inomero 57/129 ivuga ko ku wa 29 Rusama uko umwaka utashe hazokwama haba umunsi mukuru wagenewe abasirikare n’abakozi barangurira imirimo yabo muri iryo shirahamwe. Ngo ihimbazwa ry’uwo munsi rifise intumbero yo kwibuka abakozi b’Ishirahamwe Mpuzamakungu ONU bitavye Imana bari mu bikorwa vyo kugarukana amahoro hirya no hino kw’isi. Ngo ikindi naco ni ugukeza abakozi b’ishirahamwe mpuzamakungu ONU ku bikorwa vyiza babandanya barangura mu kwitanga bidasanzwe kugira amahoro n’umutekano bitsimbatare kw’isi yose. Yaravuze ko abarongoye ibisata vy’ishirahamwe ONU , ibihugu bigize iryo shirahamwe Uburundi burimwo, hamwe n’ayandi mashirahamwe ategamiye amareta, bibuka abitanze gushika n’aho basiga ubuzima bwabo mu bikorwa vyo kugarukana amahoro aho bikenewe hose. Ngo icivugo catowe mu mwaka w’2017 ni «Gutsimbataza amahoro n’umutekano kw’isi yose ». Yaravuze kandi ko iryo genekerezo rigamije kwibuka abo bose bitanga batiziganya mu bikorwa vyo kugarukana amahoro vy’Ishirahamwe Mpuzamakungu ONU. Ngo ni n’akaryo keza ko kwibuka abashika 3.500 basize ubuzima bwabo mu bikorwa vy’iteka bakorera iryo shirahamwe kuva mu mwaka w’i 1948. Yarongeye amenyesha ko mu mwaka uheze w’2016 hitavye Imana abashika 117 bari muri ico gikorwa. Ngo igihugu c’Uburundi kimaze kubura abasirikare 6 mu gihugu ca Centrafrika aho bari kwifatanya n’ayandi makungu mu gisata ca MINUSCA. Ngo ubushikiranganji bwo kwivuna abansi no kwitaho abahoze ku rugamba bukaba buhojeje imiryango yabuze. Ubushikiranganji bwo kwivuna abansi ngo buributsa yuko igihugu c’Uburundi gifise izindi ngabo mu gikorwa co kugarukana amahoro n’umutekano mu gihugu ca Somariya ku bw’ishirahamwe ry’ibihugu vya Afrika « AMISOM », barenga ibihumbi bitanu kuva mu mwaka w’2007 hambavu y’ingabo zishika 850 Uburundi bwarungitse mu gihugu ca Centrafrika ku rwego rw’Ishirahamwe Mpuzamakungu ONU. Ngo hariho akarusho kanini ku bihugu no ku ngabo ziba zagiye kurangura ibikorwa vyo kugarukana amahoro n’umutekano ku rwego rwa ONU mu kumenyera gukorera hamwe n’abandi mudasangiye imigenzo, mu kwungurana ubumenyi, bigatuma igihugu kimenyekana neza mu makungu. Ngo ubushikiranganji bwo kwivuna abansi no kwitaho abahoze ku rugamba buboneyeho akaryo ko gushimira abasirikare b’abarundi ku butwari, ubukerebutsi n’ubuhizi berekana na ntaryo mu kurangura neza imirimo yabo hirya no hino bigatera iteka igihugu c’Uburundi mu makungu. Yaramenyesheje kandi ko ibikorwa vyo kugarukana amahoro n’umutekano ku rwego rw’Ishirahamwe Mpuzamakungu ONU , ngo ibihugu bishika 124 arivyo vyatanze abasirikare hamwe n’abaporisi gushika uno mwaka. Ngo ico gitigiri kikaba kigaragaza neza umwizero ishirahamwe mpuzamakungu ONU rishira mw’irangurwa ry’ivyo bikorwa.

Thérèse Niyonkuru

                                                                  

Normal 0 21 false false false FR X-NONE X-NONE MicrosoftInternetExplorer4

Ubushikiranganji bwo kwivuna abansi no kwitaho abahoze ku rugamba burashimira abasirikare b’abarundi ku bikorwa vyiza bakora mu kugarukana amahoro n’umutekano  ku rwego rw’Ishirahamwe Mpuzamakungu ONU haba  mu kwerekana ubutwari , ubukerebutsi  hamwe n’ubuhizi. Ivyo vyamenyeshejwe na Gaspard Baratuza umuvugizi w’ubushikiranganji kw’igenekerezo rya 31 Rusama 2017 mu kiganiro yahaye abamenyeshamakuru mu gihe bariko baribuka umunsi mukuru wagenewe abasirikare n’abakozi bose barangurira imirimo yabo mw’ Ishirahamwe ONU.

