Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Mu Nama Nshingamateka : Integuro z’amategeko 16 nizo zitegekanijwe kuzokwigwa mu bikorwa bisanzwe vyo mu kwezi kwa Ruheshi

cvdfrKw’igenekerezo rya 5 Ruheshi 2017, niho haba ibirori vyo kwugurura icese ibikorwa vy’isasa risanzwe  ry’Inama Nshingamateka vyo mu kwezi kwa Ruheshi,  inyuma y’akaruhuko k’ukwezi kwa Rusama 2017 abashingamateka bahoramwo. Ivyo birori vyari birongowe n’umukuru w’Inama Nshingamateka, Pascal Nyabenda. Mw’ijambo ry’uwo munsi akaba yaramenyesheje ko integuro z’amategeko 16 zashikirijwe na Reta arizo zitegekanijwe kwigwa muri iki kiringo c’ukwezi kwa Ruheshi. Ivyo birori vyari vyatewe iteka n’abanyacubahiro batari bake, barimwo abagize Reta y’Uburundi, abaserukira ibihugu vyabo mu Burundi, abari mu nzego z’umutekano no kwivuna abansi, abari mu butungane hamwe n’abaserukira amashirahamwe yigenga. Pascal Nyabenda akaba yabandanije amenyesha ko Inama Nshingamateka yaranguye ibitari bike harimwo ukugendera abanyagihugu no kwifatanya nabo mu bikorwa vy’iterambere rusangi.Ku bijanye n’imigenderanire y’Inama Nshingamateka y’uburundi n’ibindi bihugu yamenyesheje ko abashingamateka bagize ingendo zitari nke bongera baritaba inama mpuzamakungu z’amashirahamwe  ahurikiyemwo Inama Nshingamateka z’ibihugu hirya no hino kw’isi .Muri uku kwezi kwa Ruheshi rero ngo Inama Nshingamateka itegekanya kuzokwiga integuro z’amategeko 16 zarungitswe na Reta.Muri ayo mategeko hakaba harimwo itegeko rigenga amabanki, integuro y’itegeko rigenga igitabu c’amatekeko mpanavyaha, itegeko rigenga amasezerano y’ibihugu vya Buraya n’ibihugu vya Afirika, Caraibe na Pacifike (A.C.P). Umukuru w’Inama Nshingamateka akaba yaboneyeho akaryo ko gusaba abagize Reta ko boja barabitaba mu gihe bikenewe ko basigurira abashingamateka ibijanye n’izo nteguro z’amategeko nk’uko bahora babikora.Muri iryo jambo kandi yarakeje Umukuru w’igihugu, Petero NKURUNZIZA aherutse gushiraho umurwi ujejwe guhinyanyura ivy’Ibwirizwa Nshingiro ry’Uburundi, aca asaba kandi abari muri uwo murwi ko bokwisunga ivyashikirijwe n’abanyagihugu.Pascal Nyabenda yarangije  amenyesha ko Inama Nshingamateka ishimira abakuru b’ibihugu vya Afirika y’Ubuseruko baherutse guhamagarira ibihugu vya Buraya ngo bitezurire Uburundi ku bihano vyabufatiye.

 Josélyne Ndayegamiye     

 

                                                                                                                                               

Ouvrir