Publications de Presse Burundaise, Rohero I Avenue de la JRR N°17 Immeuble le SAVONNIER, Téléphone standard : (257) 22 22 62 32, Fax :(257) 22 22 58 94, email: pressequotidienne@yahoo.fr

Intererano y’abagenzi b’Uburundi ngo irakenewe kugira bushobore gushika kw’iterambere rirama

rrrrrezzUbushikiranganji bw’imigenderanire n’ugufashanya n’ayandi makungu bwifadikanije n’ubushikiranganji bw’amagara y’abantu, ubw’uburimyi n’ubworozi, ubw’indero hamwe n’abasanzwe bafasha mu gutsimbataza amahoro n’umutekano mu Burundi, bwaratunganije kw’igenekerezo rya 12 Mukakaro 2017 inama mu ntumbero yo kwihweza aho Uburundi bugeze mu bijanye n’iterambere ry’ubutunzi n’imibano. Alain Aimé Nyamitwe, aramutswa ubushikiranganji bw’imigenderanire n’ugufashanya kw’Uburundi n’ayandi makungu, akaba yamenyesheje abitavye iyo nama ko yari ifise intumbero yo kwiga ibibazo vy’ubutunzi n’imibano na na rirya ivyo bisata bisa n’ivyibagiwe n’abari basanzwe bafasha Uburundi kuko bagumye bibanze mu gisata ca poritike kandi ico gisata carateye imbere kuko bitakiri agaseseshwarumuri amahoro n’umutekano vyatsimbataye.

Ngo ninaco gituma Uburundi bubicishije mu bushikiranganji bw’imigenderanire n’ugufashanya n’ayandi makungu hamwe n’ubushikiranganji bukorana nabwo, bwigiriye inama yo gutumirira abagumije umutima ku gihugu c’Uburundi kugira ico baterereye mw’iterambere no mu mibano ngo nakare nta mahoro abaho ata terambere kandi ngo nta n’iterambere rishoboka ata mahoro ariho . Umushikiranganji Alain Aimé Nyamitwe yabandanije amenyesha ko iyo nama yihaye ihangiro ryo kwereka neza abo bafasha Uburundi intambanyi ibisata vy’imibano n’iterambere mu Burundi bifise, nko mu gisata c’uburimyi n’ubworozi aho umwimbu utaboneka neza iyo bataronse umwavu w’ikizungu, ko bofasha kwigisha gutunganya ibigega babikamwo umwimbu bejeje kugira boye gusesagura umwimbu ngo bahave bicwa na kigoyi na cane cane iyo habaye ihindagurika ry’ibihe, kugazura imyonga hamwe n’ukwubaka ikigo rusangi c’ubushakashatsi.
Mu gisata c’amagara y’abantu bashaka ko bobafasha gushika kw’ihangiro igihugu cihaye mu kiringo kiva mu mwaka w’2016 gushika mu mwaka w’2025, ko borwanya marariya, bakirinda ikiza ruhonyanganda Sida, indwara y’igituntu n’uko ata mwana yopfa ariko aravuka hamwe no gushiraho uburyo bwo kurwanya indwara z’ivyaduka hamwe no guhangana n’irwirirana ry’abantu mu gushiraho ubuhinga bwo kugabanya imvyaro. Mu gisata c’indero ngo hokubakwa amashure afise ivyankenerwa mu bumenyi nko gushiraho inzu zo gusomeramwo ibitabu, ibibanza bagiriramwo imyimenyerezo y’ubushakashatsi, n’ikibanza co gukarihirizamwo ubwenge. Yaramenyeshe kandi ko bobafasha mu gisata co gukinga impanuka zitewe n’ihindagurika ry’ibihe hamwe no gutahukana impunzi.  Uwurongoye umurwi ujejwe gutsimbataza amahoro n’umutekano mu Burundi. Jurg Lauber mw’ijambo ryiwe yamenyesheje ko anezerejwe n’intabwe Uburundi bugezeko mu gutsimbataza amahoro n’umutekano akaba ari naco gituma bashaka gufasha mu bisata vy’iterambere n’imibano kugira ayo mahoro atsimbatare.  Jürg Lauber yaciye atumirira abari muri iyo nama guca hirya no hino ibibazo bihanze Uburundi mu bisata vy’iterambere n’imibano kugira babitorere umuti urama.
Thérèse Niyonkuru na
Anitha Bizimana
(uwimenyereza)

