Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Iminsi 16 yahariwe kurwanya amabi akorerwa abakenyezi n’abigeme niyo kurimbura ibimaze gukorwa mu kuyarwanya

 

BA01Uko umwaka utashe uburundi burifatanya n’amakungu mu gutunganya isekeza ry’iminsi 16 yahariwe  kurwanya amabi akorerwa abakenyezi n’abigeme ryama ritangura ku wa 25 Munyonyo rikarangira ku wa 10 Kigarama. Ni muri iyo ntumbero ikinyamakuru UBUMWE cegereye abantu batandukanye bishinze kurwanya amabi akorerwa abakenyezi kugira bamenyeshe aho umugambi wo kurwanya ayo mabi ugeze.Uko umwaka utashe uburundi burifatanya n’amakungu mu gutunganya isekeza ry’iminsi 16 yahariwe  kurwanya amabi akorerwa abakenyezi n’abigeme ryama ritangura ku wa 25 Munyonyo rikarangira ku wa 10 Kigarama. Ni muri iyo ntumbero ikinyamakuru UBUMWE cegereye abantu batandukanye bishinze kurwanya amabi akorerwa abakenyezi kugira bamenyeshe aho umugambi wo kurwanya ayo mabi ugeze.


Ibimaze gukorwa ni vyinshi naho intambwe ikiri ndende
Umushikiranganji w’agateka ka zina muntu, imibano n’iterambere ridakumira, Martin Nivyabandi yamenyesheje ko isekeza ry’iminsi 16 yahariwe amabi akorerwa abakenyezi n’abigeme ryatangujwe icese kw’igenekerezo rya 27 Munyonyo mu ntara ya Kirundo aho Reta ifadikanije n’amashirahamwe n’ imigwi yose y’abarundi  barimbuye ibimaze gukorwa, bongere barabira hamwe icokorwa kugira amabi akorerwa abakenyezi n’abigeme aranduranwe n’imizi.  Yabandanije asigura  igituma bavuga amabi akorerwa abakenyezi n’abigeme kandi hariho n’abagabo bayakorerwa, ko ari uko abigeme n’abakenyezi  aribo benshi bashikirwa n’ayo mabi ku bice birenga 80 %. Nivyabandi yamenyesheje ko ashima  ko Uburundi buhimbaje iyi minsi 16 hari hitegeko ryagenewe  guhana no guhasha ayo  mabi ajanye no guhohotera abakenyezi n’abigeme. Ngo ingingo y’Umukuru w’igihugu yahamagarira abajejwe intwaro ko bofasha ababana bose nk’umugore  n’umugabo bidaciye mu mategeko  bokwandikwa yarafashije kuko uko kubana bidaciye mu mategeko abagabo baravyitwaza mu guhohotera abakenyezi babana. Ubu ingo zo mu Burundi zishika 90% zirazwi n’amategeko. Ku bwa Nivyabandi, ngo hariho akarusho kubona hariko harashingwa ku bwinshi amashirahamwe y’abagabo arwanya amabi akorerwa abakenyezi n’abigeme. Ngo ivyo vyerekana yuko abagabo bariko barafata iya mbere mu kurwanya amabi akorerwa abakenyezi. Uwu mushikiranganji arashima ko hariko havuka ibigo vyo gukinga amabi akorerwa abakenyezi, hambavu y’ikigo  «  Humura » hamaze kuvuka ibindi bigo bitatu ic’i Makamba, i Muyinga no mu Cibitoke. Ikindi kiriko kirafasha ngo ni uko habaye inama nkarishabwenge nyinshi zatunganirijwe ibigo bijejwe ingo n’imiryango kugira bishobore gufasha abantu baje bavyitura bakorewe ayo amabi. Umushikiranganji Nivyabandi yamenyesheje ko naho ibimaze gukorwa atari bike, intambwe ndende cane kuko Uburundi buvuye  kure cane. Ngo ikiri ingorane ziracariho  aho usanga abajejwe umutekano bakingira ikibaba abantu batwaza inda abana b’abanyeshure. Ingingo nshasha ni uko umuntu azotwaza inda akihakana umwana atazokwihanganirwa, azohanwa bimwe bikomeye kuko bimaze kugaragara ko abanyeshure bashika 4000 bamaze gutwara inda, hatavuzwe abigeme batiga batwara inda z’indaro. Nivyabandi yahamagariye abigeme n’abakenyezi guca ubwenge bakamenya ko kurondera se w’umwana ari uburenganzira bwabo kuko ubu hariho ubuhinga bwo kwa muganga bukoreshwa  kugira ukuri kumenyekane ariko biciye mu butungane.