Gaspard Baratuza yamenyesheje ko Ishirahamwe mpuzamakungu ONU mw’ikoraniro ryayo ryo ku wa 11 Kigarama 2002 hafashwe ingingo inomero 57/129 ivuga ko ku wa  29 Rusama  uko umwaka utashe hazokwama haba umunsi mukuru wagenewe abasirikare n’abakozi barangurira imirimo yabo muri iryo shirahamwe. Ngo ihimbazwa ry’uwo munsi rifise intumbero yo kwibuka abakozi b’Ishirahamwe Mpuzamakungu ONU bitavye Imana bari mu bikorwa vyo kugarukana amahoro hirya no hino kw’isi.

Ngo ikindi naco ni ugukeza abakozi b’ishirahamwe mpuzamakungu ONU ku bikorwa vyiza babandanya barangura mu kwitanga bidasanzwe kugira amahoro n’umutekano bitsimbatare kw’isi yose. Yaravuze ko abarongoye ibisata vy’ishirahamwe ONU , ibihugu bigize iryo shirahamwe Uburundi burimwo, hamwe n’ayandi mashirahamwe ategamiye amareta, bibuka abitanze gushika n’aho basiga ubuzima bwabo mu bikorwa vyo kugarukana amahoro aho bikenewe hose. Ngo icivugo catowe mu mwaka w’2017 ni «Gutsimbataza amahoro n’umutekano kw’isi yose ». Yaravuze kandi ko iryo genekerezo rigamije kwibuka abo bose bitanga batiziganya mu bikorwa vyo kugarukana amahoro vy’Ishirahamwe Mpuzamakungu ONU. Ngo ni n’akaryo keza ko kwibuka abashika 3.500 basize ubuzima bwabo mu bikorwa vy’iteka bakorera iryo shirahamwe kuva mu mwaka w’i 1948. Yarongeye amenyesha ko mu mwaka uheze w’2016 hitavye Imana abashika 117 bari muri ico gikorwa. Ngo igihugu c’Uburundi kimaze kubura abasirikare 6 mu gihugu ca Centrafrika aho bari kwifatanya n’ayandi makungu mu gisata ca MINUSCA. Ngo ubushikiranganji bwo kwivuna abansi no kwitaho abahoze ku rugamba bukaba buhojeje imiryango yabuze.

Ubushikiranganji bwo kwivuna abansi ngo buributsa yuko igihugu c’Uburundi gifise izindi ngabo mu gikorwa co kugarukana amahoro n’umutekano mu gihugu ca Somariya ku bw’ishirahamwe ry’ibihugu vya Afrika « AMISOM », barenga ibihumbi bitanu kuva mu mwaka w’2007 hambavu y’ingabo zishika 850 Uburundi bwarungitse mu gihugu ca Centrafrika ku rwego rw’Ishirahamwe Mpuzamakungu ONU. Ngo hariho akarusho kanini ku bihugu no ku ngabo ziba zagiye kurangura ibikorwa vyo kugarukana amahoro n’umutekano ku rwego rwa ONU  mu kumenyera gukorera hamwe n’abandi mudasangiye imigenzo, mu kwungurana ubumenyi, bigatuma igihugu kimenyekana neza mu makungu.

Ngo ubushikiranganji bwo kwivuna abansi no kwitaho abahoze ku rugamba buboneyeho akaryo ko gushimira abasirikare b’abarundi ku butwari, ubukerebutsi n’ubuhizi berekana na ntaryo mu kurangura neza imirimo yabo hirya no hino bigatera iteka igihugu c’Uburundi mu makungu. Yaramenyesheje kandi ko ibikorwa vyo kugarukana amahoro n’umutekano ku rwego rw’Ishirahamwe Mpuzamakungu ONU , ngo ibihugu bishika 124 arivyo vyatanze abasirikare hamwe n’abaporisi gushika uno mwaka. Ngo ico gitigiri kikaba kigaragaza neza umwizero ishirahamwe mpuzamakungu ONU rishira mw’irangurwa ry’ivyo bikorwa.

                                                                    Thérèse Niyonkuru

 
Ouvrir