 

Mu ntara ya Ngozi Abafise imitima ikomeye mw’ijambo ry’Imana basabwa kwengenga abafise imitima idakomeye

nnnnhhh445Abamaze kugira imitima ikomeye mu bijanye no kwemera Imana basabwa kwengenga abo bose bagifise imitima idakomeye kugira nabo bazogire inkomezi, na kare ngo imbuto iteragiwe ni iyo imera. Iryo niryo jambo ry’ifatiro Umukuru w’igihugu, Petero NKURUNZIZA yishimije mu nyigisho yatanze mw’ishengero ry’urutare ry’i Buye riri ku mutumba Buye, muri komine Mwumba, intara ya Ngozi, ku wa 9 Mukakaro 2017, aho hari abo bari bahejeje kwakira baherutse ku batizwa.


Nk’uko Prezida NKURUNZIZA yabandanije abishikiriza yisunze ijambo ry’Imana ryari rihejeje gusomwa mu cete ca mbere Paulo yandikiye ab’ikorinto, igice c’8 umurongo w’7, atera akamo abamaze kugira inkomezi kwengenga abagifise imitima itarakomera, gutyo nabo bazogire inkomezi. Ivyo akaba yabisavye abakozi b’Imana ko bobera akarorero abo bajejwe, na cane cane bagakomeza imigenderanire hagati y’abafise imitima ikomeye n’abafise imitima itarakomera. Aho akaba yavuga abo baherutse kubatizwa ko baronse inkomezi nshasha. Ku bakozi b’Imana, ngo bakwiye kumenya ko izo nkomezi baronse ku buntu nabo boza barazisangira n’abo bagifise imitima itarakomera, gutyo habe uruhererekane rw’inkomezi. Vyongeye, ngo umuntu akiremwa, inkomezi ziba zitanguye, na kare ngo muri Bibiriya handitse ngo utaranavuka, nari ndakuzi. Eka ngo kumenywa n’Imana, ngo nizo nkomezi za mbere mu buzima bw’umuntu. Bisubiye, ngo uvutse Imana iraheza ikakurobanura, abavuka bose ngo ntibaronka amahirwe yo kubaho. Imana ikurobanuye, ngo iba iguhaye izindi nkomezi, ku rya kw’imbuto irobanuye, ngo iyo mbuto iba ifise izindi nkomezi. Muri Bibiriya kandi haranditse ko nitwitwararika ivy’ubwami bw’Imana, ibindi ngo bizoba inyongera. Eka ngo ntidufise ubukomezi bumwe mu bijanye no kwakira ubwami bw’Imana, ndetse dukwiye kugendera mu vyagezwe. Ku barongoye ishengero ry’urutare ry’i Buye arashima ingendo yo kurerera urwaruka mw’ijambo ry’Imana, ivyo ngo bizotuma bagira inkomezi, na kare ngo urugendo rwacu ni urw’Imana. Nk’uko vyanditswe, ngo dukundishe umutima wacu Imana, twongere dukunde n’abagenzi bacu nk’uko twikunda twebwe nyene, ngo tuzoca tuba abanyenkomezi. Vyongeye, ngo ukwubaha Imana niryo tanguriro ry’ubwenge. Uwubaha Imana, ngo aca aba umunyenkomezi.
Muri abo bubaha Imana, Prezida NKURUNZIZA yaragarutse ku bantu bubaha Imana banditse muri Bibiriya, aho yavuze Eliya, uwo nawe ngo yari afise inkomezi yahawe n’Imana zo kugwisha imvura. Muri abo bari bafise inkomezi, yaragarutse kuri Yozafati, uwo nawe ngo yarwanywa n’amahanga aho yasavye abo yari arongoye kwisonzesha n’ibikoko vyose mu ntumbero yo kwiyegereza Imana, ngo niho yamubwira ko indwano ariko ararwana atari iyiwe ahubwo ari iy’Imana ubwayo. Daniyeri yatawe mu rwobo rw’intambwe ariko kubera inkomezi z’Imana ngo ntaco zamugize. Aho umwami yahama Daniyeri yaciye atanga itegeko ko abo atwara bose bosenga Imana ya Daniyeri kubera inkomezi yahawe n’Imana zari zihejeje kwigaragaza. Umukuru w’igihugu yasozereye inyigisho ziwe asaba abari ngaho ku bafise imitima ikomeye kwirinda gutsitaza abandi bongere babere amaso inkomezi Imana yabahaye. Nk’abaronse inkomezi z’imitima yabo, basabwa gukangura abafise imitima ihuha, gutyo nabo bakire agakiza. Uwufise umutima ukomeye, ngo akiza abandi urupfu, bakuzuza ivyizigiro abadafise inkomezi, aho ngo uba ubavyaye gushasha mu kwizera no kwubaha Imana. Abo bose bataye ivyizigiro, ngo nibo bafise imitima ihuha, na kare ngo ukwizera Imana bituma utazimira.
Déo Misigaro