Amashirahamwe arashima kubona hari itegeko rijanye no kurwanya amabi akorerwa abakenyezi n’abigeme 
Icegera c’uwurongoye ihuriro ry’amashirahamwe y’abakenyezi aharanira amahoro (Réseau femme et paix), Pascasie Barampama yamenyesheje ko iyo minsi 16 yama iharirwa amabi akorerwa abakenyezi n’abigeme ari nk’inkabuzo ituma abo vyega bose barabira hamwe aho bagejeje kurwanya amabi akorerwa abakenyezi. Yabandanije amenyesha ko ari iminsi yo kwibuka abakenyezi benshi n’abigeme bashikirwa n’amabi afatiye ku gitsina. Ngo ni iminsi  amashirahamwe yirimbura akaraba ivyagenze neza mu bijanye n’ukurwanya amabi akorerwa abakenyezi n’abigeme, ivyagenze nabi bagaca biha umwanzuro y’ivyo bagiye gukora. Umupfasoni Barampama yamenyesheje ko mwihuriro ishirahamwe « Réseau femme et paix » bakorera mu makaritiye yo ku nkengera y’igisagara aho bafasha abakenyezi bahohotewe  mu kubajana kwa mu muganga no mu kubaronderera abababuranira. Yabandanije amenyesha ko bafasha abakenyezi kuvuga ivyabashikiye bigatuma baja mu bandi bagaserura ivyiyumviro hanyuma ntibaheze ngo baruhe mu mutwe. Barampama yamenyesheje ko bahimiriza abakenyezi kuja hamwe kugira barwanirize hamwe amabi akorerwa abakenyezi n’abigeme. Abo bakenyezi bagiye hamwe ngo iyo hagize uwuhohoterwa baramutabariza bakamujana kwa muganga iyo bikenewe bakanamufasha kwitura inyamiramabi. Iryo huriro ry’Ishirahamwe « Réseau femme et paix » ngo rirafasha abakenyezi bagiye hamwe kwiyungunganya kuko vyagiye biraboneka ko umukenyezi ataco azana mu muryango ariwe usanga ahohoterwa kurusha abandi. Ku bwa Barampama, ngo iyo umukenyezi yishoboye, adasega aba ari ikintu gikomeye.Umupfasoni Barampama arashima kubona hari itegeko rijanye no kurwanya amabi akorerwa abakenyezi n’abigeme kuko amashirahamwe arwanira agateka k’abakenyezi n’abigeme hamwe araterera ivyiyumviro vyagiye muri iryo tegeko rishasha. Barampama yizeye ko iryo tegeko rizozana akarusho mu bijanye no kurandurana n’imizi amabi akorerwa abakenyezi n’abigeme. 

Amabi akorerwa abakenyezi  n’abageme ateye isibe kwisi yose
Icegera c’uwurongoye ishirahamwe ry’abamenyeshamakuru b’abakenyezi AFJO, Yolande Nintunze yamenyesheje  ko iminsi 16 yahariwe kurwanya amabi akorerwa abakenyezi n’abigeme ari akaryo keza kugira abo bose biyemeje kurwanya amabi afatiye ku gitsina bakubite agatima mpembero barabire hamwe aho bateje ikivi, ni ukuvuga ivyagenze neza vyo gushigikira. Yabandanije amenyesha ko iyo minsi 16 yahariwe kurwanya amabi akorerwa abakenyezi n’abigeme ikenewe cane kuko ari akanya ko kwicara hamwe bakiyumvira ibikorwa vyoshirwa imbere y’ibindi kugira amabi akorerwa abakenyezi n’abigeme aranduranwe n’imizi. Ngo abarwanira agateka kazina muntu, abakenyezi n’abigeme badasigaye inyuma bararonka akaryo ko kwicarana bakarabira hamwe icokorwa kuko ntawokwirengangiza ko ayo mabi ateye isibe mu gihugu mbere no kw’isi yose. Ivyigwa vyakozwe n’ishirahamwe mpuzamakungu ryitaho iterambere ry’umukenyezi (ONU Femme) ngo vyerekana ko umukenyezi umwe kuri batatu kw’isi  akorerwa amabi  afatiye ku gitsina. Ngo hariho amabi akorerwa abakenyezi n’abigeme ugasanga barabirenzako uruho rw’amazi ababikoze  ntibahanwe. Naho biri uko, Nintunze yamenyesheje ko akarusho  kariko karaboneka  ku bijanye no kurwanya amabi akorerwa abakenyezi n’abigeme  kuko hari itegeko inomero 1/013 ryo ku wa 22 Nyakanga 2016 rijanye no gukinga, gukingira abahohotewe n’uguhasha amabi afatiye ku gitsina. Yabandanije atera   akamo abakenyezi ko bofatana mu nda bagashigikira ababa bahohotewe, umukenyezi wese ikibazo kijanye n’amabi akorerwa abakenyezi  n’abigeme akakigira rwiwe. Abagabo abasaba nabo nyene  gushigikira abakenyezi muri urwo rugamba  kuko ayo mabi akozwe umuryango urasambuka eka niterambere ry’igihugu rigasubira inyuma abahohotewe ngo botinyuka bakavuga ababahohoteye kugira bahanwe. Umupfasoni Nintunze yamanyesheje ko akengurukira Reta kubona  yarashizeho itegeko rijanye n’ukurwanya amabi akorerwa abakenyezi n’abigeme, akagirako ayisaba ko iryo tegeko ryokurikizwa  ukudahana amabi akorerwa abakenyezi bigasigara ari umugani mu gihugu.
Aline Kanyana

Ouvrir