 

 

Ukurwanya igiturire n’urudandazwa rudaciye mu mategeko bituma ikigega ca Reta kibomboka

cccddddzzKurwanya igiturire n’urudandazwa rudaciye mu mategeko ngo ni kimwe mu vyotuma ikigega c’igihugu kibomboka.Ivyo vyashikirijwe n’ umukuru w’Inama Nkenguzamateka,Révérien Ndikuriyo mu nama yo guhanahana ivyiyumviro yari yatunganirijwe inzego zitandukanye zo mu gisagara ca Bujumbura ku wa 5 Mukakaro 2017. Iyo nama ikaba yari yitabwe n’abarongoye abandi kuva ku nzego zo hejuru gushika ku nzego zo hasi ,abarongoye abandi mu bijanye n’ubutungane na bamwe mu barongoye abandi mu mashirahamwe atandukanye. Umukuru w’Inama Nkenguzamateka akaba asaba umurundi wese aho ari ko yoshigikira umugambi wo gutuza igiturire n’urudandazwa rwa magendo .Yamenyesheje ko mu gihe umwe wese yoshiramwo inguvu mu kurwanya igiturire no mu gutuza urudandazwa ku bisohoka canke vyinjira bidaciye mu mategeko,

ngo Uburundi bwoshobora kwitunganya butazeye inze ku babufasha. Révérien Ndikuriyo yamenyesheje ko igiturire kicibonekeza mu Burundi na cane cane mu gisagara ca Bujumbura aho adoma urutoke abaporisi bamwe bamwe ndetse n’akubiyitirira inzego z’umutekano aho naho agasaba ko vyohagarara.Yamenyesheje kandi abari aho ko mu gihe Uburundi bumaze gutsinda intambara za politike zitari nke mu makungu ,ngo ko hakiri ababandanya babucafuza mu kugurisha amatungo y’abantu bahunze mu 2015.Ngo hari aho usanga ari beneyo batanga uburenganzira bwo kuyagurisha canke ugasanga ni bamwe mubo mu muryango ariko ngo bigahindukira bikagirizwa Uburundi mu makungu ko aribwo buriko buradandaza amatungo yabo.

Aho rero umukuru w’Inama Nkenguzamateka asaba ashimitse abajejwe intwaro mu gisagara ca Bujumbura ko boba maso bakabirwanya na cane cane mu makaritiye barongoye.  Bamwe mu bari aho barashikirije ivyiyumviro bitandukanye baranavuga ingorane babona muri iki gihe mu makaritiye barongoye mugabo hariho ivyatorewe inyishu aho nyene n’ibindi bitatorewe inyishu ariko umukuru w’Inama Nkenguzamateka akaba yarabahumurije mu kubamenyesha ko urwo rwego rugiye gushiraho umurwi wihuta uzoba ujejwe kwiga ivyo bibazo bishaka gusubiza inyuma intambwe Uburundi bugezeko mu bijanye n’amahoro n’umutekano.  DSC0714 Umukuru w’Inama Nkenguzamateka Réverien Ndikuriyo arongeye inama yo coguhanahana ivyiyumviro mu kurwanya igiturire n’urudandaza rudaciye mu mategeko.
Nshimirimana Gloriose

 

Integuro y’umugambi wo guteza imbere ishirahamwe CEEAC wo kuva mu 2016 gushika mu 2020 yaremejwe n’abahinga

gbsdddInama yatunganirijwe abahinga n’abashikiranganji bo mw’ishirahamwe ry’ubutunzi ry’ibihugu vya Afrika yo hagati n’Uburundi burimwo,CEEAC ,yabereye i Bujumbura kuva ku wa 10 gushika ku wa 13 Mukakaro 2017, yaremeje integuro y’umugambi wo guteza imbere iryo shirahamwe CEEAC wo kuva mu 2016 gushika mwaka w’2020. Twobamenyesha ko abahinga b’ivyo bihugu bakoranye ku magenekerezo ya 10 na 11 Mukakaro, hanyuma abashikiranaganji bajejwe ibigega,ubutunzi n’itunganywa ry’imigambi bakorana ku wa 13 Mukakaro 2017. Mw’ijambo ryashikirijwe n’icegera c’umunyamabanga mukuru w’iryo ishirahawe CEEAC ,Tabu Abdallah Manirakiza, yamenyesheje abayitavye ko iyo nteguro yemejwe ari iy’umugambi uzomara imyaka 5, uzofasha mu bijanye n’imigenderanire n’ugufashanya hagati y’ivyo  ihugu. Yamenyesheje ko uwo mugambi washizweho kugira bategure iterambere ry’iryo shirahamwe rishobore kurangwamwo amahoro, iterambere ,umwumvikano, poritike n’ubutunzi bitere imbere, abantu baba mu bihugu bihurikiye muri iryo shirahamwe bishire bizane ata nkomanzi.Yabandanije asaba abitavye iyo nama ko ihangiro bihaye ryo gushika mu mwaka w’2025 naryo nyene borishikako ata na kimwe kivuyemwo, uwo mugambi ukababera nk’urupapuro rw’inzira y’ubutunzi n’umubano mwiza w’iryo shirahamwe.
Mu nama y’abashikiranganji yakoranye kw’igenekerezo rya 13 Mukakaro 2017, umushikiranganji w’ikigega ca Reta mu Burundi, Domitien Ndihokubwayo yari ayirongoye yamenyesheje ko bagarutse ku bijanye n’ uwo mugambi wateguwe ukemezwa n’abahinga werekana ibizokorwa muri iyo myaka 10. Uwo mugambi rero ngo urimwo intumbero n’ishusho ibihugu vyihaye . Ariko naho biri uko ngo si umugambi woroshe uca uja mu ngiro ubwo nyene ngo bazogenda buke buke intambwe ku yindi. Yavuze ko mu bihugu bigize iryo shirahamwe ry’ubutunzi rya Afrika yo hagati (CEEAC) bifise ibibazo bitandukanye muri poritike, ubutunzi, umuyagankuba, irwirirana ry’abantu n’ibindi. Ngo basanze uguhanahana ibidandazwa muri ako karere bikorwa mu buryo budatunganijwe neza. Hagati aho ngo bazihatira gutsimbataza amahoro n’ umutekano, kurwiza umwimbu no guhanahana ibidandazwa. Yarangije amenyesha ko ata kitazokorwa mu bijanye n’uburyo kugirango uwo mugambi uzoje mu ngiro kuko umugambi iyo utomoye uburyo buca buboneka kandi noneho ngo ivyo bihugu bigize umuryango umwe bizofashanya muri vyose.Aca aboneraho akaryo ko gushimira ibanki ya Afrika ijejwe iterambere ( BAD) iguma ibashigikira mu bikorwa barimwo.
Josélyne Ndayegamiye

 

 

Mu ntara ya Gitega Prezida NKURUNZIZA yaruguruye ibigo bizotanga inyigisho z’imyuga mu ntara ya Gitega

JürgUmukuru w’igihugu, Petero NKURUNZIZA mu rugendo yagize mu ntara ya Gitega, ku wa 13 Mukakaro 2017, yaruguruye icese inyubako zitandukanye zarangiye kwubakwa mu makomine ya Itaba na Makebuko, mu ntara ya Gitega. Muri komine Itaba hubatswe ikigo c’inyigisho z’imyuga kigizwe n’amasomero icenda, amasomero abiri azoba inganda, ibiro bizokorerwamwo n’umurongozi w’ico kigo n’utuzu twa sugumwe. Nk’uko umuhanuzi ajejwe intwaro n’iterambere muri komine Makebuko, Cléophace Kungeko yabishikirije abamenyeshamakuru ngo uburyo bakoresheje kugira ngo bubake ico kigo no kukironderera ibikoresho bwatanzwe n’ikigega kijejwe gusahiriza mw’iterambere ry’amakomine FONIC, ayo nayo akaba ari imiriyoni amajana atanu Reta yahaye ikomine yose kugira ngo yiteze imbere.

Muri komine Makebuko, ku musozi Rwezamenyo ahasanzwe hari ishure ry’ubuhinga baciye bahubaka ikigo cigisha imyuga kugira ngo ubumenyi bw’ubuhinga butangirwe aho nyene ku bana bahiga bose. Aho naho hubatswe amasomero atandatu n’inganda zo kwimenyererezamwo ivy’imyuga. Nk’uko musitanteri wa komine Makebuko, Niyitereka Cyprien yabishikirije ngo izo nyubakwa n’ibikoresho vyatwaye amafaranga angana n’imiriyoni amajana ane na mirongo itandatu.Ngo ico bagiye gukora ni ukuzokwicarana bagafata ingingo y’ubuhinga buzokwigwa muri ico kigo bivanye n’ico abari muri ako karere bakeneye kurusha ibindi. Mwomenya ko imbere y’ico gikorwa Umukuru w’igihugu, Petero NKURUNZIZA yari yabanje gushikiriza agakemanyi kagizwe n’itoni zitanu z’umuceri ku miryango y’abanyagihugu ishika amajana atanu muri komine Bugendana. Nk’uko intumwa y’Umukuru w’igihugu muri ico gikorwa mbere akaba n’umuhanuzi mu biro vy’Umukuru w’igihugu, Ndibadibe Nicaise yabishikirije mw’ijambo, ngo Umukuru w’igihugu yipfuje gushigikira imiryango yo muri zone Mugera iri muri komine Bugendana ifise ingorane kurusha iyindi kugira ngo ayitere intege ishishikare kwiteza imbere mu kurima no mu kworora ata nzara bafise mu nda. Yabasavye rero kuguma ku kivi kugira ngo barwanye inzara n’ubukene.

Amakungu ngo arashigikiye ibiganiro vya poritike hagati y’abarundi

Uwurongoye umurwi w’Ishirahamwe Mpuzamakungu (ONU) ujejwe gukurikiranira hafi umugambi w’amahoro mu Burundi, Jürg Lauber amenyesha ko ashima intambwe Reta y’Uburundi igezeko mu guteza imbere ibisata vy’amagara y’abantu, indero n’ibindi. Mbere akizeza abarundi ko amakungu ashigikiye itsimbatazwa ry’amahoro mu Burundi. Ivyo yabishikirije ku wa 13 Mukakaro 2017 ku kirimba c’Umukuru w’igihugu c’i Gitega, inyuma y’umubonano yari ahejeje guhabwa n’Umukuru w’igihugu, Petero NKURUNZIZA yari asanzwe ari mu rugendo muri iyo ntara ya Gitega.  Mu kiganiro Ambasaderi Jürg Lauber yahaye abamenyeshamakuru , yamenyesheje ko bashoboye kuganira ku bijanye n’ibiganiro vya politike hagati y’abarundi haba mu gihugu canke hanze y’igihugu. Ngo ivyo biganiro amakungu arabishigikiye cane.Ngo barashoboye kuganira n’ingene ibisata vy’ubutunzi n’imibano vyifashe mu gihugu. Ivyo mbere ngo vyanatumye hatunganywa inama yahuje abarongoye ubuserukizi bw’ibihugu n’amashirahamwe vyo hanze mu Burundi. Ngo kwari ukurabira hamwe ingene ubutunzi n’imibano vyifashe mu gihugu n’icokorwa. Aha rero ngo amakungu arashigikiye cane utwigoro twose Reta ikora mu kuzamura ubutunzi no gutsimbataza igisata c’imibano.Hagati aho ambasaderi Jürg Lauber ngo yaribukije ko hari ibigikenewe gushirwamwo inguvu kurusha nko guteza imbere imiganderanire myiza n’amakungu kuko ngo incuti z’Uburundi ari vyo bihugu n’amashirahamwe mpuzamakungu bifasha Uburundi bifise ku mutima imigenderanire myiza yotuma haba akarusho ku mpande zose mu bijanye n’ugufashanya.
Nathan Ntahondi

 

Abakenguzamateka basaba umushikiranganji w’indero ko yosubiriramwo ikibazo ca Reta abanyeshure batagikoze

DS21Umushikiranganji ajejwe indero, Janvière Ndirahisha yaragiye ku wa 13 Mukakaro mu Nama Nkenguzamateka kugira asigure igituma hari abanyeshure bo myaka y’9 na 10 batari bamenye mu mwaka uheze batemerewe gukora ikibazo ubugira 2 kibaha uburenganzira bwo kubandanya igice ca 2 c’amashure yisumbuye. Abakenguzamateka barasavye umushikiranganji ko yogerageza agasubiriramwo ikibazo abo banyeshure nk’uko ubushikiranganji bw’indero bwari bwemeye ko umunyeshure yamenye mw’ishure mugabo akananirwa n’ikibazo kimuha uburenganzira bwo kubandanya igice ca 2 c’amashure yisumbuye azoguma yiyigishiriza i muhira mugabo hageze akaja gukora ico kibazo hamwe n’abandi. Ndirahisha yamenyesheje ko kubona hari abanyeshure bankiwe gukora ikibazo vyavuye kuri vyinshi, ngo hari abanyeshure bagiye kwiyandikisha aho batari bize hari n’abagiye gukora ikibazo kandi batari bamenye mw’ishure.

Yabandanije ahumuriza abakenguzamateka ko agiye kwiga icatumye abo banyeshure badakora ikibazo hanyuma arabe icokorwa. Umushikiranganji yamenyesheje ko agiye gushiraho itegeko rituma abanyeshure biga ingunga 2 n’iribuza abanyeshure guhindura imishatsi, inzara no kwambara amahereni. Ngo kubona impamyabushozi za Reta z’umwaka wa 2016 ushira umwaka w’ 2017 zitaraboneka, Ndirahisha yamenyesheje ko inzira bacishamwo amasoko zitarahera ari naco gituma abanyeshure babahaye amaseretifika. Abakenguzamateka barashimye ingingo yafashwe n’umushikiranganji w’indero yo kuzoboza umuyobozi ishure ryiwe ritazoba ryaronse 30% kubera bituma umuntu aguma ku mirimo hanyuma akitunganya neza mu vyakora. Umukuru w’Inama Nkinguzamateka, Révérien Ndikuriyo yarasavye umushikiranganji w’indero ko yasaba amakomine intererano yo gushiraho ibibanza vyo kwimenyerezamwo ivy’ubushakashatsi kugira abana b’Uburundi baronke ubumenyi bukwiye.
Aline Kanyana

 

 

Page 1 sur 41

Ouvrir